− كۋرسانتتار باس شۋجي شي جينپيڭنىڭ ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ باستالۋ سالتىندا سويلەگەن ماڭىزدى ءسوزىن قىزۋ تالقىلادى
شينحۋا اگەنتتىگىنىڭ تىلشىلەرى ۋ جيڭ، جياڭ شياۋ، شى يۇيسىن
”قالىڭ كادرلار، اسىرەسە، جاس كادرلار ۇنەمى ۇيرەنۋ، ۇنەمى جاڭارۋ بارىسىندا نازاريالىق جەتىلىمدى كۇشەيتىپ، شىنايى ۇيرەنۋ، شىنايى سەنۋ بارىسىندا مۇرات - سەنىمدى بەكەمدەپ، ۇيرەنۋ، وي جۇگىرتۋ، امالياتتا ايگىلەۋ، ۇعىنۋ بارىسىندا اۋەلگى ماقساتتى، بورىشتى ەستە بەرىك ساقتاپ، دەن قويا سالىستىرىپ، ادالدىقپەن اتقارۋ بارىسىندا ءوزىن ۇزدىكسىز ىسىلدىرىپ، تانىم مەن ارەكەتتىڭ بىرلىگى بارىسىندا ىرىقتىلىقپەن جاۋاپكەرشىلىك ارقالاپ، ىسكەرلىك كورسەتىپ، پارتياعا ادال كوڭىلدى، حالىققا العىس سەزىمدى، ىسكە تالاپتىلىقتى، زاڭ - ءتارتىپ الدىنداعى يمەنۋدى ساقتاپ، سەنىمى بەرىك، ساياسيدا قاتاڭ، قابىلەتتە جوعارى، ستيلدە ىسىلعان بولۋ كەرەك“.
3 - ايدىڭ 1 - كۇنى باس شۋجي شي جينپيڭ 2019 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ باستالۋ سالتىندا ماڭىزدى ءسوز سويلەپ، قالىڭ كۋرسانتتاردىڭ كۇشتى اڭىسىن قوزعادى. كوپشىلىك مىنالاردى ءبىلدىردى: باس شۋجيدىڭ ىقىلاستى ءتالىمىن ەستە بەرىك ساقتاپ، نازاريالىق جەتىلىمدى كۇشەيتىپ، ىرىقتىلىقپەن جاۋاپكەرشىلىك ارقالاپ، ىسكەرلىك كورسەتىپ، جاڭا داۋىردەگى مەملەكەتتى قۇدىرەتتەندىرۋدىڭ، گۇلدەندىرۋدىڭ ۇلى امالياتىنا ات سالىساتىن قۋاتتى كۇش توپتاۋىمىز كەرەك.
ۇنەمى ۇيرەنۋ، ۇنەمى جاڭارۋ بارىسىندا نازاريالىق جەتىلىمدى كۇشەيتۋ كەرەك
پارتيانى يدەيالىق جاقتان قۇرۋ − پارتيامىزدىڭ ماڭىزدى اسىلى.
كۋرسانت گۇڭ جينلۇڭنىڭ ەستەلىك داپتەرىن اشساڭىز، ىشىنە باس شۋجي شي جينپيڭنىڭ ماڭىزدى سوزدەرىنىڭ مازمۇنى تولتىرىلىپ جازىلىپتى. ول بىلاي دەدى: ”باس شۋجي ورتا جاس، جاس كادرلارعا ىقىلاستى ءۇمىت ارتىپ، ءبىزدى ايرىقشا جىگەرلەندىردى. ءبىز وسى رەتكى تاپتىرماس ۇيرەنۋ ورايىنان پايدالانىپ، شي جينپيڭنىڭ جاڭا ءداۋىر جۇڭگوشا سوتسياليزم يدەياسىن مۇقيات ۇيرەنىپ، ماركسيزمنىڭ تيپتىك شىعارمالارىن قۇنتتاي، زەردەلەي وقىپ، ءتۇپ نۇسقانى وقىپ، ءتۇپ ماتىننەن ۇيرەنىپ، قاعيداسىن ءتۇسىنىپ، نازاريا ۇيرەنۋدى تەرەڭدەتىپ، ناقتىلاپ، ساناعا ءسىڭىرۋىمىز كەرەك“.
نازاريانى امالياتپەن بايلانىستىرۋ − نازاريا ۇيرەنۋدىڭ تەتىگى.
كۋرسانت لۋ جىپىڭ بىلاي دەپ قارادى: كادرلار نازاريا ۇيرەنۋدە باس شۋجي ورتاعا قويعان ”ءوزىن، قىزمەت جاۋاپكەرشىلىگىن، قىزمەتىن بايلانىستىرۋ“ تالابىن ءارقاشان ەستە بەرىك ساقتاپ، نازاريانى امالياتپەن بايلانىستىرۋ سىندى ماركستىك ۇيرەنۋ ستيلىن ساۋلەلەندىرۋگە تاباندى بولىپ، ۇيرەنگەندى قولدانا بىلۋگە، قولدانۋ ارقىلى ۇيرەنۋدى جەبەۋگە تاباندى بولىپ، نازاريامەن وي - سانانى قارۋلاندىرىپ، امالياتقا جەتەكشىلىك ەتىپ، قىزمەتتەردى ىلگەرىلەتىپ، ۇيرەنۋدىڭ، ويلاۋدىڭ، قولدانۋدىڭ تۇتاستىعىن، تانىمنىڭ، سەنىمنىڭ، ارەكەتتىڭ بىرلىگىن جۇزەگە اسىرۋ كەرەك.
شىنايى ۇيرەنۋ، شىنايى سەنۋ بارىسىندا مۇرات - سەنىمدى بەكەمدەۋ كەرەك
”كادرلاردا مۇرات - سەنىمنىڭ بار - جوقتىعىن تارازىلاۋداعى نەگىزگى تەتىك پارتياعا ادال بولعان - بولماعاندىعىندا“، - دەدى باس شۋجي شي جينپيڭ كۇشتى ارىنمەن.
”پارتيالى كادرلار بۇقارامەن بالىق پەن سۋداي ەتەنە بولىپ، ءومىر مەن ءولىمدى بىرگە وتكەرۋى كەرەك، بۇل جونىندە بايىرعى رايونداعى كادرلار اسەرى ەڭ تەرەڭ“، - دەدى يمىڭ رۋحىنىڭ نەگىزگى وشاعى − شاندۇڭ ولكەسى ينان اۋدانىنان كەلگەن كۋرسانت جياڭ نيڭ. ول باس شۋجي ورتاعا قويعان ”مۇرات - سەنىمدى بەكەمدەۋ“ دەگەن ءسوزى تۋرالى تەرەڭ اسەرگە يە: ”مۇرات - سەنىم − توڭكەرىستىك سوعىس جىلدارىندا سانسىز اعا بۋىن قۇربانداردىڭ باسىن ءباي تىگىپ، قۇرباندىق بەرۋىنە پارمەندى تىرەك بولدى، سونداي - اق بەيبىت قۇرىلىس جىلدارىندا كوممۋنيستەردىڭ ساياسي رۋحىنا اينالدى. ءبىز رۋحاني مەكەندى باتىل قورعاپ، سەنىمنىڭ تاعانىن بەرىك قالاپ، رۋحاني كالتسيدى تولىقتاپ، يدەيانىڭ تىزگىنىن مىقتى يگەرىپ، اعا بۋىن كوممۋنيستەردىڭ تاماشا ءداستۇرىن، تاماشا ستيلىن ويداعىداي جالعاستىرۋىمىز كەرەك“.
تامىرى تەرەڭ بولسا، بۇتاعى بەرىك، جاپىراعى قالىڭ بولادى.
كۋرسانت لۇي جىچىڭ بىلاي دەدى: باس شۋجيدىڭ ماڭىزدى ءسوزى ادامنىڭ جانىن سەرگىتىپ، تەرەڭ ويلانۋعا جەتەلەدى. باسشى كادرلاردىڭ قولىندا بەلگىلى ۇقىق بار، ولار ۇنەمى باعىندىرىلاتىن، قورشاپ اۋلاناتىن نىساناعا اينالادى، ءوزىن تاربيەلەۋدى، ءوزىن تارتىپپەن ۇستاۋدى كۇشەيتۋگە ءمان بەرمەسە، كورسەتكىش ءتىلى اۋىتقىپ كەتسە، ءتۇرلى ازعىرۋلار مەن سىناقتار الدىندا وڭاي جەڭىلىس تابادى.
”ءبىز باس شۋجي شي جينپيڭنىڭ تالابىن، ءسوز جوق، ەستە بەرىك ساقتاپ، ءوزىمىزدىڭ يدەيامىزدى، ءسوز - ارەكەتىمىزدى پارتيا ۋستاۆىمەن، پارتيا ەرەجەسىمەن، پارتيا تارتىبىمەن سالىستىرىپ تەكسەرىپ، پارتيالىلىق جەتىلىمدى كۇشەيتىپ، ءمورالدىق قۇلىقتى جەتىلدىرىپ، كوممۋنيستەردىڭ ساياسي قاسيەتىن ماڭگى ساقتاۋىمىز كەرەك“، - دەدى لۇي جىچىڭ.
- ۇيرەنۋ، وي جۇگىرتۋ، امالياتتا ايگىلەۋ، ۇعىنۋ بارىسىندا اۋەلگى ماقساتتى، بورىشتى ەستە بەرىك ساقتاۋ كەرەك
اۋەلگى ماقساتتى ۇمىتپاعاندا عانا، ىستەردى باياندى جالعاستىرۋعا بولادى. باس شۋجي شي جينپيڭ كۋرس باستالۋ سالتىندا بىلاي دەپ باسا دارىپتەدى: كادرلار پارتيانىڭ اۋەلگى ماقساتىن، پارتيانىڭ بورىشىن جادىندا بەرىك ساقتاۋ كەرەك، وسىلاي بولعاندا عانا ءومىر جولىنداعى كۇرەس بارىسىندا يدەيالىق جاقتان اناعۇرلىم بيىك باستاماعا، سارقىلماس رۋحاني كۇشكە يە بولا الادى.
باس شۋجي شي جينپيڭنىڭ ماڭىزدى ءسوزىن ۇيرەنۋمەن بىرلەستىرىپ، كۋرسانت لين مەي ءوز اسەرىن ءبولىستى: ”كەيدە ءبىز بۇقارا ءۇشىن كىشكەنە عانا ءىس ىستەپ عانا بەرگەنىمىزبەن، بۇقارا ءبىزدى بارىنشا تۇراقتاندىرىپ جاتادى، بۇل ءبىزدىڭ قىزمەت ىستەۋ ىنتامىز بەن جاۋاپكەرشىلىگىمىزدى ونان ارى قاۋلاتادى. قاي - قاشان دا بۇقارانى كوكەيدە ساقتاپ، پارتياعا كىرگەن العاشقى كەزدەگى ىستىق ىنتانى، ءمانساپ بەرىلگەن العاشقى كەزدەگى حالىقتىڭ قىزمەتكەرى بولاتىن نيەتتى باستان - اياق قاتاڭ ساقتاپ، حالىقتىڭ ۇنىنە قۇلاق ءتۇرىپ، شىن مانىندە حالىقتى ۋايىمنان ارىلتىپ، قيىنشىلىقتارىن شەشىپ بەرۋىمىز كەرەك“.
” كادرلار حالىقتى جۇرەگىنىڭ تورىنە قويۋ كەرەك“. ”حالىقپەن تار جول، تايعاق كەشۋدى بىرگە وتكەرۋ، ەتەنە تامىرلاس بولۋ، اشتى - تۇشتىنى بىرگە تاتۋ − پارتيامىزدىڭ بارلىق قيىنشىلىقتار مەن حاۋىپ - قاتەرلەردى جەڭىپ شىعۋىنىڭ ءتۇبىرلى كەپىلى“...
باس شۋجي شي جينپيڭنىڭ ماڭىزدى ءسوزىن دەن قويا تىڭداعان كۋرسانت جي يانبين بىلاي دەدى: ”جاڭا ءداۋىر كادرلاردىڭ كۇرەس جۇرگىزۋىن قاجەت ەتەدى. فينانستىق قىزمەت ورنىنان كەلگەن جاس كادر رەتىندە، مەن ءوز قىزمەتىمدە تاباندىلىقپەن مىندەت اتقارىپ، جاۋاپكەرشىلىگىمدى ادا ەتىپ، جاپپاي دوڭگەلەك داۋلەتتى قوعام ورناتۋدىڭ جالىندى امالياتىنا بەلسەنە ات سالىسىپ، جەكە ارمانىمدى مەملەكەتتىڭ قۇدىرەتتەنۋ، ۇلتتىڭ كوركەيۋ، حالىقتىڭ باقىتقا كەنەلۋ ۇلى ىسىمەن توعىستىرامىن“.
دەن قويا سالىستىرىپ، ادالدىقپەن اتقارۋ بارىسىندا ءوزىن ۇزدىكسىز ىسىلدىرۋ كەرەك
بيلىك جۇرگىزۋدىڭ جولى ءوزىن تاربيەلەۋدى نەگىز ەتۋدە.
”كادرلاردىڭ پارتيالىلىق جەتىلىمى، ءمورالدىق دەڭگەيى پارتيا ستاجىنىڭ، قىزمەت ستاجىنىڭ وسۋىنە قاراي تابيعي جوعارىلايتىن، قىزمەت مىندەتىنىڭ وسۋىنە بايلانىستى تابيعي وسەتىن نارسە ەمەس، ءسوز جوق، ءوزىن تاربيەلەۋدى، ءوزىن تەجەۋدى، ءوزىن وزگەرتۋدى كۇشەيتۋ كەرەك“. باس شۋجي شي جينپيڭنىڭ شىنايى ىقىلاستى ءسوزى وسىنداعى قالىڭ كۋرسانتتاردى ايرىقشا اسەرلەندىردى.
اشىق - جارقىن بولۋ، بۇكپەسىز، قالتقىسىز بولۋ − كوممۋنيستەردىڭ جارقىن قاسيەتى، سونداي - اق كادرلار جەتىلدىرۋگە ءتيىستى ساپا جەتىلىمى.
كۋرسانت چۇي ليننىڭ نازارىندا پارتيالى كادرلار جاڭا داۋىردەگى جاقسى كادر ولشەمى بويىنشا وزىنە قاتاڭ تالاپ قويىپ، ءارقاشان سالىستىرىپ تۇرۋى، امالياتتا ايگىلەۋى كەرەك. ”ەگەر جەكە باسىنىڭ اتاق - ابىرويىن ماڭىزدى ساناسا، وندا كادرلاردا ىڭعايىنا قاراي ىستەۋ، ساياسي تۇرعىسى بەرىك بولماۋ سياقتى ءتۇرلى ماسەلەلەر بايقالادى“.
”80 - جىلداردىڭ تۇلەگى“ بولعان كادر رەتىندە، كۋرسانت ديڭ لين بىلاي دەپ قارادى: جاس كادرلار ءوزىن تاربيەلەۋدى كۇشەيتىپ، ءادىل دە قالتقىسىز بولىپ، اقيقاتتى تانىپ، الدىن الا ساقتانىپ، پرينسيبى، تومەنگى شەگى، قاعيداسى بولۋ كەرەك.
”سالىستىرا ايتقاندا، جاستاردا پارتيا ىشىندەگى ساياسي تۇرمىستا شىڭدالۋ مەن جاپالى تۇرمىستىڭ سىنىنان ءوتۋ كەمشىل بولادى، ءتۇرلى تاجىريبەلەر مەن ساباقتاردى قابىلداۋى، كەمشىلىكتەرى مەن قاتەلىكتەرىنە سالىسىتىرا وتىرىپ پارىقتاردى تاۋىپ، ءوزىن ۇزدىكسىز كەمەلدەندىرۋى كەرەك“، - دەدى ديڭ لين.
تانىم مەن ارەكەتتىڭ بىرلىگىندە ىرىقتىلىقپەن جاۋاپكەرشىلىك ارقالاپ، ىسكەرلىك كورسەتۋ كەرەك
”باتىلدىقپەن جاۋاپتى بولاتىن - بولمايتىندىعىنان، جۇرەكتىلىكپەن جاۋاپكەرشىلىك ارقالايتىن - ارقالامايتىندىعىنان ءبىر كادردىڭ پارتيالىلىعى مەن ستيلىن بايقاۋعا بولادى“. باس شۋجي شي جينپيڭ ”جاۋاپكەرشىلىك ارقالاۋ“دى قايتا - قايتا باسا دارىپتەدى.
كادرلاردىڭ ءوسىپ - جەتىلۋىنىڭ وڭاي جولى جوق، بوران - شاشىنداردى باستان وتكەرىپ، كوپ ءىستى باسىنان وتكەرگەندە عانا بۋىنى بەكىپ، شىڭدالىپ، قابىلەت - دارىنىن وسىرە الادى. كۋرسانت لي گاۋ بىلاي دەدى: ”مەن ەكولوگيالىق ورتانى قورعاۋ جاعىنداعى قىزمەتپەن شۇعىلدانامىن. قازىر بۇل سالا كوپتەگەن قيىنشىلىق پەن سايىسقا ءدوپ كەلۋدە، حالىق بۇقاراسىنىڭ كۇتكەن ءۇمىتى دە توتەنشە زور. ءبىز ەكولوگيالىق ورتانى قورعاۋدىڭ ەرەكشە شىدامدى، ەرەكشە كۇرەسكەر، ەرەكشە ۇلەسكەر قۇرىش قوسىنىن قۇرىپ، لاستانۋدان ساقتانۋ جانە ونى جونگە سالۋدان قامال الۋ شايقاسىن باتىل تۇردە ويداعىداي جۇرگىزۋىمىز كەرەك“.
باس شۋجي شي جينپيڭ بىلاي دەپ اتاپ كورسەتتى: جۇمىستىڭ اۋىرىن ءبىلىپ، سالماعىن كوتەرەتىن، قيىندىقتاردان قامال الاتىن ءىس جۇزىندىك ارەكەت ارقىلى پارتياعا ادالدىقتى، حالىققا اق جارقىندىقتى بەينەلەۋ كەرەك.
توڭكەرىستىك بايىرعى رايونداعى كەدەي اۋداننان كەلگەن كۋرسانت جاڭ جيان بىلاي دەدى: ”كەدەيلىكتەن ارىلتۋدان قامال الۋ شايقاسىن كۇش سالا ويداعىداي جۇرگىزۋ قازىرگى قىزمەتىمىزدە ايرىقشا ماڭىزدى سانالادى . پارتيالى كادر رەتىندە،’باستاماشى‘ رولدى شىنايى ساۋلەلەندىرىپ، جاۋاپكەرشىلىكتى ماڭگى ارقالاپ، اسقاق سەزىمنەن ماڭگى ايرىلماي وتىرىپ بايىرعى رايون حالقىن كەدەيلىكتەن ارىلىپ، دوڭگەلەك داۋلەتتىلىككە تالپىنۋداي بايۋ جولىنا باستاپ، ءىس جۇزىندىك ارەكەت ارقىلى پارتياعا ادالدىقتى، حالىققا اق جارقىندىقتى بەينەلەيمىن“.
(شينحۋا اگەنتتىگىنىڭ 3 - ايدىڭ 1 - كۇنى بەيجيڭنەن بەرگەن حابارى)
