شينحۋا اگەنتتىگىنىڭ 11 - ايدىڭ 18 - كۇنى بەيجيڭنەن بەرگەن حابارى. 2008 - جىلى 8 - ايدىڭ 8 - كۇنىنەن 8 - ايدىڭ 24 - كۇنىنە دەيىن، كۇللى الەم كوز تىككەن 29 - كەزەكتى وليمپيادا سپورت جارىسى جۇڭگو بەيجيڭدە تابىسپەن وتكىزىلىپ، جۇڭحۋا ۇلتى 100 جىل اڭساعان تىلەگىن اقىرى جۇزەگە اسىردى.
وليمپيادا سپورت جارىسىن وتكىزۋ ارمانىن جۇزەگە اسىرۋ ءۇشىن، جۇڭگو حالقى تۇپ - تۋرا 100 جىل تالپىنىپ جانە كۇرەسىپ، قاجىماس - تالماس تاباندى قۇلشىنىستار جاسادى. 1908 - جىلى جۇڭگولىقتار جۇڭگونىڭ وليمپيادا سپورت جارىسىنا قاتىناساتىندىعى جانە وليمپيادا سپورت جارىسىن وتكىزۋى جونىندە 1 - رەت ءۇن تاراتتى. جاڭا جۇڭگو قۇرىلعاننان كەيىن، ەلىمىزدىڭ دەنە تاربيە ىستەرى قارىشتاپ دامىعان جاڭا داۋىرگە ءوتتى. پارتيا مەن ۇكىمەت ەلىمىزدىڭ حالىقارالىق وليمپيادا سپورت جارىسىنا قاتىناسۋىنا وسكەلەڭ ءمان بەردى. 1978 - جىلدىڭ سوڭىنان كەيىن، ەلىمىز رەفورما جاساۋدىڭ، ەسىك اشۋدىڭ جاڭا ساياساتىن جۇرگىزدى، دەنە تاربيە ىستەرى قارىشتاپ دامۋدىڭ جاڭا داۋىرىنە ءوتتى.
1991 - جىلى پارتيا مەن مەملەكەت بەيجيڭ قالاسىنىڭ 2000 - جىلعى 27 - كەزەكتى وليمپيادا سپورت جارىسىن وتكىزۋگە ءوتىنىش ەتۋىن قولداۋ شەشىمىن جاسادى. سول كەزدە جارىستى وتكىزۋ ۇقىعىنا قول جەتكىزە الماعانىمەن، جۇڭگو حالقى حالىقارالىق قوعامعا وليمپيادا سپورت جارىسىن وتكىزۋگە دەگەن كوكەي تەستى تىلەگىن ءبىلدىردى. جاڭا عاسىرعا وتكەننەن كەيىن، پارتيا مەن مەملەكەت تاعى دا بەيجيڭ قالاسىنىڭ 2008 - جىلعى 29 - كەزەكتى وليمپيادا سپورت جارىسىن وتكىزۋگە ءوتىنىش ەتۋىن قولداۋ شەشىمىن جاسادى، ءبىر ميلليارد 300 ميلليون جۇڭگو حالقى تاعى ءبىر رەت حالىقارالىق قوعامعا وليمپيادا سپورت جارىسىن وتكىزۋگە دەگەن كوكەي تەستى تىلەگىن ءبىلدىردى. 2001 - جىلى 7 - ايدىڭ 13 - كۇنى حالىقارالىق وليمپيادا كوميتەتى 29 - كەزەكتى وليمپيادا سپورت جارىسىن وتكىزۋ ۇقىعىن جۇڭگو بەيجيڭگە بەرۋدى ۇيعاردى.
ەرەكشەلىككە يە، جوعارى ورەدەگى ءبىر كەزەك وليمپيادا سپورت جارىسىن وتكىزۋ، بۇل − جۇڭگو حالقىنىڭ حالىقارالىق قوعامعا بەرگەن ايبىندى ۋادەسى. جۇڭحۋا ۇلتىنىڭ 100 جىلدىق تىلەگىن جۇزەگە اسىرۋ ءۇشىن، جۇڭگو حالقىنىڭ حالىقارالىق قوعامعا بەرگەن ايبىندى ۋادەسىن ورىنداۋ ءۇشىن، بۇكىل پارتيا، بۇكىل ارميا، بۇكىل ەلدەگى ءار ۇلت حالقى 7 جىلدان استام ۋاقىت قاجىماي - تالماي قۇلشىنىس جاساۋ ارقىلى اقىرى بەيجيڭ وليمپيادا سپورت جارىسىنىڭ وراسان زور تابىسىنا قول جەتكىزدى.
بەيجيڭ وليمپيادا سپورت جارىسىنىڭ تابىستى وتكىزىلۋى دۇنيە ءجۇزى حالقىنا تاعى ءبىر مارتە مىنانى ايگىلەدى: جۇڭگو حالقى ادامزات وركەنيەتىنىڭ العا باسۋى ءۇشىن اناعۇرلىم كەسەك ۇلەستەر قوسۋعا قابىلەتتى.
