□ انار بۇلت \ شينجياڭ گازەتىنىڭ ءتىلشىسى شيە حۇيبيان
جۇگەرى ساباعىنىڭ بيىكتىگى 2 ادامنىڭ بويىنداي، قاتار - قاتار قازديىپ تۇر؛ التىنداي جارقىراعان جۇگەرىنىڭ جۋاندىعى ادامدى قايران قالدىرادى. ”نەدەگەن ۇلكەيگەن“! دەگەن ماداق ءۇنى اۋىق - اۋىق ەستىلدى.
بۇل 8 - ايدىڭ 31 - كۇنى قۇلجا قالاسى قۇدياريۇزى قالاشىعىنىڭ 10 مىڭ مۋدان استام جەرگە جۇگەرى ەگۋدەن ۇلگى كورسەتۋ اۋماعىنداعى كورىنىس. سول كۇنى مەملەكەتتىك استىق - ماي داقىلدارىنىڭ كەڭ كولەمدە بىرلىك ءونىمىن جوعارىلاتۋ جۇمىس باسى ءماجىلىسى ىلە قازاق اۆتونوميالى وبلىسىندا اشىلدى، بۇكىل ەلدەگى 31 ولكەدەن (اۆتونوميالى رايون، قالا) كەلگەن اۋىل شارۋاشىلىعى، اۋىل - قىستاق تاراۋلارىنىڭ 100دەن استام ۋاكىلى جۇمىس باسىندا كوزدەن كەشىرىپ، شينجياڭدا جۇگەرىدەن ءبىر ماۋسىمدا ”5. 1 توننالىق اتىزدا“ (مۋ باسىندىق ءونىمى 5. 1 توننا اتىز) ءونىمدى ارتتىرۋ جولى جونىندە ىزدەنىس جاسادى.
”بىلتىر بۇل جەردىڭ مۋ باسىندىق ءونىمى 5. 1 توننادان استى، بۇل بۇكىل ەلدەگى جۇگەرىنىڭ مۋ باسىندىق ورتاشا ءونىمىنىڭ 3 ەسەسىنەن استى، بيىل دا 5. 1 توننادان استى“، - دەپ تانىستىردى جۇڭگو اۋىل شارۋاشىلىق عىلىم اكادەمياسى داقىل عىلمي زەرتتەۋ ورنىنىڭ زەرتتەۋشىسى لي شاۋكۇن تانىستىرىپ.
اتىز باسىندا بىرەۋلەر جۇگەرىنى الىپ ۇزىندىعىن سالىستىرسا، بىرەۋلەر قاتار ارالىعىن ولشەپ ءجۇر. ءبىر ۋاكىل قولىمەن ەكى قاتار جۇگەرىنىڭ اراسىن قارىستاپ، تەبىرەنە: ”مىناداي تىعىزدىقپەن ەگۋگە ءبىز، شىنىندا، باتىلدىق ەتە المايمىز“، - دەدى.
بۇكىل ەلدىڭ جەر - جەرىندەگى اۋىل شارۋاشىلىق تاراۋلارىنىڭ ادامدارى نە ءۇشىن ىلەگە كەلىپ كوزدەن كەشىرەدى؟ ىلە وبلىستىق پارتكومنىڭ ورىنباسار شۋجيى حاۋ لەي بۇعان بىلاي دەپ جاۋاپ بەردى: بيىل جەرگىلىكتى ورىن 100 مىڭ مۋ ۇلاسپالى جۇگەرى اتىزىن ءبىر ماۋسىمدا ”5. 1 توننالىق اتىزعا“، 3 ميلليون مۋ جەردەگى جۇگەرى اتىزىن ءبىر ماۋسىمدا ”ءبىر توننالىق اتىزعا“ (مۋ باسىندىق ءونىمى ءبىر توننا) اينالدىرۋدى جۇزەگە اسىرادى.
جوعارى ءونىمدى ۇلگى كورسەتۋ اتىزى بۇكىل ەلدىڭ بارلىق جەرىندە بار، قيىنى ونى كەڭ كولەمدەندىرۋ. بۇل شينجياڭدا ورىندالدى، 100 مىڭ مۋ ”5. 1 توننالىق اتىز“ وسىنىڭ دالەلى.
100 مىڭ مۋ ”5. 1 توننالىق اتىزدىڭ“ قۇپيا سيفرى
قۇدياريۇزى قالاشىعىنداعى كوزدەن كەشىرىلەتىن 7000 مۋ جەردەگى جۇگەرىنى لي شيمين قاتارلى 4 ەگىمشىلىك ءىرى وتباسى بىرگە باسقارادى.
لي شيمين حىناندىق، شينجياڭدا 10 جىل ەگىن ەككەن. بىلتىر ول تۇڭعىش رەت اۆتونوميالى رايون نەگىزگى جالپىلاستىرعان جۇگەرىنى ”70 + 40“ كەڭ - تار ارالىق بويىنشا جوعارى ءتۇسىمدى، ءجيى ەگۋ تەحنولوگياسىن قولداندى، ونىڭ ۇستىنە سۋ مەن تىڭايتقىشتى دالمە - ءدال رەتتەپ - مەڭگەرگەندىكتەن، ءونىم مولشەرى ءار مۋىنا 6. 1 تونناعا تايادى، بۇل ول ەگىن ەككەن تالاي جىلدان بەرى ەڭ جوعارى ءونىم العان جىل بولدى.
”70 + 40“ دەگەنىمىز ەكى قاتار جۇگەرىنىڭ ارالىعى 40 سانتيمەتر، جانىنان 70 سانتيمەتر كەڭدىكتە ارالىق قالدىرىلادى. وسىلاي بولعاندا، ءبىر مۋ جەرگە 8200 ءتۇپ ەگۋگە بولادى، بۇل ءداستۇرلى ەگۋ ادىسىنەن ءبىر ەسەگە جۋىق ارتىق“. ”ارالىعى الىس بولسا، اۋا الماسۋى جاقسى بولادى، جارىق جەتكىلىكتى تۇسەدى، دەرت - دەربەزگە وڭاي شالدىقپايدى، تامشىلاتىپ سۋارۋ بەلدەۋى دە ۇنەمدەلەدى“، - دەدى لي شيمين.
الايدا تىعىزدىقتىڭ ارتۋى دا جاپىرىلۋ، ساباق بوس كۇيىندە قالۋ، ءدانى كىشكەنە بولۋ، دەرت - دەربەزگە شالدىعۋ سياقتى جاڭا ماسەلەلەردى تۋىنداتتى. لي شاۋكۇننىڭ ءادىسى: تۇقىمدى قاي كەزدە ءسىڭىرۋ، تىعىزدىعى قانشا بولۋ، قانشا رەت تامشىلاتىپ سۋارۋ، ت. ب بارلىعىن ولشەم بويىنشا ەسەپتەۋ، مىنە بۇل تاماشا ءادىس.
تەحنولوگيا ”قالاي ەگۋ“ ماسەلەسىن شەشەدى، تۇقىم ”وسىلاي ەگۋگە بولاتىن - بولمايتىندىعىن“ بەلگىلەيدى. كوزدەن كەشىرۋ ۇجىمى اتىزدىڭ قارسىسىنداعى جۇگەرىنىڭ تاڭداۋلى سورتتارىن سۇرىپتاۋ، كورمەگە قويۋ بازاسىنا كەلدى. جۇڭگو اۋىل شارۋاشىلىق عىلىم اكادەمياسى باتىس بولىك اۋىل شارۋاشىلىعىن زەرتتەۋ ورتالىعىنىڭ دوكتورى شۋە جۇن بىلاي دەپ تانىستىردى: بىلتىر بۇل ارادا 168 سورتتان 20 جەتەكشى سورت تاڭدالىپ، ەكشەۋ مولشەرى ％88تەن استى.
”بۇرىن سورت تاڭداۋدا ماماندار جيىن اشىپ اقىلداساتىن، قازىر اتىزداعى بەينەسىنە قاراپ بەلگىلەنەدى. وڭاي جىعىلىپ قالاتىن، تىعىز ەگۋگە ۇيلەسپەيتىن، دەرت - دەربەزگە وڭاي شالدىعاتىنداردىڭ بارلىعى ەكشەپ تاستالادى“، - دەدى اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنىڭ ورىنباسار باستىعى تاڭ ي - ۋ.
ساپالى سورت تياناقتانسا، اۋىل شارۋاشىلىق ماشينالارىن دا بىرگە تياناقتاندىرۋ كەرەك. جۇگەرى اتىزىنىڭ جانىنداعى اۋىل شارۋاشىلىق ماشينالارى كورمە اۋماعىندا جەر تەگىستەۋ ماشيناسى، تۇقىم سەبۋ ماشيناسى، جيىن - تەرىن ماشيناسى سياقتىلار قاز - قاتار ءتىزىلىپ تۇر، جابدىقتار تۇگەلدەي ”70 + 40“ بويىنشا جوبالانعان. ”قاتار ارالىعى بىرلىككە كەلسە، جول جەتەك ىسكە قوسىلىسىمەن - اق، تۇقىم سەبۋ ماشيناسى جۇمىس باستايدى، ءتۇپ ارالىعى بىركەلكى بولادى، مايسا شىعۋ مولشەرى تۇراقتى تۇردە ％95تەن جوعارى بولادى“، - دەدى اۆتونوميالى رايوندىق اۋىل شارۋاشىلىعىن، اۋىل - قىستاقتى ماشينالاندىرۋدى دامىتۋ ورتالىعى پارتكومىنىڭ شۋجيى لۋ دۇڭ.
تاماشا ءادىس، ساپالى تۇقىم، تاماشا ماشينا ءبارى بار بولعاندا، ەڭ ماڭىزدىسى، سۋ مەن تىڭايتقىش. كوزدەن كەشىرۋ ۇجىمى قۇلجا اۋدانى ءۇش ون حۇيزۋ اۋىلىنىڭ 2 - ءنومىرلى ناسوس پۋنكتىنە باردى، اتىز شەتىنە ەكى ءتۇپ جۇگەرى قويىلىپتى. شىحىزى داشۋەسى اۋىل شارۋاشىلىعى شۋەيۋانىنىڭ پروفەسسورى ما فۋيۇي ەكى قولىمەن ەكى ءتۇپ جۇگەرىنى سۇيەپ تۇرعىزىپ، كوپشىلىكتى جانىنا شاقىردى.
”بۇل تامشىلاتىپ سۋارىلاتىن اتىزدان اكەلىنگەن“. ما فۋيۇي الدىمەن وڭ قولىنداعى جۇگەرى ساباعىن كوتەردى، جۇگەرىنىڭ تامىرى اپپاق، تارامدالعان بەينەسى قولشاتىرعا ۇقسايدى ەكەن. ساباعى جۋان، جاپىراعى كەڭ، رەڭى جارقىراعان قانىق جاسىل. ”مىناۋ قاپتاتىپ سۋارىلاتىن اتىزدان اكەلىنگەن“. ول تاعى سول قولىنداعى جۇگەرى ساباعىن كوتەردى، جۇگەرى تامىرى ءبۇرىسىپ قالعان، ءارى جىڭىشكە، ءارى از. ساباعى الدەقايدا جىڭىشكە ەكەن، تومەن جاعىنداعى جاپىراقتار قۋراپ قالىپتى.
كوپشىلىك كوپ ءتۇسىندىرۋدى كۇتپەي - اق بىردەن بىلە قويدى. ”ۇقساس جەر، ۇقساس سۋ، تەڭ مولشەردەگى تىڭايتقىش بەرىلگەن، باپتاۋ ءادىسى ۇقساماعاندىقتان، ءوسىپ شىققان ءونىم ەكى ءتۇرلى بولعان“. ما فۋيۇي بىلاي دەدى: ”بۇرىن قاپتاتىپ سۋارعاندا نەگىزگى تىڭايتقىش ءبىر جولدا جەتكىلىكتى بەرىلەدى دە، سوڭىنان بەرىلمەيدى، العاشىندا تويىپ العانداي بولادى دا، سوڭىنان اشىعادى. قازىر تامشىلاتىپ سۋارۋدا سۋ تىڭايتقىشتى بىرگە الىپ جۇرەدى، از مولشەردە كوپ رەت بەرىلەدى، نەنى قاجەت ەتسە سول بەرىلەدى، قانشالىق قاجەت بولسا سونشالىق بەرىلەدى. مۇنداي ۇلگىدە تىڭايتقىشتىڭ پايدالانىلۋ سالىستىرماسى ％30 − 20 جوعارىلاپ، سۋ ％40 ۇنەمدەلىپ، ءونىم مولشەرى ％40 − 20 جوعارىلايدى“.
سۋ مەن تىڭايتقىشتان سىرت، تاعى ”قۇنارلى اتىز“ بولۋ كەرەك. قازىر بۇكىل شينجياڭدا 61 ميلليون 300 مىڭ مۋ جوعارى ولشەمدى ەگىنجاي قۇرىلدى، جوعارى ونىمدىلىكپەن سۋ ۇنەمدەۋ جانە سۋ مەن تىڭايتقىش ءبىر تۇلعالانعان جەر اۋدانى 77 ميلليون 780 مىڭ مۋ بولدى. ىلە وبلىسى 6 ميلليون 580 مىڭ مۋ جوعارى ولشەمدى ەگىنجاي قۇردى، بۇل ماڭگىلىك نەگىزگى ەگىنجايلاردىڭ ％54. 87ىن ۇستايدى. ”جوعارى ولشەمدى ەگىنجاي قۇرىلعاننان كەيىن جۇگەرىنىڭ ءونىم مولشەرى جاپپاي 200 كيلوگرامنان استام ارتتى“، - دەدى حاۋ لەي.
تاماشا ءادىس، ساپالى تۇقىم، تاماشا ماشينا، قۇنارلى اتىز دەگەندەردىڭ ءبارى دە جاڭا نارسە ەمەس. ىلە ۇلگىسىنىڭ باعالى جەرى ولاردى ءبىر اراعا شوعىرلاندىرۋىندا. لي شاۋكۇن تۇسىنىك جاساۋ بارىسىندا قايتا - قايتا بىلاي دەدى: ”بۇل تەحنولوگيا جالپىلىق بولىپ تابىلادى. تەك تامشىلاتىپ سۋارۋدى، سورتتى جانە اۋىل شارۋاشىلىعىن يگەرۋمەن عانا مۇنداي ونىمدىلىككە جەتۋگە بولمايدى.
تاڭ ي - ۋ بىلاي دەپ قارادى: ىلە ۇلگىسىنىڭ تابىستى بولۋى، ءبىر جاعىنان، ۇيىمداستىرۋ، اتقارۋ پارمەندى بولدى، ەندى ءبىر جاعىنان، ”تاماشا ءادىس، ساپالى تۇقىم، تاماشا ماشينا، قۇنارلى اتىز“ توعىستىرىلدى. الايدا شارۋالاردى سىناپ كورۋگە شىن مانىندە يلاندىرعانى ەسەپتىڭ انىق بولۋى.
لو جۇنجيە 90 - جىلداردىڭ تۇلەگى، داشۋە بىتىرگەننەن كەيىن مەكەنى ىلەگە قايتىپ كەلىپ ەگىن ەككەنىنە 9 جىل بولعان. ايەلى ەكەۋى شارۋاشىلىق جۇرگىزگەن سەلبەستىك كووپەراتيۆى 15 مىڭ مۋ جەردەگى جۇگەرى مەن ءبيدايدى باسقارادى، جىل بويى اتىز باسىندا تەك 4 − 5 ادام عانا جۇمىس ىستەيدى.
”ءار مۋ جەردى 1300 يۋانعا جالعا الدىق، باسقا ۇسنىلىم 1100 يۋان، ءبىر جارىم توننا جۇگەرىنى بازار باعاسى بويىنشا 3000 يۋانعا ساتساق، ءار مۋىنان 600 يۋان اينالاسىندا كىرىس كىرگىزەمىز، پايداسى ادەتتەگى جەردەن تۇسەتىن پايدادان 200 يۋانعا تاياۋ جوعارى“، - دەدى لو جۇنجيە.
مىنە بۇل 100 مىڭ مۋ ”5. 1 توننالىق اتىزدىڭ“ قۇپيا سيفرى ”− تاماشا ءادىس، ساپالى تۇقىم، تاماشا ماشينا، قۇنارلى اتىزدى“ توعىستىرىپ نەگىز قالاپ، ۇيىمدىق مەحانيزم ارقىلى قورعاپ، شارۋالاردىڭ كىرىسىنىڭ ارتۋى ارقىلى دەم بەردى. ۇشەۋىنىڭ ءبىرى كەم بولسا، ءونىم مولشەرى جوعارىلامايدى.
ىلە ۇلگىسىن بۇكىل شينجياڭ بويىنشا كوشىرىپ قولدانۋعا بولا ما
ىلە جۇگەرىسىنىڭ جوعارى تۇسىمىنە مەڭزەس كوپتەگەن ادامدا ىشتەي مىناداي سۇراق تۋىندايدى: بۇل ارادا كۇن نۇرى، جىلۋ جەتكىلىكتى، سۋ بايلىعى مول، شينجياڭعا ۋاكىلدىك ەتە الا ما؟
تاڭ ي - ۋ بىلاي دەدى: بۇل ۇلگىنىڭ وزەگى سۋدىڭ كوپ - از بولۋىندا ەمەس، سۋ مەن تىڭايتقىشتى دالمە - ءدال رەتتەۋ - مەڭگەرۋدە، ”كوپتەگەن ادام سۋ ۇنەمدەپ تامشىلاتىپ سۋارۋدى سۋ ۇنەمدەۋ دەپ تۇسىنەدى. ءىس جۇزىندە، ونىڭ ەڭ شەشۋشى ءتۇيىنى سۋ مەن تىڭايتقىشتى دالمە - ءدال رەتتەۋ - مەڭگەرۋ“.
شينجياڭنىڭ جەرى كەڭ، وڭتۇستىك، سولتۇستىك شينجياڭنىڭ پارقى زور، ىلە ۇلگىسى بۇكىل شينجياڭدا قالاي دالمە - ءدال تياناقتانادى؟
لي شاۋكۇن ۇجىمى 6 ءتۇرلى وڭىرلىك ۇلگىنى زەرتتەپ اشتى − ىلە 5. 1 توننالىق جوعارى ءونىمدى ءوڭىرى، وڭتۇستىك شينجياڭ قايتالاي ەگۋ ءوڭىرى، تاكلاماكان ءشول جيەگى قۇمدى ءوڭىرى، سۋىق - سالقىن ءوڭىر، ماقتا ەگۋدەن قايتارىلعان جوعارى تەمپەراتۋرالى ءوڭىرى، سۋلياۋ جارعاقسىز ەگۋگە ۇيلەسىمدى ءوڭىر. باسقا ۇلگىنىڭ ءبارى دە ىلەنىڭ كوشىرمەسى ەمەس، قايتا ”ءجيى ەگۋ، دالمە - ءدال رەتتەۋ - تىزگىندەۋ“ جۇلگەسىندە جەر - جەردىڭ شارت - جاعدايىنا مەڭزەس رەتتەۋ جۇرگىزۋ بولىپ تابىلادى.
”وڭتۇستىك شينجياڭداعى قۇمدى شولدە سۋ، تىڭايتقىش ساقتالمايدى، قاتار ارالىعىن 40 سانتيمەتردەن 30 − 35 سانتيمەترگە تارايتۋ كەرەك، تامشىلاتىپ سۋارۋدىڭ جيىلىگىن دە ارتتىرۋ كەرەك“. لي شاۋكۇن بىلاي دەدى: تەحنولوگيالىق جۇلگە ۇقساس، ناقتى پارامەتر مۇلدە ۇقسامايدى.
ناعىز قيىن ءتۇيىن تياناقتاندىرۋدا.
ما فۋيۇي بىلاي دەدى: بۇكىل شينجياڭدا تاعى 30 ميلليون مۋدان استام ەگىستىك جەر ءالى دە قاپتاتىپ سۋارىلۋدا، باسىم كوپ ساندىسى وڭتۇستىك شينجياڭداعى 5 ايماق، وبلىسقا شوعىرلانعان، ”ەگەر تۇگەلدەي تامشىلاتىپ سۋارىلاتىن، سۋ مەن تىڭايتقىش ءبىر تۇلعالاندىرىلعان جوعارى ولشەمدى ەگىنجايعا وزگەرتىلسە، 4 ميلليارد 500 ميلليوننان 6 ميلليارد تەكشەمەترگە دەيىن سۋ ۇنەمدەپ قانا قويماي، استىق پەن ماقتا ءونىمىن، كەمىندە، 3 ميلليون توننادان 4 ميلليون 500 مىڭ تونناعا دەيىن ارتتىرۋعا بولادى“.
ما فۋيۇي بىلاي دەپ قارادى: قيىنشىلىق قۇرىلىستا ەمەس، قايتا ۇيىمدىق تاسىلدە، ”قازىر اۋىل - قىستاق جەرىن ءالى دە وتباسىلارىنىڭ بىتىراندى باسقارۋى نەگىز ەتىلەدى، اتىز بولىكتەرگە بولىنگەن. سۋ، تىڭايتقىشتى ءبىر تۇلعالاندىرۋدىڭ شىنايى ونىمدىلىگىن كورۋ ءۇشىن، ءسوز جوق، ءبىر تۇتاس جوسپارلانىپ، تۇتاستىرىپ رەتتەلگەن جەرگە سۇيەنىپ، سەلبەستىك كووپەراتيۆى، ەگىمشىلىك سەرىكتەستىگى نەمەسە تاجىريبەلى ءىرى وتباسىلار ءبىر تۇتاس شارۋاشىلىق جۇرگىزىپ باسقارۋى قاجەت“.
تاڭ ي - ۋ پارىقتى ۋاقىت وسىنە تۇراقتاندىردى: ”وڭتۇستىك شينجياڭنىڭ كوپتەگەن جەرى ىلە وبلىسىنىڭ 2023 - جىلدان بۇرىنعى جاعدايىمەن ۇقساس. جەر شاعىن بولعاندىقتان، ديقاندار بۇل تەحنولوگيانى ءالى دە تولىق قابىلداي قويعان جوق. سۋ پايدالاناتىن، سۋدى باسقاراتىن سەلبەستىك كووپەراتيۆىن قۇرىپ، قوعامدانعان قىزمەت وتەۋ ۇيىمى ارقىلى ءبىر تۇتاس باسقارۋعا بولادى“. الايدا ول تاعى دا بۇكپەسىزدىكپەن بىلاي دەدى: شەشۋشى ءتۇيىن ءالى دە شارۋالاردىڭ ءونىم مولشەرىنىڭ جوعارىلاۋىن، پايدانىڭ ارتۋىن شىنايى كورۋىنە مۇمكىندىك جاساۋ كەرەك.
بۇل بارىس شينجياڭنىڭ استىق ءونىمىن ارتتىرۋدىڭ سوڭعى جارتى بولىگىن بەلگىلەيدى“. ”14 - بەسجىلدىقتان“ بەرى بۇكىل ەل بويىنشا استىقتىڭ ءونىم مولشەرىن ارتتىرۋدا شينجياڭ بەستەن بىرىنە تاياۋ ۇلەس قوستى، ال شينجياڭدا استىق ەگىلگەن جەر اۋدانى بۇكىل ەل بويىنشا نەبارى ون نەشىنشى ورىندا تۇرادى.
تاڭ ي - ۋ مىنانى ءبىلدىردى: شينجياڭ جاڭا كەزەكتى استىق ءوندىرىس قۋاتىن جوعارىلاتۋ ارەكەتىن كۇش سالا اتقارىپ، 2030 - جىلعا بارعاندا استىق ءونىمىن ارتتىرۋ كولەمىن 20 ميلليارد جىڭ اينالاسىنا جەتكىزۋگە قۇلشىنادى، ”وڭتۇستىك شينجياڭنىڭ ءوندىرىس قۋاتىن ارتتىرساق، شينجياڭنىڭ تۇتاس تۇلعالىق استىق ءونىمىنىڭ ارتۋى تاعى دا زور ورلەۋگە كوتەرىلەدى“.
ىلە ۇلگىسىن شينجياڭدا كەڭ كولەمدە جالپىلاستىرۋعا بولا ما؟ جاۋابى: ارينە، بولادى. الايدا قاز - قالپىندا كوشىرىپ قولدانۋعا بولمايدى، قايتا ”’تاماشا ءادىس، ساپالى تۇقىم، تاماشا ماشينا، قۇنارلى اتىزدى‘ توعىستىرۋ + قاجەتكە قاراي قامداۋ“ سىندى وزەكتى تاجىريبەنى ءاربىر وڭىرگە ۇيلەسەتىن جوباعا اينالدىرۋ كەرەك.
شينجياڭ تاجىريبەسى بۇكىل ەل كولەمىندە جالپىلاستىرىلا باستادى
2023 - جىلى لي شاۋكۇن ۇجىمىنىڭ جۇگەرىنى تىعىز، جوعارى ءونىمدى ەگۋ، دالمە - ءدال رەتتەۋ - مەڭگەرۋ تەحنولوگياسى بۇكىل ەل بويىنشا جۇگەرىنىڭ بىرلىك ءونىمىن جوعارىلاتۋ ينجەنەرياسىنىڭ وزەكتى تەحنولوگياسى قاتارىنا ەنگىزىلدى، قازىر بۇكىل ەل بويىنشا قولدانىلۋ كولەمى 100 ميلليون مۋدان استى. بيىل ىشكى موڭعۇل لي شاۋكۇن قاتارلى مامانداردى استىق ءوندىرىسىنىڭ اقىلشىسى بولۋعا ۇسىنىس ەتتى، سۋ مەن تىڭايتقىشتى ءبىر تۇلعالاندىرۋدىڭ پايدالانىلۋ كولەمى 38 ميلليون 180 مىڭ مۋعا جەتىپ، جىلدىق ءونىم مولشەرى 500 ميلليون جىڭ ارتتى؛ سانشي ولكەسى ءبىر ميلليون 380 مىڭ مۋ جەرگە جالپىلاستىرىپ، مۋ باسىندىق ءونىم مولشەرى 200 جىڭ ارتتى، حىناندا كۇزگى داقىلعا سۋ مەن تىڭايتقىشتى ءبىر تۇلعالاندىرىپ پايدالانۋ كولەمى 16 ميلليون 170 مىڭ مۋعا جەتتى.
”شينجياڭدا زەرتتەپ اشىپ، بۇكىل ەلگە جالپىلاستىرامىز“. لي شاۋكۇن بىلاي دەدى: قازىر ورتا ازياداعى كەيبىر ەلدەردە دە شاعىن كولەمدە ۇلگى كورسەتۋ باستالدى.
جالپىلاستىرۋ قارقىنى تەز، ويتكەنى بۇل ۇلگى قاراپايىم تەحنولوگيانىڭ ۇشتاسۋى عانا ەمەس، قايتا 20 نەشە جىلدىق امالياتتىق ىزدەنىستەن كەلگەن.
لي شاۋكۇن ۇجىمى 2004 - جىلدان باستاپ شينجياڭدا جۇگەرىدەن جوعارى ءونىم الۋ جولىن جۇيەلى زەرتتەدى، 2013 - جىلى ءار مۋىنان 74. 1511 كيلوگرام ءونىم الۋدى جۇزەگە اسىرىپ، ەلىمىزدە جۇگەرىنىڭ مۋ باسىندىق ءونىمىن تۇڭعىش رەت 3000 جىڭنان اسىردى. وسىدان كەيىن ۇجىمنىڭ زەرتتەۋ وزەگى ”قايتكەندە ەڭ از تىڭايتقىش، ەڭ از سۋ، ەڭ از ەڭبەككۇش ارقىلى وسى ءونىم مولشەرىن جۇزەگە اسىرۋعا بولادى“ دەگەنگە ويىستى. ونىڭ سوزىمەن ايتقاندا، ”جوعارى ءونىم الۋدان سىرت، تاعى دا جوعارى ءونىمدى بولۋ، ءتوزىمدى بولۋ، كىرىستى ارتتىرۋ كەرەك، وسى تورتەۋى بىرگە ورىندالعاندا عانا كەڭ كولەمدە جالپىلاستىرۋعا بولادى“.
بۇل وي جەلىسى ءبيداي، سويا بۇرشاق سياقتى داقىلدارعا قاراي كەڭەيۋدە. ”سويا بۇرشاقتىڭ تىعىزدىعى جوعارى، رەتتى بولعاندا، تامشىلاتىپ سۋارىپ قاتار ەگۋدى پايدالانۋعا بولادى“. لي شاۋكۇن بىلاي دەدى: مەملەكەت سويا بۇرشاقتىڭ بىرلىك ءونىمىن جوعارىلاتۋ ينجەنەرياسىن اتقارۋدى ىلگەرىلەتتى، شينجياڭدا ءبيدايعا دا قاتار ارالىعىن جاقىنداتۋ، تىعىزدىعىن جيىلەتۋ، تامشىلاتىپ سۋارىپ قاتار ەگۋ، حيميالىق جولمەن تىزگىندەۋ، جىعىلۋىنان ساقتانۋ ءتاسىلى پايدالانىلدى.
ءبىراق كومەسكى كۇشتى شىن مانىندە اشۋ ءۇشىن ءالى دە پارىق بار. لي شاۋكۇننىڭ ەڭ كوڭىل بولەتىنى تەحنولوگيانىڭ تياناقتاندىرىلۋ مولشەرى: ”كەيبىر شارۋا وتباسىلارى ءالى دە قاپتاتىپ سۋارادى، تىعىزدىعى تومەن. ال ىستەتكەن كۇندە دە، ءاربىر بۋىننىڭ ءبارىنىڭ دۇرىس بولۋىنا دا ءبىر بارىس قاجەت“. ول تەحنولوگيانىڭ پارشالانۋىنان ايرىقشا الاڭدايدى − سورتتى دارىپتەيتىندەر سورتتى عانا دارىپتەپ، تامشىلاتىپ سۋارۋدى دارىپتەيتىندەر تامشىلاتىپ سۋارۋدى عانا دارىپتەپ، اۋىل شارۋاشىلىق ماشينالارىمەن اينالىساتىندار اۋىل شارۋاشىلىق ماشينالارىن عانا تانىستىرىپ، مۇنى تۇتاس تۇلعا دەپ قاراماسا، ونىمدىلىككە جەتۋ قيىن. بۇل ماسەلەلەردى بىرتىندەپ شەشۋ كەرەك.
