شينجياڭنىڭ ازاماتتىق اۆياتسياسى كوكتەم مەرەكەسى كەزىندەگى تاسىمالعا بار كۇشپەن دايىندالدى
ءتىلشى ما ينيڭ 1 - ايدىڭ 8 - كۇنى ۇرىمجىدەن حابارلايدى. كوكتەم مەرەكەسى كەلۋ قارساڭىندا، شينجياڭنىڭ ازاماتتىق اۆياتسياسى كوكتەم مەرەكەسى كەزىندەگى تاسىمالعا دايىندىق كورىپ، ۇرىمجىدەن سان - يا، جىڭجوۋ سياقتى جەرلەرگە باراتىن، جولاۋشى كوپ قاتىنايتىن اۋە لەنيالارىن جيىلەتىپ قانا قالماستان، قىرۋار ارزانداتىلعان بەلەتتى دە الدىن الا ساتىپ، جولاۋشىلاردىڭ الدىن الا بەلەت ساتىپ الۋىنا قولايلىلىق جاسادى.
بۇرىنعى ءار اپتانىڭ دۇيسەنبى، سارسەنبى، جۇما، سەنبى كۇندەرى ۇرىمجىدەن ءىسلامابادقا بارىپ - كەلەتىن كەزەكشى ۇشاق نەگىزىندە، نانحاڭ شينجياڭ بولىمشە سەرىكتەستىگى سەيسەنبى كۇنى ۇشاتىن 7 كەزەك ۇشاقتى تىڭنان قوسىپ، ونى بۇرىنعى ۇشۋ ۋاقىتىمەن پارىقتاندىرىپ، جولاۋشىلاردىڭ ساپارعا شىعۋىنا ءتىپتى دە كوپ تالعام ازىرلەدى. ۇرىمجىدەن جىڭجوۋعا ۇشاتىن ءبىر كەزەكشى ۇشاق تىڭنان قوسىلادى، ۇشاق قوسىلعاننان كەيىن وسى اۋە لەنياسىندا كۇنىنە 5 كەزەك ۇشاق قاتىنايدى. كوكتەم مەرەكەسى كەزىندەگى تاسىمال مەرزىمىندە، نانحاڭ ءۇرىمجى - سان - يا اراسىنا تىكە بارىپ - كەلەتىن اۋە لەنياسىن اشادى، بارعان كەزدە ساعات 11دەن 45 مينۋت وتكەندە ۇرىمجىدەن ۇشىپ، 17دەن 15 مينۋت وتكەندە سان - ياعا جەتەدى، قايتقان كەزدە 18دەن 30 مينۋت وتكەندە سان - يادان ۇشىپ، ۇرىمجىگە كەلەسى كۇنى تاڭعى ساعات 0دەن 10 مينۋت وتكەندە جەتەدى.
كوكتەم مەرەكەسى كەلۋدەن بۇرىن شينجياڭنان وزگە جەرلەرگە باراتىن ارزانداتىلعان بەلەتتى الدىن الا ساتىپ الۋعا بولادى. جولاۋشى كوپ قاتىنايتىن نەگىزگى اۋە لەنيالارىنىڭ بەلەت باعاسى تومەندەگىدەي: ۇرىمجىدەن بەيجيڭگە دەيىنگى بەلەت باعاسى 870 يۋاننان باستالادى، ۇرىمجىدەن گۋاڭجوۋعا دەيىنگى بەلەت باعاسى 1320 يۋاننان باستالادى، ۇرىمجىدەن شاڭحايعا دەيىنگى بەلەت باعاسى 1760 يۋاننان باستالادى؛ ۇرىمجىدەن سان - ياعا دەيىنگى بەلەت باعاسى 2160 يۋاننان باستالادى، ۇرىمجىدەن شيامىنعا دەيىنگى بەلەت باعاسى 2390 يۋاننان باستالادى، ۇرىمجىدەن چىڭدۋعا دەيىنگى بەلەت باعاسى 1280 يۋاننان باستالادى، ۇرىمجىدەن جىڭجوۋعا دەيىنگى بەلەت باعاسى 1430 يۋاننان باستالادى. شينجياڭنىڭ ىشىندەگى اۋە لەنيالارىنىڭ بەلەت باعاسى جالپى جاقتان جوعارى بولماعانىمەن، الايدا ارزانداتىلعان بەلەتتىڭ سانى شەكتى، باعاسى ءاردايىم وزگەرىپ تۇرادى.
كوكتەم مەرەكەسى كەزىندە ۇرىمجىدەن بەيجيڭگە، شاڭحايعا، گۋاڭجوۋعا باراتىن اۋە لەنيالارىنىڭ بەلەت باعاسىنىڭ ارزانداتىلۋ مولشەرى ءبىرشاما زور بولادى، شينجياڭ ىشىندەگى اۋە لەنيالارىندا، مىسالى، ۇرىمجىدەن قۇلجا، قاشقار، اقسۋ، التاي، قارامايلى، بۇراتالا سياقتى جەرلەرگە باراتىن لەنيالاردا ارزانداتىلعان بەلەت ساتىلادى.
