جالىن يماتاي ۇلى
ق XX پەن س XX باستارىنا ءۇي، باۋىرلارىنا قازان اسىپ 3 - بالالارى ءومىر ەسىگىن اشقاننان كەيىن، وتىرعان ۇيلەرىنىڭ تار ءارى ۇزاق ۋاقىت اشەكەيلەنبەي توزىعى جەتكەنىن كورىپ، س XX توركىن جاعىنان 50 مىڭ يۋان الىپ كەلىپ، وعان وزدەرىنىڭ جيعان اقشالارىن قوسىپ ەسكىلەۋ ءبىر جاتاعان ءۇي ساتىپ الىپ كوشىپ كىرەدى. «اجال ايتىپ كەلمەيدى» دەگەندەي، ق XX كاسىپ ىستەپ توپىراق تاسىپ جۇرگەن كەزىندە، توپىراق الاتىن جەر قۇلاپ استىندا قالىپ، تۇتقيىل قايتىس بولادى، سونىمەن ارتىندا قالعان 3 بالانى باعىپ - قاعۋ، وتباسىنىڭ بارلىق اۋىرتپالىعى س XXتىڭ موينىنا ارتىلادى.
رەال تۇرمىستىڭ تاۋقىمەتى س XXتى قايتالاي نەكەلەنۋگە ءماجبۇر ەتەدى. س XX ءبىر اۋىلداسىمەن نەكەلى بولىپ، وزىنە قالعان قورا - جايدى ساتىپ جىبەرمەك بولادى. كەلىنىنىڭ بالاسىنان قالعان ءۇيدى ساتىپ جىبەرمەك بولىپ جۇرگەنىنەن حابارلى بولعان ق XXتىڭ اكەسى د XX كەلىنىنىڭ ءۇيدى ساتىپ جىبەرۋىنە قوسىلماي، اشۋ ۇستىندە ءۇيدىڭ ەسىگىن قۇلىپتاپ تاستايدى. سونىمەن ارالارىندا داۋ - داماي كۇن سايىن اسقىنىپ، ءبىر اۋىزدىلىققا كەلە الماي، اقىرى حالىق سوتى مەكەمەسىنە جۇگىنەدى.
دەلو ىستەۋشى سوتشى دەلو ماتەريالىن كورىپ شىققاننان كەيىن، بۇل دەلونى ۇستەل باسىندا وتىرىپ شەشۋدىڭ ەشقانداي ءونىمى بولمايتىنىن ءبىلىپ، الدىمەن قىستاق تۇرعىندار كوميتەتى، اۋىلدىق زاڭ كومەكشىلەرى جانە داۋگەرلەردىڭ كورشىلەرىنەن احۋال ۇعىسىپ، د XXتىڭ قورا - جايدى ساتۋعا قوسىلماۋىنداعى سەبەپ −− ونىڭ 3 نەمەرەسىنىڭ قاراۋسىز قالىپ، بولاشاعىنان الاڭداۋىنان بولعاندىعىنا كوز جەتكىزگەن سوڭ، د XXتىڭ وتباسىنا بارىپ، ونىڭ تۇرمىس حال - جايىن ەگجەي - تەگجەيلى ۇعىسىپ، نەمەرەلەرىنە بولعان اتالىق مەيىرىمىنە راقىمەت ايتۋمەن بىرگە، س XXكە دە بالالارىن باعىپ - قاعۋ بورىشىن وتەۋدىڭ زاڭدىق قاتىناسىن تولىق تۇسىندىرەدى. سوتشىنىڭ ءار ەكى جاققا جالىقپاي قايتا - قايتا قىزمەت ىستەپ، ولاردى بۇرىنعى بەرەكە - بىرلىكتەرىن ساقتاپ، تاتۋ - ءتاتتى ءوتىپ، ۇرپاقتارىن اقاۋسىز باعىپ - تاربيەلەۋ جونىندە تاربيە جۇرگىزۋىنىڭ ناتيجەسىندە، كەلىنى مەن قايىن اتاسى كەلىسىمگە كەلىپ، س XX قورا - جايدى ساتىپ اقشاسىن العاننان كەيىن، اقشانى ۇلكەن ۇلىنىڭ اتىندا بانكەگە قويىپ، 3 بالاسىنىڭ وقۋ قاراجاتى ءۇشىن پايدالانۋ جونىندە ءبىر اۋىزدىلىققا كەلەدى. د XX نەمەرەلەرىنەن الاڭداۋدان ايىعىپ، «مەن نەمەرەلەرىم ءۇشىن وسىنشا جاسقا كەلگەندە سوتتىڭ ەسىگىن اشتىم، تەلەۆيزوردان سوتتىڭ سوت زالىندا اشىلىپ، داۋدىڭ سوت ساحناسىندا شەشىم تاۋىپ جاتاتىنىن ۇنەمى كورەتىنمىن. ال بۇگىن سوتشىنىڭ ۇيىمە كەلىپ، مەنىڭ جاعدايىمدى ۇعىسىپ، سوتتى وتباسىمدا اشىپ، كەلىنىممەن بولعان ارازدىعىمدى وتباسىندا وتىرىپ شەشەرىن مۇلدە ويلاماعان ەكەنمىن، حالىق سوتى مەكەمەسىنە جانە سوتشىعا راقىمەت» دەپ كوزىنە جاس الدى.
حالىق سوتى مەكەمەسىنە ارىز ايتىپ، داۋ كوتەرەتىندەردىڭ سانى دا، داۋدىڭ ءتۇرى دە كوبەيۋگە قاراي بەت الىپ، سوت قىزمەتىنىڭ سالماعى كۇن سايىن ارتىپ، بۇقارانىڭ مۇددەسى مەن ۇددەسىنەن شىعا الۋ قازىر حالىق سوتى مەكەمەلەرىنىڭ قىزمەتتەن ناتيجە جاراتا الۋىنىڭ ءبىر سىناعى بولۋدا. سوندىقتان وسى دەلودان قورىتار ويىمىز: ءاربىر دەلونىڭ ءىس جۇزىندىك قاجەتىن شىعار ءتۇيىن ەتىپ، نەكە - وتباسى، كورشىلىك قاتىناس، سالت - سانا، عۇرىپ - ادەتكە ساياتىن دەلولاردى ۇستەل باسىندا وتىرىپ، زاڭ تارماقتارىنا عانا جۇگىنىپ ءبىر جاقتى ەتۋدەن گورى تومەنگە كوبىرەك ءتۇسىپ، ىسكە قاتىستى جاقتاردىڭ تۇپكىلىكتى وي - ساناسىن جەتىك مەڭگەرۋگە شەبەر بولىپ، زاڭ مەن امالياتتى جانە ءمورالدىق قاتىناستى ءوزارا ۇشتاستىرىپ قىزمەت وتەر بولساق، دەلو ىستەۋدە زاڭدىق ونىمدىلىك پەن قوعامدىق ونىمدىلىككە قاتار قول جەتكىزە العان بولار ەدىك.
