قۇرىلىس ساتىسى تابىسپەن اياقتاپ، كوپ ءتۇرلى ونىمدىلىك قاتار جارىققا شىقتى
شينجياڭ داشىشيا سۋ يگىلىگى تورابى ينجەنەرياسىنىڭ تۇڭعىش توپتاعى گەنەراتور اگراگاتتارى وندىرىسكە قوسىلىپ ەلەكتر تاراتتى
شينجياڭ داشىشيا سۋ يگىلىگى تورابى ( 9 - ايدىڭ 29 - كۇنى تۇسىرىلگەن). □ سۋرەتتى شينحۋا اگەنتتىگىنىڭ ءتىلشىسى ما كاي تۇسىرگەن
انار بۇلت \ شينجياڭ گازەتىنىڭ ءتىلشىسى كاڭ حاۋيان 9 - ايدىڭ 29 - كۇنى اقسۋدان حابارلايدى. ”داشىشيا سۋ يگىلىگى تورابى ينجەنەرياسىنىڭ تۇڭعىش توپتاعى گەنەراتور اگراگاتتارى ەلەكتر تاراتا باستادى“! 9 - ايدىڭ 29 - كۇنى ساعات 10نان 31 مينۋت وتكەندە، بۇيرىق بەرىلىسىمەن شينجياڭ داشىشيا سۋ يگىلىگى تورابى ينجەنەرياسىنىڭ 1 -، 2 - ءنومىرلى گەنەراتور اگراگاتتارىنىڭ سۋ ترۋبيناسى ىسكە قوسىلىپ، تىزگىن دوڭگەلەگى تەز قارقىنمەن اينالىپ، تۋلاعان سۋ ەنەرگياسى تازا ەلەكتر قۋاتىنا اينالىپ، وڭتۇستىك شينجياڭنىڭ ەلەكتر تورىنا ۇزدىكسىز جەتكىزىلدى. سونىمەن وسى ”ەرەكشە ينجەنەريا“ ەكولوگيالىق سۋمەن قامداۋ، سۋارۋ، تاسقىننان ساقتانۋ جانە ەلەكتر تاراتۋ ونىمدىلىگىن جاپپاي ساۋلەلەندىرە باستادى.
اقسۋ ايماعى قۇمارىق وزەنىنىڭ ورتا، تومەنگى اعارىنداعى شينجياڭ داشىشيا سۋ يگىلىگى تورابى ينجەنەرياسى − مەملەكەتتىڭ 172 ءتۇرلى سۋ ۇنەمدەۋ، سۋمەن قامداۋ كەلەلى سۋ يگىلىگى ينجەنەرياسىنىڭ ءبىرى، سۋ قويماسىنىڭ جالپى سيىمدىلىعى ءبىر ميلليارد 170 ميلليون تەكشەمەتر، ەلەكتر ستانسياسىنىڭ جالپى گەنەراتور اگراگاتتارىنىڭ سيىمدىلىعى 750 مىڭ كيلوۆات.
”قازىر العاشقى توپتاعى 2 گەنەراتور اگراگاتى رەسمي جەلىگە قوسىلىپ ەلەكتر تاراتتى، 3 - ءنومىرلى گەنەراتور اگراگاتى جەلىگە قاتىستى سىناق جۇرگىزۋدە، 10 - ايدا جەلىگە قوسىلىپ ءوندىرىسىن باستاماقشى“، - دەدى جۇڭگو گىجوۋبا توبى جارنا شەكتى سەرىكتەستىگىنىڭ ورىنباسار باس مەڭگەرۋشىسى، باس ينجەنەرى يۇي يىڭ تانىستىرىپ. 3 گەنەراتور اگراگاتتارىنىڭ جىلدىق ورتاشا ەلەكتر تاراتۋ مولشەرى ءبىر ميلليارد 893 ميلليون كيلوۆات ساعاتقا جەتىپ، شامامەن 600 مىڭ وتباسىنىڭ تۇتاس جىلدىق ەلەكتردەن پايدالانۋ قاجەتىن قاناعاتتاندىرىپ، وڭتۇستىك شينجياڭداعى 4 ايماق - وبلىستىڭ ەلەكتر جۇيەسىنىڭ قاۋىرت مەزگىلدى رەتتەۋىنە بەرىك تىرەك ازىرلەدى.
داشىشيا سۋ يگىلىگى تورابى ينجەنەرياسى حالىقارادا جاپپاي مويىندالعان 200 مەتر دارەجەلى قۇم - شاعىل توسپاسىنىڭ ”بيىكتىك شەكتەمەسىن“ بۇزىپ، قازىر دۇنيە جۇزىندەگى ەڭ بيىك بەتون تاقتالى قۇم - شاعىل توسپاسىن سالدى، ەڭ ۇلكەن توسپانىڭ بيىكتىگى 247 مەترگە جەتەدى.
قۇمارىق وزەنى − تارىم وزەنىنىڭ ماڭىزدى قاينارى بولعان اقسۋ وزەنىنىڭ 1 - دارەجەلى تارماق اعارى، داشىشيا سۋ يگىلىگى تورابى ينجەنەرياسى قۇمارىق وزەنىندەگى بىردەن - ءبىر تىزگىندەۋ سيپاتتى ”باستاماشى“ سۋ قويماسى رەتىندە، اقسۋ وزەنى الابىندا تاۋلى وڭىردە تىزگىندەۋ سيپاتتى رەتتەۋ سۋ قويماسى بولماۋ تاريحىن اياقتاتتى. سۋ مول كەزدە سۋدى ساقتاۋ، سۋ ازايعان كەزدە سۋمەن تولىقتاۋ، عىلمي ورنالاستىرۋ ارقىلى بۇل ينجەنەريا تارىم وزەنىنىڭ نەگىزگى اعارىنا جىلىنا 3 ميلليارد 420 ميلليون تەكشەمەتر ەكولوگيالىق سۋ جەتكىزىپ، تومەنگى اعارداعى 6 ميلليون 800 مىڭ مۋدان استام سۋارمالى وڭىردە ”كوكتەمدە قۋاڭشىلىق، كۇزدە سۋ تاپشى بولۋ“ سىندى سۋ ىستەتۋ قيىن بولۋ ماسەلەسىن شەشتى ءارى اقسۋ وزەنى نەگىزگى اعارىنىڭ تاسقىننان ساقتانۋ ولشەمىن 30 جىلدا ءبىر رەت كەزىگۋدەن 50 جىلدا ءبىر رەت كەزىگەتىن دەڭگەيگە جوعارىلاتۋعا بولادى.
2019 - جىلدىڭ سوڭىندا جاپپاي قۇرىلىس باستاعاننان بەرى، داشىشيا سۋ يگىلىگى تورابى ينجەنەرياسىنىڭ ءاربىر ماڭىزدى تۇيىندەرى جۇرت نازارىن اۋداردى: 2024 - جىلى 12 - ايدا توسپانىڭ توبەسىنە 8 اي بۇرىن بەتون جاتقىزىلدى، 2025 - جىلى تيەكتى بەكىتىپ سۋ ساقتاۋ ءساتتى ورىندالدى، 2026 - جىلى 7 - ايدا 2 - مەرزىمدىك سۋ ساقتاۋ (1700 مەتر) بيىكتىگىن تەكسەرىپ وتكىزىپ الۋ تامامدالدى.
”العاشقى توپتاعى گەنەراتور اگراگاتتارىنىڭ وندىرىسكە قوسىلۋى قۇرىلىس كەزەڭىنىڭ تابىسپەن اياقتاعاندىعىن بىلدىرەدى، ونان دا ماڭىزدىسى، بۇل ينجەنەريا ونىمدىلىگىن ساۋلەلەندىرۋدىڭ شىت جاڭا باستاماسى بولماق“. اۆتونوميالى رايوندىق سۋ يگىلىگى مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى لي جياڭ مىنالاردى ءبىلدىردى: داشىشيا سۋ يگىلىگى تورابى ينجەنەرياسى − وڭتۇستىك شينجياڭنىڭ سۋ تورى قۇرىلىسىنداعى تايانىش تىرەك ينجەنەرياسى، ءتىپتى، تارىم وزەنى الابىنداعى ءار ۇلت بۇقاراسىنا تيىمدىلىك جەتكىزەتىن ەكولوگيالىق ينجەنەريا، حالىق تۇرمىسى ينجەنەرياسى، ول ءبىر وزەندى عانا قورعاپ تۇرعان جوق، ءتىپتى، وڭتۇستىك شينجياڭنىڭ سۋ حاۋىپسىزدىگىنىڭ، استىق حاۋىپسىزدىگىنىڭ، ەكولوگيا حاۋىپسىزدىگىنىڭ جانە ەنەرگيا حاۋىپسىزدىگىنىڭ ستراتەگيالىق تومەنگى شەگى.
