چىن زىحۋا، لي يۇڭ
بۇل كۇندەرى ءۇنحاتتا ەسەپ اۋدارىپ تولەۋ جاپپاي جالپىلاستى، ەكى ولشەمدى كودتى سكانەرلەپ، اقشا تولەۋ دەگەندى باسىپ قالساڭىز بولعانى، مايدا اقشا ىزدەۋدىڭ اۋرەسىنەن قۇتىلاسىز. دەسە دە، مۇنداي وڭاي تولەۋ ءادىسىنىڭ الدامكوستىكتىڭ جاڭا تاسىلىنە اينالعانىن ەشكىم ويلاماعان شىعار.
جۋىقتا قۇلجا قالاسى سەلبەستىك اۋماعىنداعى كوپتەگەن ساۋدا دۇكەندەرى، ەرەن بازارلار ءۇنحاتتا بەتپە - بەت ەسەپ اۋدارۋ الدامكوستىگىنە ۇشىرادى.
24 - شىلدەدە ءبىر ەر ادام قۇلجا قالاسى سەلبەستىك اۋماعىنداعى ءبىر ساۋدا دۇكەنىنە كىرىپ ازىق - تۇلىك ساتىپ الادى. اقى تولەيتىن كەزدە، ول ءۇنحاتتا تولەيتىنىن ايتادى دا، اقى الۋ تۇعىرىنا جاپسىرىلعان ەكى ولشەمدى كودتى سكانەرلەيدى. ول سكارنەرلەپ بولعان سوڭ، قول تەلەفونىن ارى - بەرى شۇقىلاپ، قوجايىنعا تولەۋ ءساتتى بولعان پاراقشانى كورسەتەدى.
«اۆاتارى مەن لاقاپ اتى دۇرىس، ماسەلە جوق». دۇكەنشى قارسى جاقتىڭ اقشا تولەگەن پاراقشاسىنا ءبىر كوز جۇگىرتكەننەن كەيىن كوپ ەشتەڭە ويلامايدى. ايتسە دە، ەر ادام كەتىپ بىرەر مينۋتتان سوڭ، قول تەلەفونىن قاراعاندا، اقشانىڭ تولەنبەگەنىن بايقايدى.
سودان كەيىنگى بىرنەشە كۇندە تاعى دا كوپتەگەن ساۋدا دۇكەندەرى مەن ەرەن بازارلار ۇقساس جاعدايعا تاپ بولادى، قارسى جاقتىڭ سكانەرلەگەنى انىق، اقشانىڭ ءساتتى تولەنگەنى تۋرالى پاراقشانى دا كورگەن، ءبىراق اقشا تولەنبەيدى. سونىمەن دۇكەنشىلەر ساقشىعا مالىمدەيدى.
حالىق ساقشىلارى دۇكەندەردەگى بەينەباقىلاۋ ماتەريالدارىن تەكسەرىپ كورۋ ارقىلى دەلو تۋدىرعان ادامنىڭ ۇقساس ءبىر ەر ادام ەكەنىن بايقايدى. حالىق ساقشىلارى قىرۋار تەكسەرۋلەر ارقىلى كۇدىكتى لي ميڭ (وزگەرتىلگەن اتى) دەپ تۇراقتاندىرادى.
ءاسىلى، لي ميڭ الدىن الا قول تەلەفونىنا ەكى ولشەمدى كودپەن تولەۋ ءساتتى بولعان پاراقشانى جاسايتىن ءبىر جۇمساق بولشەك ورناتىپ العان. ءار جولى زات ساتىپ الىپ اقشا تولەيتىن كەزدە، الدىمەن دۇكەنشىنىڭ اقشا تولەۋگە ارناعان ەكى ولشەمدى كودىن سكانەرلەپ، دۇكەنشىنىڭ لاقاپ اتىن ءبىلىپ العاننان كەيىن، جۇمساق بولشەكتى اشىپ، لاقاپ ات پەن تولەنەتىن اقشا سوماسىن ەنگىزسە بولدى، جۇمساق بولشەك اقشا تولەۋ ءساتتى بولعان ءبىر پاراقشانى جاساپ بەرەدى ەكەن.
سوڭىنان ول ونى دۇكەنشىگە كورسەتەدى، لاقاپ اتى مەن اقشا سوماسىنىڭ دۇرىستىعىن كورگەن دۇكەنشى كوپ ەشتەڭە ويلاماي، ونى جولعا سالىپ قويادى ەكەن. اندا - ساندا ءبىر دۇكەنشى قول تەلەفونىن كورىپ، اقشانىڭ تولەنبەگەنىن ايتقان كەزدە، لي ميڭ قول تەلەفوننىڭ ينتەرنەت سيگنالى تۇراقسىز دەگەن سىلتاۋمەن تاعى ءبىر رەت تولەگەن بولىپ كورسەتەدى، دۇكەنشى سوندا وڭاي سەنىپ، ونى شىنداپ جولعا سالىپ جىبەرەدى ەكەن. لي ميڭ وسىلايشا وپ - وڭاي پايداعا باتىپ ءجۇرىپتى.
ەڭ سوڭىندا، لي ميڭ وسىنداي تاسىلمەن سەلبەستىك اۋماعىنداعى كوپتەگەن دۇكەنشىلەردەن الداپ العان 400 نەشە يۋان اقشا تۇگەلدەي يەلەرىنە قايتارىلادى. لي ميڭنىڭ 17 جاستا عانا، ازامات جاسىنا تولماعانىن ەسكەرىپ، حالىق ساقشىلارى وعان سىن - تاربيە بەرەدى ءارى اتا - اناسىنا قاتاڭ باسقارۋعا تاپسىرادى.
اۋدارعان: نۇرلان جانايقان ۇلى
