انار بۇلت \ شينجياڭ گازەتىنىڭ ٴتىلشىسى لي لين
بيىل جازدا جاسى 60تان اسقان حىبەيلىق 10 قارت مامان 3000 كيلومەتر جول باسىپ تيانشان تاۋىنىڭ وڭتۇستىك باۋرايىنا كەلىپ، بايىنعولين موڭعۇل اۆتونوميالى وبلىسىندا 30 كۇندىك حىبەي ـ شينجياڭ ”قارت ماماندار ارەكەتى“ ەرىكتى قىزمەت وتەۋىن ورىستەتتى.
بۇل — 2025 ـ جىلعى تۇڭعىش رەتكى ارەكەتتەن كەيىنگى تاعى ٴبىر رەتكى ساپار بولۋمەن بىرگە، ونان دا ماڭىزدىسى، ەكى ولكە، اۆتونوميالى رايوننىڭ باعىتتامالى ىستەستىكتى تەرەڭدەتىپ، جان سانىنىڭ قارتتانۋىنا بەلسەنە توتەپ بەرۋ سىندى مەملەكەت ستراتەگياسىن تياناقتاندىرۋىنىڭ ناقتى شاراسى ەدى. تەتە اعا دارەجەلى جانە ودان جوعارى اتاققا يە 10 بىلىكتى مامان بايىنعولين وبلىستىق ورمان شارۋاشىلىعى جانە جايلىم مەكەمەسى، ساۋدا ىستەرى مەكەمەسى، موڭعۇل شيپاگەرلىگى شيپاحاناسى، رۋحاني سالاماتتىق ورتالىعى سياقتى 4 ورىنعا جەكە ـ جەكە بارىپ اقىل ـ پاراساتى مەن تاجىريبەلەرىن تيانشان تاۋىنىڭ باۋرايىنا ”جەتكىزدى“.
7 ـ ايدىڭ 14 ـ كۇنى 2026 ـ جىلعى حىبەي - شينجياڭ ”قارت ماماندار ارەكەتى“ ەرىكتى قىزمەت وتەۋ اترەتىنىڭ 10 ەرىكتىسى كورلا قالاسىنا جەتىپ توپتىق سۋرەتكە ٴتۇستى. سۋرەتتى زو يۇييۋان تۇسىرگەن
7 ـ ايدىڭ 14 ـ كۇنى 2026 ـ جىلعى حىبەي - شينجياڭ ”قارت ماماندار ارەكەتى“ ەرىكتى قىزمەت وتەۋ اترەتى شينجياڭعا كەلىپ، سول كۇنى ٴبىرىنشى شەپكە دەيىن بارىپ ارالاپ، بۇقارا ەڭ قاجەت ەتكەن جەرلەرگە دەيىن بارىپ كومەكتەسۋ ـ سۇيەمەلدەۋ جۇمىستارىن ورىستەتتى.
كورلا قالاسىنداعى ٴبىر المۇرت باعىندا 65 جاستاعى جاڭ يۇيشيڭ جاپىراقتارعا زەر سالا قاراپ، المۇرتتى قولىنا الىپ تاپتەشتەي كوز جۇگىرتتى.
حىبەي اۋىل شارۋاشىلىعى داشۋەسىنىڭ پروفەسسورى، دوكتورانت جەتەكشىسى، جۇڭگو باۋ ـ باقشا شارۋاشىلىعى قوعامى المۇرت كاسىپ سالاسى بولىمشەسىنىڭ باسالقاسى، حىبەي ولكەسى المۇرت كاسىپ سالاسى تەحنولوگيا جۇيەسىنىڭ باس مامانى رەتىندە، بايىنعولين وبلىستىق ورمان شارۋاشىلىعى جانە جايلىم مەكەمەسىنە كەلگەننەن بەرى، جاڭ يۇيشيڭ شىلىڭگىر ىستىققا قاراماي، ٴبىر اي ىشىندە 30 المۇرت باعىن ارالاپ جاعداي ۇعىستى. جەرگىلىكتى ورىنداعى جەمىس باعىنىڭ سۋ مەن تىڭايتقىشتان پايدالانۋ ونىمدىلىگى تومەن بولۋ، جەمىس ساپاسى تۇراقسىز بولۋ سياقتى كورنەكتى ماسەلەلەرىنە مەڭزەس، ول تامشىلاتىپ سۋارۋ مەن جەر بەتىن جاۋىپ سۋ ۇنەمدەۋ تەحنولوگياسىن زور كۇشپەن جالپىلاستىردى ٴارى توتەسىنەن: ”بۇل ادىسپەن سۋدى %60 ۇنەمدەپ قالۋعا بولادى“، ـ دەدى. ول تاعى 3 رەت ەگىنشىلىك تەحنولوگياسى كۋرسىن اشىپ، المۇرت ەگەتىن ديقاندارعا تىكە جەتەكشىلىك ەتتى.
”حىبەيدەن كەلگەن ساقا ماماندار كۇننىڭ ىستىعىنا، جولدىڭ الىستىعىنا قاراماي اتىز باسىنا ارنايى كەلىپ بىزگە تەحنولوگيا ۇيرەتتى، كوپشىلىك ەرەكشە اسەرلەندى“، ـ دەدى ٴبىر المۇرت ەگەتىن ديقان.
سۇي لينحۋا، جاڭ يىڭچي، ليۋ ايشياڭ، جاڭ گايرۋ قاتارلى 4 بىلىكتى ەمدەۋ مامانى بايىنعولين وبلىستىق موڭعۇل شيپاگەرلىگى شيپاحاناسىنا كەلىپ ٴارقايسى بولىمدەردە تۇرىپ جەتەكشىلىك ەتتى.
سۇي لينحۋا حىبەي ولكەلىك حالىق شيپاحاناسى ينەمەن ەمدەۋ ٴبولىمىنىڭ اعا شيپاگەرى، پروفەسسور، ول ٴوزى تاپقىرلاعان ”ينە شانشىپ ارەكەتتەندىرىپ ەمدەۋ ٴادىسىن“ كلينيكاعا ەنگىزىپ، شيپاحانانىڭ ساۋىقتىرۋ بولىمىنە ماڭدايشالىق اسىپ، ينە شانشىپ ارەكەتتەندىرىپ ەمدەۋ اۋماعىن قۇردى.
”باس بولىمىندەگى سايكەستى ۇياشىقتارعا ينە شانشيمىز، ودان ناۋقاس ىرىقتىلىقپەن ارەكەت جاساۋعا سايكەسكەندە، دەنە مۇشەلەرى قىزمەتىنىڭ قالپىنا كەلۋ ونىمدىلىگىن زور دارەجەدە ارتتىرۋعا بولادى“. ينەمەن ەمدەۋ ارەدىگىندە سۇي لينحۋا ەمدەۋ ٴادىسى قاعيداسىن ەگجەي ـ تەگجەيلى ٴتۇسىندىردى. ٴبولىمنىڭ مەڭگەرۋشىسى ەردىنبىلىك ۇجىمدى باستاپ جالپى بارىستى قاداعالاي كوردى، مۇقيات ەستەلىككە الدى، ٴاربىر بۋىندى قالت جىبەرمەدى.
”بۇل تەحنولوگيانى مەڭگەرۋدىڭ تالابى تومەن، ونىمدىلىگى تەز، نەگىزگى ساتىدا جالپىلاستىرۋعا توتەنشە ۇيلەسەدى“. ەردىنبىلىك ٴبولىم وسى تەحنولوگيانى جالپىلاستىرعاننان كەيىن كوپتەگەن ناۋقاسقا شيپالىعى كورنەكتى بولعاندىعىن ايتتى.
وسى رەتكى حىبەي - شينجياڭ ”قارت ماماندار ارەكەتىنىڭ“ باس جەتەكشىسى رەتىندە، حىبەي مەديتسينا داشۋەسى 3 ـ شيپاحاناسى شۇعىل ەمدەۋ ٴبولىمىنىڭ مەڭگەرۋشىسى جاڭ يىڭچي ماڭىزدى ٴتۇيىندى شۇعىل قۇتقارۋ قابىلەتىن جوعارىلاتۋعا قويدى. حالىقاراداعى ەڭ جاڭا باعدارناماعا تۋرالانىپ، بارلىق قىزمەتكەرلەردى ۇدايىلانعان شۇعىل قۇتقارۋعا تاربيەلەۋدى ىلگەرىلەتىپ، جاس تىرەكتىلەردى ٴتۇيىندى جەتىلدىردى. ونىڭ جەتەكشىلىگىندە، جەرگىلىكتى جاس ەمدەۋ قىزمەتكەرلەرىنىڭ نەگىزدىك شۇعىل قۇتقارۋ، ٴبىر جاقتى ەتۋ قابىلەتى كورنەكتى جوعارىلادى.
شيڭتاي قالالىق حالىق شيپاحاناسىنىڭ اعا شيپاگەرى ليۋ ايشياڭ، حىبەي ولكەسىنىڭ 1 ـ رۇڭجۇن قامقورلىق جاساۋ شيپاحاناسىنىڭ اعا شيپاگەرى جاڭ گايرۋ ۇدايىلانعان ساباق ٴوتۋ، اۋرۋحانادا وقىتۋ جانە اۋرۋ تاريحىن جازۋدى ارناعا ٴتۇسىرۋ ارقىلى قاتاڭ شيپاگەرلىك ۇستانىمىن كۇندەلىكتى تۇرمىسقا ٴسىڭىردى. ”ماماندار ’بالىقتى دا بەرىپ‘، ونان دا ماڭىزدىسى، ’بالىق اۋلاۋدى دا ۇيرەتتى‘، ولاردان كوپتەگەن تەحنولوگيانى ۇيرەندىك“، ـ دەدى بايىنعولين وبلىستىق قارتتاردى كۇتىمدەۋ قىزمەت وتەۋگە جەتەكشىلىك ەتۋ ورتالىعىنىڭ مەڭگەرۋشىسى فىڭ جۋان.
حىبەي شىفان داشۋەسى پسيحولوگيا فاكۋلتەتىنىڭ زەينەتكە شىققان دوتسەنتى مۋ شين ـ يدىڭ حىبەي - شينجياڭ ”قارت ماماندار ارەكەتىنە“ 2 ـ رەت قاتىناسۋى، ول چىڭدى قالالىق پسيحولوگيا عىلمي قوعامىنىڭ باستىعى حۇڭ چاليمەن بىرگە بايىنعولين وبلىستىق رۋحاني سالاماتتىق ورتالىعىنا كەلدى. 7 ـ ايدىڭ 14 ـ كۇنى بايىنعولين وبلىسىنا جەتىسىمەن ولار دەرەۋ جۇمىسقا كىرىسىپ، كاسىپتىك ۇجىمداردىڭ ىشكى جاتتىعۋى، جاس وسپىرىمدەردىڭ پسيحيكالىق اقاۋسىزدىعىنا قىزمەت وتەۋ سياقتى 5 ۇلكەن وزەكتى قىزمەت بەتالىسىن سارالاپ شىقتى ٴارى ٴبىر ـ بىردەن ىلگەرىلەتتى.
پسيحولوگيالىق جاقتان جەتەكشىلىك ەتۋ قيمىلىن ورىستەتكەندە مۋ شين ـ ي ٴبىر كىشكەنتاي قىز بالانىڭ ۇنەمى بۇرىشتا تىعىلىپ وتىراتىنىن بايقايدى، ويىن ويناپ ىقپالداستىق جاساۋ جانە بەلسەنە جەتەكتەۋ ارقىلى كىشكەنتاي قىز بالا بىرتە ـ بىرتە اشىق ـ جارقىن بولا باستاپ، وقىتۋشىسىمەن ىرىقتى اڭگىمەلەسەتىن بولدى. ”بالانىڭ وزىنە سەنىمدى بولا باستاعانىن كورگەندە، بۇل جولعى ساپارىمىزدىڭ ەرەكشە قۇندى ەكەنىن سەزىندىك“، ـ دەدى مۋ شين ـ ي.
ٴبىر ايعا جالعاسقان قىزمەت وتەۋ اياقتالعانىمەن، كومەكتەسۋ ـ سۇيەمەلدەۋ توقتاپ كورگەن جوق. ٴىرى ەگىنشىلىك وتباسىلارى مامانداردىڭ ۋيشينىن الىپ قالىپ، جوعارى ولشەمدى ۇلگى كورسەتۋ باقشاسىن قۇراتىن كەزدە ولاردان كاسىپتىك جەتەكشىلىك العىسى كەلدى؛ نەگىزگى ساتىداعى ەمدەۋ قىزمەتكەرلەرى ينتەرنەتتەن وقۋ ماتەريالدارىن ساتىپ الىپ، جاڭا تەحنولوگيالاردى ۇڭىلە زەرتتەپ، قاجىرلى ەڭبەكتەرىمەن مامانداردىڭ بارىن سالىپ ۇيرەتكەندەرىنە جاۋاپ قايتاردى... قايتاردا ماماندار: ۋيشىنىمىز ۇزىلمەيدى، جەتەكشىلىك ەتۋىمىز توقتامايدى، ـ دەپ ۋادە بەردى.
ساناققا قاراعاندا، وسى رەتكى حىبەي ـ شينجياڭ ”قارت ماماندار ارەكەتىنە“ قاتىناسقان 10 مامان جيىنى 189 رەت ارناۋلى تاربيەلەپ، ٴبىر ۇستاز، ٴبىر شاكىرت بويىنشا 233 ادامعا (رەت) كومەكتەسىپ، جەتەكتەپ، الەۋمەتتىك اۋماق، اۋىل ـ قالاشىق ٴبىرىنشى شەبىنە بارىپ 1227 بۇقاراعا (رەت) قىزمەت وتەپ، كاسىپتى ارناعا ٴتۇسىرىپ دامىتۋ جونىندە 120 ۇسىنىستى رەتتەپ، ۇزاق ۋاقىت تياناقتاندىرۋعا بولاتىن كوپتەگەن ناقتى جوبا قالدىردى.
8 - ايدىڭ 7 - كۇنى حىبەي - شينجياڭ ”قارت ماماندار ارەكەتى“ ەرىكتى قىزمەت وتەۋ اترەتىنىڭ ەرىكتىسى سۇي لينحۋا (وڭنان 2 -) سالاماتتى دەنە سالماعىن باسقارۋ امبۋلاتورياسىنا ماڭدايشالىق استى. سۋرەتتى تيانشان تورى − شينجياڭ گازەتىنىڭ ٴتىلشىسى لي لين تۇسىرگەن
