شينحۋا اگەنتتىگىنىڭ 10 - ايدىڭ 29 - كۇنى گۋاڭجوۋدان بەرگەن حابارى (ءتىلشى لي شيۇڭيىڭ). قارۋ ۇستاعان بۇزاقىعا جولىعىپ، مىلتىق كەزەلىپ تۇرسادا، ول ءارى - ءسارى بولمادى، شەگىنشەكتەمەدى، اۋىر جارالانىپ جاتسادا عالامات قايسارلىقپەن بۇزاقىنى اتىپ ءولتىرىپ، سوڭىندا جاس ءومىرىن ارنادى، انە ول − پىڭ باۋلين قۇربان ەدى.
پىڭ باۋلين 1966 - جىلى 8 - ايدا دۇنيەگە كەلگەن، گۋاڭدۇڭ حۇيياڭ اۋدانى ما - ان قالاشىعىنان. 1984 - جىلى ورتا مەكتەپتى بىتىرگەن سوڭ، پىڭ باۋلين جۇڭگو حالىق ازاتتىق ارمياسى گۋاڭشي قارۋلى ساقشى اسكەري بولىمىنە قاتىناستى. اسكەري مىندەت وتەپ جۇرگەن كەزىندە، ول بار ىقىلاسىن سالىپ، قاجىرلىلىقپەن ۇيرەنىپ، جاپالى جاتتىعۋ جاساپ، تالاي رەت اسكەري ءبولىمنىڭ ماراپاتىنا بولەندى ءارى 1986 - جىلى جۇڭگو كوممۋنيستىك پارتياسىنا مۇشە بولدى.
1987 - جىلى 12 - ايدا پىڭ باۋلين اسكەردەن بوساعاننان كەيىن اۋداندىق ونەركاسىپ - ساۋدا بانكەسىنىڭ ەكونوميكالىق ساقشىسى قىزمەتىنە ورنالاستى. 1991 - جىلى پىڭ باۋلين اۋداندىق قوعام حاۋىپسىزدىگى ورگانىنا تاڭداپ اۋىستىرىلىپ، ىلگەرىندى - كەيىندى اماندىق قورعاۋ حالىق ساقشىسى، قىلمىس بارلاۋ تەحنيگى مىندەتتەرىن وتەدى، ول قاجىرلىلىقپەن ىستەپ، قىزمەتكە بەرىلە كىرىسىپ، ءبىر جىلدان ارتىق ۋاقىتتا تىرەكتى قىزمەتشىگە اينالىپ، ءتۇرلى دەلولاردان 150دەن استامىن بارلاپ اشۋعا ات سالىستى. پىڭ باۋلين زاڭدى ءادىل اتقارىپ، كىرشىكسىز، پاك بولىپ، 12 مىڭ يۋاننان استام قۇنعا يە جالپى 20 نەشە رەتكى تارتۋ - تارالعىدان، پارادان باس تارتىپ، حالىق ساقشىسىنىڭ بۇكىل ىنتا - پەيىلىمەن حالىق ءۇشىن قىزمەت ىستەيتىن وسكەلەڭ ءمورالىن ايگىلەدى.
1993 - جىلى 5 - ايدىڭ 14 - كۇنى پىڭ باۋلين جاۋىنگەر سەرىكتەرىمەن بىرگە ورىنباسار بولىمشە باستىعى حۋاڭ شىحۇيدىڭ، ورىنباسار جەتەكشى ۋىڭ جىنميڭنىڭ باستاۋىندا دانشۇي قالاشىعى تاڭبيان قىستاعى اۋماعىندا جالعا بەرىلگەن ۇيلەردى اداقتاپ تەكسەرەدى. ساعات 9دان 40 مينۋت وتكەندە، 11 - ءنومىرلى جالعا بەرىلگەن ءۇيدى باستاپ تەكسەرەدى، بۇل ەكى قابات ەتىپ سالىنعان، قاباتتارى ءبىرشاما الاسا، وزگە تۇرعىن ۇيلەرمەن جالعاسىپ جاتقان ءۇي بولاتىن. حۋاڭ شىحۇي 8 ساقشى مەن اماندىق قورعاۋ مۇشەلەرىن ەرتىپ قابات ءۇيدىڭ استىندا تەكسەرۋ جۇرگىزەدى دە، پىڭ باۋلين قاتارلى 4 ادام 2 - قاباتقا شىعادى. پىڭ باۋلين وڭتۇستىك جاقتاعى ءۇيدىڭ ىشىندەگى سىرتتان كەلگەن 2 ادامدى تەكسەرىپ جاتقاندا، كەنەت سىرتتاعى زالدان شىققان ”مىلتىقتارى بار ەكەن“ دەگەن ايعايدى ەستىپ، دەرەۋ مىلتىعىن الىپ شىعىپ، زالعا قاراي ۇمتىلادى.
بۇزاقى اماندىق قورعاۋشى جوۋ جىكىعا قارۋىن كەزەپ، توقتاۋسىز قۇتىرىنا ايعايلايدى. جاۋىنگەر سەرىگىنىڭ باس اماندىعى ءۇشىن، پىڭ باۋلين مىلتىعىن قىسا ۇستاپ، اقىرىن - اقىرىن وڭتۇستىك جاقتاعى ۇيگە شەگىنەدى. ول اسا سابىرلىلىقپەن قىلمىسكەردى شاۋجايلاۋدىڭ وڭتايلى ءساتىن كۇتەدى. سەكەم العان قىلمىسكەر ارت جاعىن شولا بەرگەندە، پىڭ باۋلين ەرلىكپەن قىلمىسكەرگە قاراي اتىلادى، جانى قىسپاقتا قالعان قىلمىسكەر قۇتىرىنا مىلتىقتىڭ شۇرىپپەسىن باسىپ جىبەرەدى، وق پىڭ باۋليننىڭ قارنىن تەسىپ ءوتىپ ول جەرگە جىعىلىپ تۇسەدى. جوۋ جىكى جاۋىنگەر سەرىگىنىڭ جەرگە جىعىلىپ تۇسكەندىگىن كورە سالا اتىلىپ بارىپ قىلمىسكەردىڭ ناگانىن تارتىپ الىپ، قىلمىسكەردى جەرگە الىپ ۇرادى.
وق ءتيىپ جارالانعان پىڭ باۋليننىڭ قۇرساق بولىگىنەن قان سورعالايدى، ول قىلمىسكەردىڭ قولىندا مىلتىق بارلىعىن، ونىڭ ۇستىنە ەڭگەزەردەي دەنەلى، وتە جاۋىز ەكەندىگىن، ال جاۋىنگەر سەرىگى جوۋ جىكىنىڭ قۇر قول بولىپ، قاتەرلى جاعدايدا قالعاندىعىن اڭعارىپ، دەنەسىنىڭ قاتتى اۋىرعانىنا قاراماي، عالامات قايسارلىقپەن ناگانىن قولىنا قىسا ۇستايدى. جوۋ جىكى قىلمىسكەردى جەرگە الىپ ۇرعان ورايدا، ول دەرەۋ قىلمىسكەردى كوزدەپ تۇرىپ بىرنەشە رەت اتادى، قىلمىسكەردى اتىپ ولتىرگەن سوڭ ءوزى دە تالىقسىپ كەتەدى. سوڭىنان شيپاحاناعا جەتكىزىلىپ قۇتقارۋ بارىسىندا، وق بۇيرەگىنىڭ كۇرە تامىرىن ءۇزىپ كەتىپ، قان كوپ اققاندىقتان، ەمدەۋ شيپا بولماي قۇربان بولادى.
پىڭ باۋلين ءوز ومىرىمەن جاۋىنگەر سەرىگىن قورعادى، حالىق بۇقاراسىنىڭ باس اماندىعى، مال - مۇلىك حاۋىپسىزدىگىن قورعادى. ول قۇربان بولعاننان كەيىن، جۋجياڭ كينو - فيلم ستۋدياسى ونىڭ ىزگى ىستەرىنە نەگىزدەلە وتىرىپ «ساقشى رۋحى» كينوسىن ءتۇسىرىپ، بۇكىل ەلدەگى كورەرمەندەردى اسەرلەندىرەدى. پىڭ باۋلين ءتىرى كەزىندە قىزمەت ىستەگەن دانشۇي ساقشى بولىمشەسى جىل سايىن 5 - ايدىڭ 14 - كۇنى تۇتاس بولىمشەدەگى حالىق ساقشىلارىن ۇيىمداستىرىپ، پىڭ باۋلينگە ازا ءبىلدىرىپ، ەرجۇرەك قۇرباندى ساعىنىشپەن ەسكە الىپ، ۇرپاقتاردى جىگەرلەندىرىپ وتىردى. پىڭ باۋلين رۋحىنىڭ ىقپالىندا، دانشۇي ساقشى بولىمشەسىندەگى حالىق ساقشىلارى ءبىر نيەتپەن قايراتتانا ىستەپ، يدەيالارى ورنىقتى بولىپ، قوسىننىڭ جاۋىنگەرلىك قۋاتى مەن ۇيىستىرۋ قۋاتى ۇزدىكسىز كۇشەيپ، تاڭداۋلى حالىق ساقشىلارى ارت - ارتىنان جارىققا شىقتى.
