ءتىلشىمىز ليۋ ي 10 - ايدىڭ 13 - كۇنى ۇرىمجىدەن حابارلايدى. اۆتونوميالى رايوندىق اۋىل شارۋاشىلىق ماشينالارىن باسقارۋ مەكەمەسىنەن ۇعىسۋىمىزشا، بيىل بۇكىل رايونىمىزدا ماشينامەن ماقتا جينايتىن اۋماق جەدەل ارتىپ، بۇكىل رايونىمىزدا ماقتانى ماشينامەن جيناۋ مولشەرى 2016 - جىلعى %21تەن بيىلعى %30كە ارتقان. بيىل بۇكىل رايونىمىزدا ماقتا جيناۋ ماشيناسىنان 650ى تىڭنان كوبەيىپ، جالپى سانى 3600دەن استامعا جەتىپ، ارتۋ قارقىنى بۇرىنعى جىلداردان بەرگى ەڭ جوعارى دەڭگەيگە جەتكەن.
سوڭعى جىلدارى بۇكىل رايونىمىزدىڭ ەگىن شارۋاشىلىق تاراۋلارى ماقتا ءوندىرىسىنىڭ تۇتاس بارىسىن ماشينالاندىرۋ دەڭگەيىن ءوسىرۋدى ءتۇيىندى قىزمەت رەتىندە تىنباي ىلگەرىلەتىپ، اۋىل شارۋاشىلىق ماشينالارىن ساتىپ الۋعا بەرىلەتىن قوسىمشا قاراجات، جەردى اينالىمعا سالۋ، جاڭاشا اۋىل شارۋاشىلىق ماشينالارى تەحنيكالارىن جالپىلاستىرۋ سياقتى جاقتاردا ءبىرسىپىرا ساياساتتار شىعارىپ، ماشينامەن ماقتا جيناۋدىڭ دامۋىنا ءتيىمدى شارت - جاعداي ازىرلەدى. سونىمەن بىرگە، ماشينامەن ماقتا جيناۋدى، ەگۋدى جالپىلاستىرۋ ارقىلى ماقتا ءوندىرىسىنىڭ ساپاسى مەن ونىمدىلىگىنىڭ تەڭ ءوسۋىن جەبەدى.
اۆتونوميالى رايوندىق اۋىل شارۋاشىلىعى ماشينالارىن باسقارۋ مەكەمەسىنىڭ باس ينجەنەرى پەي شينمين: قازىر سولتۇستىك شينجياڭداعى ماقتا ەگىلەتىن نەگىزگى وڭىرلەردە ماقتانى ماشينامەن جيناۋ مولشەرى %80تەن استى، ءىشىنارا اۋدانداردا، قالالاردا %100كە تايادى. ەگىنشىلىك تەحنيكاسىنىڭ جوعارىلاۋى جانە جابدىقتاردىڭ جاڭالانۋى ماشينامەن ماقتا جيناۋدىڭ ونىمدىلىگىن اناعۇرلىم جوعارىلاتتى»، - دەدى.
بيىل سولتۇستىك شينجياڭداعى ماقتا ەگەتىن ءىرى اۋدان ساۋان اۋدانىنىڭ ماقتا اتىزدارىندا جاڭاشا ماقتا جيناعىش ءوز ونەرىن ايگىلەدى. «جاڭاشا ماقتا جيناعىشتىڭ قولدانىلۋى ساۋاننىڭ ماشينامەن ماقتا جيناۋىنىڭ 2.0 داۋىرىنە وتۋىنە جەتەكشىلىك ەتەدى. بۇل تۇردەگى جاڭاشا تايلاپ ماقتا جيناعىش ماقتانىڭ شاش سياقتى بوگدە تالشىقتاردىڭ لاستاۋىنان ساقتاپ، ساپاسىن بارىنشا وسىرەدى، تەك وسى ءبىر تۇردەگىدەن - اق ماقتا ەگەتىن ديقانداردىڭ مۋ باسىندىق كىرىسىن 100 يۋان اينالاسىندا ارتتىرۋعا بولادى، ونىمدىلىك باسىمدىعى كورنەكتى»، - دەيدى ساۋان اۋداندىق اۋىل شارۋاشىلىق عىلىم - تەحنيكاسى جينيۋە اۋىل شارۋاشىلىق ماشينالارى شارۋالار كاسىپتىك كووپەراتيۆى بىرلەسكەن كووپەراتيۆىنىڭ القا باستىعى حان بو.
وڭتۇستىك شينجياڭداعى ماقتا ەگەتىن نەگىزگى ءوڭىر شايار اۋدانىندا ماشينامەن ماقتا جيناۋ سول جەردەگى ماقتا ەگەتىن ديقاندار سۇيىنەتىن جاڭاشا ءوندىرىس ۇلگىسىنە اينالدى. شايار اۋدانى گۇلباق قالاشىعى داشين اۋىل شارۋاشىلىق ماشينالارى كاسىپتىك كووپەراتيۆىنىڭ القا باستىعى شيان يۇيلين: ماقتا جيناۋدى ماشينالاندىرۋ ماقتا ەگۋدىڭ مۋ باسىندىق وزىندىك قۇنىن 600 نەشە يۋان تومەندەتىپ، بارعان سايىن كوپتەگەن ديقانداردىڭ قارسى الۋىنا بولەنىپ، قازىر سەلبەستىك كووپەراتيۆى شارۋاشىلىق جۇرگىزىپ وتىرعان 10 نەشە مىڭ مۋ جەردەگى ماقتانى ماشينامەن جيناۋ ىسكە استى، الداعى 2 جىلدا سەلبەستىك كووپەراتيۆى ماشينامەن ماقتا جينايتىن اۋماقتى 30 مىڭ مۋعا كەڭەيتەدى، - دەدى.
پەي شينمين: 2020 - جىلى بۇكىل رايونىمىزدا ماقتانى ماشينامەن جيناۋ مولشەرىن %30كە جەتكىزۋ جوسپارلانعان بولاتىن، بۇل نىسانا بيىل مەرزىمىنەن بۇرىن ىسكە استى. بيىل اۋىل شارۋاشىلىق ماشينالارىن باسقارۋ تاراۋلارى قاتىستى عىلمي زەرتتەۋ ورىندارىمەن بىرگە جاڭا دامۋ جوباسىن جاساۋدى قولعا الىپ، 2022 - جىلى بۇكىل رايونىمىزدا ماقتانى ماشينامەن جيناۋ مولشەرىن %50كە جەتكىزۋ نىساناسىن ىسكە اسىرماقشى، - دەدى.
ۇعىسۋعا قاراعاندا، ماقتا جيناعىشتىڭ ءوڭىر اتتاپ جۇمىس جۇرگىزۋىنە كەپىلدىك ەتۋ ءۇشىن، اۆتونوميالى رايوندىق اۋىل شارۋاشىلىعى ماشينالارىن باسقارۋ مەكەمەسى اۋىل شارۋاشىلىعى، اۋىل - قىستاق مينيسترلىگىنەن اۋىل شارۋاشىلىق ماشينالارىنىڭ ءوڭىر اتتاپ جۇمىس جۇرگىزۋ كۋالىگىنەن 400ىن العان، جۋىقتا ىركەس - تىركەس تاراتىپ، بيىل بۇكىل رايونىمىزدا ماقتانى ماشينامەن جيناۋدىڭ ءساتتى جۇرىلۋىنە كەپىلدىك ەتپەك بولىپ وتىرىپتى.
