”ۇلى ۇزاق جورىق − جۇڭگو جۇمىسشى - شارۋا قىزىل ارمياسى ۇزاق جورىعى جەڭىسىنىڭ 90 جىلدىعىن ەسكە ءتۇسىرۋ نەگىزگى تاقىرىپتىق كورمەسىنىڭ“ اشىلۋ سالتى بەيجيڭدە وتكىزىلدى
ساي چي قاتىناستى ءارى ءسوز سويلەدى
9 - ايدىڭ 21 - كۇنى كورەرمەندەر ”ۇلى ۇزاق جورىق − جۇڭگو جۇمىسشى - شارۋا قىزىل ارمياسى ۇزاق جورىعى جەڭىسىنىڭ 90 جىلدىعىن ەسكە ءتۇسىرۋ نەگىزگى تاقىرىپتىق كورمەسىنىڭ“ مەديالار تىلشىلىك كۇنىندە سۋرەت تۇسىرۋدە. 9 - ايدىڭ 22 - كۇنى ”ۇلى ۇزاق جورىق − جۇڭگو جۇمىسشى - شارۋا قىزىل ارمياسى ۇزاق جورىعى جەڭىسىنىڭ 90 جىلدىعىن ەسكە ءتۇسىرۋ نەگىزگى تاقىرىپتىق كورمەسى“ جۇڭگو حالىق توڭكەرىستىك اسكەري ىستەر مۇراجايىندا اشىلدى. نەگىزگى تاقىرىپتىق كورمە جيىنى 7 بولىككە بولىنگەن، 357 پارشا سۋرەت، كەستە، 1061 مادەني مۇرا، حۇجات كورمەگە قويىلدى.
□سۋرەتتى شينحۋا اگەنتتىگىنىڭ ءتىلشىسى يىن گاڭ تۇسىرگەن
شينحۋا اگەنتتىگىنىڭ 9 - ايدىڭ 22 - كۇنى بەيجيڭنەن بەرگەن حابارى. ”ۇلى ۇزاق جورىق − جۇڭگو جۇمىسشى - شارۋا قىزىل ارمياسى ۇزاق جورىعى جەڭىسىنىڭ 90 جىلدىعىن ەسكە ءتۇسىرۋ نەگىزگى تاقىرىپتىق كورمەسىنىڭ“ اشىلۋ سالتى 9 - ايدىڭ 22 - كۇنى تۇستەن بۇرىن جۇڭگو حالىق توڭكەرىستىك اسكەري ىستەر مۇراجايىندا وتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي ءسوز سويلەدى ءارى كورمەنىڭ اشىلعاندىعىن جاريالادى.
تۇستەن بۇرىن ساعات 10دا جۇڭگو حالىق ازاتتىق ارمياسىنىڭ اسكەري وركەسترى «ەرىكتىلەر مارشىن» ورىندادى، بۇكىل الاڭداعىلار جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى. وسىدان كەيىن بۇكىل الاڭداعىلار جىم - جىرت كۇيگە شومىپ، ۇزاق جورىقتا ەرلىكپەن قۇربان بولعان توڭكەرىستىك ارداگەر قۇرباندارعا ءۇنسىز ازا ءبىلدىردى.
ساي چي سوزىندە بىلاي دەپ اتاپ كورسەتتى: 90 جىلدىڭ الدىندا جۇڭگو كوممۋنيستىك پارتياسى جۇڭگو جۇمىسشى - شارۋا قىزىل ارمياسىنا باسشىلىق ەتىپ قات - قابات قيىنشىلىقتار مەن حاۋىپ - قاتەردى جەڭىپ، وراسان زور قۇرباندىق بەرىپ، دۇنيە ءجۇزىن ءدۇر سىلكىندىرگەن، تاريحتا ماڭگى وشپەيتىن ۇزاق جورىقتى جەڭىسپەن ورىندادى. ۇزاق جورىقتىڭ جەڭىسى جۇڭگو كوممۋنيستىك پارتياسى مەن جۇڭگو توڭكەرىستىك ىستەرىنىڭ ساتسىزدىكتەن جەڭىسكە بەت العان ۇلى بۇرىلىسىن جۇزەگە اسىرىپ، جۇڭگو كوممۋنيستىك پارتياسىنىڭ ۇلت تاۋەلسىزدىگىن، حالىقتىڭ ازاتتىعىن جۇزەگە اسىرۋ جولىندا كۇرەس جاساۋ سىندى جاڭا ۇلى جورىعىن باستادى، ول جۇڭحۋا ۇلتىنىڭ ۇلى گۇلدەنۋى تاريحي ۇردىسىندەگى ايبىندى ەسكەرتكىش. جۇڭگو كوممۋنيستەرى مەن قىزىل ارميا قولباسى - جاۋىنگەرلەرىنىڭ ومىرىمەن جانە ىستىق قانىمەن سومداعان ۇلى ۇزاق جورىق رۋحى جۇڭحۋا ۇلتىنىڭ قان تامىرى جانە جان دۇنيەسىمەن تەرەڭ توعىسىپ، جۇڭگو حالقىن ۇزدىكسىز قامال الىپ، قيىندىقتاردى جەڭىپ، جەڭىستەن - جەڭىسكە جەتۋگە شابىتتاندىراتىن جانە دەم بەرەتىن قۇدىرەتتى رۋحاني قوزعاۋشى كۇشكە اينالدى.
ساي چي بىلاي دەدى: نەگىزگى تاقىرىپتىق كورمە پارتيانىڭ قىزىل ارمياعا باسشىلىق ەتىپ جۇرگىزگەن ۇزاق جورىعىنىڭ شۇعىلالى بارىسىن، باعالى تاجىريبەلەرىن، ۇلى ءمانىن، تەرەڭ ىقپالىن جالپى كورىنىستىك ايگىلەپ، ۇزاق ۋاقىتتان بەرى، اسىرەسە، پارتيا 18 - قۇرىلتايىنان بەرى پارتيانىڭ حالىققا باسشىلىق ەتىپ توڭكەرىستىك ءداستۇردى جالعاستىرعاندىعىن جانە ساۋلەلەندىرگەندىگىن، جاڭا تاريحي شۇعىلالى ايبىندى جورىقتى ۇزدىكسىز جاراتقاندىعىن تولىق ايگىلەپ، مۇرات - سەنىم تاربيەسىن، وتانشىلدىق تاربيەنى جانە توڭكەرىستىك ءداستۇر تاربيەسىن ورىستەتۋگە ماڭىزدى تۇعىر ازىرلەدى. بۇل كورمەنى وتكىزۋدەگى ماقسات − قالىڭ كادرلار مەن بۇقارانى قىزىل بيلىككە وڭاي - وسپاق قول جەتپەگەندىگىن، جاڭا جۇڭگوعا وڭاي - وسپاق قول جەتپەگەندىگىن، جۇڭگوشا سوتسياليزمگە وڭاي - وسپاق قول جەتپەگەندىگىن تەرەڭ تانىپ جەتۋگە جەتەكتەپ، پارتيا مەن قىزىل ارميانىڭ ۇلى ۇلەسىن ماڭگى ەستە بەرىك ساقتاپ، توڭكەرىستىك اعا بۋىندار اشقان ۇلى ىستەردى ۇزدىكسىز العا ىلگەرىلەتۋ. جاڭا جورىقتا شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ەكىنى قورعاۋدى“ باتىل ورىنداپ، ۇلى ۇزاق جورىق رۋحىن بار كۇشپەن اسقاقتاتىپ، جاڭا داۋىردەگى ۇزاق جورىق جولىمەن ويداعىداي ءجۇرىپ، قايراتتانا العا ۇمتىلىپ، ەرلىكپەن العا باسىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ جولىندا قاجىماي - تالماي كۇرەس جۇرگىزۋ كەرەك.
ساي چي قاتارلى باسشى جولداستار ءار سالا بۇقاراسىنىڭ ۋاكىلدەرىمەن بىرگە نەگىزگى تاقىرىپتىق كورمەنى ەكسكۋرسيالادى.
يىن لي، لي شۋلەي، جاڭ شىڭمين، لوساڭ جياڭسۇن، ۋاڭ يۇڭ قاتىناستى.
ورتالىقتاعى پارتيا، ۇكىمەت، ارميانىڭ قاتىستى تاراۋلارىنداعى جانە بەيجيڭ قالاسىنداعى جاۋاپتى جولداستار، بەيجيڭدە تۇراتىن اسكەري بولىمدەردەگى وفيتسەر - اسكەرلەر جانە استاناداعى ءار سالا بۇقارا ۋاكىلدەرى قاتارلىلاردان 600دەي ادام قاتىناستى.
نەگىزگى تاقىرىپتىق كورمە جيىنى 7 بولىككە بولىنگەن، 357 پارشا سۋرەت، كەستە، 1061 مادەني مۇرا، حۇجات كورمەگە قويىلدى.
