شينحۋا اگەنتتىگىنىڭ 10 - ايدىڭ 27 - كۇنى چىڭدۋدان بەرگەن حابارى (ءتىلشى لي حۋالياڭ). سىچۋان ولكەسى ميانياڭ قالاسى پيڭۋ اۋدانى بەيشان باقشاسىندا ”مەملەكەتتىك قوعام حاۋىپسىزدىگى شەبىندەگى 2 - دارەجەلى قاھارمان ۇلگى“ زىڭ فۋشيڭ ماڭگىلىك ۇيقىدا جاتىر، ول ءوزىنىڭ بۇكىل عۇمىرىمەن حالىق ساقشىسىنىڭ ادالدىعىن، ناقتى ىسكەرلىگىن جانە جاۋاپكەرلىگىن ايگىلەدى.
زىڭ فۋشيڭ، 1951 - جىلى 4 - ايدىڭ 29 - كۇنى دۇنيەگە كەلگەن، 1974 - جىلى 4 - ايدا پيڭۋ اۋداندىق قوعام حاۋىپسىزدىگى مەكەمەسىنە تاڭداپ جىبەرىلگەن، 1982 - جىلى 8 - ايدا اۋداندىق قوعام حاۋىپسىزدىگى مەكەمەسى قىلمىستىق ىستەر ساقشى اترەتىنىڭ ورىنباسار جەتەكشىسى، 1985 - جىلى 2 - ايدا قىلمىستىق ىستەر ساقشى اترەتىنىڭ جەتەكشىسى، 1989 - جىلى 2 - ايدا اۋداندىق قوعام حاۋىپسىزدىگى مەكەمەسىنىڭ ورىنباسار مەكەمە باستىعى دارەجەلى بارلاۋشىسى بولعان.
قىزمەتتە ول مۇقيات جاۋاپكەرشىلىك ارقالاپ، 8 مارتە وزات قىزمەتكەر بولىپ باعالانعان. 1975 - جىلى جازدا، ول جاۋىنگەر سەرىگىمەن بىرگە ابدەن بۇزىلىپ كەتكەن مۇردەنى تەكسەرەدى، مۇردەنىڭ جارتىسى سۋعا شىلانىپ تۇرسا دا ول تايسالماي وزەنگە ءتۇسىپ، مۇردەنى جاعاعا سۇيرەپ شىعارىپ، وپەراتسيا پىشاعىمەن جارىپ، قولقانى قاباتىن ساسىق يىسكە شىداي وتىرىپ دەن قويا تەكسەرىپ شىعادى.
قىزمەتتە كەزدەسەتىن الۋان ءتۇرلى كۇردەلى جاعدايلار الدىندا، زىڭ فۋشيڭ قاشاندا كوپ مۇددەسى مەن جەكە مۇددەنى ايقىن اجىراتىپ، ستيلى تازا، پاك بولدى. 1988 - جىلى 7 - ايدا ونىڭ نەمەرە اكەسى سيرەك كەزدەسەتىن باعالى اڭداردىڭ تەرىسىن الىپ - ساتۋ سىندى قىلمىستىق قيمىلعا ارالاسىپ تەكسەرۋگە الىنادى. زىڭ فۋشيڭدى كورگەن ول ماسەلەسىن تاپسىرعاندى قويىپ، وزىنشە ارقالانىپ، ەشكىمنەن يمەنبەي داۋرىعىپ شۋ شىعارىپ، مەنى بوساتىپ جىبەرەدى دەپ ويلايدى، ءبىراق زىڭ فۋشيڭ: ”ءسىز مەنىڭ تۋىسىم بولعانىڭىزبەن، قازىر قىلمىسكەرسىز، ءسىزدىڭ بىردەن - ءبىر شىعار جولىڭىز ماسەلەڭىزدى جۋاستىقپەن تاپسىرۋ“، - دەيدى.
قىزمەتتەستەرىنە ول ايرىقشا ىقىلاستى، پەيىلدى بولاتىن. 1989 - جىلى 7 - ايدىڭ 23 - كۇنى مىندەت اتقارىپ جۇرگەن بىرنەشە ساقشى تاسقىن سۋعا قامالىپ قالادى، ول سىبەرلەپ تۇرعان جاڭبىرعا قاراماي، كومەككە شىققان جولداستاردى باستاپ، باسىنا تونگەن قاتەرمەن ەسەپتەسپەي، جاۋىنگەر سەرىكتەرىن قۇتقارىپ شىعادى. ايەل ساقشى سىرتقا ۇيرەنۋگە كەتىپ، كۇيەۋى ۇزاقتى ۋاقىت ىسساپارمەن سىرتتا ءجۇرىپ، بالاسىنا قارايلايتىن ادام بولماسا، ول سول ساقشىنىڭ بالاسىن ۇيىنە الىپ كەلىپ، بارىن اۋزىنا توسەپ قارايلاساتىن.
1993 - جىلى 3 - ايدىڭ 4 - كۇنى اكەسىن ساباعان ءبىر بۇزاقىعا اۋىل كادرى تاربيە بەرەدى، الگى بۇزاقى بۇعان وشىگىپ، ودان كەك الماق بولىپ، اۋىل كادرىنىڭ ايەلىن پىشاقتاپ اۋىر جارالاپ، قاشىپ كەتەدى، زىڭ فۋشيڭ بۇيرىق بويىنشا ساقشىلاردى باستاپ قىلمىستىق بارلاۋ مىندەتىن اتقارادى. دەلو ىستەۋ بارىسىندا زىڭ فۋشيڭدەر بۇزاقىدان اۋمايتىن ءبىر ادامدى بايقاپ قالادى. ونىڭ ءىس - ارەكەتىنىڭ كۇماندى، كيىمىندە قان داعى بار ەكەندىگىن كورىپ، ساقشىلار ونى توقتاتىپ تەكسەرەدى. ىزدەپ جۇرگەن بۇزاقى ءدال سول ەكەن، بۇزاقى دەرەۋ كيىمىن ءتۇرىپ جىبەرگەندە، وق ءدارىنىڭ ءيىسى بۇرق ەتە تۇسەدى. زىڭ فۋشيڭ ءبىر اتتاپ العا ۇمتىلىپ بارىپ، جاۋىنگەر سەرىگىن يتەرە سالىپ، الگى بۇزاقىنى قاپسىرا قۇشاقتاي الادى، گۇرس ەتكەن داۋىس شىعىپ، زىڭ فۋشيڭ قانعا بوگىپ قۇلاپ تۇسەدى. 6 جاۋىنگەر سەرىگىنىڭ ءومىرى ءۇشىن ول ماڭگىلىككە كوز جۇمادى.
1993 - جىلى 4 - ايدىڭ 22 - كۇنى قوعام حاۋىپسىزدىگى مينيسترلىگى زىڭ فۋشيڭگە ”مەملەكەتتىك قوعام حاۋىپسىزدىگى شەبىندەگى 2 - دارەجەلى قاھارمان ۇلگى“ اتاعىن تولىقتاپ بەرەدى، 1993 - جىلى 5 - ايدىڭ 12 - كۇنى سىچۋان ولكەلىك حالىق ۇكىمەتى ونى توڭكەرىستىك قۇربان دەپ بەكىتەدى.
پيڭۋ اۋداندىق قوعام حاۋىپسىزدىگى مەكەمەسى ساياسي ءبولىمىنىڭ مەڭگەرۋشىسى ۋي ليليڭنىڭ تانىستىرۋىنشا، ءار جىلى 3 - ايدىڭ 4 - كۇنى قوعام حاۋىپسىزدىگى مەكەمەسى كوپشىلىكتى زىڭ فۋشيڭ قۇرباننىڭ قابىرىن سىپىرۋعا ۇيىمداستىرادى ەكەن، بۇل قازىر داعدىعا اينالىپتى. ”ونىمەن ءبىر شايقاس كوللەكتيۆىندە بولعاندىعىمىزدى ءبىز ايرىقشا ماقتانىش جانە داڭق سەزىنەمىز، زىڭ فۋشيڭنىڭ ەرلىك ىستەرى ءبىزدى ۇزدىكسىز العا باسۋعا تەرەڭ ىنتالاندىرىپ وتىرادى“، - دەيدى ۋي ليليڭ.
