اۆتونوميالى رايونىمىز بەيقۇت ءۇي ينجەنەرياسى قۇرىلىسىن ساپاسى مەن سانىنا كەپىلدىك ەتە ىلگەرىلەتتى
ءتىلشىمىز ما ينيڭ اتۇشتان حابارلايدى. جۋىقتا، اتۇش قالاسى قاراجون اۋىلى ورتا قاراجون قىستاعىنا بارعانىمىزدا، 343 بەيقۇت ءۇي سالىنىپ بولۋعا تاياپ قالىپتى، قىستاق تۇرعىندارى جۋىقتا جاڭا ۇيلەرىنە ىركەس - تىركەس كوشىپ كىرىپ، شىت جاڭا تۇرمىستارىن باستاماق.
ورتا قاراجون قىستاعىنداعى اۋىل - قىستاق بەيقۇت ۇيلەر تۇيىنىندە جاڭادان سالىنعان قاتار - قاتار اۋىل - قىستاق بەيقۇت ۇيلەرى كوزگە ايرىقشا تۇسەدى. قىستاق تۇرعىنى ايجامال تۇرعىن قىستاقتاعى كەدەي شارۋا، ءبىر ۇيدەگى 4 جان تام ۇيدە تۇرادى. ايجامالدىڭ كونە ءۇيىنىڭ قاسىندا ونىڭ ەندى كوشىپ كىرەتىن جاڭا ءۇيى تۇر. جاڭا ءۇيدىڭ اۋدانى 80 شارشى مەتر، وعان اۋلاسىن، مال قوراسىن قوسقاندا 408 شارشى مەترگە جەتەدى، جاڭا ءۇيدىڭ جاتىن بولمەسى، تازالىق ءۇيى، قوناق ءۇيى بار، قىستاق تۇرعىندار كوميتەتى، مەكتەپ ءۇيدىڭ قاسىندا عانا، بالالاردىڭ وقۋعا بارىپ - كەلۋىنە دە، قىستاق تۇرعىندار كوميتەتىنە بارىپ ءىس بىتىرۋگە دە توتەنشە قولايلى.
اتۇش قالاسىنان 15 كيلومەتر شالعايداعى اعۋ اۋىلى توعراق قىستاعىندا، 2 ايدا ءبىر رەت وتكىزىلەتىن اۋىل - قىستاق بەيقۇت ءۇي ينجەنەرياسى قۇرىلىسىن ىلگەرىلەتۋ جينالىسى اشىلىپ جاتىر.
اتۇش قالاسى اعۋ اۋىلدىق پارتكومىنىڭ ورىنباسار شۋجيى، اۋىل باستىعى ءجۇرات تاش تىلشىگە بىلاي دەدى: ءبىز اۋىل - قىستاق بەيقۇت ءۇي قۇرىلىسىندا ساقتالعان ماسەلەلەردى رەتتەپ، ءبىر جاقتى ەتەمىز. كەلەسى قادامدا قالاي سالۋ جونىندە تاپتەشتەي ورنالاستىرۋ جاسايمىز. بيىلعى جالپى مىندەتىمىز 576 بەيقۇت ءۇي سالۋ، ونىڭ 500ى جۇمىس باستاپ، 260ى سالىنىپ ءبىتتى. بيىل اعۋ اۋىلى اۋىل - قىستاق بەيقۇت ءۇيىن شارۋالار ءوزى سالۋ ۇلگىسىن قولداندى. بۇل، ءبىر جاعىنان، قارجىنى باقىلاۋ - باسقارۋدىڭ جاريالىلىعىن ارتتىرسا، ەندى ءبىر جاعىنان، بۇقارانىڭ ءۇي سالۋ وزىندىك قۇنىن ازايتتى. اۋىلدىق ۇكىمەت، قىستاق تۇرعىندار كوميتەتى، «ۇعىسۋ، تيىمدىلىك جاساۋ، توعىستىرۋ» قيمىلى بويىنشا قىستاقتا تۇراتىن قىزمەت اترەتى قۇرىلىس اترەتىمەن بايلانىس جاساپ، ەڭبەككۇشى جوق وتباسىلارعا ءۇي سالىپ بەرۋگە كومەكتەستى.
ءۇي سالۋدىڭ وزىندىك قۇنىن ءونىمدى تەجەپ، ءۇي سالاتىن شارۋالاردىڭ اۋىرتپالىعىن جەڭىلدەتۋ ءۇشىن، قىزىلسۋ قىرعىز اۆتونوميالى وبلىسى اۋىل - قىستاق بەيقۇت ءۇي قۇرىلىسى قىزمەتى بارىسىندا، اۋدان - قالالاردى «شارۋالار وزدەرى سالۋ، اقىسىز ەڭبەككە قاتىناسۋ، ءوزارا كومەكتەسۋ، قوعام سۇيەمەلدەۋ، كاسىپورىن كومەكتەسۋ» سياقتى تاسىلدەردەن پايدالانۋعا شابىتتاندىرىپ، اۋىل - قىستاقتاردا ءۇي سالاتىن كەدەي بۇقارانىڭ «اقشا شىعارماي نەمەسە از عانا اقشا شىعارىپ» جاڭا ۇيگە كوشىپ كىرۋىنە كەپىلدىك ەتتى.
قىزىلسۋ وبلىسى سياقتى، قاشقار ايماعىنىڭ دا اۋىل - قىستاق بەيقۇت ءۇي ينجەنەرياسى قۇرىلىسى ءساتتى ىلگەرىلەتىلدى. قاشقار ايماقتىق تۇرعىن ءۇي جانە قالا، اۋىل قۇرىلىسى مەكەمەسى پارتيا باسشىلىق گرۋپپاسىنىڭ ورىنباسار شۋجيى، مەكەمە باستىعى، بەيقۇت ءۇي سالۋ قىزمەتىنە باسشىلىق ەتۋ كەڭسەسىنىڭ مەڭگەرۋشىسى ۋاڭ ۋلي بىلاي دەپ تانىستىردى: قاشقار ايماعىنىڭ 2018 - جىلعى اۋىل - قىستاق بەيقۇت ءۇي ينجەنەرياسى قۇرىلىسىنىڭ جالپى مىندەتى 127 مىڭ 537 ءۇي سالۋ، 6 - ايدىڭ 7 - كۇنىنە دەيىن ايماق بويىنشا 105 مىڭ 368 ءۇي قۇرىلىسى جۇمىس باستادى، جۇمىس باستاۋ سالىستىرماسى% 82.6كە جەتتى.
ءتىلشىنىڭ اۆتونوميالى رايوندىق تۇرعىن ءۇي جانە قالا، اۋىل قۇرىلىسى مەڭگەرمەسىنەن ۇعىسۋىنشا، بيىل رايونىمىز 300 مىڭ اۋىل - قىستاق بەيقۇت ءۇي ينجەنەرياسىن اتقارۋدى جوسپارلاعان، بۇنىڭ ىشىندەگى 210 مىڭ ءۇي اۋىل - قىستاقتارداعى ارحيۆ تۇرعىزىلىپ، كارتچكا بەرىلگەن كەدەي وتباسى، ەڭ تومەنگى تۇرمىسى قامسىزداندىرىلاتىن وتباسى، اۋىل - قىستاقتارداعى بىتىراڭقى كۇتىمدەلەتىن ەرەكشە قيىنشىلىعى بارلار، كەدەي مۇگەدەك وتباسى سياقتى 4 ءتۇرلى ءتۇيىندى وبيەكتىنىڭ ءۇي سالۋ ماسەلەسىن شەشۋگە پايدالانىلادى ەكەن.
قازىرگە دەيىن بۇكىل رايونىمىزداعى اۋىل - قىستاق بەيقۇت ءۇي ينجەنەرياسىنىڭ قۇرىلىس باستاۋ سالىستىرماسى %66.68كە جەتكەن، جەر - جەر اۋىل - قىستاقتاعى 4 ءتۇرلى ءتۇيىندى وبيەكتىلەردى «شىنايى اتى - ءجونى» بويىنشا ەسەپ تۇرعىزۋ قىزمەتىن اياقتاتىپ، رايونىمىزدىڭ اۋىر كەدەي رايوندارىنىڭ اۋىل - قىستاقتارىنداعى 4 ءتۇرلى ءتۇيىندى وبيەكتىلەردىڭ ءۇي سالۋ ساندى مالىمەتىنىڭ «وتباسىنا دەيىن دالمە - ءدال تياناقتانۋ، ادامعا دەيىن تياناقتانۋ، اۋىل - قىستاق بەيقۇت ءۇي قۇرىلىسى جاعدايىن جىلجىمالى تەكسەرۋ - باقىلاۋ» سىندى قىزمەت نىساناسىن نەگىزىنەن جۇزەگە اسىرعان. كەلەسى كەزەڭدە، اۋىل - قىستاقتارداعى 300 مىڭ بەيقۇت ءۇي ينجەنەرياسى قۇرىلىس مىندەتىن سانى مەن ساپاسىنا كەپىلدىك ەتە ورىنداپ، ءار ۇلت ەگىنشى - مالشى بۇقاراسىنىڭ جاڭا ۇيگە ۋاعىندا كوشىپ كىرۋىنە كەپىلدىك ەتەدى.
