قىپ - قىزىل بۇرىش، شات - شادىمان تۇرمىس
ءتىلشى ليۋ ي
بەتاشار
التىن كۇزدىڭ 9 - ايى، جەمىس - جيدەكتىڭ حوش ءيىسى اڭقيدى، تاعى ءبىر جىلدىڭ مول ءونىم ماۋسىمى، بايتاق شينجياڭ دالاسىندا تىرشىلىك پەن ءۇمىت ەسەدى. قىپ - قىزىل بۇرىش، اپپاق ماقتا، ساپ - سارى جۇگەرى، تاعى ءدامى ءتىل ۇيىرەتىن ءجۇزىم، شىلان... تيانشاننىڭ وڭتۇستىگى مەن سولتۇستىگىندەگى قالىڭ ەگىنشى - مالشىلار ءبىر جىلداعى ەڭ ءتاتتى، ەڭ باقىتتى ءساتتى قارسى الدى.
پارتيا 18 - قۇرىلتايىنان بەرى شي جينپيڭنىڭ جاڭا ءداۋىر جۇڭگوشا سوتسياليزم يدەياسىنىڭ جەتەكشىلىگىندە، اۋىل - قىستاقتاردى كوركەيتۋ ستراتەگياسىنىڭ پارمەندى ىلگەرىلەتىلۋىندە، تۇتاس رايونىمىزداعى اۋىل شارۋاشىلىعىنىڭ، اۋىل - قىستاقتىڭ بەت - بەينەسى شىت جاڭا تۇرگە ەنىپ، اۋىل شارۋاشىلىعىنىڭ قامداۋ جاعىنداعى قۇرىلىمدىق رەفورماسىندا ءبىر قىدىرۋ ناتيجەلەرگە قول جەتىپ، ەگىنشى - مالشىلاردىڭ ءوندىرىس، تۇرمىس شارت - جاعدايى كورنەكتى جاقسارىپ، تۇتاس رايونىمىز ەكونوميكالىق، قوعامدىق دامۋىنىڭ نەگىزىن بەكەمدەپ، قۋاتىن كۇشەيتتى.
تۇڭعىش كەزەكتى «جۇڭگو شارۋالارىنىڭ مول ءونىم مەرەكەسى» كەلۋ قارساڭىندا، گازەتىمىز «كۇزگى جيىن - تەرىننىڭ دۋماندى كورىنىسى» ايدارىن اشىپ، تىلشىلەردىڭ اتىز باسىنا بارىپ تىلشىلىك ىستەپ، جازعان حابارلارى ارقىلى جەر - جەردىڭ مول ءونىم دۋمانى مەن بۇقارانىڭ تابىسقا كەنەلۋ شاتتىعىن كورسەتىپ، تۇتاس رايونىمىزدا اۋىل شارۋاشىلىعى، اۋىل - قىستاق رەفورماسىنىڭ جاڭا تاجىريبەلەرىن، جاڭا جەتىستىكتەرىن جالپىلاستىرىپ، قالىڭ ەگىنشى - مالشىلاردىڭ باقىت سەزىمى مەن شاتتىق سەزىمىن جەتكىزەدى.
كۇزدىڭ قوڭىر سامالى ەسىپ تۇر، كۇن اشىق، اۋا تازا. ساۋان اۋدانى قالاشىعىنان اۆتوكولىكپەن شىعىپ، انجىحاي كوپىرىنەن وتسەڭىز، بۇكىل ەلدەگى ماڭىزدى قىزىل بۇرىش وندىرەتىن جەر − انجىحاي قالاشىعىنا جەتەسىز.
انجىحايدا تەڭىز جوق دەپ كىم ايتادى؟ ءشول دالاعا، جولدىڭ ەكى جاعىنا جايىلعان بولەك - بولەك قىزىل بۇرىشتار بىرىمەن - ءبىرى تۇتاسا كەلە قىزىل تەڭىز قالىپتاستىرىپ، تيانشاننىڭ ەتەگىندەگى شاعىن قالاشىقتى مول ءونىمنىڭ شاتتىعىنا بولەگەن.
انجىحاي قالاشىعىنىڭ شارۋالارى مول ءونىمدى قاربالاستىقپەن قۇتتىقتادى. 9 - ايدىڭ 18 - كۇنى تاڭەرتەڭ، قالاشىقتىڭ جياحىزى قىستاعىنىڭ تۇرعىنى ۋاڭ يۇيمىڭ ەرتەلەتىپ اتىزىنا كەلىپ، ءونىم جيناۋ ماشيناسىنىڭ كەلۋىن كۇتتى. جارىم جىلدىق قاربالاستىقتىڭ ءونىمىن كورەر ءسات ءدال بۇگىن، وسى ءۇشىن ونىڭ كوڭىل كۇيى كوتەرىڭكى ەدى. قازىرگى بازارداعى باعا بويىنشا ونىڭ 120 مۋ جەرىندەگى جىڭىشكە قىزىل بۇرىشتان ونىڭ وتباسى 200 مىڭ يۋاننان استام كىرىس كىرگىزەدى. ونان دا قۋانارلىعى، قىزىل بۇرىشىن ءالى جيناماي جاتىپ ساتىپ الۋشى تابىلدى، تاپسىرىس الدىن الا ءتۇسىپ بولدى.
«كۇز قاربالاستىعىندا وزىڭە قاراۋعا مۇرسا جوق». انجىحاي قالاشىعى شياڭتۋدي شارۋالار كاسىپتىك سەلبەستىك كووپەراتيۆىنىڭ القا باستىعى ليۋ پەيجۇن دە ۋاڭ يۇيمىڭنىڭ اتىزىنا كەلدى. جەيدەسى تەرگە مالشىنعان، بالاعىنا شاڭ باتتاسقان، ءونىم جيناۋ كەزىندە ونىڭ وزىنە قارايتىن ۋاقىتى جوق سياقتى.
ۋاڭ يۇيمىڭ سەلبەستىك كووپەراتيۆكە مۇشە بولعاننان كەيىن بۇل سەلبەستىك كووپەراتيۆى تيجارات ەتەتىن قىزىل بۇرىشتىڭ ەگىس اۋدانى 6000 مۋدان استى. كيىم كيىنىسىنە تىم ءمان بەرە قويمايتىن ليۋ پەيجۇن ءار مۋ جەردەگى قىزىل بۇرىشقا بارىنشا دەن قويىپ، ەگىندى باعىپ - باپتاۋعا بارىنشا ءمان بەرەدى. «قازىر ءبىز تۇقىم ءسىڭىرۋدىڭ، باعىپ - باپتاۋدىڭ، جيناۋدىڭ تۇتاس بارىسىن ماشينالاندىردىق، قىزىل بۇرىشتىڭ ساپاسى مەن ونىمدىلىگى زور مولشەردە جوعارىلادى، بيىل مۋ باسىندىق ءونىم 500 كيلوگرامعا جەتەدى، بۇل بۇرىنعىدان ءبىر ەسە كوپ»، - دەپ ليۋ پەيجۇن ماقتانىشپەن ءسوزىن جالعادى، - «قازىر سەلبەستىك كووپەراتيۆ وسىرگەن قىزىل بۇرىش انجىحايدان شىقپاي - اق ساتىلىپ بولادى، ساتۋ جولى جاعىندا قام جەمەيمىز».
ۋاڭ يۇيمىڭ دا ەگىس جۇمىسىنا بارىنشا ءمان بەرەدى. «بۇرىن قىزىل بۇرىش ەگۋ ۋاقىت، كۇش كوپ كەتەتىن، سۋارعان كەزدەردە تۇندە اتىز باسىندا تۇنەيتىنبىز، سۋ كەلىسىمەن ونى مەڭگەرىپ وتىرۋ كەرەك، كوپ سۋارىپ جىبەرۋگە دە، از سۋارۋعا دا بولمايدى، ءسال ابايلاماساڭ ءونىم مولشەرىنە نۇقسان جەتەدى»، - دەدى ۋاڭ يۇيمىڭ، قازىر تامشىلاتىپ سۋارۋ جانە سۋ مەن تىڭايتقىشتى ءبىر تۇلعالاندىرۋ تەحنيكاسى بار، سۋارعاندا ەلەكتر كنوپكاسىن باسساڭىز بولعانى، ۋاقىت پەن كۇشتى ۇنەمدەپ عانا قالماستان سۋ مولشەرى دە تۇراقتى بولادى. بىلتىر اۋدان ولاردىڭ جەرىن تەگىن تەرەڭ جىرتىپ بەرىپ، ءوندىرىس ونىمدىلىگىن ونان ارى جوعارىلاتتى.
انجىحاي قالاشىعىنىڭ قىزىل بۇرىشتان مول ءونىم الۋىنىڭ سەبەبى شارۋالاردىڭ ىجداعاتپەن ىستەۋىنەن سىرت، كاسىپورىنداردىڭ قۇلشىنۋىندا. قازىر انجىحاي قالاشىعىنىڭ جىنتىكتەي مانەرلەيتىن قىزىل بۇرىشى بارعان سايىن كوبەيىپ، قىزىل بۇرىشتىڭ ساتىلۋ ارناسى كەڭەيىپ عانا قالماستان، مانەرلەۋ تىزبەگى دە كەڭەيىپ، قوسىمشا قۇن جوعارىلادى.
«ءبىز سەلبەستىك كووپەراتيۆىمەن 2000 مۋ جەردەگى ساپالى قىزىل بۇرىشتى ساتىپ الۋ تاپسىرىسىنا قول قويىستىق، كاسىپورىن انجىحايدىڭ ساپالى قىزىل بۇرىش بايلىعىن تياناق ەتىپ، جوعارى ساپالى قىزىل بۇرىش مانەرلەپ ءتىپتى دە ءىرى بازارلارعا ساتۋ ارقىلى شارۋالاردى دا، كاسىپورىندى دا تەڭ پايداعا كەنەلتتى»، - دەدى شينجياڭ گۋاڭحايجي اۋىل شارۋاشىلىق عىلىم - تەحنيكاسىن دامىتۋ شەكتى سەرىكتەستىگىنىڭ باس ديرەكتورى شيە گۋاڭجوۋ، - بۇل كۇندەرى كاسىپورىن الداعى مانەرلەۋدىڭ قاۋىرت مەزگىلىنە تولىق دايىندالىپ بولدى. الداعى كۇندەردە مانەرلەۋدىڭ قاۋىرت مەزگىلىنە وتەدى. قازىر سەرىكتەستىك وندىرگەن قىزىل بۇرىش قويمالجىڭى بۇكىل ەل بازارىنا بەتتەپ، جىلدىق ساتىلىم سوماسى 10 ميلليون يۋانعا جەتتى.
بيىل انجىحاي قالاشىعىنىڭ قىزىل بۇرىش ەككەن جەر اۋدانى شامامەن 40 مىڭ مۋ، قىزىل بۇرىش تۇرلەرىنەن جىڭىشكە قىزىل بۇرىش، جالپاق قىزىل بۇرىش، ۇشكىر قىزىل بۇرىش سياقتى 10 نەشە ءتۇرى بار. انجىحايدىڭ قىزىل بۇرىشىنىڭ اتاعىنىڭ بارعان سايىن تانىلۋىنا ىلەسە، قىزىل بۇرىش بۇكىل ەلگە ساتىلىپ، جەرگىلىكتى شارۋالاردىڭ كىرىسىنىڭ جارتىسى قىزىل بۇرىش ەگىنشىلىگىنەن كەلەتىن بولدى. قىپ - قىزىل بۇرىش انجىحايدىڭ شارۋالارىنىڭ تۇرمىسىن شاتتىققا بولەدى.
