شينحۋا اگەنتتىگىنىڭ 10 - ايدىڭ 22 - كۇنى نانچاڭنان بەرگەن حابارى (ءتىلشى لاي شيڭ). ”ءبىر تاڭداۋلى جاۋىنگەر رەسپۋبليكانىڭ رەفورما جاساۋىنداعى، ەسىك اشۋىنداعى ءبىر حاۋىپسىزدىك قالتقى“. مەي كايچۇن كۇندەلىگىنە وسىلاي جازعان. 1992 - جىلى 10 - ايدا شاقىرۋعا ساي اسكەرگە قاتىناسقانىنا ءبىر جىل تولماعان ول، مىلتىق الىپ اۋمىن حىڭشىڭ بانكەسىن توناعاننان كەيىن جاسىرىن جۋحايعا قاشىپ بارعان 4 بۇزاقىمەن باسىن ءباي تىگىپ الىسىپ، ىستىق قانىمەن شەكارا سىزىعىن بويادى، قۇربان بولعان كەزدە نە بارى 18 جاستا ەدى، ول جان - تانىمەن شەكارا قورعانىسىنىڭ ماداق جىرىن جازدى.
مەي كايچۇن، 1974 - جىلى جياڭشي ولكەسى جيۋجياڭ قالاسى پىڭزى اۋدانىنداعى ءبىر اۋىل - قىستاق وقىتۋشىسى وتباسىندا دۇنيەگە كەلگەن، 1991 - جىلدىڭ سوڭىندا شاقىرۋعا ساي اسكەرگە قاتىناسىپ، قارۋلى ساقشى گۋاڭدۇڭ ولكەلىك شەكارا قورعانىسى باس اترەتى 5 - تارماق اترەتى سايلاۋىت ورتا اترەتىنىڭ ءبىر جاۋىنگەرى بولادى.
1992 - جىلى 10 - ايدىڭ 17 - كۇنى تاڭعا جۋىق، مەي كايچۇن جۋحاي قالاسىنىڭ اۋمىنمەن ىرگەلەس جاتقان شەكارا سىزىعىندا مىندەت اتقارادى. ول شارلاپ ءجۇرىپ گۋانجاكوۋعا 800 مەتردەي قالعان جەرگە جەتكەندە، قاراڭداعان 3 − 4 ادامنىڭ كەنەتتەن باسپالاپ قارسى جاقتاعى اۋمىن باعىتىنان تولقىنى قايتقان يايۇڭ وزەنىنە ءتۇسىپ، دەرەۋ ەلىمىز جاقتىڭ سىم تەمىر قورشاۋىنا جاقىنداعاندىعىن بايقايدى، بۇل بۇزاقىلار اۋمىننان ءبىر ميلليون 300 مىڭ يۋاننان كوپ شياڭگاڭ اقشاسىن توناعاننان كەيىن ىشكى وڭىرگە جاسىرىن قايتپاقشى بولىپتى.
مەي كايچۇن 4 بۇزاقىنىڭ جاقىنداعانىن كورە سالا: ”توقتاڭدار!“ دەپ ايعاي سالىپ، مىلتىعىن اسپانعا قاراتىپ اتىپ قالىپ، بۇزاقىلارعا ەسكەرتۋ بەرەدى. كەنەتتەن جەتكەن ايعاي مەن مىلتىق داۋىسى بۇزاقىلاردى سەلك ەتكىزەدى. مەي كايچۇن تاباندا ولاردى سىم تەمىر قورشاۋدان اسىپ وتۋگە شاقىرادى ءارى ولاردى قولدارىن كوتەرۋگە بۇيىرىپ، سودان كەيىن تەرگەۋ جۇرگىزەدى.
مەي كايچۇننىڭ جالعىز ەكەنىن بايقاپ، ولاردىڭ اراسىنداعى ءبىر بۇزاقى ءبىر بۋدا 10 مىڭ يۋان شياڭگاڭ اقشاسىن جەرگە قويىپ: ”مىناعان شاي الىپ ءىش، ءبىزدى قويا بەرە سال!“ - دەيدى.
مەي كايچۇن قاتاڭ تويتارىپ: ”بولمايدى! مەنىمەن بىرگە ورتا اترەتكە بارىپ جۋاستىقپەن ماسەلەلەرىڭدى تاپسىرىڭدار!“ - دەيدى.
بۇزاقى تاعى دا ءبىر بۋدا 10 مىڭ يۋان شياڭگاڭ اقشاسىن مەي كايچۇننىڭ الدىنا تاستايدى ءارى تاعى ءبىر تومپايعان سومكەنى نۇسقاپ: ”ەگەر ءبىزدى قويا بەرسەڭ، تاعى 100 مىڭ يۋان قوسامىز“، - دەيدى.
مەي كايچۇن جاعدايعا بايقاپ، بۇزاقىلارعا ايعاي سالادى: ”دامەلەنبە! قانشا كوپ اقشاڭ بولسا دا مەنى ساتىپ الا المايسىڭ!“. ول بۇزاقىلاردى تۇرۋعا بۇيىرىپ، ولاردى ورتا اترەتكە ايداپ اپارماق بولادى. 20 نەشە مەتر جۇرگەننەن كەيىن، ەڭ سوڭىندا كەلە جاتقان ءبىر بۇزاقى الدىعا قاراي سىتىلىپ ءوتىپ، ەكى قولىمەن مەي كايچۇندى قاپسىرا قۇشاقتاپ الىپ ءارى قالعان 3 سەرىگىنە: ”ونى اتىپ تاستاڭدار!“ - دەيدى.قالعان 3 بۇزاقى جالما - جان مەي كايچۇندى جەرگە قاراي باسادى، مەي كايچۇن جان - تانىمەن قارسىلاسادى. سول كەزدە بۇزاقىلار مەي كايچۇننىڭ ەكى اياعىن باسىپ تۇرىپ، ونى جەرگە الىپ ۇرادى، اراسىنداعى ءبىر بۇزاقى ناگانىن الىپ شىعىپ، مەي كايچۇننىڭ كوكىرەگىنە توسەيدى.
مەي كايچۇن: ”مەنى اتىپ ولتىرسەڭدەر دە سەندەردى جىبەرمەيمىن!“ - دەيدى. ناگانى بار بۇزاقى مەي كايچۇنگە قاراتىپ وق اتادى. باسقا قاراۋىلحاناداعى قاراۋىل اسكەرلەر داۋىستى ەستىپ جەتىپ كەلگەندە، قاندى قولدار زىم - زيا قاشىپ جوعالعان ەدى. نە بارى 18 جاستاعى، اسكەرلىككە قاتىناسقانىنا ءبىر جىل بولا قويماعان مەي كايچۇن ەرلىكپەن قۇربان بولادى.
”كايچۇن ىستەۋگە ءتيىس جۇمىسىن ىستەدى، كۇزەتتە تۇرىپ، قاراۋىلعا شىعۋ ونىڭ ۇلەسىندەگى ءىس“، - دەيدى مەي كايچۇننىڭ اكەسى مەي ماۋشىڭ ەسكە الىپ، 28 جىلدىڭ الدىندا مەي كايچۇن اسكەرلىك مىندەت وتەگەندە، ول كايچۇنگە اسكەري بولىمگە بارعاننان كەيىن، ءسوز جوق، بۇيرىققا قۇلاق اسىپ، قولباسشىلىققا بويسۇنىپ، اسكەري بولىمدە ءومىرىنىڭ قۇنىن ايگىلەۋدى ايتقان ەدى.
مەي كايچۇن قۇربان بولعاننان كەيىن، قوعام حاۋىپسىزدىگى مينيسترلىگى وعان ”شەكارا قورعاعان قاھارمان“ داڭقتى اتاعىن بەردى، گۋاڭدۇڭ ولكەلىك پارتكوم، ولكەلىك حالىق ۇكىمەتى مەي كايچۇندى جۇڭگو كوممۋنيستىك پارتياسىنىڭ مۇشەسى جانە توڭكەرىستىك قۇربان دەپ تانىدى.
”كايچۇن دۇرىس ىستەدى، وتاننىڭ شەكاراسىن قورعايتىن ادام بولۋ كەرەك“. مەي ماۋشىڭ مەن جۇبايى 2017 - جىلعى 1 - تامىز ارميا مەرەكەسى قارساڭىندا ۇلى كوزى تىرىسىندە اسكەري مىندەت وتەگەن جەرگە كەلىپ، ونىڭ كوزى ءتىرى كەزىندە شارلاۋ قىزمەتىن جۇرگىزگەن جۋحاي - اۋمىن شەكارا سىزىعىندا ءجۇرىپ، ۇلىنىڭ تاڭداعان جولىن ونان ارى ءتۇسىندى.
