عىلىم - تەحنولوگيانىڭ قۋات ۇستەۋىندە فۋكاڭ جالپاق شاپتولىنىڭ باعاسى ءوستى
□ انار بۇلت \ شينجياڭ گازەتىنىڭ ءتىلشىسى چىن جياڭلين، ەرىكتى ءتىلشى ۋاڭ جيالەي
8 - ايدىڭ باس شەنىندە فۋكاڭ قالاسىنداعى 2400 مۋ جەردەگى جالپاق شاپتولدان مول ءونىم الىندى. جۇڭگو اۋىل شارۋاشىلىعى عىلىم اكادەمياسى باتىس بولىك اۋىل شارۋاشىلىعىن زەرتتەۋ ورتالىعىنىڭ عىلىم - تەحنولوگيا جاعىندا ءۇرتىس دالمە - ءدال كومەكتەسۋ - سۇيەمەلدەۋىنىڭ ارقاسىندا، فۋكاڭ جالپاق شاپتول كاسىپ سالاسى ۇتىمسىز ەگىنشىلىككە، تابيعاتقا سۇيەنىپ ءونىم الاتىن ءداستۇرلى ۇلگىگە قوش ايتىپ، ءونىمدى ورنىقتىرىپ ساپانى جوعارىلاتۋدىڭ، ونىمدىلىكتى ارتتىرىپ حالىقتى بايىتۋدىڭ دەڭگەيىن جوعارىلاتتى.
فۋكاڭنىڭ كۇن نۇرى جەتكىلىكتى، كۇندىز بەن ءتۇننىڭ تەمپەراتۋرا پارقى زور بولىپ، وزگەشە كليمات شارت - جاعدايى جالپاق شاپتولدىڭ قانت قۇرامىنىڭ جينالۋى مەن ءدامىنىڭ جاقسى بولۋىنا ءتيىمدى. بۇرىن جەرگىلىكتى ورىندا جالپاق شاپتولدى شارۋا وتباسىلارى بىتىراندى ەگەتىن دە سورتى كونە، ارالاس بولۋ، اتىزداردى باسقارۋ - باپتاۋ ۇتىمسىز بولۋ، ەگۋ ولشەمى بىركەلكى بولماۋ سياقتى ماسەلەلەر ورىن تەۋىپ، جەمىس ونىمدەرىنىڭ ساپاسى اركەلكى، كاسىپ سالاسىنىڭ حاۋىپ - قاتەرگە توتەپ بەرۋ قۋاتى ءالسىز بولاتىن.
”بۇرىنعى كونە سورتتاردىڭ ۋاقىتى الدەقاشان ءوتىپ، ساپاسى بازار قاجەتىنە ىلەسە الماي، ساتىلۋ مولشەرى باستان - اياق تومەن بولىپ كەلگەن ەدى“. 8 - ايدىڭ 20 - كۇنى فۋكاڭ قالاسى فانشىڭ وتباسىلىق ەگىس الاڭىنىڭ جاۋاپتىسى شۇي جۇنجيان عىلىم - تەحنولوگيا ارقىلى اۋىل شارۋاشىلىعىنا دەم بەرۋدىڭ ونىمدىلىگىن شىنايى سەزىنگەندىگىن اقتارىلا ايتتى.
جالپاق شاپتول تۇقىمدىق زاتىن 30 نەشە جىل زەرتتەپ جيناۋعا سۇيەنگەن عىلمي زەرتتەۋ ۇجىمى سولتۇستىك شينجياڭنىڭ كليمات جانە توپىراق ەرەكشەلىگىمەن دالمە - ءدال ۇشتاستىرىپ، فۋكاڭدا ساپالى تۇقىم ەنگىزۋ، اتىزدا سىناق ەتۋ، جەرگىلىكتى جاعدايعا ۇيلەستىرىپ ەگۋ، سۇرىپتاۋ سياقتى ءبىر قىدىرۋ قىزمەتتەردى ورىستەتتى.
8 - ايدىڭ 8 - كۇنى فۋكاڭ قالاسى فانشىڭ وتباسىلىق ەگىس الاڭىنىڭ ولشەمدەنگەن جالپاق شاپتولدان ۇلگى كورسەتۋ بازاسىندا جۇڭگو اۋىل شارۋاشىلىعى عىلىم اكادەمياسى جىڭجوۋ جەمىس اعاشتارىن زەرتتەۋ ورنىنىڭ اعا زەرتتەۋشىسى، جۇڭگو اۋىل شارۋاشىلىعى عىلىم اكادەمياسى باتىس بولىك اۋىل شارۋاشىلىعىن زەرتتەۋ ورتالىعىنىڭ باتىس بولىك ەرەكشە جەمىس ورمانى كاسىپ سالاسىنىڭ ساپاسىن جوعارىلاتۋ، ونىمدىلىگىن ارتتىرۋ بويىنشا جاڭالىق اشۋ ۇجىمىنىڭ باس عالىمى ۋاڭ ليرۇڭ ۇجىمدى باستاپ ناقتى ورىندا جەمىس اعاشتارىنىڭ جەمىس بەرۋ، ءوسۋ جاعدايىن تەكسەرىپ، جەمىس ونىمدەرىنىڭ ساپاسىن ساراپتاپ ەگۋ ونىمدىلىگىن تەكسەرىپ كوردى. ”ءبىز فۋكاڭعا ىلگەرىندى - كەيىندى 30عا جۋىق جالپاق شاپتول سورتىن ەنگىزىپ، قايتا - قايتا سىناق ەتۋ، ەگۋ ۇلگىسىن ساپالىلاندىرۋ ارقىلى ەڭ سوڭىندا جەرگىلىكتى ورىننىڭ سۋ مەن توپىراعىنا، كليمات شارت - جاعدايىنا ۇيلەسەتىن تاڭداۋلى سورتتاردى تاڭداپ جەتىلدىردىك“، - دەدى ۋاڭ ليرۇڭ.
قازىر جۇڭپان 11 - ءنومىر، جۇڭيوۋپان 7 - ءنومىر سياقتى ساپالى سورتتار فۋكاڭ جالپاق شاپتولىنىڭ وزەكتى نەگىزگى ەگىلەتىن سورتىنا اينالدى، جاڭا سورتتاعى جەمىس اعاشتارىنا دوربا كيگىزۋدىڭ قاجەتى جوق، ءپىشىنى ادەمى، رەڭى اشىق جەمىس بەرەدى، ەتى تولىق جانە شىرىندى بولىپ، ءدامى ءتىل ۇيىرەدى، ساقتاۋعا، تاسىمالداۋعا ءتوزىمدى، بۇل جەمىس ونىمدەرىنىڭ تاۋارلانۋ مولشەرى مەن بازارداعى باسەكەلىك قۋاتىن بارىنشا جوعارىلاتتى.
جەمىس ءتۇرى ورنىقتى دا ساپالى بولعاندىقتان، فۋكاڭ جالپاق شاپتولى بازاردىڭ قارسى الۋىنا يە بولىپ، جەر - جەردەگى ساتىپ الۋشى ساۋداگەرلەر ىركەس - تىركەس كەلىپ ساتىپ الدى. جەمىس ساتىپ الۋشى ساۋداگەر ليۋ گاۋتيڭ: ”فۋكاڭ جالپاق شاپتولىنىڭ قانت قۇرامى جوعارى، ساقتاۋعا ءتوزىمدى، ۇزاق جولعا تاسىمالداۋ شىعىنى تومەن. ءبىز ساتىپ العان جاس جەمىستەر نەگىزىنەن بەيجيڭ، شاڭحاي، گۋاڭجوۋ سياقتى قالالارعا جەتكىزىلەدى، بازارداعى ءوتىمى توتەنشە تۇراقتى“، - دەدى.
”عىلىم - تەحنولوگيادا جاڭالىق اشۋدىڭ ەڭ سوڭعى ماقساتى − ناقتى ەكونوميكالىق ونىمدىلىككە اينالدىرۋ. ءبىز سورت ەنگىزۋ، ەگۋ ۇلگىسىندە جاڭالىق اشۋ، ەگىنشىلىك تەحنولوگياسىن جاقسارتۋ، ۇلگى كورسەتۋ بازاسى قۇرىلىسى، ۇدايىلانعان تەحنولوگيالىق قىزمەت وتەۋ سىندى 5 جاقتان ۇزدىكسىز كۇش سالدىق، مۇنداعى ماقساتىمىز عىلمي زەرتتەۋ جەتىستىكتەرىنىڭ تياناقتانىپ تامىر تارتۋىن ىلگەرىلەتىپ، شارۋالاردى شىن مانىندە يگىلىككە كەنەلتۋ“، - دەدى ۋاڭ ليرۇڭ.
قازىر فۋكاڭ قالاسى بويىنشا جالپاق شاپتولدىڭ جىلدىق ءونىم مولشەرى 800 دە 1000 توننا بولىپ، تاۋارلىق جەمىس مولشەرى ％92كە جەتتى. تاڭداۋلى جالپاق شاپتولدىڭ كيلوگرامىنىڭ تولايىم ساتىلۋ باعاسى 20 − 30 يۋان بولىپ، ولشەمدەنگەن جەمىس باعىنىڭ جەكە مۋ باسىندىق تازا كىرىسى 6000 يۋاننان اسىپ، ءداستۇرلى ەگىنشىلىك ۇلگىسىمەن سالىستىرعاندا، پايداسى ەسەلەپ ارتتى.
فۋكاڭ قالالىق ورمان شارۋاشىلىعى جانە جايلىم مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى لو جىياڭ بىلاي دەدى: ”كەلەسى قادامدا ءبىز بۇقارانىڭ كىرىسىن ءۇرتىس ورنىقتى ارتتىرۋدى وزەكتى نىسانا ەتىپ، جەرگىلىكتى ورىننىڭ ەرەكشە جەمىس ورمانى التىن ماڭدايشالىعىن جارقىراتىپ، جالپاق شاپتول كاسىپ سالاسىنىڭ جوعارى ساپالى دامۋىن ىلگەرىلەتەمىز“.
