ءبىر جاس ازامات تۇرمىستاعى مازاسىزدىقتار مەن كوڭىلسىزدىكتەردەن قالاي ارىلارىن بىلمەي،ءبىر اقىلگوي قارتتى ىزدەپ بارادى دا ءوز كوڭىلىندەگى مازاسىزدىقتارىن بايان ەتىپ، ءوزىنىڭ ۋنيۆەرسيتەتتى تابىسپەن اياقتاتىپ، الداعى ءومىر ساپارىنا كوپتەگەن اسقاق ارماندار ورناتقانىن، الايدا، ارادا بىرنەشە جىل وتسە دە، تابىستىڭ تالعارىنا شىعا الماعانىن ايتىپ، قارتتان اقىل سۇرايدى. وسى كەزدە باعانادان ونىڭ ءسوزىن تىڭداپ وتىرعان اقىلشى قارت كۇلىمسىرەي ءتىل قاتىپ: «بالام، سەن الدىمەن ماعان مىنا ءبىر شولمەكپەن سۋ قايناتىپ بەرشى»،- دەپ، تامنىڭ بۇرىشىنداعى بىر ۇلكەن شولمەكتى جانە ونىڭ قاسىنداعى كىشكەنتاي پەشتى نۇسقايدى. پەشتىڭ جانىندا وتقا جاعاتىنداي ءبىر تال شىرپى دا جوق ەدى. «ماقۇل اتا»،- دەپ ورنىنان ۇشىپ تۇرعان ازامات سىرتتان ءبىر قۇشاق وتىن اكەلەدى دە، شولمەككە سۋ تولتىرىپ، كىشكەنتاي پەشكە قويىپ، اكەلگەن وتىنىن تۇتاندىرا باستايدى. ءبىراق شولمەكتىڭ ىشىندەگى سۋ كوپ بولعاندىقتان، اكەلگەن ءبىر قۇشاق وتىندى جاعىپ تاۋىسسا دا سۋ قاينامايدى، سونىمەن ول تاعى دا وتىن ىزدەپ سىرتقا شعادى. الايدا قايتا اينالىپ كەلگەندە، قايناماي تۇرعان سۋى ءتىپتى سۋىپ قالعانىن كورەدى. ءبىراق، ول بۇل جولى ءبىر نارسە بايقاعانداي، اسىعىپ وت جاقپايدى، سىرتتان مىنا سۋدى قايناتۋعا جەتەرلىك بىرنەشە قۇشاق وتىن اكەلىپ، وتتى مازداتىپ جاعادى، سۋ سارقىلداپ قاينايدى. ايتسە دە قارتتىڭ ايتقان ۋاقىتىنان جارتى ساعات ءوتىپ كەتكەنىن بايقايدى. ۇيالعانىنان جەرگە قاراپ وتىرىپ قالعان ازاماتقا اقىلگوي قارت: «بالام، ەگەر جەتكىلىكتى وتىنىڭ بولماعاندا مىنا سۋدى قايتىپ قايناتار ەدىڭ؟»،- دەپ سۇرايدى، ازامات ءۇنسىز باسىن شايقايدى. قارت ءسوزىن جالعاپ: «سەن باستابىندا وزىڭە كوپ نىسانا ورناتتىڭ، بەينە شولمەكتىڭ ىشىنە كوپ سۋ قۇيعانىڭ سياقتى. ال، العاشىندا وتىنىڭنىڭ جەتكىلىكسىز بولۋى سەبەبىنەن سۋ قايناماي قالدى، بۇل سەنىڭ سول كوپ نىساناعا قول جەتكىزۋگە قاجەتتى ءبىلىم جيناپ ۇلگىرە الماعانىڭ سياقتى. سەن ءاسىلى سۋدى مەجەلى ۋاقىتقا دەيىن قايناتۋ ءۇشىن، شولمەكتىڭ ىشىندەگى سۋدىڭ ءبىر ءبولىمىن توگىپ تاستاۋىڭ، نە الدىمەن جەتەرلىك وتىن دايىنداۋىڭ قاجەت ەدى، ساعان بۇلايشا جارتى ساعات ۋاقىت كەسىپ، سۋ قايناتىپ بەرۋگە جۇمساعانىم ۋاقىتتى دۇرىس پايدالانۋدى ۇعىنسىن دەگەنىم ەدى»،- دەيدى.
جاس ازامات ءوزىنىڭ تابىسقا جەتە الماي ءجۇرۋىنىڭ سەبەبىن ەندى بىلگەندەي بولىپ، اقىلگوي قارتقا العىسىن جاۋدىرىپ قايتىپ كەتەدى. ول ۇيىنە قايتار جولىندا، ءوزىنىڭ العاش ۋنيۆەرسيتەتتى بىتىرگەن كەزدەگى قۇرعان كوپ جوسپارلارىنان شىندىققا ۇيلەسپەيتىنىن الىپ تاستاپ، شىندىققا جاناسىمدىلارىن ساقتاپ قالدى. سول كۇننەن باستاپ بوس ۋاقىتتارىنان پايدالانىپ، كوزدەۋلى نىسانالارىنا قاتىستى بىلىمدەردى قۇلشىنا ۇيرەندى ءارى سول نىسانالارعا قاتىستى ءوزى ىستەي الاتىن ىستەردەن باستاپ قۇلشىنا قىزمەت ىستەدى. ءسويتىپ، اينالاسى بىرنەشە جىل ىشىندە، تىنباي تەر توگۋىنىڭ ارقاسىندا كوزدەگەن نىسانالارىنا قول جەتكىزدى.
بۇل اڭگىمە بىزگە مىناداي قاعيدانى ۇعىندىرادى: ءارقانداي ادام ءوز بويىنداعى قابىلەتىنە ۇيلەسىمدى، ايقىن نىسانالار ورناتىپ، سوعان قاجەتتى دۇرىس جوسپارلار قۇرىپ، كاسىپتىك قابىلەتتەرىن ۇزدىكسىز جەتىلدىرە ءجۇرىپ، ءوزى ىستەي الاتىن ىستەردەن باستاپ، تاباندىلىقپەن قۇلشىنعاندا عانا تابىسقا جەتەدى.
ءيا، ءوزىمىز ىستەي الاتىن ىستەردەن باستاپ قۇلشىنا قىزمەت ىستەۋ—ءوز ءومىرىمىزدىڭ ءماندى دە قىزىقتى بولىپ باستالۋىنىڭ العاشقى قادامى. ويتكەنى، ءبىز ءومىردىڭ ۇزىن - قىسقالىعىن بەلگىلەي المايمىز. ءبىراق بۇل ومىردە قالاي ءومىر ءسۇرۋ كەرەكتىگىن ءوزىمىز بەلگىلەي الامىز. بىلايشا ايتقاندا، اعاش بەسىكتەن جەر بەسىككە دەيىنگى ارالىقتا قالاي ءومىر كەشىرۋ بارلىعى ءوز قولىمىزدا، ءبىز بارلىق ءىستى ءساتتى باستاي الۋىمىز مۇمكىن ەمەس، ءبىراق ءبىز مينۋت - سەكۋندتارىمىزدى قولدان جىبەرمەي، ءوزىمىز ىستەي الاتىن، جاقىنداعى ىستەردەن باستاپ ىستەپ، تاباندىلىقپەن قۇلشىنساق، تابىس بىزگە ءتان. سوندىقتان، ەرتەڭگى ءومىرىمىزدىڭ ءماندى دە ءساندى بولۋى ءۇشىن، بۇگىننەن باستاپ قۇلشىنايىق!
حانزۋشادان اۋدارعان: بۇلبۇل احىمەت قىزى
اۆتوردىڭ قىزمەت ورنى: قابا اۋداندىق قوعام حاۋىپسىزدىگى مەكەمەسى
