شام ءىلىپ، تورعىن - تورقامەن اشەكەيلەپ كوكتەم مەرەكەسىن قارسى الىپ، مەرەكەنى شات مەرەيمەن قۇتتىقتادى. جاڭا جىلعا قاراعان كۇنى، جۇرت جۇرەك جاردى قۋانىشتارى مەن ۇلى وتانعا دەگەن تىلەكتەرىن ءتۇرلى تاسىلمەن شاتتانا بەينەلەدى. وسى كۇنى تاڭ اتىسىمەن، تيانشاننىڭ تۇستىگى مەن تەرىستىگىندەگى سان مىڭداعان قىستاقتاعى جانە الەۋمەتتىك اۋماقتاعى ءار ۇلت كادرلارى مەن جۇرتشىلىعى مەملەكەت تۋىنىڭ استىنا جينالىپ، مەملەكەت تۋىن بىرگە شىعارىپ، كوكتەم مەرەكەسىن بىرگە قارسى الدى؛ ءتۇن شىملىدىعى تارتىلعاندا، تيانشاننىڭ تۇستىگى مەن تەرىستىگىندە الۋان ءتۇستى شامدار توڭىرەكتى اق ساۋلەگە بولەدى. ءداستۇرلى ءتۇستى جارقىلداق ويىن، جاڭاشا شام سالتاناتى مەرەكە ءتۇنىنىڭ اسپانىن الۋان تۇسكە بولەپ، باقىت لەبى ەسكەن جۇزدەردى ونان ارى نۇرلاندىردى.
2 - ايدىڭ 4 - كۇنى تاڭ اتىسىمەن، ءۇشتۇرپان اۋدانى العا اۋىلى جار باسى قىستاعىنىڭ تۇرعىندارى جاڭا كيىمدەرىن كيىپ، قىستاق تۇرعىندار كوميتەتىنىڭ اۋلاسىنا ەرتە جينالدى. ساعات 10دا، مەملەكەت تۋىن شىعارۋ سالتى باستالدى. ايبىندى مەملەكەت ءانى، جەلبىرەگەن مەملەكەت تۋى، رەتتى توپ، كوز الداعى كورىنىس ەرەكشە تانىس بولعانىمەن، قىستاق تۇرعىنى روشانگۇل سامەت بۇگىن ايرىقشا تەبىرەنىستە ەدى. تۋ شىعارۋ سالتى اياقتاعاننان كەيىن، روشانگۇل تىلشىگە «ۇعىسۋ، تيىمدىلىك جاساۋ، توعىستىرۋ» بويىنشا قىستاقتا تۇراتىن قىزمەت اترەتى مەن جۇپ قۇراپ، تۋىستاسقان كادردىڭ ءوزىنىڭ كەدەيلىكتەن ارىلۋىنا كومەكتەسۋ بارىسىن اڭگىمەلەدى.
وسى كۇنى تاڭەرتەڭ، قۇلجا قالاسى قازانشى ءمالىسى مويىك الەۋمەتتىك اۋماعى تۇرعىندار كوميتەتىنىڭ اۋلاسىندا 1000نان استام تۇرعىن باس قوسىپ، مەملەكەت تۋىن شىعارۋ سالتىنا قاتىناستى، ەڭ تومەنگى تۇرمىسى قامتاماسىز ەتىلەتىن نۇرجامال ياسىن تازا دا ادەمى كيىنىپ، تاڭ اتا وسىندا كەلدى.
نۇرجامالدىڭ كۇيەۋى ۇزاق جىل ناۋقاسقا شالدىققان، بىلتىر ىلە قازاق اۆتونوميالى وبلىستىق مادەنيەت، دەنە تاربيە، راديو، كينو - تەلەۆيزيا مەكەمەسىنىڭ «ۇعىسۋ، تيىمدىلىك جاساۋ، توعىستىرۋ» بويىنشا مويىك الەۋمەتتىك اۋماعىندا تۇراتىن قىزمەت اترەتىنىڭ كومەگىندە ونىڭ كۇيەۋى ەداۋىر جاقسى ەمدەلىپ، ناۋقاس جاعدايى جاقسارا ءتۇستى ءارى اماندىق قورعاۋ جۇمىسىنا تۇردى. سونىمەن بىرگە، داشۋەگە وتكەن كىشى قىزىنىڭ وقۋ قاراجاتىن دا قىزمەت اترەتى كومەكتەسىپ شەشىپ بەردى.
تۋ شىعارۋ سالتى باستالاردا نۇرجامال الدىڭعى قاتارعا تۇرىپ، جالىندى مۋزيكاعا ىلەسىپ، مەملەكەت ءانىن اسقاقتاتا شىرقاپ، پارتياعا جانە وتانعا دەگەن العىس سەزىمىن كوكىرەك كەرنەگەن قىزۋ ىنتامەن بەينەلەدى.
كەشكى ساعات 7دەن 30 مينۋت وتكەندە ءۇرىمجىنىڭ حۇڭشان تاۋىنان شاشىراپ شىققان كوز ۇيالتارلىق ساۋلەلەر ءتۇن اسپانىن ءتىلىپ ءوتىپ، قالا كوركىنە كورىك قوستى.
حۇڭشان تاۋىنىڭ توبەسىندەگى تاماشالاۋ تۇعىرىنا كوتەرىلسەڭىز بەينە قيالداعى سارايدا تۇرعانداي سەزىنەسىز، ءار ءتۇرلى فورماداعى قۇس ۇياسى شامى، سۋ تولقىنى شامى، باسپالداق شام، ورنەكتى شام ءبىر - بىرىنە ساعىم ءتۇسىرىپ، قۋانىشتى بەينەلەيتىن قىزىل رەڭ، اسىلدىلىقتى بەينەلەيتىن سارى رەڭ، ارماندى بەينەلەيتىن كوك رەڭ، تىرشىلىكتى بەينەلەيتىن جاسىل رەڭ، تىلسىمدىكتى بەينەلەيتىن كۇلگىن رەڭ دامىلسىز الماسىپ، كەيدە جارقىراپ، كەيدە سولعىنداپ، بىرەسە كوتەرىلىپ، بىرەسە باسەيىپ، كول سۋى مەن سايالىقتارعا ادەمى جەلەك جاپقانداي سەزىم بەردى. مۇناراداعى سەمسەر، نانحۋداعى ساعىم، بايىرعى مۇنارا كەلبەتى، تۇعىرداعى قيال، حۇڭشان جانارى سياقتى شام ساۋلەلەرىنىڭ جارقىراۋىندا حۇڭساندا گۇل اشقان كوكتەم، سالقىن جاز، سارى جاپىراقتى كۇز، رومانتيكالى قىس سىندى ءتورت ماۋسىمنىڭ اسەم كورىنىسى ءبىر - بىردەن ايگىلەندى.
جاڭا جىلعا قاراعان تۇنگى شىراق سالتاناتىن كورۋ ءۇشىن، 68 جاستاعى فان يۇيمين نەمەرەسىن جەتەلەپ، قاراڭعى تۇسپەي حۇڭشان تاۋىنا شىعىپ الدى. كاريا نەمەرەسىنە: مەنىڭ كىشكەنە كەزىمدە، شيداچياۋ كوپىرى اعاش كوپىر بولاتىن، قازىر قاتار - قاتار تىزىلگەن قالىڭ عيماراتتى، كولىك ارلى - بەرلى قايشالىسىپ جاتقان حىتان تەز قارقىندى جولىن كورەسىڭ، بۇلاردىڭ ءبارى - ءبارى وسى قالانىڭ دامۋ قارقىنىنا كۋا بولىپ تۇر. سەن جاقسى وقىپ، بولاشاقتا مەملەكەتتىڭ قۇرىلىس ىستەرىنە كۇش قوساتىن بول! - دەدى.
وسىدان كەيىن ءتىلشى ۇرىمجىدەگى شينجياڭ حالىقارالىق ۇلكەن بازارىنا كەلدى، بۇل جەر الۋان ءتۇستى شىراقتارمەن جايناپ تۇر. «باقىتتى جۇڭگو جىلى»، «جاڭا جۇڭگوعا ماداق»، «جاڭا داۋىردە ەكپىندەي العا ىلگەرىلەيىك» دەگەن سياقتى سوزدەر تاماشالاۋ مۇناراسىنىڭ ەكرانىندا ءالسىن - ءالى الماسۋدا. سىچۋاننان شينجياڭعا كەلىپ جۇمىس ىستەپ جاتقان جاڭ شياۋلياڭ الگىندە عانا تۇسىرگەن كوركەم سۋرەتتى دوستار شەڭبەرىنە شىعارىپ: مەن شينجياڭدا ۇزاق جىل قىزمەت ىستەدىم، بۇل ارا مەنىڭ مەكەنىمە اينالدى، مەن شينجياڭدى سۇيەمىن! - دەپ جازدى.
شينجياڭ حالىقارالىق كورمە ورتالىعى، دوستىق اۋماعى، گاۋتيە اۋماعى... اشەكەي شامدارمەن بەزەندىرىلىپ كوركەم كورىنىس قالىپتاستىرىپ، قارقىندى دامىعان ءۇرىمجىنىڭ قول جەتكىزگەن تاماشا جەتىستىكتەرىن ايعاقتايدى ءارى مەرەكەدە تيانشان پەرزەنتتەرىنىڭ ۇلى وتانعا ەل امان، جۇرت تىنىش بولسىن، ەلىمىز كوركەيىپ، قۇدىرەتتەنسىن! دەگەن شىنايى تىلەگىن بىردەن اڭعارتىپ تۇردى.
( تىلشىلەر جاۋ چۇنحۋا، جاڭ جىلي، جازيرا نەسىپبەك قىزى، ەرىكتى تىلشىلەر ياڭ لەي، ابدۇقادىر ابباس)
