9 - ايدىڭ 19 - كۇنى جۇڭگو دەنە تاربيە ۋاكىلدەر ۇيىرمەسى باستالۋ سالتىندا الاڭعا كىردى. □ سۋرەتتى شينحۋا اگەنتتىگىنىڭ ءتىلشىسى جيا حاۋچىڭ تۇسىرگەن
شينحۋا اگەنتتىگىنىڭ 9 ـ ايدىڭ 19 ـ كۇنى جاپونيانىڭ ناگوياسىنان بەرگەن حابارى (تىلشىلەر حۋاڭ حاۋران، يۋە چىنشيڭ، ساۋ يبو). 9 ـ ايدىڭ 19 ـ كۇنى كەشتە 20 ـ كەزەكتى ازيا سپورت جارىسى جاپونيانىڭ ايچى اۋدانى ناگويا قالاسىندا باستالدى.
جەرگىلىكتى ۋاقىت بويىنشا ساعات 18دە باستالۋ سالتىنىڭ كونسەرتى ميزۋحو باقشاسىنىڭ جەڭىل اتلەتيكا الاڭىندا رەسمي باستالدى، وسى كەزدە شامامەن 30 مىڭ ادامدىق وتىرعىدا ٴالى تالاي بوس ورىن بار ەدى. كورەرمەندەردىڭ الاقايلاۋىندا، 45 مەملەكەت پەن وڭىردەن كەلگەن سپورتشىلار الاڭعا رەتىمەن كىردى.
جۇڭگو دەنە تاربيە ۋاكىلدەر ۇيىرمەسى الاڭعا كىرگەندە، بۇكىل الاڭداعىلار قىزۋ قارسى الدى، ەرلەر باسكەتبول سپورتشىسى حۋ ميڭشۋان مەن ايەلدەر بوكس سپورتشىسى ۋ يۇي بەس جۇلدىزدى قىزىل تۋدى بيىك ۇستاپ الدىدا ٴجۇردى. وسى كەزەكتى ازيا سپورت جارىسىنداعى جۇڭگو ۋاكىلدەر ۇيىرمەسىندە جيىنى 815 سپورتشى بار، 38 ۇلكەن ٴتۇر، 369 شاعىن ٴتۇر بويىنشا جارىسقا قاتىناسادى. جۇڭگو كومانداسىنداعىلار، نەگىزىنەن، جاس سپورتشىلار، ورتاشا جاس شاماسى 24 جاس، ولاردىڭ ىشىندە 548 ادام تۇڭعىش رەت ازيا سپورت جارىسىنا قاتىناسىپ وتىر. 2005 ـ جىلدان كەيىن تۋعان سپورتشىلار %27تى يەلەيدى. كوماندادا سۇن يىڭشا، چىن يۇيشي قاتارلى وليمپيادا سپورت جارىسىنىڭ 36 اعا جۇلدەگەرى بار، يۇي زىدي، چىن يۇيجيە قاتارلى جاس ساڭلاقتار دا از ەمەس.
ايچى اۋدانىنىڭ اكىمى، ازيا سپورت جارىسى ۇيىمداستىرۋ كوميسسياسىنىڭ ٴتوراعاسى داسۇن شيۋجاڭ مەن ازيا وليمپيادا القالار كەڭەسىنىڭ ٴتوراعاسى پاتشازادا جوان باستالۋ سالتىندا جەكە ـ جەكە ارناۋ ٴسوز سويلەدى.
بۇل جاپونيانىڭ 1958 ـ جىلى 3 ـ كەزەكتى توكيو ازيا سپورت جارىسىن، 1994 ـ جىلى 12 ـ كەزەكتى حيروسيما ازيا سپورت جارىسىن وتكىزگەننەن كەيىنگى ازيا سپورت جارىسىن ٴۇشىنشى رەت وتكىزۋى سانالادى.
سول كۇنى كەشتەگى باستالۋ سالتىنىڭ نەگىزگى ساحناسى جۇرەك پىشىنىندە بولىپ، ”جاراسىمدى جۇرەك ٴلۇپىلى“ ۇستانىمىن جەتكىزۋ ماقسات ەتىلدى. ويىن نومىرلەرى ايچى اۋدانى مەن ناگويا قالاسىنىڭ تاريحي مادەنيەت مايەگىن بارىنشا ايگىلەدى، سونداي ـ اق جاپونيانىڭ وسىزاماندانعان ونەركاسىبى مەن عىلىم ـ تەحنولوگيا ەلەمەنتتەرىن توعىستىردى.
الاۋ جەتكىزۋ جانە نەگىزگى الاۋدى تۇتاندىرۋ سالتى باستالۋ سالتىن جوعارى ورلەۋگە كوتەردى. الاڭداعى كورەرمەندەردىڭ كۋا بولۋىندا، 6 الاۋ جەتكىزۋشى رەتىمەن ۇتىلاپ، سوڭىندا 2 شىنجىر دوپ سپورتشىسى اكەلى ـ بالالى شىفۋ چۇڭشين مەن شىفۋ گۋاڭجى مىنبەگە شىعىپ، نەگىزگى الاۋدى بىرگە تۇتاندىردى.
ايچى· ناگويا ازيا سپورت جارىسى 9 ـ ايدىڭ 19 ـ كۇنىنەن 10 ـ ايدىڭ 4 ـ كۇنىنە دەيىن وتكىزىلەدى. 45 مەملەكەت پەن وڭىردەن مولشەرمەن 11 مىڭ سپورتشى 43 ۇلكەن ٴتۇر، 71 تارماق ٴتۇر، 469 شاعىن ٴتۇر بويىنشا جارىسقا قاتىناسادى. وسى كەزەكتى ازيا سپورت جارىسى 54 الاڭ ـ سارايدا وتكىزىلەدى، نەگىزىنەن، ايچى اۋدانى مەن ناگويا قالاسىندا وتكىزىلەدى، توكيو، جيفۋ، شيزوكا جانە وساكا دا ٴبىر ٴبولىم جارىس تۇرلەرىن مىندەتىنە الىپ وتكىزەدى. وليمپيادا سپورت جارىسىنىڭ تۇرلەرىنەن تىس، وسى كەزەكتى جارىستا تاعى كابادي، شارباق دوپ، سايىسكەرلىك ونەرى جانە ەلەكتروندى باسەكە سياقتى وليمپيادا سپورت تۇرلەرىنە جاتپايتىن تۇرلەر ورنالاستىرىلدى.
جارىس كۇن ٴتارتىبى بويىنشا، باسكەتبول، فۋتبول، وسى زامانعى بەس ٴتۇر، ۆولەيبول، ەسكەك دوپ، تايكى دوپ، حوككەي دوپ جانە جۇمساق تور دوپ سياقتى تۇرلەر باستالۋ سالتىنان بۇرىن باستالىپ كەتتى. تۇڭعىش توپتاعى التىن مەدال 9 ـ ايدىڭ 20 ـ كۇنى جارىققا شىعادى.
