جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قۇتتىقتاۋ بايلانىسىمەن
اۆتونوميالى رايون مەملەكەت تۋىن شىعارۋ سالتىن سالتاناتپەن وتكىزدى
چىن شياۋجياڭ، ەركىن تۇنياز، ءزۇمىرات وبۇل، نۇرلان ءابىلماجىن، حى جۇڭيوۋ، جاڭ يىڭچۇن، ۋاڭ لين قاتىناستى
10 - ايدىڭ 1 - كۇنى اۆتونوميالى رايون ءۇرىمجى حالىق الاڭىندا مەملەكەت تۋىن شىعارۋ سالتىن سالتاناتپەن وتكىزىپ، جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قىزۋ قۇتتىقتادى.
□ سۋرەتتى انار بۇلت \ شينجياڭ گازەتىنىڭ ءتىلشىسى شيە لۇڭ تۇسىرگەن
انار بۇلت \ شينجياڭ گازەتىنىڭ تىلشىلەرى ۋاڭ شيڭرۇي، ليۋ ي 10 ـ ايدىڭ 1 ـ كۇنى ۇرىمجىدەن حابارلايدى. 10 ـ ايدىڭ 1 ـ كۇنى تۇستەن بۇرىن اۆتونوميالى رايون ٴۇرىمجى حالىق الاڭىندا مەملەكەت تۋىن شىعارۋ سالتىن سالتاناتپەن وتكىزىپ، جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قىزۋ قۇتتىقتادى. چىن شياۋجياڭ، ەركىن تۇنياز، ٴزۇمىرات وبۇل، نۇرلان ٴابىلماجىن، حى جۇڭيوۋ، جاڭ يىڭچۇن، ۋاڭ لين قاتارلى اۆتونوميالى رايوننىڭ جانە بيڭتۋاننىڭ باسشىلارى ٴار ۇلت، ٴار سالا ۋاكىلدەرىمەن بىرگە سالتقا قاتىناسىپ، ۇلى وتاننىڭ گۇلدەنىپ ـ كوركەيۋىن، باي ـ قۇدىرەتتى بولۋىن تەرەڭ سۇيىسپەنشىلىكپەن تىلەدى، شينجياڭداعى ٴار ۇلت حالقىنىڭ باقىتتى، امان ـ ەسەن بولۋىنا تىلەكتەستىك ٴبىلدىردى.
التىن كۇز مەزگىلى، كۇن شايداي اشىق. ٴۇرىمجى حالىق الاڭىنان دۋماندى دا سالتاناتتى لەپ ەستى. سالتقا قاتىناسقان ٴار ۇلت كادرلارى مەن بۇقاراسى تاڭ بوزىنان وسىندا كەلىپ، رەتتى قاتارعا تۇرىپ، سالتاناتتى ٴساتتىڭ كەلۋىن كۇتتى.
ساعات 10نان 30 مينۋت وتكەندە، مەملەكەت تۋىن شىعارۋ سالتى باستالدى. ەڭسەسىن تىك ۇستاعان مەملەكەت تۋىن قورعاۋ اترەتىنىڭ كوماندير ـ جاۋىنگەرلەرى ارشىندى نىق قادام تاستاپ، مەملەكەت تۋىن قورعاپ تۋ شىعارۋ تۇعىرىنا قاراي ٴجۇردى. ايبىندى «ەرىكتىلەر مارشى» ورىندالىپ، بەس جۇلدىزدى قىزىل تۋ باياۋ كوتەرىلدى. بارلىق ادام مەملەكەت ٴانىن اسقاقتاتا شىرقاپ، مەملەكەت تۋىنا قاراپ قۇرمەت ٴبىلدىردى.
اسقاق جەلبىرەگەن بەس جۇلدىزدى قىزىل تۋعا قاراپ تۇرىپ، پيونەرلەر ۋاكىلى ايبىندى تۇردە ارناۋ ٴسوز سويلەدى. ”جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا باتىلدىقپەن جاۋاپكەرشىلىك ارقالاۋعا دايىنبىز!“ باتىل شىققان بالالار ٴۇنى الاڭدا جاڭعىرىپ، ادال جۇرەگى پارتياعا تالپىنعان، وتان ٴۇمىتىن اقتاۋعا بەل بايلاعان جاڭا داۋىردەگى شينجياڭ ورەندەرىنىڭ اسقاق كەلبەتىن ايگىلەدى.
77 جىلدان بەرى پارتيامىز حالىقتى ىنتىماقتاستىرىپ جانە باستاپ، دۇنيەنى جالت قاراتقان، تاريحتا ماڭگى وشپەيتىن ۇلى تابىستار جاراتتى. شينجياڭنىڭ بايتاق دالاسى پارتيانىڭ شۇلەن شۇعىلاسىنا شومىلىپ، كەرەمەت زور وزگەرىستەر تۋىلدى. پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، جاڭا داۋىردەگى پارتيانىڭ شينجياڭدى باسقارۋ جالپى جوباسىنىڭ عىلمي جەتەكشىلىگىندە، شينجياڭنىڭ ءتۇرلى ىستەرىندە تاريحي سيپاتتى تابىستارعا قول جەتتى، تاريحي سيپاتتى وزگەرىستەر تۋىلدى، ءار ۇلت تيانشان ۇلاندارى اسقاق جىگەرمەن ”15 - بەسجىلدىقتا“ ەكپىندەي ىلگەرىلەپ، بۇكىل ەلمەن بىرگە سوتسياليستىك وسىزامانداندىرۋدى نەگىزىنەن جۇزەگە اسىرۋدا شەشۋشى ىلگەرىلەۋشىلىككە قول جەتكىزۋ جاڭا ساپارىندا ارشىندى قاداممەن ىلگەرىلەۋدە. سالتقا قاتىناسقان ءار ۇلت كادرلارى مەن بۇقاراسى جابال مىنالاردى ءبىلدىردى: رەسپۋبليكانىڭ 77 جىلدىق مەرەيتويى ءارى اۆتونوميالى رايون قۇرىلعاندىعىنىڭ 71 جىلدىعى. ءبىز تاپسىرمانى ەستە بەرىك ساقتاپ، العىس ايتا ەكپىندەي ىلگەرىلەپ، ۇلى وتانىمىز قول جەتكىزگەن كۇللى الەمدى جالت قاراتقان تابىستاردان ەكپىندەي ىلگەرىلەۋ كۇش - قۋاتىن قابىلداپ، شينجياڭنىڭ بايتاق دالاسىندا تۋىلعان سان قيلى زور وزگەرىستەردەن العا باسۋ سەنىمىمىزدى بەكەمدەپ، وتاندى ءسۇيۋ، شينجياڭدى ءسۇيۋ ىنتاسىن ءىس تىندىرىپ ناتيجە شىعارۋدىڭ قۋاتتى قوزعاۋشى كۇشىنە جانە ءىس جۇزىندىك ارەكەتىنە اينالدىرىپ، جۇڭحۋا ۇلتى ورتاق تۇلعا تانىمىن بەكەمدەۋگە، سوتسياليستىك وسىزاماندانعان شينجياڭ قۇرۋعا تىڭ دا اناعۇرلىم زور ۇلەس قوسامىز.
ۋاڭ جيانشين، ءيۇسۇپجان مامەت، ەلزات احمەتجان، قادەن كابەن، لي گاڭ، ۋاڭ گاڭ، قايسار ابدۇكەرىم، ليۋ چۇنلەي، اۆتونوميالى رايوندىق حالىق قۇرىلتايى تۇراقتى كوميتەتىنىڭ، ۇكىمەتتىڭ، ساياسي كەڭەستىڭ، بيڭتۋاننىڭ باسشىلىق القا مۇشەلەرى، شينجياڭ اسكەري رايونىنداعى، قارۋلى ساقشى شينجياڭ باس اترەتىندەگى قاتىستى جاۋاپتى جولداستار، اۆتونوميالى رايوندىق سوت مەكەمەسىندەگى، پروكۋراتۋراداعى قاتىستى جاۋاپتى جولداستار، ءۇرىمجى قالاسىنداعى ءار ۇلت، ءار سالا ۋاكىلدەرى قاتارلىلار سالتقا قاتىناستى.
