بالا ارمانىن بىرگە جۇزەگە اسىرايىق
”فۋتبولشى بالالار“ تيانجينگە بارىپ، اۋىس - كۇيىس جاسادى
شينحۋا اگەنتتىگىنىڭ 5 - ايدىڭ 29 - كۇنى تيانجيننەن بەرگەن حابارى (ءتىلشى فۋ گۋاڭيۇي). فۋتبولعا دەگەن ىستىق ىنتا جانە ارمان ارقالاپ، شينجياڭنىڭ حوتان ايماعىنان كەلگەن 22 ”فۋتبولشى بالا“ تيانجيننەن شينجياڭعا كومەككە كەلگەن كادرلاردىڭ باستاۋىندا تيانجينگە كەلدى. 5 - ايدىڭ 28 - كۇنى كەشتە بالالار تيانجيندە 2019 - جىلعى جۇڭگو فۋتبول بىرلەستىگى جۇلدەسى اياسىنداعى تيانجين مەن تايجوۋ اراسىنداعى جارىستى كوردى، ولاردىڭ ىشىندەگى 12 ”فۋتبولشى بالا“نىڭ باعى جانىپ، جارىس ويىنشىلارى قولىنان جەتەلەپ شىعاتىن بالالار بولىپ، جارىستىڭ الاڭعا كىرۋ سالتىنا قاتىناستى.
تيانجين مەن حوتان 2 جەردىڭ مادەنيەت اۋىس - كۇيىسى قيمىلىنىڭ بالا ەلشىسى رەتىندە، 22 ”فۋتبولشى بالا“ تيانجين باعىتتامالى كومەك بەرەتىن شينجياڭنىڭ حوتان ايماعىنداعى شەريا، كەريا جانە نيە اۋداندارىنان كەلگەن، وقىتۋشىلار وسى 3 اۋدانداعى مەكتەپتەردەن تاڭداپ شىققان ولار − باستاۋىش مەكتەپتىڭ فۋتبولعا شەبەر وقۋشىلارى. جۇڭگو سۋپەر ليگاسىنداعى كوماندا باستىقتارىنىڭ ىشىندەگى بىردەن - ءبىر شينجياڭدىق، تيانجين تايدا فۋتبول كومانداسىنىڭ باستىعى، وڭتۇستىك شينجياڭنان كەلگەن ماتجان دا بالالارمەن قۋانا اڭگىمەلەسىپ، ولاردى وزدەرىنىڭ فۋتبول ارماندارىنا تاباندى بولۋعا ىنتالاندىردى.
جارىستىڭ ءۇزىلىس كەزىندە، قوعامنىڭ ءار سالاسى بالالارعا ارناپ مەيىر باعىشتاپ، جىلۋ اتاۋ قيمىلىن وتكىزدى.
حوتان ايماقتىق پارتكوم ۇگىت ءبولىمىنىڭ ورىنباسار باستىعى، ايماقتىق مادەنيەت - ساياحات مەكەمەسى پارتيا باسشىلىق گرۋپپاسىنىڭ شۋجيى ياڭ يىڭ مىنالاردى ءبىلدىردى: بالالار ۇلتتار ىنتىماعىنىڭ ەلشىسى رەتىندە، تيانجينگە بارىپ، فورماسى الۋان، مازمۇنى باي اۋىس - كۇيىس قيمىلىن وتكىزىپ، ۇلتتار ىنتىماعىنىڭ تۇقىمىن بالالاردىڭ جۇرەگىنە سەۋىپ، ۇلتتار ىنتىماعى گۇلىنىڭ اناعۇرلىم جايقالا اشىلۋىنا مۇمكىندىك جاسادى.
ءتىلشىنىڭ ۇعىسۋىنشا، فۋتبولشى بالالاردىڭ وسى جولعى ساپارىندا نانكاي داشۋەسىن، تيانجين مۇراجايىن ەكسكۋرسيالاۋ سياقتى قيمىلدار ورنالاستىرىلعان، سونداي - اق ولار شاڭحايداۋ باستاۋىش مەكتەبىنىڭ، جيننان رايونى باليتاي باستاۋىش مەكتەبىنىڭ وقۋشىلارىمەن جانە جاڭ شياۋرۇي جاستار - ورەندەر فۋتبول كلۋبىنىڭ بالا ويىنشىلارىمەن فۋتبولدىق دوستىق جارىس وتكىزەدى ەكەن.
