− شينجياڭنىڭ ءۇمىت ينجەنەرياسىن اتقارۋى جونىندە
ءتىلشى لياڭ ليحۋا
ءۇمىت ينجەنەرياسىن اۋىزعا الار بولساق، كوپشىلىكتىڭ ەسىنە بۇرىنعى ۇگىت جارناماسىنداعى ءبىر جۇپ وقۋ ارمانىنا تولى ”جاۋدىرەگەن كوز“ تۇسەدى. 1989 - جىلى 10 - ايدىڭ 30 - كۇنى ءۇمىت ينجەنەرياسى اتقارىلعاننان بەرى، سانسىز كەدەي وتباسىنداعى بالالار قوعامداعى ءار سالانىڭ قامقورلىق جاساۋىمەن، كومەكتەسۋىمەن ساباقحاناعا كىردى.
1992 - جىلى 10 - ايدا ءۇمىت ينجەنەرياسى شينجياڭدا تياناقتاندى. قازىرگە دەيىن، 100 مىڭنان استام كەدەي وتباسىنداعى بالالاردىڭ وقۋ ارمانى جۇزەگە استى.
■ ارمان الاۋىن ۇلاستىرىپ، ءۇمىتتى جالعادى
”ءبىر ۇلكەن كيىز ءۇيدىڭ ءبىر جاعىنا 1 -، 2 - جىلدىقتىڭ وقۋشىلارى، ەندى ءبىر جاعىنا 3 - جىلدىقتىڭ وقۋشىلارى وتىرادى. مۇعالىم 1 -، 2 - جىلدىقتىڭ ساباعىن ءوتىپ بولعان سوڭ، 3 - جىلدىققا ساباق وتەدى. ءار جولى كوشىپ - قونعاندا، مۇعالىم كيىز ءۇي مەن وقىتۋ جابدىقتارىن جيناستىرىپ، اتقا ارتىپ، كەلەسى جەرگە كوشىپ بارىپ ساباق وتەدى“. 11 - ايدىڭ 27 - كۇنى تولى اۋدانى ۇتى قالاشىعى جاتاقتى ءۇمىت مەكتەبىنىڭ باستىعى ەربولات قىدىرحان بالا كەزىندەگى وقۋ وقىعان جاعدايىن ەسىنە العاندا، وتكەن كۇننىڭ ەلەسى كوز الدىنا مەن مۇندالادى.
ەربولات بىلاي دەپ تانىستىردى: كوشپەلى مەكتەپ باستاۋىشتىڭ 1 - جىلدىعىنان 3 - جىلدىعىنا دەيىنگى وقۋشىلاردى عانا قابىلدايتىن، ول كەزدە تولى اۋدانىندا جاتاقتى مەكتەپ جوق ەدى، 3 - جىلدىقتى وقىپ بولعان سوڭ سىرت جەرگە بارىپ وقۋعا تۋرا كەلەتىن، كەيبىر بالالار 3 - جىلدىقتى تامامداعان سوڭ وقۋدان قول ءۇزۋشى ەدى. 1992 - جىلى 10 - ايدا ءۇمىت ينجەنەرياسىنىڭ يگىلىگىن كورگەن شينجياڭداعى تۇڭعىش ءۇمىت باستاۋىش مەكتەبى تولى اۋدانى ۇتى قالاشىعىندا قۇرىلدى. بۇل اۆتونوميالى رايوندىق وداق كوميتەتى، شينجياڭ جاستار مەن وسپىرىمدەر دامۋ قور قوعامى، تارباعاتاي ايماعى جانە تولى اۋدانى بىرگە قۇرعان ءۇمىت باستاۋىش مەكتەبى ەربولات سياقتى مال شارۋاشىلىق وڭىرلەرىندەگى كوپتەگەن بالاعا ءۇمىت الا كەلدى. بۇل مەكتەپ سول كەزدە تولى اۋدانىنداعى وقۋ - وقىتۋ شارت - جاعدايى ەڭ جاقسى مەكتەپ ەدى ءارى تۇتاس اۋدانداعى بىردەن - ءبىر جاتاقتى مەكتەپ بولاتىن، ونىڭ قۇرىلۋى ءۇمىت ينجەنەرياسىنىڭ شينجياڭدا تياناقتانىپ تامىر تارتقانىن ايگىلەدى.
”جاڭا مەكتەپ قۇرىلعان سوڭ، ءۇي ىشىمىزبەن ەرەكشە قۋاندىق، مەن اقىرى جالعاستى وقي الاتىن بولدىم!“ ەربولاتتىڭ سول جىلداعى وقۋعا كىرگەن كەزدەگى قۋانىشى ءالى ەسىندە. ساباقحانادا ساباق وقىعان سول كەزدە ەربولات سوتسياليستىك ۇلى شاڭىراقتىڭ مەيىرىن شىنايى سەزىندى، سونىمەن بىرگە ونىڭ جۇرەگىندە مۇعالىم بولامىن دەگەن ۇشقىن قاۋلادى. تولىقسىزدى بىتىرگەن سوڭ، ەربولات تارباعاتاي ايماقتىق پەداگوگيكا مەكتەبىنە وقۋعا تۇسەدى.
1999 - جىلى ەربولات پەداگوگيكا مەكتەبىن بىتىرگەننەن كەيىن، اۋدان قالاشىعىندا قالىپ قىزمەت ىستەۋ ورايىنا يە بولسا دا، ءبىراق ءارى - ءسارى بولماستان، ۇتى قالاشىعىنا قايتىپ كەلىپ، انا مەكتەبىندە وقىتۋشى بولادى.
”مەنىڭ اۋىلىمنىڭ شارت - جاعدايى ناشار، اۋىل - قىستاق وقىتۋشىسى توتەنشە كەمشىل، مەن 1 - توپتاعى ءۇمىت باستاۋىش مەكتەبىنەن وقىعان وقۋشىمىن، مەنىڭ وسى ارادا ءۇمىتتىڭ الاۋىن ۇلاستىرىپ، كوپتەگەن بالالاردى باستاپ تاۋ قويناۋىنان شىعىپ، جاڭا دۇنيەگە بەت الدىراتىن جاۋاپكەرشىلىگىم بار“، - دەيدى ەربولات.
قازىرگە دەيىن ءۇمىت ينجەنەرياسى شينجياڭدا جيىنى ءۇمىت باستاۋىش مەكتەبىنەن، ءۇمىت بالاباقشاسىنان 517سىن، ءۇمىت شيپاحاناسىنان بىرەۋىن كومەكتەسىپ قۇردى، كەدەي وتباسىنداعى جيىنى 100 مىڭنان استام وقۋشىعا قارجىلاي كومەكتەستى.
■ ءاربىر سۇيىسپەنشىلىك شىن مەيىر بولىپ جينالدى
تامشى سۋ وزەن بولار، قۇم جيىلىپ مۇنارا بولار. ءۇمىت ينجەنەرياسى شينجياڭدا تياناقتانعاننان بەرى، سۇيىسپەنشىلىككە باي كوپتەگەن قوعامدىق توپتار، كاسىپورىندار جانە جەكە ادامدار بۇعان ات سالىستى.
قازىرگە دەيىن، ءۇمىت ينجەنەرياسىنىڭ شينجياڭدا جيىنى جيناعان ءتۇرلى جىلۋ اقشاسى، زاتى مولشەرمەن 512 ميلليون يۋانعا جەتتى، قارجى شىعارىپ سالىپ بەرگەن ءۇمىت ينجەنەرياسى شاتتىق جەلىلەس نىسانى 2480گە جەتتى.
جۇڭگو گۇيجوۋ ماۋتاي اراعى زاۆود (توبى) شەكتى جاۋاپكەرشىلىك سەرىكتەستىگى باستاعان ”جۇڭگو ماۋتاي. ەل تىرەگى“ شينجياڭ ءۇمىت ينجەنەرياسى. ارمانعا قانات قاعۋ قيمىلى 2012 - جىلى باستالعاننان بەرى، شينجياڭعا جيىنى 21 ميلليون 750 مىڭ يۋان جىلۋ بەرىپ، 4350 جوعارى مەكتەپ جاڭا وقۋشىسىنا قارجىلاي كومەكتەسىپ، ءۇمىت ينجەنەرياسىنىڭ شينجياڭداعى دامۋىن پارمەندى جەبەدى.
قۇلجا قالاسىندا ەرجەتكەن حان باۋچيڭ 1999 - جىلى قىزمەتكە قاتىناسقاننان باستاپ وقۋعا قارجىلاي كومەك بەرۋ ءتاسىلى ارقىلى كەدەي وتباسىنداعى بالالاردىڭ وقۋىن بىتىرۋىنە كومەكتەسۋدى ءۇرتىس جالعاستىرىپ كەلەدى، ول جيىنى 10نان استام كەدەي وقۋشىنىڭ جوعارى مەكتەپ بىتىرۋىنە قارجىلاي كومەكتەسىپ، جيىنى 150 مىڭ يۋانعا جۋىق قارجىلاي كومەك بەردى.
”ءار رەت قارجىلاي كومەك بەرگەن وقۋشىلاردىڭ وقۋىن ءساتتى تامامداپ، قوعام تابالدىرىعىن اتتاپ، قوعامعا پايدالى ادامعا اينالعانىن كورگەنىمدە، مەنىڭ بارلىق ىستەگەندەرىم تاتىمدى، ماعىنالى بولعانىن سەزىنەمىن“، - دەيدى حان باۋچيڭ.
■ ايگىلى ماركانىڭ ىقپالىن اناعۇرلىم ساۋلەلەندىردى
ءۇمىت ينجەنەرياسى شينجياڭدا تياناقتانعاننان بەرى، تۇتاس رايونداعى كەدەي وقۋشىلارعا قارجىلاي كومەكتەسۋ، ءۇمىت باستاۋىش مەكتەبى قۇرىلىسى سياقتى كوپ ءتۇرلى قىزمەتتەردى ارقالاپ، شينجياڭداعى جاستار مەن وسپىرىمدەر ىستەرىن دامىتۋدىڭ كومەكتەسۋشىسىنە جانە ىلگەرىلەتۋشىسىنە اينالدى.
2016 - جىلدان باستاپ، شينجياڭ جاستار مەن وسپىرىمدەر دامۋ قور قوعامى ىشكى جەرلەردەگى مەيىر باعىشتاۋ الەۋمەتتىك قور قوعامىمەن بىرلەسىپ ۇرىمجىدەگى جوعارى مەكتەپتەردە ”جاستار يگىلىك قىزمەت قوعامى“ ستۋدەنتتەر الەۋمەتتىك يگىلىك ۇيىمىن قۇرىپ، ستۋدەنتتەردى الەۋمەتتىك يگىلىك امالياتىن ورىستەتۋگە ۇيىمداستىردى. وسى بارىستا كومەككە يە بولعان وقۋشىلارعا نەنىڭ الەۋمەتتىك يگىلىك ىستەر ەكەندىگىن ۇعىندىرىپ قانا قالماستان، ولاردى الەۋمەتتىك يگىلىك قيمىلدارىنا قاتىناستىرىپ، اماليات بارىسىندا قابىلەتتەرىن جەتىلدىردى.
ءۇمىت ينجەنەرياسى شينجياڭنىڭ ءىس جۇزىندىك جاعدايىمەن بىرلەستىرە وتىرىپ، ءۇمىت بالاباقشاسىن سالۋعا كومەكتەسۋ، جىلۋ جيىپ ءۇمىت دىبىس ساباقحاناسى نىسانىن، ءۇمىت كىتاپ بولمەسى نىسانىن سالۋ سياقتىلاردى ورىستەتىپ، از ۇلت جاستار مەن وسپىرىمدەردىڭ ەرتە باستان مەملەكەتتە ءبىر تۇتاس قولدانىلاتىن ءتىل - جازۋدى يگەرۋىنە كومەكتەسىپ، جۇڭحۋانىڭ ءداستۇرلى تاڭداۋلى مادەنيەت تاربيەسىن قابىلداپ، بالالاردىڭ مەملەكەتتى شىنايى مويىنداۋ سەزىمىن كۇشەيتتى. قازىر كومەككە يە بولعان قىستاققا باراتىن بولساڭىز، بالالار سىزگە ىستىق ىقىلاسپەن قول بەرىپ، سىزگە ”!你好“ دەپ امانداسادى. بالالاردىڭ كۇلكى ۇيىرىلگەن جۇزىنە قاراپ، ءۇمىتتىڭ ۇشقىنى وسى قۇتتى مەكەندە تامىر تارتىپ، وركەن جايىپ كەلە جاتقانىن سەزىنەسىز.
”ءۇمىت ينجەنەرياسى الەۋمەتتىك يگىلىك نىسانىنىڭ ايگىلى ماركاسى رەتىندە، قوعامدىق ىقپالىن قايتكەندە ءتىپتى دە جاقسى ساۋلەلەندىرتىپ، اناعۇرلىم جوعارى ورەدە قىزمەت وتەۋمەن قامداۋ ءبىزدىڭ ۇزدىكسىز ىزدەنىس جاسايتىن جانە قۇلشىناتىن بەتالىسىمىز“. شينجياڭ جاستار مەن وسپىرىمدەر دامۋ قور قوعامىنىڭ باس حاتشىسى شى لەي مىنالاردى ءبىلدىردى: جۋىق جىلداردان بەرى، قور قوعامى الەۋمەتتىك يگىلىك تۇرىندەگى بايلىقتاردى بىرىكتىرۋ، قوعامدىق باسقارۋ ۇلگىسىنە جاڭالىق اشۋ، قوعامدىق ۇيىمداردى جەتىلدىرۋ ورتالىعىن قۇرۋ، الەۋمەتتىك يگىلىك نىسانىنىڭ ارناۋلى قورىن قۇرۋ ارقىلى الەۋمەتتىك يگىلىك ۇيىمدارىنىڭ جاستار مەن وسپىرىمدەردىڭ اقاۋسىز ەسەيىپ - ەرجەتۋىن جەبەۋ ىستەرىنە اناعۇرلىم ويداعىداي توعىسۋىنا كومەكتەستى.
