ءتىلشىمىز سۇي يۇنيان 7 - ايدىڭ 19 - كۇنى مارالباسىدان حابارلايدى. 7 - ايدىڭ 17 - كۇنى تاڭعى ساعات 0 مولشەرى، مارالباسى اۋدانى اناركول اۋىلى تالاشور قىستاعىنداعى كەشكى بازاردىڭ دۋمانى ءالى باسىلعان جوق. قاقتالعان بالىق، كاۋاپ، اسقان بورمي، تۇشپارا، سۋىق ءساي، مالاتاڭ، دوعاپ... سياقتى ءتۇرلى ءدامدى تاعامدار ارت - ارتىنان داستارقانعا شىعارىلىپ جاتتى، قىستاق تۇرعىندارى ساحناعا شىعىپ بيگە باستى.
«الگىندە حىنان ولكەسىنەن ءوز اۆتوكولىكتەرىمەن حۇڭحاي كورىنىس رايونىنا ساياحاتتاي كەلگەن 40 نەشە ساياحاتشى وسى جەردەن تاماقتانىپ، ويىن نومىرلەرىن تاماشالادى، قىستاق تۇرعىندارىنىڭ ءالى ويىنى قانعان جوق، وسى دۋمان تاڭعى ساعات 2 مولشەرىنە دەيىن جالعاسادى»، - دەدى 7 - ايدىڭ 16 - كۇنى كەشكى ساعات 21دەن باستاپ كەشكى بازاردا جۇرگەن حۇڭحاي كورىنىس رايونىن باسقارۋ كوميتەتىنىڭ مەڭگەرۋشىسى لياڭ باۋجۇن قۋانا.
تالاشور قىستاعىنداعى مارالباسى حۇڭحاي كورىنىس رايونى ءشول دالا، توراڭعى ورمانى، سۋ الابى، شۇرات سياقتى جاراتىلىستىق كورىنىستەر مەن قويۋ ۇلتتىق سالت - سانانى ءبىر تۇلعالاندىرىپ، سوڭعى جىلداردان بەرى ەلىمىزدىڭ ءىشى - سىرتىنان كەلگەن ساياحاتشىلار مەن فوتو سۋرەت اۋەسكەرلەرىن وزىنە باۋرادى، ساياحات كاسىبىنىڭ دامۋى جەرگىلىكتى ورىنداعى قىستاق تۇرعىندارىنىڭ كىرىستەرىن مولايتۋىنا ۇتىمدى وراي اكەلدى.
«كورىنىس رايونىندا ون نەشە شارۋالار ساياجايى مەن قوناق ۇيلەر بار. وسى قىستاق دارەجەلى كەشكى بازار 7 - ايدىڭ 1 - كۇنى تيجارات باستاعاننان باستاپ، قىستاق تۇرعىندارىنىڭ تابىس تابۋىنداعى جاڭا تۇعىرىنا اينالدى، قازىر كەشكى بازارداعى 17 جايما ورنىنىڭ 13ىن قىستاقتاعى كەدەي وتباسىلارى اشادى»، - دەدى لياڭ باۋجۇن.
قىستاق تۇرعىنى ابدىرەشيت وبۇل مازداپ جانعان وتتىڭ قاسىندا مۇرنىنا سۋ جەتپەي ءجۇر، ول ءبىر كەشتىڭ وزىندە ءاربىرىن 70 − 80 يۋان مولشەرىندە 15 قاقتالعان بالىق ساتتى. ولاردىڭ قاقتايتىنى جەرگىلىكتى ورىننىڭ وزىنەن شىعاتىن بوز بالىق، وتقا قاقتاپ، تۇزدى سۋ سەپكەننەن باسقا ەشقانداي دامدەندىرگىش ىستەتپەيدى، سىرتى كۇيگەن، ءىشى جۇمساق، تابيعي ءوز ءدامىن ساقتاعان قاقتالعان بالىقتى ساياحاتشىلار ءسۇيىپ جەيدى.
ابدىرەشيتتىڭ ميى العىر، ول بالىق قاقتاۋمەن بىرگە تاعى ءبىر جايما اشىپ، جەر جاڭعاعى، شەكىلدەۋىك، كامپيت جانە ءتۇرلى سۋسىن ساتادى. تابىسى جونىندە توقتالعاندا ول: ءار كۇنگى تابىسىم 2000 يۋاننان اسادى، - دەيدى ءماز - ءمايرام بولىپ.
كەشكى بازار ساياحاتشىلاردان تىس، تاعى توڭىرەكتەگى قىستاق تۇرعىندارىن دا باۋرادى، اناركول اۋىلى عول ءمالى قىستاعىنداعى مامەت روزى ءار كۇنى كەشتە كەشكى بازارعا كەلىپ قاربىز، كوكونىس ساتادى. «كەشكى بازاردىڭ اشىلعان كەزى ءدال قاربىز پىسقان كەزگە تۋرا كەلدى، قاربىز بەن پاميدور ءوز اۋلامىزدىكى، بۇرىش پەن سيىر بۇرشاقتى باسقالاردان الدىم، وسىلاردى ساتىپ، ءار كۇنى 600 − 700 يۋان تابامىن»، - دەدى ول. ول تاعى: بيىل قاربىزدان مولشەرمەن 20 مىڭ يۋان پايدا تابامىن، قاربىزدىڭ ۋاقىتى وتكەننەن كەيىن الما ساتامىن، تەك تىرىسىپ توقتاماي بىردەڭە ىستەپ تۇرسام اقشا تابىلادى، - دەدى.
لياڭ باۋجۇن بىلاي دەپ تانىستىردى: كەشكى بازاردا سەيىل - سەرۋەن قۇرىپ، سالقىنداعالى كەلگەن اۋدان قالاشىعىنىڭ تۇرعىندارى مەن كورىنىس رايونىندا تۇراتىن ساياحاتشىلار تۇتىنۋدىڭ نەگىزگى كۇشى، ساياحاتشىلار مەن قىستاق تۇرعىندارىنىڭ بىرگە ءان ايتىپ، بيگە باسۋىنىڭ ءوزى بولەكشە تاماشا كورىنىس.
«وسى ايدا ءبىز ۇشاق مايلاپ كەلگەن 9 توپتاعى ساياحاتشىنى قابىلدادىق، ءبىرقانشا كۇننەن كەيىن حۇڭحاي كورىنىس رايونىنا ۇشاق مايلاعان 4 توپ، ارناۋلى پويەزبەن ءبىر توپ ساياحاتشى كەلەدى»، - دەي كەلىپ لياڭ باۋجۇن: كورىنىس رايونىنىڭ شارت - جاعدايى جاقسارىپ، اتى تانىلۋىمەن بيىلعى ساياحاتشىلار سانى تاعى دا تاريحتاعى تىڭ رەكوردتى جاڭالاعالى تۇر. فوتوگرافتاردىڭ ەڭ جاقسى كورەتىنى بۇل جەردىڭ <توراڭعى> كورىنىسى، كورىنىس رايونىنىڭ ساۋداسى ناعىز كۇسەت بولاتىن كەز كۇز ماۋسىمى، اۋىلداستاردىڭ بارلىعى ساياحاتتىڭ ەڭ قاۋىرت مەزگىلىن اسىعا كۇتۋدە، - دەدى.