ءتىلشى فۋ شياڭلۇڭ
3 - ايدىڭ 22 - كۇنى تاڭەرتەڭ ەرتە، ءۇرىمجى ەكونوميكالىق - تەحنيكالىق اشۋ رايونى (توۋتۇنحى رايونى) سۇڭشان كوشەسى ءمالى باسقارماسى حۋاڭشان كوشەسى الەۋمەتتىك اۋماعىنىڭ تۇرعىنى جاڭ رۇي الەۋمەتتىك اۋماققا، ءۇرىمجى ەكونوميكالىق - تەحنيكالىق اشۋ رايونى (توۋتۇنحى رايونى) قۇرىلىس، قارجى قوسۋ، اشۋ شەكتى سەرىكتەستىگىنىڭ حۋاڭشان كوشەسى الەۋمەتتىك اۋماعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ باستىعى، ءبىرىنشى شۋجي سۋ ۋيدى ىزدەپ كەلدى.
”سۋ شۋجي، قىزمەت اترەتى مەن الەۋمەتتىك اۋماقتىڭ كومەگىندە دۇكەنىمنىڭ ساۋداسى ءبىرشاما تۇراقتى بولىپ، كىرىسىم ءوزىم مەن بالامدى اسىراۋعا جەتەتىن بولدى، بۇگىن مەن ەڭ تومەنگى تۇرمىستى قامتاماسىزداندىرۋ قاراجاتىن الاتىندار تىزىمىنەن شىعايىن دەپ كەلدىم، ونى باسقا دا ءزارۋ ادامدارعا بەرسەڭىزدەر“، - دەدى جاڭ رۇي شىن پەيىلمەن.
بيىل 32 جاستاعى جاڭ رۇي 10 نەشە جىلدىڭ الدىندا اۆتوكولىك شىرعالاڭى سەبەبىنەن كورۋ قۋاتى 2 - دارەجەلى مۇگەدەك بولادى، كۇن الاكەۋىم تارتسا، انىق كورە المايتىن ول كەشتە سىرتقا جالعىز شىعۋدان الاڭدايتىن ەدى. 8 جىلدىڭ الدىندا اجىراسقان جاڭ رۇي قىزىمەن بىرگە تۇرادى، ”جايما اشىپ، ۇساق - تۇيەك ساتىپ كۇنەلتتىم، تابىسىم تۇراقسىز بولدى، قىزىم دا بويجەتىپ كەلەدى، وعان جاقسىراق تۇرمىس شارت - جاعدايىن جاساپ بەرۋگە دە دارمەنسىز بولدىم“، - دەيدى جاڭ رۇي.
2013 - جىلى حۋاڭشان ءمالى باسقارماسى جاڭ رۇيدىڭ جاعدايىنان حابار تاپقان سوڭ، ونى ەڭ تومەنگى تۇرمىستى قامتاماسىزداندىرۋ قاراجاتىن الاتىندار قاتارىنا تىركەيدى. ”يىعىمداعى جۇك بىردەن جەڭىلدەپ قالعانداي بولدىم، بۇل ۇكىمەتتىڭ ماعان جاساعان قامقورلىعى عوي، مەنىڭ العىسىم شەكسىز، ءوزىم دە ونان ارى قۇلشىنىپ، قىزىما ونەگە بولسام، جاقسى ءومىر كەشسەم دەپ ويلادىم“، - دەيدى جاڭ رۇي تىلشىگە.
وسىنداي جىگەرمەن جاڭ رۇي سىرتقا شىعىپ جايما اشۋىن جيىلەتە ءتۇستى، ”كوبىرەك اقشا تاپقىم كەلدى، بىرەر ونەر ۇيرەنىپ الۋدى ويلادىم، سوندا تابىسىم اناعۇرلىم تۇراقتى بولار ەدى“، - دەيدى ول.
2017 - جىلى ءۇرىمجى ەكونوميكالىق - تەحنيكالىق اشۋ رايونى (توۋتۇنحى رايونى) مۇگەدەكتەر بىرلەستىگى شەبەرلىك كۋرسىن ۇيىمداستىرعاندا، جاڭ رۇي بالالاردى ۋقالاپ ەمدەۋ جانە ەرەسەكتەردىڭ دەنساۋلىعىن فيزيكالىق جولمەن قالپىنا كەلتىرۋ شەبەرلىگىن ۇيرەنۋگە تىركەلدى، سونداي - اق 2018 - جىلى 4 - ايدا وقۋ تاۋىسۋ كۋالىگىن الدى.
ءبىر ونەردى مەڭگەرگەن جاڭ رۇي دۇكەن اشىپ، شارۋاشىلىق قۇرۋ تۋرالى جوسپار جاساي باستادى. باستاۋىش مەكتەپتە وقيتىن قىزىنا قارايلاسۋدى ويلاعان ول ۇيگە جاقىن جەردەن دۇكەن قاراستىردى، ءبىراق، توڭىرەكتەگى دۇكەندەردىڭ جال اقىسىن سۇراستىرىپ كورگەن سوڭ، جاڭ رۇي بۇل ويىنان ايني باستادى، ”50 شارشى مەترلىك دۇكەندى ايىنا 40 مىڭ يۋانعا جۋىق اقشامەن جالدايدى ەكەنسىڭ، بۇعان مەنىڭ شامام قايدان كەلسىن؟“، - دەيدى جاڭ رۇي.
قىزمەت اترەتىنىڭ مۇشەلەرى مەن الەۋمەتتىك اۋماق كادرلارى وتباسىلاردى ارالاۋ بارىسىندا بۇل جاعدايدان حابار تاۋىپ، دەرەۋ قاراستى اۋماقتاعى دەنساۋلىق ساقتاۋعا قىزمەت وتەۋ ورتالىعىمەن سويلەسىپ، جاڭ رۇيگە تيجارات جۇرگىزەتىن ورىن الىپ بەرۋگە قۇلشىندى. 2018 - جىلى 8 - ايدا قاراستى اۋماقتاعى دەنساۋلىق ساقتاۋعا قىزمەت وتەۋ ورتالىعى جاڭ رۇيدىڭ ۋقالاپ ەمدەۋ بولمەسى رەتىندە پايدالانۋىنا 60 شارشى مەترلىك بولمە بوساتىپ بەردى، ول جالداۋ اقىسى ءۇشىن جىلىنا 50 مىڭ يۋان عانا تاپسىراتىن، ونىڭ ءوزىن مەرزىمگە ءبولىپ تولەيتىن بولىپ كەلىستى.
دۇكەننىڭ ماسەلەسى شەشىلگەن سوڭ، جاڭ رۇي دەرەۋ دوس - جاراندارىنان قارجى قۇرادى، ”دۇكەندى اشەكەيلەۋ، جابدىق ساتىپ الۋ جانە ءۇيدىڭ جالداۋ اقىسىن تاپسىرۋ ءۇشىن، العاشقى جىلى جالپى 100 مىڭ يۋانداي اقشا سالۋ كەرەك بولدى، بۇعان شامام كەلەتىنىنە سەنىمدەمىن، شامام دا جەتەدى!“. جاڭ رۇي ءومىرىنىڭ جاڭا ءبىر پاراعى اشىلعانداي سەزىمگە بولەندى.
2018 - جىلى 11 - ايدىڭ باسىندا جاڭ رۇيدىڭ ۋقالاپ ەمدەۋ دۇكەنى اشىلدى. اقىسى تومەن، قىزمەت وتەۋ پوزيتسياسى مەن تەحنيكاسى دا جاقسى بولعاندىقتان، دۇكەنگە كەلەتىندەر كوبەيە ءتۇستى. العاشقى ايىندا جاڭ رۇي 3000 يۋان تازا تابىس تاپتى.
وسىدان كەيىنگى بىرنەشە ايدا، جاڭ رۇيدىڭ ايلىق تابىسى 4000 يۋان اينالاسىندا بولدى، ”وسىلاي كەتە بەرسە، ءوزىم مەن قىزىمدى اسىراپ كەتۋگە شامام ابدەن جەتەدى ەكەن، ەڭ تومەنگى تۇرمىستى قامتاماسىزداندىرۋ قاراجاتىن مەنەن دە ءزارۋ جاندارعا قالدىرعانىم ءجون“ دەپ ويلاعان جاڭ رۇيدا ەڭ تومەنگى تۇرمىستى قامتاماسىزداندىرۋ قاراجاتىن قايتارۋ ويى تۋدى.
جاڭ رۇي سۋ ۋيگە: ”ماعان قارىزعا اقشا بەرگەن دوس - جاراندارىممەن اقىلداستىم، ولارعا قارىز اقشانى بىرتىندەپ قايتاراتىن بولدىم. سوندىقتان ەڭ تومەنگى تۇرمىستى قامتاماسىزداندىرۋ قاراجاتىن ەندى المايمىن، بۇل اقشاعا مەنەن دە ءزارۋ ادامدار بار عوي“، - دەدى.
”جاڭ رۇيدىڭ وسىنداي ءوز كۇشىنە سۇيەنەتىن، ءوزىن الەۋەتتەندىرەتىن رۋحى ءبىزدى شىنمىمەن اسەرلەندىردى. قاتىستى ساياسات بويىنشا، ەڭ تومەنگى تۇرمىستى قامتاماسىزداندىرۋ قاراجاتىن الۋشى دەربەس شارۋاشىلىق قۇرعان سوڭ جارتى جىل ىشىندە تابىسى تۇراقتى بولسا، سونداي - اق تۇرمىسى قامتاماسىز ەتىلسە، ەڭ تومەنگى تۇرمىستى قامتاماسىزداندىرۋ قاراجاتىن الۋ تىزىمىنەن شىعۋ راسمياتىن بىتىرۋىنە بولادى“، - دەدى سۋ ۋي.
”ەندەشە، مەن ەڭ تومەنگى تۇرمىستى قامتاماسىزداندىرۋ تىزىمىنەن شىعامىن!“، - دەدى جاڭ رۇي كۇلمسىرەپ.
