− گولمۋد - كورلا تەمىر جولى التىنتاۋ تۋنەلىنىڭ قۇرىلىسشىلارى جونىندە
ءتىلشى لۋ فىڭباۋ
التىنتاۋ تاۋ سىلەمى ءۇستىرت جەرگە ورنالاسقان، جولى قاتەرلى، كليماتى سۇركەيلى، ادام اياعى باسپاعان ءوڭىر. شينجياڭنان شىعاتىن جاڭا تەمىر جول ءىرى وتكەلىن اشۋ ءۇشىن، سان مىڭداعان تەمىر جول قۇرىلىسشىسى 3 جىل 6 اي ۋاقىت جۇمساپ، گولمۋد - كورلا تەمىر جولىنىڭ التىنتاۋ تۋنەلىن ءساتتى تۇتاستىرىپ، ادام تىرشىلىك ەتپەيتىن وڭىردە اسقاقتاعان كۇرەسكەرلىك جىرىن جازدى.
نەشە ءجۇز ادام كەتىپ قالدى، ءبىراق ونان دا كوپ ادام تابانداپ قالىپ قالدى
چارقىلىق كروران اۋەجايىنان شىعىپ، شىعىس وڭتۇستىكتى بەتكە الا اۆتوكولىكپەن 4 ساعاتقا تاياۋ ۋاقىت جۇرسەڭىز، جۇڭگو جۇڭتيە تۋنەل مەكەمەسى توبى شەكتى سەرىكتەستىگىنىڭ گولمۋد - كورلا تەمىر جولى شينجياڭ S6 بولىگى نىسان مەڭگەرۋ بولىمىنە جەتەسىز. 11 - ايدىڭ 15 - كۇنى ءتىلشى كولىكتەن تۇسە سالىسىمەن ىزعارلى جەل الدىندا شىداماي قالتىراپ كەتتى.
”بۇل ارادا جەل كوپ سوعادى، كوكتەمنەن قىسقا دەيىن ءۇزىلىس جاسامايدى، جەل سوقسا ەرەكشە سۋىق بولادى“، - دەدى S6 بولىگىنىڭ باس ينجەنەرى ۋاڭ گۋاڭكى.
جالپى ۇزىندىعى 73.694 كيلومەتر كەلەتىن S6 بولىگى التىنتاۋدىڭ تەرەڭ قويناۋىندا، بۇل ارانىڭ قىس ماۋسىمى 9 ايعا سوزىلادى، جىلدىق ورتاشا تەمپەراتۋراسى 2.5 سەلتسي گرادۋس.
ۋاڭ گۋاڭكى بىلاي دەدى: تەحنيك قىزمەتكەرلەر دالادا ولشەۋ جۇرگىزگەن كەزدە، جىلۋ ساقتاعىش ستاكاندارىن اشقاندا، ىشىندەگى سۋعا ۇنەمى ءبىر قابات مۇز قاتىپ قالادى.
وندىرىسكە، تۇرمىسقا قاجەتتى زاتتىق ماتەريالداردىڭ كەيبىرىن 650 كيلومەتر شالعايداعى كورلا قالاسىنان جانە 1100 كيلومەتر شالعايداعى ءۇرىمجى قالاسىنان ساتىپ الادى، اۋەلى، تۇرمىستىق سۋ مەن ازعانتاي كوكونىستەردى ساتىپ الۋ ءۇشىن دە 100 كيلومەترگە تاياۋ جول باسۋعا تۋرا كەلەدى.
قىس ماۋسىمىندا تاۋدى قاسات قار باسىپ قالادى، جولدىڭ بىتەلىپ قالۋى ۇنەمىلىك ءىس. ”ءبىر جولى قاسات قار جولدى بىتەپ قالىپ، كەرەك - جاراق جەتكىزىلمەي، ءار كۇنى كارتوپ، ءبايساي عانا جەدىك، ءبىر اپتا وتكەننەن كەيىن كارتوپتى، ءبايسايدى كورسەم بولدى جۇرەگىم اينيدى“، - دەدى ۋاڭ گۋاڭكى.
كوكتەم، جاز ماۋسىمدارىندا قۇم - شاڭدى كۇندەر كوپ بولادى، بوران كوك ءجۇزىن بۇركەگەن قۇم - شاڭدى ۇشىرىپ، ءاپ - ساتتە قىزمەت جانە تۇرمىس ءوڭىرىن تۇمشالايدى. ”ءبىز ۇنەمى ’قورەكتىك جەتىسپەسە، قۇممەن تولىقتاپ الامىز‘ دەپ قالجىڭدايمىز“، - دەدى ۋاڭ گۋاڭكى.
التىنتاۋ تەڭىز دەڭگەيىنەن ءبىرشاما بيىك، S6 بولىگىندە تۇرمىس كەشىرەتىن جانە قۇرىلىس جۇرگىزەتىن جەرلەردىڭ تەڭىز دەڭگەيىنەن ورتاشا بيىكتىگى 3500 مەتر، جىلدامىراق ءجۇرىپ قالساڭ بولعانى، دەمىڭ جەتىسپەي قالعانىن لەزدە سەزە الاسىڭ.
”بۇل مەنىڭ قىزمەت ىستەگەن 10 جىلدان بەرگى ەڭ سۇركەيلى قۇرىلىس جۇرگىزۋ ورتاسى بولدى“، - دەدى ۋاڭ گۋاڭكى.
كەيبىرەۋلەر نىسان باسىنا ەندى عانا كەلىپ، وسىنداي تىرشىلىك ورتاسىن كورە سالىپ كەتىپ قالدى. ”بىرەۋلەر كەتەدى، بىرەۋلەر كەلەدى، ىلگەرىندى - كەيىندى نەشە ءجۇز ادام كەتىپ قالدى، ءبىراق ونان دا كوپ ادام قالدى“، - دەدى ۋاڭ گۋاڭكى.
تۋنەلدەن سۋ اتقاقتاعانىمەن، قيىن وتكەلدەردەن ءبىر - بىرلەپ قامال الىندى
تۇرمىس ورتاسى سۇركەيلى، قۇرىلىس جۇرگىزۋ شارت - جاعدايى دا وتە ناشار.
تۋنەل قازعاندا ەڭ قورقىنىشتىسى نە؟ سۋدان. قىرسىققاندا، التىنتاۋ تۋنەلىنەن سۋ ءبىرشاما كوپ شىقتى.
”جاڭادان كەلگەن كەزىم، قىلتاناقسىز ءشول دالا مەن تاۋدى كورگەنىمدە، تۋنەل ىشىنەن كوپ مولشەردە سۋ شىعاتىندىعىن ويلاپ تا كورمەگەن ەدىم“، - دەدى S6 بولىگىنىڭ نىسان ديرەكتورى گو چۋان.
تۋنەلدى جاڭادان قازعان كەزدە بارلىعى جوسپارداعىداي بولاتىن. بيىل 5 - ايدا تۋنەل ىشىنەن سۋ شىعۋ مولشەرىنىڭ قاۋىرت ارتىپ كەتەتىندىگىن كىم ءبىلسىن. ”كەي كەزدەرى سۋ 10 مەتر الىسقا اتقالاقتاپ شىعادى، ەڭ جوعارى كۇندىك سۋ شىعۋ مولشەرى 27 مىڭ تەكشەمەترگە جەتتى، بۇل ولشەمدى 10 مالتاۋ كولشىگىندە ساقتالعان سۋمەن قارايلاس“، - دەدى گو چۋان.
شىققان سۋ مولشەرى كوبەيگەنىمەن، جۇمىستى توقتاتۋعا بولمايدى. قايتۋ كەرەك؟ سۋمەن ساناسپاي جۇمىس ىستەۋ كەرەك.
S6 بولىگىنىڭ 3 - بولىمشە ءبولىمى قازۋ اترەتىنىڭ باستىعى لو جاۋبيڭنىڭ اتقاقتاعان سۋ جونىندەگى ەلەسى توتەنشە تەرەڭ: ”سۋلىق كيىپ ۇڭگىر ىشىنە كىرىپ ۇڭگيمىز، توبەمىزدەن سۋ اعىپ تۇرادى، اياق استىمىز دا سۋ“.
سۋلىق كيىم كيگەنىمەن، مۇزداي سۋ كيىمنەن ءوتىپ، ماقتالى كيىم دەرەۋ شىلقىلداپ كەتەدى. ءبىراز جۇمىس ىستەگەننەن كەيىن، قازۋ اترەتىنىڭ مۇشەلەرى جۇمىسىن توقتاتىپ، قايتىپ شىعىپ كيىمدەرىن كەپتىرەدى. ”ءار كۇنى سۋىقتان تۇماۋراتىپ قالاتىندار بار“، - دەدى لو جاۋبيڭ. 8 - ايعا كەلگەندە، سۋ شىعۋ مولشەرى ازايىپ، اقىرى ءار كۇنى سۋعا مالىنىپ جۇمىس ىستەمەيتىن بولادى.
كۇردەلى گەولوگيالىق شارت - جاعداي دا قۇرىلىس جۇرگىزۋگە قيىنشىلىق تۋدىردى. التىنتاۋ تۋنەلىنىڭ قۇرىلىس جۇرگىزۋ كولەمىندە جەمىرىلمە جارتاسقا، ۇلعايعىش جارتاسقا، ءۇستىرت كەرنەۋىنە جولىعامىز، كەسىپ وتەتىن گەولوگيالىق وپىرىلما بەلدەۋىنىڭ وزىنەن 11ى بار، قازۋدىڭ قيىندىق دەڭگەيى جوعارى بولدى.
گو چۋان بىلاي دەپ تانىستىردى: قازۋ بارىسىندا قۇرىلىس قىزمەتكەرلەرى قاتاڭ باقىلاپ - مەڭگەرىپ، ولشەپ، الدىعا ءوتىپ گەولوگيالىق بولجال جاساپ، ارناۋلى قۇرىلىس جۇرگىزۋ جوباسىن جاسادى ءارى ونى قاتاڭ اتقاردى؛ جۇمىس ءادىسىن ۇيلەسىمدى تاڭداپ، دەر كەزىندە العاشقى تىرەك قويىپ وتىردى؛ تارامدى سىرنەلەۋ تەحنيكاسى شاراسىن قولدانىپ، سۋدى بوگەۋ، ىعىستىرۋ سياقتى شارالاردى كۇنى بۇرىن قولدانىپ، قۇرىلىس جۇرگىزۋ بارىسىنداعى تالاي - تالاي قيىن وتكەلدەردەن قامال الىپ، ەڭ سوڭىندا تۇتاستىرۋدى جۇزەگە اسىردى.
ادام تىرشىلىك ەتپەيتىن ءوڭىردى ەسكە الاتىندار بار، ءبىراق سيگنال ”باق سىناۋعا“ سۇيەنەدى
ەگەر ناشار تۇرمىس ورتاسى جانە قۇرىلىس جۇرگىزۋ شارت - جاعدايىن جەڭۋگە بولادى دەسەك، S6 بولىگىندە، جەڭۋ ەڭ قيىن بولعانى وتباسىنداعىلارعا دەگەن ساعىنىش سەزىمى ەدى.
ادام تىرشىلىك ەتپەيتىن وڭىردە قول تەلەفون سيگنالى جوق، سيگنال ىزدەۋ ءۇشىن 10 كيلومەتر شالعايداعى مەملەكەت تاس جولى ماڭىنا نەمەسە ماڭداعى جوتالارعا شىعىپ ”باق سىناۋ“عا تۋرا كەلەدى.
كەشقۇرىم قىزمەتتەن تۇسكەننەن كەيىن، جوتالار ادامعا تولادى. ولار قول تەلەفوندارىن كوتەرىپ الىپ اينالىپ ءجۇرىپ، بولىمسىز سيگنال بايقالسا بولدى دەرەۋ وتباسىنداعىلارىنا تەلەفون جالعايدى. ”كەيدە تەلەفون جالعانعانىمەن، قارسى جاق داۋىسىمىزدى ەستي المايدى. ايتسەدە، وتباسىنداعىلار تۋىسىنان كەلگەن تەلەفوندى كورگەننەن كەيىن قالاي دەمەسىن الاڭسىز بولادى عوي“، - دەدى S6 بولىگى 3 - بولىمشە بولىگى قۇرىلىسقا جاۋاپتى ورىنباسار باس ينجەنەر گاۋ جانفي.
كەيىن كەلە، قاتتى بولشەك قۇرىلعىلارىنىڭ جاقسارۋىنا ىلەسە، ءىشىنارا وڭىردە اقىرى ءبىرشاما ىركىلىسسىز سيگنال بار بولدى. گاۋ جانفي ۇنەمى وتباسىنداعىلارمەن تەلەفوندا سويلەسىپ، وتباسىنىڭ حال - جايىن سۇراپ، ءوز قىزمەتىن ايتىپ بەرەدى. الايدا، ونىڭ ءبىر جىلدا ءبىر رەت ۇيگە قايتۋىنىڭ ءوزى قيىن ەدى، ەڭ ۇزاق بولعان كەزدە ول 2 رەتكى كوكتەم مەرەكەسىن جۇمىس ورنىندا وتكىزگەن.
تەلەفوندا ساعىنىش ايتىلعانىمەن، جۇزدەسە الماۋداي وكىنىشتى تولىقتاۋ قيىن.
بيىل 6 - ايدىڭ 1 - كۇنى ۇلى تەلەفوندا گاۋ جانفيگە بىلاي دەيدى: ”اكە، بۇگىن بالاباقشا قيمىل وتكىزدى، مەنەن باسقا بالالاردىڭ اكە - شەشەلەرى تۇگەلدەي قاتىناستى، تەك مەن عانا جالعىزبىن، ايتسەدە مەن جىلامادىم، مىقتى ما ەكەنمىن؟“.
”بالامنىڭ ءسوزىن تىڭداپ بولعاننان كەيىن مەن تەلەفوندى قويا سالىپ، ادام جوق جەرگە بارىپ قاتتى جىلادىم“، - دەدى گاۋ جانفي.
”ايتپاي - اق قويايىق، باسقا تاقىرىپقا كوشەلىك“. گاۋ جانفي تەرىس اينالىپ، بەتىنەن سورعالاعان جاسىن ءسۇرتتى.
”ءبىز جاپا تارتپاساق، قاشاندا جاپا تارتاتىندار شىعادى، ءبىز ەڭبەك ەتپەسەك، قاشاندا ەڭبەك ەتەتىندەر شىعادى. كەلگەن ەكەنبىز، شەگىنشەكتەۋگە بولمايدى، وسى قىزمەتتىڭ قاجەتىنەن شىعۋىمىز كەرەك. قارتايعان شاعىمىزدا ۇرپاعىمىزعا: ’قاراشى، بۇل تۋنەلدى مەن جاساعام‘دەپ ماقتانىشتى تۇردە ايتا الاتىن بولامىز“، - دەدى گاۋ جانفي.
يىعىنا ارقالاعان زىلدەي جاۋاپكەرشىلىكتەرى ءۇشىن، تەمىر جول قۇرىلىسشىلارى ادام تىرشىلىك ەتپەيتىن وڭىردە تاۋ تەسىپ، الىپ بولات - تەمىر ايداعارىن ۇزاقتارعا جونەلتتى.
