بۇلبۇل احىمەت قىزى
ارمان — تىرشىلىك الەمىنە جان ءبىتىرىپ، تىنىس سيلايتىن الاۋلاعان شابىت، ارمان — تەبىرەنگەن شاقتاعى كوز جاسىمىز، ونىڭ ءار تامشىسىندا جۇرەك تۇكپىرىندەگى رەاسىز سۇيىسپەنشىلىگىمىز شۋاق شاشادى.
ادام ءومىرى كەيدە ماشاقاتقا تولى، جۇرگەن سايىن تار جول، تايعاق كەشۋلەر كوبەيىپ، كوڭىل كوگىن ۇمىتسىزدىك تۇمانى تورلايتىن ساتتەر تۋىندايدى، تەك قايراتىن سەنىممەن قامشىلاپ، ارمانىنا قانات قاققان جاندار عانا باقىت قۇشاعىندا تەربەلەدى!
ءيا، كىرشىكسىز جاننىڭ 20 جىل اڭساعان ارمانى اقىرى جۇزەگە اسىپ، بارلىعىمىزدى شەكسىز قۋانىشقا بولەدى، بۇعان اياۋلى اناسىنىڭ جاتسا - تۇرسا تىلەگەن اق تىلەگى، قۇلىن جۇرەكتىڭ قايسار دا قايراتتىلىعى سەبەپ بولعان ەدى.
ايجان اقىلدى دا مەيىرىمدى قىز، كىشكەنتايىنان ءان ايتۋ، ولەڭ جازۋ، سۋرەت سالۋعا شەبەر بولىپ ءوستى. ول ساۋىققاننان بەرى، وسى ماقالانى جازۋ ويىما كەلە بەرگەن، نەگىزگى جاعدايىن بۇرىننان تولىق بىلسەم دە، ءوز تاراپىنان جەتكىزگەندى ءجون ساناپ، ۇيلەرىنە ارنايى بارىپ اڭگىمەدە بولعىم كەلەتىنىن ايتقانىمدا، ول ماعان: «اپەكە، سول ءبىر قيىن كۇندەردى قالاي وتكەرىپ، بۇگىنگىدەي باقىتتى كۇنگە قالاي جەتكەنىمدى، وقىرمان قاۋىمعا ايتىپ بەرۋگە دايىنمىن، مۇمكىن باسىنداعى باقىتىن باعالاي الماي جۇرگەن كەي قۇربىلارىما وي سالار»، - دەدى. سونداعى اڭگىمەمىز بىلاي ورىلگەن ەدى:
«اپەكە ، مەن ءۇش جاسىمدا سالماقتى ناۋقاسقا شالدىعىپ ەكى اياعىمدى باسا الماي قالىپپىن»،-دەپ باستادى ول، اتا - انام مەنى ارقالاپ، كوپتەگەن شيپاحانالاردىڭ ەسىگىن توزدىرسا دا، ءونىمى بولماپتى، كەيىن كەلە ناۋقاسىم اۋىرلاپ، توسەك تارتىپ جاتىپ قالدىم. اتا - انام بالاپانىنا جەم تاسىعان قارلىعاشتاي شىرىلداپ، الاقانعا سالىپ باعىپ - قاعىپ، دوڭگەلەكتى ورىندىقپەن ( مۇگەدەكتەر ارباسى) كىرىپ - شىعا الاتىن كۇيگە جەتكىزدى. ەندى ۇلكەن قالاعا اپارىپ ەمدەتەمىز دەپ جۇرگەندە، 2010 - جىلى، ءساۋىر ايىندا اسقار تاۋ اكەم و دۇنيەلىك بولدى، توسىن كەلگەن قازانىڭ قايعىسى جان ۇياداعى بارلىعىمىزدى بىرنەشە جىلعا دەيىن باس كوتەرتپەي قويدى، اقىرى قايعىنى قايراتقا جەڭدىرگەن انام: «بالام سەن ەشتەڭەدەن الاڭداما، نۇرلى بولاشاققا سەنىممەن قارا، مەن سەنى قايتسەم دە ەمدەتىپ ساۋىقتىرامىن، اكەڭنىڭ دە جەتە الماعان ارمانى ەدى عوي»،- دەپ، تىرناشتاپ جيعان قاراجاتىمەن شينجياڭ مەديتسينا ۋنيۆەرسيتەتىنە قاراستى ءبىرىنشى شيپاحاناعا اپارىپ كورسەتتى، سول شيپاحانادا 2014 - جىلى ماۋسىم ايىندا جانە 2015 - جىلى قاڭتار ايىندا، ەكى اياعىما ءىرى وتا جاساتۋ ارقىلى بۇكىلدەي ساۋىقتىم، قازىر قالىپتى ادامدارداي ءجۇرىپ - تۇرا الامىن، وتە باقىتتىمىن ...
- قىراننىڭ ارمانى — زەڭگىر كوكتە تالماي قانات قاعىپ، جەر الەمگە كوز تاستاۋ؛ بالىقتىڭ ارمانىءمولدىر سۋدا ەمىن - ەركىن ءجۇزىپ، جاعامەن اسىر سالىپ ويناۋ؛ ۇساق قۇستاردىڭ دا ارمانى بار، جاپ - جاسىل نۋ ورماندا ماڭگىلىك شات - شادىمان سايران سالىپ، تابيعاتتى قۇيقىلجىعان كۇيگە بولەۋ دەگەندەيىن، ادام بالاسىندا عانا ەمەس، بۇكىل تىرشىلىك اتاۋلىنىڭ بارلىعىندا ارمان بولادى عوي، شيپاگەر ەكى اياعىما وتا جاسالعان سوڭ، ساۋىعىپ كەتەتىنىمدى ايتقاندا، انام جانە اپەكەم ۇشەۋمىزدىڭ كوز جاسىمىزدى تيا الماعانىمىز ءالى ەسىمدە، «ادام قاتتى قۋانعاندا جىلايدى» دەگەن ءسوزدىڭ اقيقاتىنا سوندا كوزىم جەتكەندەي بولدى،-دەپ كۇلىمسىرەپ قويىپ، ءسوزىن جالعادى: «باتپانداپ كىرگەن اۋرۋدىڭ مىسقالداپ شىققانى مەنءۇشىن وڭايعا تۇسپەدى، سار توسەك بولىپ جاتقانءسابي كۇندەرىمدە، مۇقتاجدىق قۇيىننان قالاي قۇتىلۋدى ويلاپ جەتە الماسام دا اكەم مەن انامنىڭ مەنىڭ حالىم ءۇشىن اھ ۇرعانىن كورىپ جۇرەگىم ەزىلىپ كەتەتىن، كوز جاسىمدى ول كىسىلەرگە كورسەتپەۋگە تىرىساتىنمىن، ءوزىم تەڭدەس بالالارمەن بىرگە اسىر سالىپ ويناي الماعانىممەن مەكتەپ قۇشاعىنا بارا الماعانىممەن اتا - انامنىڭ، اپەكەلەرىمنىڭ جەتەكشىلىگىندە باعالى بىلىمدەردى ۇيدە جاتىپ - اق يگەردىم، ءتۇرلى گازەت - جۋرنال، كىتاپتار، تەلەۆيزور، راديو مىنە وسىلار مەنىڭ جان سەرىگىم بولدى، كەيىن كەلە، دوڭگەلەكتى ورىندىقتا وتىرىپ، كومپيۋتەردى دە جەتتىك مەڭگەرە الاتىن بولدىم، ءبىرقانشا ءان - جىر بايقاۋلارىنا قاتىناسىپ جاقسى ناتيجەلەردى دە يەلەدىم، سويتە ءجۇرىپ، قوعامدىق ورتادا ءبىر كىسىلىك ورنىمدى تاۋىپ، ۇلكەندەردىڭ العىس - باتاسىن الدىم، ساۋىعىپ كەتەمىن دەگەن سەنىمىم دە ارتا ءتۇستى، اقىرى سول سەنىمنىڭ جەتەگىندە، شيپاگەردىڭ قۇلشىنىسىمەن اياۋلى انامنىڭ اق تىلەگى ورىندالىپ، بۇگىنگدەي باقىتتى كۇنگە جەتتىم».
- نەگىزى، ءارقانداي ادامنىڭ بويىندا، سابىرلىلىق، ەڭبەكقورلىق قاسيەتى بولسا، ءوزىن قوراشسىنۋدان اۋلاق بولاتىن بولسا، قانداي دا ءبىر قيىندىقتاردى وپ - وڭاي جەڭىپ كەتە الادى! مەن ساۋىققاننان بەرى انام وتە كوڭىلدى، ءتىپتى توي توپتاردا، باس قوسۋلاردا بولسىن، دوس - جاران، تانىستارىن كورسە: «مەنىڭ بالام ساۋىعىپ كەتتى»،- دەپ اعىنان جارىلىپ، ءوز قۋانىشىن ايتا جونەلەدى. الداعى جەردە ونەردەگى جەتكەن جەتىستىكتەرىممەن، باعىندىرعان بيىكتەرىممەن ول كىسىنى جانە وزدەرىڭىزدى ءالى تالاي قۋانىشقا بولەيتىنىمە سەنەمىن،-دەپ اڭگىمەسىن اياقتاعان بولاتىن .
ءيا، اياۋلى ءسىڭلىم، سەن قايسار دا اقىلدى بويجەتكەنسىڭ، سەنىڭ ءتاتتى ارماندارىڭنىڭ ورىندالاتىنىنا سەنەمىن، مەيلى قاي زاماندا بولسىن، جەڭىس تەك وزىڭدەي جالىندى جاندارعا ءتان، ءوزىڭ ايتقانداي، وسى ماقالانى وقىعان ءاربىر وقىرمان تاربيەلىك قۋاتىڭنان تەبىرەنىپ، قايسارلىعىڭ، مەيىر شۋاعىڭ، وقىرمانداردىڭ جان دۇنيەسىنە توگىلىپ، كوزدەرىنە سۇيىسپەنشىلىك جاسىن ءۇيىرىپ، ساناسىنا، تەرەڭ وي ۇيالاتىپ، عيبىرات الار بولسا نۇر ۇستىنە نۇر بولار ەدى ...
اۆتوردىڭ قىزمەت ورنى: قابا اۋداندىق قوعام حاۋىپسىزدىگى مەكەمەسى
