تىلەكتەس بولىپ ارمانعا قانات قاعىپ، جاڭا ساپاردى باستادى
− اۆتونوميالى رايوندىق 15 - كەزەكتى سپورت جارىسى جانە 11 - كەزەكتى ۇلتتار ءداستۇرلى دەنە تاربيە جارىسىنىڭ جابىلۋ سالتىنان ەستەلىك
□ انار بۇلت \ شينجياڭ گازەتىنىڭ ءتىلشىسى ءجازيرا نەسىپبەك
كۇزدىڭ سالقىن سامالى ەسىپ، ءان - ءبي ءۇنى شارىقتادى. اۆتونوميالى رايوندىق 15 - كەزەكتى سپورت جارىسى جانە 11 - كەزەكتى ۇلتتار ءداستۇرلى دەنە تاربيە جارىسى 9 - ايدىڭ 6 - كۇنى قاشقار دەنە تاربيە ورتالىعىندا تابىسپەن اياقتادى. بۇل جارىس ءبىر جارىم ايعا جالعاستى، بۇكىل شينجياڭداعى جيىنى 14 مىڭ 600گە جۋىق سپورت ساڭلاعى جارىس الاڭىندا قۇيعىتىپ، ەرلىكپەن بەلدەستى.
شينجياڭنىڭ بۇكىل رايوننىڭ جالپىلىق سپورت جارىسى مەن ۇلتتار ءداستۇرلى دەنە تاربيە جارىسىن تۇڭعىش رەت بىرىكتىرىپ وتكىزۋى رەتىندە، وسى رەتكى سالتاناتتى جارىستا ىلە، قاشقار سىندى ەكى ۇلكەن جارىس رايونى جانە ات ويىندارى كورلا بولىمشە جارىس الاڭى ورنالاستىرىلدى، بۇل شينجياڭ بويىنشا ولشەمى ەڭ جوعارى، كولەمى ەڭ ۇلكەن جالپىلىق دەنە تاربيە سالتاناتى.
جابىلۋ سالتى ايبىندى دا دۋماندى بولدى، جارىسقا قاتىناسقان ۋاكىلدەر كومانداسى قاتار تۇزەپ الاڭعا كىردى، تۋلار جەلبىرەپ، سپورت ساڭلاقتارى بويىن ءتىپ - تىك ۇستاپ، اسقاق رۋح كورسەتتى. وسى رەتكى سپورت جارىسىندا ءارقايسى ۋاكىلدەر كومانداسى ءبىر ساحنادا ونەر كورسەتىپ، اركىم ءوز كەلبەتىن ايگىلەپ، سۇبەلى تابىسقا قول جەتكىزدى. ىلە ۋاكىلدەر كومانداسىنىڭ جاستار مەن ورەندەردىڭ باسەكەلىك جارىسىندا ارتىقشىلىعى كورنەكتى بولىپ، جەڭىل اتلەتيكا، بالۋان، بوكس سياقتى ءداستۇرلى كۇشتى تۇرلەردە كوپ تۇيىندە گۇل اشىپ، كوپ ءتۇرلى جارىس مەدالىنا يە بولىپ، شينجياڭداعى جاستار مەن ورەندەردىڭ دەنە تاربيە زاپاس دارىندىلارىنىڭ كۇشتى كومەسكى كۇشىن تولىق ايگىلەدى؛ نەگىزگى الاڭدا جارىسقا تۇسكەن قاشقار ۋاكىلدەر كومانداسى ۇلتتار ءداستۇرلى دەنە تاربيە تۇرلەرىن ىشكەرىلەي ورىستەتىپ، بۇقا تارتىس، ۇلتتىق ات ونەرى، دار ويىنى سياقتى ەرەكشەلىككە يە جارىستاردا كوزگە ءتۇسىپ، تاماشا ناتيجەگە قول جەتكىزدى؛ تۇمسىق قالاسىنىڭ ۋاكىلدەر كومانداسى ورنىقتى بەينە بايقاتىپ، ءتۇرلى ۇلتتار ءداستۇرلى دەنە تاربيە جارىستارىندا، ويىن قويۋ تۇرلەرىندە ءوزىنىڭ مىعىم كۇشىن ايگىلەدى؛ ءۇرىمجى، سانجى قاتارلى ۋاكىلدەر كومانداسى جاستار مەن ورەندەردىڭ باسەكەلىك جارىسىندا ەرلىكپەن العا ۇمتىلىپ، ۇزدىكسىز كورنەكتى ناتيجە جاراتتى... بارلىق سپورتشى قىزۋ سۇيىسپەنشىلىگىن ماڭداي تەرىمەن سۋارىپ، سايىسۋ ارقىلى دەنە تاربيە رۋحىن ءتۇسىندىرىپ، جارىس الاڭىندا جاڭا داۋىردەگى شينجياڭ جاستارىنىڭ اسقاق رۋحاني بەينەسىن ايگىلەدى.
سالتاناتتى ادەبيەت - كوركەمونەر كونسەرتى ارت - ارتىنان قويىلدى. بەتاشار ءان - ءبي «قاشقاردا باس قوسايىقتىڭ» اۋەنى ويناقى، ءبيى جالىندى بولىپ، دۋماندى دا تارتىمدى كونسەرت بايىرعى قالا قاشقاردىڭ جالىندى ومىرشەڭ كۇشى مەن وزگەشە تارتىمدىلىعىن تولىق ايگىلەدى. قويىلىم «المۇرت باعىندا اشىلعان گۇل» جۇرتتى تاڭ قالدىردى، ەكپىندى دە اسقاق بەيجيڭ تەاترىنىڭ اۋەنى مەن تامىلجىعان حۋاڭمەي تەاترى ءبىر - بىرىنە كورىك قوسىپ، وڭتۇستىك پەن سولتۇستىكتىڭ ءداستۇرلى تەاتر كوركەمونەرى ءبىر ساحنادا ورىندالىپ، كورەرمەندەرگە جۇڭحۋانىڭ ءداستۇرلى تەاتر مادەنيەتىنىڭ تەرەڭ استارى مەن مىڭ قۇبىلعان كەلبەتىن سەزىندىردى.
ءان - ءبي قويىلىمى «سۇلۋلىقتان بىرگە سۋسىنداۋدىڭ» ءمانى تەرەڭ بولدى، تامىلجىعان دۋتار مۋزيكا ۇنىنە قۇيقىلجىعان ىرحۋ اۋەنى قوسىلىپ، ۇلت اسپاپتارى مۋزيكاسى مەن اسەم ءبيدىڭ مۇلتىكسىز توعىسۋى ءار ۇلت مادەنيەتىنىڭ بارلىعىن قامتىپ ءوزارا شۇعىلا شاشقان اسەرلى كورىنىسىن جاندى بەينەلەدى. سوڭعى قويىلىم «جۇڭحۋا شاڭىراعى» سۇيىسپەنشىلىكپەن ورىندالىپ، ءار ۇلت ارتيستەرى قول ۇستاسا بىرگە ساحناعا شىعىپ بۇرالا بيگە باستى، اعا - باۋىرداي ەتەنە بولعان مەيىرلى كورىنىس جۇرت جۇرەگىنە ۇيالادى.
”جابىلۋ سالتىنداعى ويىن - ساۋىق نومىرلەرى شينجياڭداعى ءار ۇلت بۇقاراسىنىڭ تىلەكتەس، باعىتتاس بولىپ، ءوزارا قارايلاسىپ، جۇڭگو ارمانىن قول ۇستاسا بىرگە سومداعان رۋحاني بەت - بەينەسىن جاندى بەينەلەدى“، - دەدى جابىلۋ سالتىنداعى ادەبيەت - كوركەمونەر كونسەرتىنىڭ باس رەجيسسەرى ميھىربانگۇل دولقۇن.
ارتيست قادىريا ايسا «المۇرت باعىندا اشىلعان گۇلدىڭ» قاربالاس جاتتىعۋىنا جارتى اي بۇرىن كىرىستى. ”جارىس الاڭىنداعى سپورتشىلاردىڭ ەرلىكپەن شايقاسقان بەينەسى مەنى قاتتى اسەرلەندىردى. بۇل رەتكى ادەبيەت - كوركەمونەر كونسەرتى ءارى بارلىق سپورتشىلارعا، جاتتىقتىرۋشىلارعا، قىزمەتكەرلەرگە قۇرمەت ءبىلدىرۋ، ءارى كوپشىلىكپەن بىرگە سالتاناتتى جينالىستىڭ شاتتىعىنان يگىلىكتەنۋ“، - دەدى ول.
وسى كەزەكتى جارىستىڭ رايوندارعا ءبولىپ وتكىزۋ ەرەكشەلىگى ايقىن، جارىس ءتۇرى مول، كوپ نەگىزدى بولدى. ىلە جارىس رايونىندا جاستار مەن ورەندەردىڭ 18 باسەكەلىك دەنە تاربيە ءتۇرى، 13 بۇقارالىق دەنە تاربيە جارىس قيمىلى ورنالاستىرىلدى؛ قاشقار جارىس رايونىندا ۇلتتاردىڭ 13 ءداستۇرلى دەنە تاربيە باسەكەلىك جارىس ءتۇرى، ۇلتتاردىڭ 10 ءداستۇرلى دەنە تاربيە ويىن ءتۇرى (جەلىدە ورىندالاتىن 3 ويىن ءتۇرىن قامتيدى) ورنالاستىرىلدى. ات ويىندارى كورلا بولىمشە جارىس الاڭىندا ۇلتتاردىڭ 3 ءداستۇرلى دەنە تاربيە باسەكەلىك جارىس ءتۇرى، ۇلتتاردىڭ 2 ءداستۇرلى دەنە تاربيە ويىن ءتۇرى ورنالاستىرىلدى. جارىس كاسىپتىك باسەكە مەن بۇقاراعا جالپىلاستىرۋعا، ءداستۇرلى ءتۇر مەن ەرەكشەلىككە يە جاڭالىق اشۋعا تەڭ ءمان بەرىپ، شينجياڭنىڭ دەنە تاربيە ىستەرىنىڭ دامۋ جەتىستىكتەرىن جان - جاقتى ايگىلەدى.
جارىس الاڭىنداعى باسەكە اياقتادى، ەكپىندەي ىلگەرىلەۋ قادامى ماڭگى توقتامايدى. وسى رەتكى سالتاناتتى جينالىس دەنە تاربيە باسەكەسىنىڭ شىرقاۋ شىڭىنداعى سالتاناتتى جينالىس قانا ەمەس، ونان دا ماڭىزدىسى، ۇلتتاردىڭ ارالاسۋىنىڭ، ىشتەسۋىنىڭ، توعىسۋىنىڭ مەيىرلى ساحناسى بولىپ، ىنتىماقتاسا ەكپىندەي ىلگەرىلەپ، قايراتتانا العا ۇمتىلاتىن قۇدىرەتتى كۇش ۇيىستىردى.
”ءبىز وسى رەتكى سپورت جارىسىن وراي ەتىپ، جالپى حالىقتىق دەنە شىنىقتىرۋ الاڭى قۇرىلعىلارىنداعى ولقىلىقتاردى تولىقتاپ، دەنە تاربيە مەن وقۋ - اعارتۋدىڭ توعىسپالى دامۋىن تەرەڭدەتىپ، دەنە تاربيە زاپاس دارىندىلارى ساتىلى قوسىنى قۇرىلىسىن بەكەمدەپ، ’دەنە تاربيە + مادەنيەت - ساياحات‘ توعىسا دامۋىنىڭ جاڭا ۇلگىسى جونىندە بەلسەنە ىزدەنىس جاساپ، دەنە تاربيەنىڭ دامۋ جەتىستىكتەرىنەن ءار ۇلت بۇقاراسىن اناعۇرلىم كوپ يگىلىكتەندىرىپ، شينجياڭ دەنە تاربيە ىستەرىنىڭ جوعارى ساپالى دامۋ نەگىزىن ۇزدىكسىز بەكەمدەپ، سوتسياليستىك وسىزاماندانعان شينجياڭ قۇرۋعا قۋاتتى دەنە تاربيە قوزعالىس قۋاتىن ۇستەيمىز“، - دەدى اۆتونوميالى رايوندىق دەنە تاربيە مەكەمەسىنىڭ ورىنباسار باستىعى كاڭ يۇڭشين.
