شينحۋا اگەنتتىگىنىڭ 8 - ايدىڭ 15 - كۇنى ۇرىمجىدەن بەرگەن حابارى (ءتىلشى سۇن شاۋشيۇڭ). ءتىلشىنىڭ الاتاۋ ساعاسى كەدەنىنەن ۇعىسۋىنشا، 8 - ايدىڭ 14 - كۇنى الاتاۋ ساعاسى وتكەلىنەن شەكارادان كىرىپ - شىققان جۇڭگو - ەۆروپا كەزەكشى پويەزى 6000 رەتتەن اسىپ، 6031 رەتكە جەتكەن.
الاتاۋ ساعاسى شەكارا وتكەلى شينجياڭ بۇراتالا موڭعۇل اۆتونوميالى وبلىسىنا ورنالاسقان، ول ەلىمىزدىڭ باتىس سولتۇستىگىندەگى ەڭ ۇلكەن قۇرلىق وتكەلى بولىپ قازاقستانمەن شەكارالاسادى. 1990 - جىلى مەملەكەت الاتاۋ ساعاسى شەكارا وتكەلىن قۇرۋدى بەكىتىپ، قازاقستاننىڭ درۋجبا شەكارا وتكەلىمەن تەمىر جولدى تۇتاستىرۋدى جۇزەگە اسىرعاننان كەيىن، 10 مىڭ كيلومەتردەن اساتىن ازيا - ەۆروپا 2 - قۇرلىق كوپىرى تۇتاستى. 2011 - جىلى مەملەكەتتىك كەڭەس الاتاۋ ساعاسى ۋنيۆەرسال باجىسىز اۋماعىن قۇرۋدى بەكىتتى. قازىر ءار جىلى الاتاۋ ساعاسى وتكەلى ارقىلى شەكارادان شىعاتىن جۇڭگو - ەۆروپا كەزەكشى پويەزدەرى ەلىمىزدەن جۇرەتىن كەزەكشى پويەزدەردىڭ 70%ىنە جۋىعىن يەلەيدى.
الاتاۋ ساعاسى كەدەنى باقىلاۋ - باسقارۋ ءبولىمىنىڭ ورىنباسار باستىعى لي حۇڭفىڭنىڭ تانىستىرۋىنشا، جۇڭگو - ەۆروپا كەزەكشى پويەزدەرى شوعىرلى باسقارۋ ءتۇزىمى بويىنشا جۇمىس جۇرگىزەدى، سونداي - اق «كۇندىز + ءتۇن» جۇمىس ۇلگىسىمەن ىستەيدى، تۇندە شەكارادان شىعاتىن پويەزدىڭ سالىستىرماسى %63كە جەتەدى. قازىر جۇڭگو - ەۆروپا كەزەكشى پويەزدەرىنىڭ الاتاۋ ساعاسى وتكەلىندە دامىلدايتىن ۋاقىتى بۇرىنعى 23 ساعات 30 مينۋتتان ورتاشا ەسەپپەن 14 ساعات 46 مينۋتقا قىسقاردى.
ءتىلشىنىڭ الاتاۋ قالاسى شەكارا وتكەلىن باسقارۋ كەڭسەسىنەن ۇعىسۋىنشا، 2018 - جىلى 1 - ايدان 7 - ايعا دەيىن، الاتاۋ ساعاسى كەدەنىنىڭ باقىلاۋ - باسقارۋىنان وتكەن جۇڭگو - ەۆروپا كەزەكشى پويەزى 1328 رەتكە، جۇك مولشەرى 577 مىڭ 600 تونناعا جەتىپ، سايكەس مەزگىلدەگىدەن %32.4 جانە %55.9 ارتقان. بيىل جىل باسىنان بەرى الاتاۋ ساعاسى كەدەنى جۇڭگو - ەۆروپا كەزەكشى پويەزىنىڭ جالپى 10 لەنياسىن باقىلاۋ - باسقارۋعا الدى، ولار ەۆروپاداعى 13 مەملەكەت پەن 36 قالاعا تۇتاسادى.
