ۋىنچۋانداعى جەر سىلكىنىسىنەن كەيىنگى قايتا قۇرۋدان ەستەلىك
شينحۋا اگەنتتىگىنىڭ ءتىلشىسى
كوزدى اشىپ - جۇمعانشا 10 جىل وتە شىقتى، «12 - مامىر» ۋىنچۋانداعى ەرەكشە اۋىر جەر سىلكىنىسى تۋىلعان ءوڭىر ماساتىداي قۇلپىرىپ، قايتا سەرپىلدى.
10 جىلدىڭ الدىنا قايتا قايىرىلار بولساق، ادامداردىڭ ءومىرىن قۇتقارۋ، مەكەندى قايتا قۇرۋ، كوركەيتۋ، دامىتۋ بارىسىندا، جۇڭگو كوممۋنيستىك پارتياسى جۇڭگو حالقىن باستاپ، جان دۇنيەنى تەبىرەنتەتىن تالايلاعان ايبىندى داستان جازىپ، قيىنشىلىقتى جەڭۋدەن قامال الۋدىڭ حيكىمەتتەرىن ءبىر - بىرلەپ جاراتتى.
ءبىر كۇشپەن جەر - الەمدى تەبىرەنىتتى؛ ۇلەس قوسىپ ءومىردى ورنەكتەدى
5 - ايداعى ۋىنچۋاننىڭ وزەن اڭعارى مەن تاۋلارىندا 400 مىڭ ءتۇپ عاسىرلىق شاي اعاشى بۇرشىك جاردى. لۇڭمىنشان تاۋى سىلەمى الۋان تۇسكە بولەندى. ول ارا تىڭ تىنىسقا كەنەلگەن ورمان، ول ارا قايتالاي گۇلگە ورانىپ، تىرشىلىك جالىنى لاۋلاعان جەر.
ۋىنچۋان اۋدانى يىڭشيۋ قالاشىعى يۇيزىشي قىستاعىندا، كوك توبەلى اق عيماراتتار تاۋ بوكتەرىنە سالىنىپتى. ءار كۇنى كەشقۇرىم ەلۋدى ەڭسەرگەن جاڭ جىفۋ اتىزدا سەيىلدەۋدى ۇناتادى. جول جاعالاۋىندا الۋان ءتۇرلى گۇلدەر جايقالىپ تۇر.
جاڭ جىفۋ يۇيزىشيدا تۋىپ - وسكەن، جەر سىلكىنۋدىڭ الدىندا، يۋانشيۋانكوۋ ورتا مەكتەبىنىڭ كۇزەتشىسى بولاتىن. جاڭ جىفۋ بىلاي دەدى: مەن فاڭ جيە مۇعالىمدى ۇنەمى ەسكە الىپ جۇرەتىنمىن. جەر سىلكىنگەندە، فاڭ جيە كلاستىڭ ەسىگىن قولىمەن تىرەپ تۇرىپ، نەشە ون وقۋشىنى قۇتىلدىرىپ، ءوزى قۇلاعان تامنىڭ استىندا قالادى. قۇتقارۋ، كومەكتەسۋ قىزمەتكەرلەرى ونىڭ ماڭگى قۇلاماس تىرشىلىك ەسىگىن كوتەرىپ تۇرعانداي قوس قولىن سوزعان كۇيى سۇلاپ جاتقانىن بايقايدى.
جاڭ جىفۋ: مۇنداي ادامدى قايتىپ ۇمىتايىق! - دەدى.
اپاتتان كەيىنگى قايتا قۇرۋ بارىسى دا ءومىر مەن ءولىم سىناعىنا ءدوپ كەلدى. بەيچۋان اۋدانىنىڭ كونە قالاسى جۇرتىنىڭ جانىنداعى ۋىنچۋان ەرەكشە اۋىر جەر سىلكىنىسى ەسكەرتكىش سارايىنىڭ ىشىندە ادامدار ءبىر قاتار ايكەلدىڭ الدىندا ۇنەمى ۇيلىعىپ قالادى. ول جەر سىلكىنىسى اپاتى تۋىلعان وڭىرگە كومەكتەسۋگە كەلىپ قۇربان بولعان قاھارمانداردىڭ ايكەلى. ونىڭ ىشىندە سۇي شۋەشۋان بار.
سۇي شۋەشۋان كوزى تىرىسىندە ۋيفاڭ قالاسىنىڭ جەر سىلكىنىسى، اپاتتان قۇتقارۋ، كومەكتەسۋ ىستەرى الدىڭعى شەبىنىڭ قولباسشىسى بولاتىن. ول قالدىق سىلكىنىسكە، كوشكىنگە جانە دومالاعان تاسقا قاراماي، كومەككە كەلگەندەردى باستاپ، بەيچۋان اۋدانى گۇيشي اۋىلىنىڭ جەرىن تۇگەلدەي ارالايدى، كەيدە ءتۇنى بويى شارلايدى. 2009 - جىلى 7 - ايدىڭ 13 - كۇنى قاتتى قالجىراعاندىقتان، جىعىلىپ تۇسەدى. حال ۇستىندە جاتقاندا، قاسىندا وتىرعان قارت شەشەسىنە: شەشە، جازىلعاننان كەيىن، ءسىزدى جاڭا بەيچۋاندى كورۋگە ەرتىپ بارايىن، - دەيدى.
وتانىمىزدىڭ جەر - جەرىنەن كومەككە كەلگەندەردىڭ لۇڭمىنشان تاۋى سىلەمىندەگى قالا - قالاشىق، زاۆود، كەندەردە، اۋىل - قىستاق، اتىز - ارىق باسىندا شايقاس جۇرگىزگەندىگى جەر سىلكىنىسى اپاتى تۋىلعان وڭىردەگى كادرلار مەن بۇقارانى ەرەكشە اسەرلەندىرىپ، ءوزىن الۋەتتەندىرىپ، قايراتتانا العا باسۋعا جەبەدى.
سۇي شۋەشۋان قايتىس بولعان جىلى، لان حۇي بەيچۋان اۋدانىنىڭ ورىنباسار اكىمدىگىنە تاعايىندالدى. وسىدان سوڭ، لان حۇي توزىعى جەتكەن تاۋ - تاس، وزەن اعارى جولدارىندا تىنىمسىز شاپقىلاپ، 240 نەشە مىڭ كيلومەتر جول باستى. 2013 - جىلى 5 - ايدىڭ 23 - كۇنى اۋرۋ سەبەبىنەن اۋىلعا كەلگەن لان حۇي وپەراتسيا جاساتقان جارانىڭ اۋىزى جازىلماي، كولىكتەن ءتۇسىپ، ءدارى اۋىستىرىپ جاتقاندا، وقياتتان بوگەت كولگە ءتۇسىپ كەتىپ، باقىتقا قارسى قايتىس بولدى.
جەر سىلكىنگەندە، ياڭشيۋ قالاشىعىندا قيراندىنىڭ استىندا 125 ساعات كومىلىپ جاتقان جياڭ يۇيحاڭدى شاڭحاي ءورت ءسوندىرۋ كوماندير - جاۋىنگەرلەرى قۇتقارىپ الدى. «ءورت ءسوندىرۋ كوماندير - جاۋىنگەرلەرى ماعان 2 - رەت ءومىر بەردى، مەن دە سولار سياقتى بولامىن». سول جىلدىڭ اقىرىندا جياڭ يۇيحاڭ اسكەرگە قاتىناسۋعا تىزىمدەلىپ، ءوزىنىڭ ايتقانىنداي شاڭحاي ءورت ءسوندىرۋ جاۋىنگەرىنە اينالدى.
جياڭ يۇيحاڭدى قۇتقارعان «كونە بانجاڭ» جۋ چيڭياڭ: قۇتقارۋ، كومەكتەسۋ اترەتى قازا بولعانداردى بايقاعاندا باسقا دا جاڭا اسكەرلەر ولاردى الىپ شىعۋعا جۇرەكسىنەدى، مۇنداي كەزدە جياڭ يۇيحاڭ كەۋدە كەرىپ العا شىعاتىن، - دەدى. جياڭ يۇيحاڭنىڭ بانى ءار جىلى كوپتەگەن ادامدى قۇتقارادى. كوپتى كورگەن جياڭ يۇيحاڭ اترەتتەگىلەردىڭ كوڭىل كۇيىن جۇباتاتىن «مامانعا» اينالدى.
«ەسەيگەندە پاراشوتشى اسكەر بولامىن» دەگەن جازۋ جازىلعان كەرمە تۋدى بيىك كوتەرگەن كىشكەنتاي چىنچياڭ ءالى ەسىڭىزدە مە؟ قازىر ول، راسىندا، پاراشوتشى اسكەر بولدى. ەرىكتىلەر قاتەردەن الىپ شىققان بەيچۋان ورتا مەكتەبىنىڭ وقۋشىسى دۋ سانسان قازىر الەۋمەتتىك يگىلىك ۇيىمىنىڭ جاۋاپتىسى.
2010 - جىلى يۇيشوۋدا جەر سىلكىنگەندە، بانفاڭ رايونىنداعى كيىم - كەشەك ساتاتىن بەيچۋاندىق ءمالىش ساۋداگەرلەر زاتتارى كەلە سالا يۇيشوۋعا توتە جىبەردى؛ 2013 - جىلى لۋشاندا جەر سىلكىنىپ 4 ساعاتتان كەيىن، ۋىنچۋان اۋدانى شۇيمۋگوۋ قالاشىعىنداعى 20 نەشە قىستاق تۇرعىنى ءوز ەرىكتەرىمەن لۋشانعا باردى؛ 2017 - جىلى جيۋزايگوۋدا جەر سىلكىنگەندە، ياڭشيۋ قالاشىعى جۇڭتانباۋ قىستاعى پارتيا ياچەيكاسىنىڭ شۋجيى ياڭ يۇنبيڭ بۇقارانى باستاپ، اسقار تاۋدان اسىپ، جەر سىلكىنىسى تۋىلعان جەرگە توتە تارتتى...
كۇرەس جاساۋدىڭ ارقاسىندا 10 جىلدان كەيىن، اپات تۋىلعان وڭىردە تىرشىلىك تىنىسى قايتا جانداندى.
تاعدىرلاس، تىنىستاس جاۋاپكەرلىك؛ اپاتتاردا سومدالعان بەرەكە - بىرلىك
تاعى دا 5 - اي كەلدى، 10 جىلدىڭ الدىنداعى كورىنىس كوز الدىمىزدا.
جەر سىلكىنىسى تۋىلعان العاشقى كۇندەرى، شۇعىل جەتكىزىلگەن شاتىرلار اپات تۋىلعان وڭىرلەردىڭ جول جاعالاۋلارىنا تاۋ بولىپ ءۇيىلدى، شاتىردى كىم كەلىپ قۇرادى؟ بارلىق جەردە ادام تاپشى، جەرگىلىكتى كادرلار تۇنەرۋلى. ەگىنشىلىككە پايدالاناتىن 3 دوڭگەلەكتى ءبىر موتوتسيكل كەلىپ توقتاي قالدى، ۇستىنەن 10 جىگىت سەكىرىپ ءتۇسىپ جاتىپ، «كومەكتەسۋگە كەلدىك»، - دەدى.
جىگىتتەر شاندۇڭنىڭ دۇڭجۇي اۋدانىنان كەلىپتى، ولار 3 دوڭگەلەكتى ءبىر موتوتسيكلگە سىعىلىسا وتىرىپ، 3000 يۋان اقشا، 38 ساندىق مينەرال سۋ، 50 ساندىق دايىن كەسپە، 50 كيلوگرام شاندۇڭ قاتتاماسىن الىپ، اۋىلدارىنان جولعا شىعىپتى. 3 دوڭگەلەكتى موتوتسيكلمەن جوعارى جىلدامدىقتى تاس جولعا شىعۋعا بولمايتىندىقتان، تاۋ اسىپ، تاس باسىپ، نەشە كۇن، نەشە تۇننەن كەيىن، اپات تۋىلعان جەرگە كەلىپتى.
نانجيڭ قالاسى جياڭنيڭ رايونىنىڭ جىلۋ اتاۋ تۇيىنىندە، قوقىر - قوقسىق تەرەتىن ءبىر قاريا 5 يۋان جىلۋ اتاعاننان سوڭ، تۇستەن كەيىن تالاي جىل جيناعان مايدا اقشاسىن الىپ بانكەگە بارىپ 100 يۋاندىق اقشاعا اۋىستىرىپ الىپ جىلۋعا اتادى؛ ال ءوزىنىڭ ۇستىنە ىلگەنى قىرىق شوقپىت كيىم.
بۇل جۇڭحۋا ۇلتىنىڭ قانىنداعى ىزگىلىك جانە جاۋاپكەرشىلىك. جەر سىلكىنىسىنەن كەيىنگى ءبىر ايدىڭ وزىندە پارتيا ورتالىق كوميتەتىنىڭ ۇندەۋىمەن 19 ولكە، قالا اۋىر اپات تۋىلعان اۋداندارعا باعىتتامالى كومەكتەستى، 300 نەشە مىڭ ادامدىق كومەكتەسۋ قوسىنى جەر سىلكىنىسى اپاتى تۋىلعان وڭىرلەرگە ىلگەرىندى - كەيىندى كەلدى، ميلليونعا جۋىق ەرىكتى ءوز ەرىكتەرىمەن اپات تۋىلعان جەرگە كومەككە كەلدى، ەل ءىشى - سىرتىنداعى باۋىرلاستار تۇس - تۇستان كومەك كورسەتتى، اپات تۋىلعان ءوڭىر قۇرىلىس جۇرگىزەتىن شايقاس مايدانىنا اينالدى:
− جەر سىلكىنىسىندە جيانمىن اۋىلى اۋىر دارەجەدە ءبۇلىندى. حيلۇڭجياڭ ولكەسى ارناۋلى ءماجىلىس اشىپ، جيانگى اۋدانىن «لۇڭجياڭنىڭ ءبىرىنشى اۋدانى» ەتىپ بەلگىلەدى.
«شىركىن - اي، قۇلاعان ۇيلەردى ءاپ - ساتتە جوندەي الاتىن بولساقشى». جيانگى اۋدانىنا العاش كەلگەندە، حيلۇڭجياڭ ولكەلىك كومەك بەرۋ ىستەرىنىڭ باس قولباسشىسى ليۋ گوحۇي شاتىردا قالعان قارتتى كورىپ كوز جاسىنا ەرىك بەردى. داچيڭدىق بۇل جىگىت جۇمىستى اپىرىپ - جاپىرىپ ىستەيدى. قان قىسىمى جوعارىلاسا بولدى بىلدىرتپەي ءدارىسىن ءىشىپ الادى دا ىستەي بەرەدى.
− بەيچۋان اۋدانىنىڭ بايني اۋىلى جەر سىلكىنىسىنەن كەيىن، «وقشاۋ ارالعا» اينالدى. شاندۇڭ يانتاي كومەك بەرۋ ىستەرىنىڭ كادرى جاڭ ياۋجىڭ شاتىردا ۇيىقتادى.
جاڭ ياۋجىڭ: سىچۋان سوناۋ جىلدارى قىزىل ارميا باسىپ وتكەن جەر. پارتيا مۇشەسى رەتىندە، مەن اعا بۋىنداردىڭ وسى جەرگە سىڭىرگەن ەڭبەگىن اقتايمىن، - دەدى.
− ۋىنچۋان اۋدانىنىڭ ميانسى قالاشىعىنداعى مينجياڭ دارياسىنىڭ ەكى جاعالاۋى جالاما قۇز. كومەكتەسۋگە كەلگەن گۋاڭدۇڭدىق مامان جاڭ تۇڭ تۇتقيىل مەرتىگىپ، بالداقپەن قۇرىلىس ورنىنا بارعاندا، اياعىنداعى بولات تاقتايدىڭ بۇرانداسى بوساپ، تابانىنان قان شىعىپ كەتەدى. ول بىلاي دەدى: باتىس بولەكتىڭ بايلىقتان، ادام كۇشىنەن پايدالانىپ، شىعىس بولىكتىڭ دامۋىنا كومەك كورسەتكەنىن ءوز كوزىممەن كورمەسەم سەنبەس ەدىم، قازىر شىعىس بولىك بايىدى، باتىس بولىككە كومەك بەرۋ ءبىزدىڭ جاۋاپكەرشىلىگىمىز.
شاڭحايدىڭ كومەك بەرۋ قوسىنى چيڭشىنشاننان شەگىنگەندە، توڭىرەكتەردەگى قىستاقتاردان سان مىڭداعان ادام ولاردى اتتاندىرعالى كەلەدى، مۇنى كورگەن كومەك بەرۋ قوسىنىنداعىلار قيماس سەزىممەن كوزدەرىنە جاس الادى.
قوسىن تاراسا دا سۇيىسپەنشىلىك ماڭگى ساقتالادى. اپاتتان قۇتقارۋ، كومەك بەرۋ، اپاتتان كەيىن قايتا قۇرۋ ءىسى جۇرگىزىلىپ 10 جىل وتسە دە، بۇل سۇيىسپەنشىلىك ءتىپتى دە قويۋلاي ءتۇستى.
چيڭچۋاندا، جىجياڭنىڭ شاي كاسىبى سىچۋانعا ىرگە تەپتى، 300 ادامدىق شاي كووپەراتيۆىن كومەكپەن قۇرۋدىڭ ءوزى 200دەن استام شارۋانى كەدەيلىكتەن قۇتىلدىرادى. 2017 - جىلى چيڭچۋاننىڭ ەلەكتروندى ساۋدا ايىرباس سوماسى 400 ميلليون يۋاندى قۇرادى، تاۋ قويناۋىنداعى اۋدان «ەلەكتروندى ساۋداداعى بەلدى اۋدانعا» اينالدى.
...
پارتيا مەن ۇكىمەتتىڭ جوعارى ساپالى ۇيىمداستىرۋىنىڭ ارقاسىندا كادرلار مەن بۇقارا، مەملەكەت مەنشىگىندەگى كاسىپورىندار مەن حالىق باسقارۋىنداعى كاسىپورىندار، قوعامدىق ۇيىمدار مەن جەكەلەر جوعارى - تومەن بولىپ، ءبىر نيەتپەن سەلبەسىپ، تاراپتار بىرلەسىپ اتتانىسقا كەلىپ، تىزە قوسا كۇرەس جاساپ، ىنتىماقتىڭ، سەلبەستىكتىڭ، دامۋدىڭ، گۇلدەندىرۋدىڭ جويقىن كۇشىن قالىپتاستىردى.
ۇلگى بولۋدىڭ ءوزى ءبىر ءتۇرلى جاۋاپكەرشىلىك؛ قاجىماي قۇلشىنۋدىڭ ءوزى قايتا تولىسۋ
ۋىنچۋانداعى اۋىر جەر سىلكىنىسى جاڭا جۇڭگو قۇرىلعاننان بەرگى ويرانداۋ سيپاتى ەڭ كۇشتى، قامتۋ كولەمى ەڭ كەڭ، قۇتقارۋ قيىندىعى ەڭ اۋىر ءبىر رەتكى جەر سىلكىنىسى بولدى. اپاتتان كەيىنگى قايتا قۇرۋ جۇمىسى «دۇنيە جۇزىلىك قيىن ماسەلە» دەپ اتالىپ، ەلىكتەيتىندەي ۇلگى بولماعان.
جەر سىلكىنىسى تۋىلا سالا، پارتيا ورتالىق كوميتەتى نۇسقاۋ بەرىپ، حالىقتىڭ جانىن قۇتقارۋ كەزەك كۇتتىرمەيتىن جۇمىس دەپ باسا دارىپتەپ، اپات رايونىنداعى حالىق بۇقاراسىنىڭ تۇرمىسىن امالدىڭ بارىنشا ويداعىداي ورنالاستىردى.
پارتيانى «تىرەك»، بۇكىل ەل حالقىن سۇيەنىش ەتكەن اپات رايونىنداعى كادرلار مەن بۇقارانىڭ جالىندى قۋاتى تاسقىندادى.
«مۇندا نازالانۋ بولمادى». جەر سىلكىنىسىنەن كەيىن، اپات رايونى چۇڭجوۋعا ەرىكتى بولىپ بارعان ا ق ش - ندىق جون ءوزى كورگەن كورىنىستى بىلايشا سۋرەتتەيدى: «قىستاقتاعى ءبىر كادر كوز جاسىن كولدەتە ءجۇرىپ ءتىرى قالعاندارعا قىزمەت كورسەتۋدە، ونىڭ اتا - اناسى، بالا - شاعاسى تۇگەلدەي قازا بولىپتى».
قاي جەردە بۇقارا اپاتقا ۇشىراسا، سول جەردە جەر سىلكىنىسىنە قارسى اپاتتان قۇتقارۋ جانە قالپىنا كەلتىرىپ قايتا قۇرۋ قىزمەتى ىستەلدى، سول جەردە پارتيانىڭ نەگىزگى ساتى ۇيىمى بولدى، سول جەردە پارتيا قىزمەتى ىستەلدى.
تاڭجياشان ىركىندى كولىندە حاۋىپتى جاعداي تۋىلعاننان كەيىن، ج ك پ ورتالىق كوميتەتىنىڭ يوۋشيان رايوندىق پارتيا كوميتەتى دەرەۋ 9 ۋاقىتتىق پارتيا كوميتەتىن، 43 ورنالاستىرۋ ءتۇيىنىن، شاتىردا جاتىپ قىزمەت ىستەيتىن 296 پارتيا گرۋپپاسى مەن 200دەن استام پارتيا مۇشەسىنىڭ مىندەتتى قىزمەت وتەۋ اترەتىن قۇرىپ، 3000نان استام پارتيا مۇشەسىن ۇيىمداستىرىپ، 80 مىڭنان استام بۇقارانى ءساتتى تۇردە بىتىراتتى، كوشىردى.
پارتيا مۇشەسى بولساڭ الدا ءجۇرۋىڭ، كادر بولساڭ جاۋاپكەرشىلىك ارقالاي ءبىلۋىڭ قاجەت!
اپات رايونىنداعى، اسىرەسە، ەرەكشە اۋىر اپاتقا ۇشىراعان 10 ورىنداعى پارتيالى كادرلاردىڭ دەنى جاقىنىنان ايىرىلۋدىڭ نەمەسە مۇگەدەكتىك ازابىن تارتتى، ءبىراق ولار جۇمىس ورنىنان تاپجىلماي، بار ىنتا - پەيىلىمەن حالىق ءۇشىن ىستەۋ نەگىزگى ماقساتىن جۇزەگە اسىردى.
پارتيا مۇشەسى جۇڭ شىپيڭ جەر سىلكىنگەن كەزدە شىنفاڭ قالالىق حۇڭباي ورتا مەكتەبىنىڭ ورىنباسار باستىعى بولاتىن، ەكى بىردەي جان اشىرى قازا تاۋىپ، ءوزى جارالانعان جاعداي استىندا، مەكتەپتە بولىپ ادام قۇتقارعان؛ اپاتتان كەيىن ۇيىمنىڭ ۇندەۋىنە ءۇن قوسىپ، ۋاقىتشا قۇرىلعان شىنفاڭ قالالىق قامقورلىق كەڭسەسىندە جۇمىستا بولىپ، جاقىن - جان اشىرىنان ايرىلعان قيىنشىلىقتى وتباسىلارىنا كوڭىل ءبولىپ، كومەك كورسەتكەن، 10 جىل بويى وسى قىزمەتتە بولعان. پارتيا مۇشەسى ياڭ كاي دا وسىعان ۇقساس جاقىنىنان ايرىلۋدىڭ ازابىن ىشكە جۇتىپ، جەر سىلكىنىسى كەزىندە ءوزى تۇرعان ورمان الاڭىندا ءوزىن - ءوزى قۇتقارۋعا بەلسەنە ۇيىمداستىرىپ، جەر سىلكىنىسىنەن كەيىن 28 گرۋپپانى باستاپ، انزىحى قورىق رايونىندا جىلىنا 10 مىڭ مۋ جەرگە كوشەت وتىرعىزعان.
اپات ناقتى ءىس ىستەۋگە يتەرمەلەيدى، جاسامپازدىق دامۋدى ىلگەرىلەتەدى. ۋىنچۋان اۋدانىنىڭ شۇيمو قالاشىعى جەر سىلكىنەردەن بۇرىن ابا وبلىسىنىڭ ونەركاسىپ ورتالىعى بولاتىن، تۇتاس وبلىستاعى ەنەرگيانى ەڭ كوپ جۇمسايتىن، اۋىر لاستاۋشى 30دان استام كاسىپورىن وسىندا شوعىرلانعان. قايتا قۇرۋ بارىسىندا، جەرگىلىكتى پارتكوم مەن ۇكىمەت بەلدى بەكەم بۋىپ لاستاۋشى كاسىپورىنداردى كوشىرۋدى ۇيعارىپ، چياڭ ۇلتىنىڭ سالت - ساناسىن نەگىز ەتكەن «ەكولوگيالىق ساياحات قىستاعىن» قۇرىپ شىعىپ، ب م ۇ جاعىنان «اپاتتان كەيىنگى قايتا قۇرۋدىڭ ماياگى» دەپ ماداقتالدى.
اسىرەسە، پارتيا 18 - قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، سىچۋان اپاتتان كەيىنگى قايتا قۇرۋدى وراي رەتىندە قاراپ، رەفورما جاساۋ مەن ەسىك اشۋدا جاڭالىق اشۋدى جاپپاي تەرەڭدەتۋدى جەبەدى، اۋىر اپاتتان امان ءوتىپ عانا قويماي، بۇگىنگى جوعارى ساپالى دامۋ ءۇشىن بەرىك نەگىز قالادى.
ميانجۋ قالاسى جاڭاشا دامۋ تانىمىن بەرىك دايەكتىلەندىرىپ، بۇرىنعى ماشينا مانەرلەۋ ءوندىرىسى اپات سالدارىنان كوشىرىلىپ 10 ميلليارد يۋاندىق ءونىم قۇنى زيانعا ۇشىراعان قيىن - قىستاۋ جاعداي استىندا، ورتانى لاستايتىن فوسفور كەنىن اشۋدان باتىلدىقپەن ۋاز كەشىپ، اۋىل شارۋاشىلىعى - ساياحات، مادەنيەت - ساياحات شارۋاشىلىعى توعىسا داميتىن دامۋ جولىمەن ءجۇردى، بىلتىر قابىلداعان ساياحاتشى سانى 6 ميلليون ادام - رەتكە جەتىپ، ديقانداردىڭ جىلدىق ورتاشا تازا كىرىسى %12 ارتىپ، قالا، اۋىلدارداعى تۇرعىنداردىڭ كىرىس پارقى 1: 96. 1 ازايدى.
10 جىلدا مال باسى ءوسىپ، سان وزگەرىستى باستان كەشىردى. اپات رايونىنىڭ قالاسى مەن دالاسىن كوكتەي وتكەندە، تاس - تالقانى شىققان تاۋ - وزەندەردىڭ شىت جاڭا تۇسكە ەنگەندىگىن كورەسىڭ. سىچۋان، شانشي، گانسۋ ولكەسىندەگى اۋىر اپاتقا ۇشىراعان 41 اۋداننىڭ (قالا، رايون) ەكونوميكا، قوعام، ەكولوگيا، مادەنيەت ورەسى جەر سىلكىنىسىنىڭ الدىنداعىدان جاپپاي جوعارىلادى. اپات رايونىنداعى كادرلار مەن بۇقارانى كورىپ، ءبىز جۇڭحۋا ۇل - قىزدارىنىڭ قايتپاس قاجىرلىلىق، قاجىماس قۇلشىنۋ رۋحى مەن قۋاتىن سەزىندىك.
(تىلشىلەر: حۇي شياۋيۇڭ، سۇڭ فىڭ، جياڭ ي، جوۋ شياڭجي، شيە جياۋ، ياڭ دي)
(شينحۋا اگەنتتىگىنىڭ 5 - ايدىڭ 10 - كۇنى چىڭدۋدان بەرگەن حابارى)
