ءتىلشىمىز جاۋ جۇن حابارلايدى. ءۇرىمجى قالالىق رۋحاني وركەنيەت قۇرىلىسىنا باسشىلىق ەتۋ كوميتەتى كەڭسەسىنەن ۇعىسۋىمىزشا، ءۇرىمجى قالاسىنىڭ قورشاعان ورتا تازالىعى ساپاسىن كوتەرۋ، قالا تۇرعىندارىنىڭ قورشاعان ورتانى قورعاۋ تانىمىن ءوسىرۋ ءۇشىن، 6 - ايدىڭ 1 - كۇنىنەن باستاپ، ءۇرىمجى قالالىق رۋحاني وركەنيەت كەڭسەسى، قالا باسقارۋ كوميتەتى (قالا باسقارۋ اكىمشىلىك زاڭ اتقارۋ مەكەمەسى)، قوعام حاۋىپسىزدىگى مەكەمەسىنىڭ قاتىناس ساقشى بولىمشە اترەتى، ءادىليا مەكەمەسى بىرلەسىپ، اۆتوكولىك تەرەزەسىنەن نارسە لاقتىراتىن زاڭعا قايشى ارەكەتتەردى ارناۋلى جونگە سالادى، قالا تۇرعىندارى اشكەرەلەسە، ايىپ سوماسىنىڭ %80ى سيلىق رەتىندە بەرىلەدى ەكەن.
وسى رەتكى جونگە سالۋدىڭ ءتۇيىنى − موتورلى كولىك شوفەرلەرى مەن كولىككە وتىرعانداردىڭ سىرتقا نارسە لاقتىرۋ، تۇكىرۋ، جەمىس قابىعى، قاعاز قيقىمدارى، تەمەكى تۇقىلى سياقتى جاراقسىز زاتتاردى تاستاۋ سىندى زاڭعا قايشى ارەكەتتەر. 6 - ايدىڭ 1 - كۇنىنەن باستاپ، ءۇرىمجى قالالىق قوعام حاۋىپسىزدىگى مەكەمەسىنىڭ قاتىناس ساقشىلارى مەن اكىمشىلىك زاڭ اتقارۋ تاراۋلارى ءىس باسىندا زاڭ اتقارۋ، كەسكىنگە ءتۇسىرۋ، قالا تۇرعىندارىنىڭ اشكەرەلەۋىن قابىلداۋ سياقتى فورمالارمەن جولدا كەتىپ بارا جاتقان اۆتوكولىك تەرەزەسىنەن نارسە لاقتىرعان زاڭعا قايشى ارەكەتتەرگە قاراتا، موتورلى كولىك شوفەرلەرىنە 200 يۋان ايىپ سالىپ، 2 ءنومىر تارتادى؛ اۆتوكولىكتە وتىرعانداردىڭ تەرەزەدەن نارسە لاقتىرۋ سىندى زاڭعا قايشى ارەكەتىنە قاراتا، 20 يۋان ايىپ سالادى؛ توقتاپ تۇرعان اۆتوكولىك تەرەزەسىنەن نارسە تاستاعان زڭعا قايشى ارەكەتتەرگە قاراتا، اكىمشىلىك زاڭ اتقارۋ تاراۋلارى 50 − 100 يۋان ايىپ سالادى. قالىڭ قالا تۇرعىندارى كەسكىنگە ءتۇسىرۋ (قول تەلەفون، اۆتوكولىك جۇرگىزۋ بارىسىن ەستەلىككە الۋ اسپابى قاتارلىلار) ارقىلى قوعام حاۋىپسىزدىگى تاراۋلارىنا («بۇقارا حاۋىپسىزدىگى» APP نەمەسە اكىمشىلىك زاڭ اتقارۋ تاراۋلارى 1005894736@qq.com«حات ساندىعى») اشكەرەلەۋىنە بولادى، اشكەرەلەنگەن جاعدايدىڭ شىندىعى تۇراقتاندىرىلعان سوڭ، ايىپ سوماسىنىڭ %80ى سيلىق رەتىندە بەرىلەدى.
بۇل رەتكى ارناۋلى جونگە سالۋدا تاعى اۆتوكولىك تەرەزەسىنەن نارسە لاقتىراتىن زاڭعا قايشى ارەكەتتەر حابارلاندىرىلىپ سىندالىپ، جاۋاپكەرشىلىگى قۇزاستىرىلادى، اۆتوكولىك تەرەزەسىنەن نارسە لاقتىراتىن زاڭعا قايشى ارەكەت ىستەگەندەر مەكەمەسىنە نەمەسە كاسىپ باسقارۋ تاراۋلارىنا ۇقتىرىلادى، ولار جىل سوڭىندا وزاتتىققا سايلانبايدى؛ اۆتوكولىك تەرەزەسىنەن نارسە لاقتىرعان زاڭعا قايشى ارەكەتى بار جۇك اۆتوموبيلىنە، جولاۋشى تاسىمال اۆتوكولىگىنە جانە ساياحات اۆتوكولىگىنە قاراتا، ولار قاراستى كاسىپ سالاسىن باسقارۋ ورنىنداعى تاسىمال تيجاراتىن باقىلاۋشى كاسىپورىن زاڭعا قايشىلىق ىستەگەن شوفەرلەردى اۆتوكولىك جۇرگىزۋدەن توقتاتۋ شاراسىن قولدانادى؛ ءار دارەجەلى وركەنيەت ورىندارداعى حابارلاندىرىلىپ سىندالعان ادام سانى بويىشا سول جىلعى وركەنيەتتى ورىنداردى يكەمدى باسقارۋدى باعالاۋ، رۋحاني وركەنيەت ناتيجەسىن سىناۋ ءنومىرىنىڭ %50ى، %70ى تارتىلادى، ءتىپتى، %100كە دەيىن تارتىلادى ءارى وركەنيەتتى ورىن داڭقتى اتاعى الىپ تاستالادى؛ وركەنيەتتى وتباسى بولىپ سايلانبايدى، باعالانعانداردىڭ وركەنيەتتى وتباسى داڭقتى اتاعى قالدىرىلادى.
ءۇرىمجى قالالىق رۋحاني وركەنيەت كەڭسەسىنىڭ ۇنەمىلىك ىستەرگە جاۋاپتى ورىنباسار مەڭگەرۋشىسى ما جۇڭفۋ: ارناۋلى جونگە سالۋ قيمىلى بارىسىندا قالالىق وركەنيەت كەڭسەسى تاربيەلەۋ، جەتەكشىلىك ەتۋ تەبىنىن بارىنشا ارتتىرىپ، «8 ۇلكەن وركەنيەت قيمىلىن»، «8 ۇلكەن وركەنيەتتى ورىن قۇرۋدى» دانەكەر جانە تۇتقا ەتىپ، ءتۇرلى ارنالار ارقىلى جان - جاقتى ۇگىت جۇرگىزىپ، اۆتوكولىك تەرەزەسىنەن نارسە لاقتىراتىن زاڭعا قايشى ارەكەتتەردى بۇكىل قوعام تەڭ يگەرۋ، بىرگە باسقارۋ، بىرگە باقىلاۋ، سانالىلىقپەن تىزگىندەۋ ارقىلى قورشاعان ورتا تازالىعىن ايالاۋدىڭ سانالى تانىمىن قالىپتاستىرادى، - دەدى.
