شينحۋا اگەنتتىگىنىڭ 8 - ايدىڭ 28 - كۇنى جىڭجوۋدان بەرگەن حابارى (ءتىلشى حان چاۋياڭ). ”دۇڭ سۇنرۇيدىڭ قامالدى تالقانداعان ەرلىگىن كوردىك... بۇگىنگى كۇندە، قاھارمان ءوز جانىمىزدا، ول − حاۋ جينمۋ...“ 41 جىلدىڭ الدىندا، بۇرىنعى لوياڭ قالالىق قوعام حاۋىپسىزدىگى مەكەمەسى چۇڭچيڭ جولى ساقشى بولىمشەسىنىڭ حالىق ساقشىسى جوۋ جيڭمەي نەبارى ءبىر رەت عانا جۇزدەسكەن قاھارمان حاۋ جينمۋ ءۇشىن كوزىنە جاس الىپ وتىرىپ، ”بۇرىن قاھارماندار مەنەن تىم شالعايدا دەپ ويلايتىنمىن، ءاسىلى قاھارماندار جانىمىزدا ەكەن“ دەپ ماداق جىرىن جازدى.
حاۋ جينمۋ، 1953 - جىلى 7 - ايدا دۇنيەگە كەلگەن، حىنان ولكەسى لوياڭ قالاسى مىڭجين اۋدانى حۇيمىڭ قالاشىعىنان. 1971 - جىلى حاۋ جينمۋ لوياڭ قالالىق قوعام حاۋىپسىزدىگى مەكەمەسىنە قىزمەتكە ورنالاسادى، كوزى تىرىسىندە لوياڭ قالالىق قوعام حاۋىپسىزدىگى مەكەمەسى قىلمىستىق ىستەر ساقشى ۇلكەن اترەتىنىڭ بارلاۋشىسى بولعان.
1977 - جىلى 11 - ايدىڭ 28 - كۇنى تۇندە لوياڭ وقبۋار زاۆودىنىڭ قارۋلى كۇش بولىمىندە اۋىر ۇرلىق دەلوسى تۋىلىپ، 56 تۇرپاتتى 2 اۆتومات، 11 قول بومبى، 929 وق ۇرلانادى. ەگەر دەلو دەر كەزىندە اشىلماسا، ۇلكەن حاۋىپسىزدىك كومەسكى اپاتى ساقتالىپ، حالىق بۇقاراسىنىڭ حاۋىپسىزدىگىنە اۋىر قاتەر تونەتىن ەدى.
لوياڭ قالالىق پارتكومنىڭ جانە جوعارى دارەجەلى باسشىلاردىڭ نۇسقاۋى بويىنشا، لوياڭ قالالىق قوعام حاۋىپسىزدىگى مەكەمەسى بار كۇشىن جۇمساپ، دەلونى تەز ارادا اشۋعا بەكيدى. ناق مايداندى بارلاپ تەكسەرۋ ارقىلى ساقشى جاق قىلمىس كۇماندىسى تىعىپ قويعان وق - ءدارىنىڭ ءبىر ءبولىمىن تاۋىپ شىعادى ءارى وسى جەردە كۇزەتىپ وتىرۋعا بەكيدى.
حاۋ جينمۋ دەلونى اشۋ قىزمەتىنە بەلسەنە ات سالىسادى، ول قارنىنىڭ اشقانىنا، ارىپ - شارشاعانىنا قاراماي، ون نەشە ساعات تىنباي قىزمەت ىستەپ، 29 - كۇنى ءتۇن ورتاسىنا دەيىن كۇرەس ورنىندا تاپجىلماي وتىرادى. وسى كەزدە جوعارى جاقتان شۇعىل جاعداي مالىمەتى كەلىپ، قىلمىستى ەلەمەنتتىڭ اۆتوماتتى، قول بومبىنى الىپ، كوز جازدىرىپ كەتكەندىگى جەتكىزىلەدى. حاۋ جينمۋ دەرەۋ ساقشى كيىمىن شەشىپ، بۇقاراشا كيىنىپ، 2 جولداسىمەن بىرگە بەلگىلەنگەن ورىنعا جەتىپ بارادى، قىلمىستى ەلەمەنتتىڭ الدىن توسپاق بولادى.
30 - كۇنى ساعات 0دەن 25 مينۋت وتكەندە، قىلمىستى ەلەمەنت كورۋ اياسىنا كىرگەننەن كەيىن، حاۋ جينمۋ مەن تاعى ءبىر جولداسى قىلمىستى ەلەمەنتكە قاراي جاقىندايدى ءارى ونى قورشاۋعا الادى. ونى ۇستاۋعا دايىندالعان كەزدە قىلمىستى ەلەمەنت كەنەت قول بومبىنىڭ بىلتەسىن تارتىپ قالادى. قىسىلتاياڭ ساتتە، حاۋ جينمۋ اتىلىپ بارىپ قىلمىستى ەلەمەنتتى قاپسىرا قۇشاقتاپ، ونى جەرگە الىپ سوعادى. ارپالىس بارىسىندا قول بومبى جەرگە ءتۇسىپ قوپارىلىس جاساپ، حاۋ جينمۋ جولداستىڭ باسى، بەتى، كوكىرەگى، اياعى نەشە ون جەردەن جارالانادى، شۇعىل قۇتقارۋ ءونىم بەرمەي، ەرلىكپەن قۇربان بولادى، سول جىلى 24 جاستا عانا ەدى.
1977 - جىلى 12 - ايدىڭ 26 - كۇنى حاۋ جينمۋعا توڭكەرىستىك قۇربان اتاعى بەرىلەدى. 1998 - جىلى 2 - ايدىڭ 12 - كۇنى جۇڭگو كوممۋنيستىك پارتياسى لوياڭ قالالىق كوميتەتى حاۋ جينمۋ جولداستى جۇڭگو كوممۋنيستىك پارتياسىنىڭ رەسمي مۇشەسى دەپ تانيدى.
قاھارماننىڭ ەسمى ماڭگى وشپەيدى. حاۋ جينمۋ قۇرباننىڭ اتا مەكەنى مىڭجين اۋدانى حۇيمىڭ قالاشىعى لاۋچىڭ قىستاعىندا، قىستاقتاعى جاسى ەگدە تارتقان ادامداردىڭ ءبارى حاۋ جينمۋدىڭ بۇزاقىنى ۇستاۋ بارىسىندا ەرلىكپەن قۇربان بولعانىن بىلەدى، ونى جاقسى ۇلگىمىز دەپ ماقتايدى.
حاۋ جينمۋ قۇربان بولعاننان كەيىن، ونىڭ ءىنىسى حاۋ جينپيڭ قوسىننان شەگىنگەننەن كەيىن اعاسىنىڭ ءىزىن باسىپ، لوياڭ قالالىق قوعام حاۋىپسىزدىگى مەكەمەسىندە قىلمىستىق ىستەر ساقشىسى بولادى. ”اعام ەكەۋىمىز باسكەتبول ويناۋعا قىزىعاتىنبىز، وتە تاتۋ ەدىك. بالا كۇنىمىزدە كورشىمىز جەتىم - جەسىر كاريا ەدى، اعام ءار كۇنى مەنى ەرتىپ كارياعا سۋ اكەلىپ بەرەتىن، قىستاقتاعىلار ونى اۋىزعا العاندا، باس بارماعىن شىعارمايتىنى جوق“. 40 نەشە جىلدان بەرى، ءار جىلعى چيڭميڭدە حاۋ جينپيڭ وتباسىنداعىلارىن ەرتىپ لوياڭ قالاسىنداعى قۇرباندار قابىرستانىنا بارىپ، اعاسىنىڭ قابىرىن سىپىرادى، حاۋ جينمۋدىڭ ىزگى ىستەرى دە ۇرپاقتان - ۇرپاققا جالعاسۋدا.
لوياڭ قالالىق قوعام حاۋىپسىزدىگى مەكەمەسى ساياسي ءبولىمىنىڭ مەڭگەرۋشىسى شىڭ ساۋفي بىلاي دەدى: حاۋ جينمۋ جولداس قۇربان بولعان كەزدە 24 جاستا عانا بولاتىن، ول جاستىق كوكتەمى، ىستىق قانىمەن حالىقتىڭ حاۋىپسىزدىگىن قورعاۋداي قىزمەت جاۋاپكەرشىلىگى مەن بورىشىن امالياتتا ايگىلەدى، 40 نەشە جىلدان بەرى، حاۋ جينمۋدىڭ قاھارماندىق ىزگى ىستەرى لوياڭداعى ءار ۇرپاق قوعام حاۋىپسىزدىگى قىزمەتكەرلەرىن حالىقتىڭ قوعام حاۋىپسىزدىگى ىستەرىنىڭ ۇلى جورىعىندا جاپا - ماشاقاتتان تايسالماي، ەرلىكپەن العا باسۋعا شابىتتاندىرىپ كەلەدى.
