شينحۋا اگەنتتىگىنىڭ 12 - ايدىڭ 1 - كۇنى گۇيياڭنان بەرگەن حابارى (ءتىلشى جياڭ چىڭ). ”كىشكەنە كەزىمدە اكەم ۇنەمى قاربالاس جۇرەتىن، كەيدە ءبىر - ەكى ايدا ءبىر كورەتىنمىن، اكەممەن بىرگە بولعان كۇندەرىم ۇزاق بولماسا دا ونىڭ رۋحى بۇرىننان بەرى ماعان ىقپال ەتىپ كەلەدى“، - دەدى گۇيجوۋ ولكەسى انشۇن قالاسى پيڭبا رايوندىق قوعام حاۋىپسىزدىگى مەكەمەسى چيبو ساقشى بولىمشەسىنىڭ ورىنباسار باستىعى ياڭ جيە اكەسى ياڭ شۋچيندى ەسكە الىپ، ونىڭ كوڭىلى قاشاندا ءبىر كۇردەلى سۇيىسپەنشىلىككە تولى ەدى، بۇل سۇيىسپەنشىلىك ونىڭ اكەسىنىڭ قاھارماندىق ىستەرىنە دەگەن ماقتانىشى مەن اكەسىنەن ايرىلعان قيماستىقتان كەلگەن.
ياڭ جيەنىڭ ەسىندە قالۋىنشا، اسكەري وتباسىنان شىققان اكەسى دەنەلى، تۇلعاسى تىپ - تىك بولىپ، وزگەلەرگە حاۋىپسىزدىك سەزىمىن بەرەتىن. ”كىشكەنتاي كەزىمنەن باستاپ اكەمدى ارداقتايتىنمىن، ول قۇربان بولعان جىلى مەن 11 جاستا ەدىم، كەيبىر ىستەردى بىلە باستاعانمىن“، - دەدى ياڭ جيە، - ”قازىر مەن ءبىر حالىق ساقشىسىمىن ءارى اكەمنىڭ ىقپالىنا ۇشىراعانمىن“.
ياڭ شۋچين، 1956 - جىلى دۇنيەگە كەلگەن، حىنان ولكەسى نەيشياڭ اۋدانىنان، ورتا تەحنيكۋم ماعلۇماتىنا يە، 1977 - جىلى 1 - ايدا جۇڭگو حالىق ازاتتىق ارمياسىنا قاتىناسقان، 1979 - جىلى 7 - ايدا جۇڭگو كوممۋنيستىك پارتياسىنا مۇشە بولعان، 1981 - جىلى 10 - ايدا قوسىننان قايتىپ، قوعام حاۋىپسىزدىگى قىزمەتىنە قاتىناسقان، گۇيجوۋ ولكەسى پيڭبا اۋداندىق قوعام حاۋىپسىزدىگى مەكەمەسى گاۋفىڭ ساقشى بولىمشەسىنىڭ حالىق ساقشىسى، ورىنباسار جەتەكشى بولعان، 1994 - جىلى 4 - ايدا قىلمىس بارلاۋ اترەتىنىڭ باستىعى بولىپ اۋىسقان. 1 - دارەجەلى اتقارۋشى ساقشى.
1981 - جىلى قوعام حاۋىپسىزدىگى قىزمەتىنە قاتىناسقاننان بەرى، ياڭ شۋچين ءوز قىزمەتىن قىزۋ ءسۇيىپ، كاسىبىنە بەرىلە زەرتتەۋ جۇرگىزدى، حاۋىپتى ساتتەردە ۇنەمى باس بولىپ العا شىعىپ، اتويلاپ الدا ءجۇردى، اسىرەسە، 1994 - جىلى 4 - ايدا قىلمىس بارلاۋ اترەتىنىڭ باستىعى بولعاننان كەيىن، قىزمەتتى ءتىپتى دە قۇلشىنا ىستەدى، بارلىق حالىق ساقشىلارىن باستاپ قايىسپاي سايىسىپ، ءتۇرلى زاڭعا قايشى قىلمىستىق ارەكەتتەرگە سوققى بەرىپ، ءبىر ءوڭىردىڭ اماندىعىن قورعاۋعا كورنەكتى ۇلەس قوستى. ول كەزىندە ءبىر رەت جەكە 3 - دارەجەلى ەڭبەك كورسەتتى، 1994 - جىلى گۇيجوۋ ولكەلىك قوعام حاۋىپسىزدىگى جۇيەسى جاعىنان ”دەلو اشۋ شەبەرى“ بولىپ باعالاندى ءارى ولكەلىك ساياسي - زاڭ كوميتەتى، ولكەلىك كادرلار مەڭگەرمەسى جاعىنان ”ۇزدىك قىزمەتكەر“ اتاعىن الدى.
ۋاقىتتى 1996 - جىلى 5 - ايدىڭ 21 - كۇنى تۇستەن بۇرىنعا قايتارايىق، پيڭبا اۋداندىق قوعام حاۋىپسىزدىگى مەكەمەسى حۇڭحۋ ماشينا زاۆودىنىڭ قوعام حاۋىپسىزدىگى ءبولىمىنىڭ تەلەفونىن قابىلدايدى، وسى زاۆودتاعى جاس ايەل جۇمىسشى تيان XXتىڭ جابدىق قوبديشاسىنان كۇماندى قوپارعىش زاتتىڭ بايقالعاندىعىن ايتادى. سول كەزدە پيڭبا اۋداندىق قوعام حاۋىپسىزدىگى مەكەمەسى قىلمىس بارلاۋ اترەتىنىڭ باستىعى ياڭ شۋچين دەرەۋ 4 بارلاۋشىنى ەرتىپ حۇڭحۋ ماشينا زاۆودىنا بارىپ قاتەردى تەكسەرەدى. تۇستەن كەيىن ساعات 4 مولشەرىندە ياڭ شۋچين قىزمەتتەستەرىمەن جانە گۇيجوۋ ولكەلىك قوعام حاۋىپسىزدىگى مەڭگەرمەسى جىبەرگەن قوپارعىشتى تەكسەرۋ ماماندارىمەن بىرگە ءساتتى تۇردە جابدىق قوبديشاسىنداعى قوپارعىش زاتتى الاستايدى.
ىلە - شالا ياڭ شۋچين تەكسەرۋ ارقىلى تيانXXتىڭ بۇرىنعى كۇيەۋى فۋXXتىڭ ۇلكەن كۇماندى ەكەندىگىن بايقايدى، ويتكەنى فۋXX كەزىندە قوسىندا اسكەر بولعان، ءبىرشاما جوعارى تالقانداۋ تەحنيكاسى بار بولاتىن. ەكەۋى وتباسى قايشىلىعىنان اجىراسقان سوڭ، فۋXX تالاي رەت تيانXXتىڭ قىر سوڭىنان قالمايدى ءارى دەلو تۋىلاردان ءبىر كۇن بۇرىن فۋXX تيانXXتىڭ قىزمەت سەحىنا كىرگەندىگىن بىرەۋلەر بايقايدى. ارناۋلى دەلو گرۋپپاسى تۇجىرىمداپ تالداۋ جاساۋ ارقىلى كۇماندى فۋXX تيانXXتىڭ ۇيىندە جاسىرىنىپ جاتۋى مۇمكىن دەيدى.
حاۋىپسىزدىك كومەسكى قاتەرىن تەز ارادا جويۋ ءۇشىن، ياڭ شۋچين دەرەۋ 6 حالىق ساقشىسىن باستاپ، قىلمىس كۇماندىسىن ۇستاۋعا بارادى. ول ومىرىنە تونگەن قاتەرگە قاراماي، ءبىرىنشى بولىپ قىلمىس كۇماندىسى جاسىرىنعان ۇيگە باسىپ كىرەدى، كۇتپەگەن جەردەن قىلمىس كۇماندىسى ورناتقان قوپارعىش ءدارىنى جارىپ جىبەرەدى، ياڭ شۋچين دەنەسىمەن جاۋىنگەر سەرىكتەرىن قورعاپ، ءوزى قانعا مالشىنىپ، سول مايداندا داڭقپەن قۇربان بولادى، ول كەزدە 40 جاستا عانا بولاتىن.
1996 - جىلى 6 - ايدىڭ 18 - كۇنى قوعام حاۋىپسىزدىگى مينيسترلىگى ياڭ شۋچيننىڭ كورنەكتى ىزگى ىستەرى مەن كوزى ءتىرى كەزىندەگى بەينەسى بويىنشا ياڭ شۋچين جولداسقا ”مەملەكەتتىك قوعام حاۋىپسىزدىگى جۇيەسىندەگى 1 - دارەجەلى قاھارمان ۇلگى“ اتاعىن تولىقتاپ بەرەدى، سول جىلى 9 - ايدىڭ 18 - كۇنى گۇيجوۋ ولكەلىك حالىق ۇكىمەتى ياڭ شۋچيندى توڭكەرىستىك قۇربان دەپ بەكىتەدى.
قازىر پيڭبا رايوندىق قوعام حاۋىپسىزدىگى مەكەمەسى زورلىقپەن اۋاشالاپ ەسىرتكىدەن ايىقتىرۋ ورنىنىڭ جەتەكشىسى ما جۇن سول كەزدە ياڭ شۋچين دەنەسىمەن توسىپ قالعان قىزمەتتەستەرىنىڭ ءبىرى بولاتىن. ”لاۋ ياڭ سول كەزدە مەنى دەنەسىمەن توسىپ قالىپ، ءوزى اتىلىپ العا شىقتى، ءبىزدىڭ ءتىرى قالۋىمىز سونىڭ ارقاسى“، - دەدى ما جۇن. 23 جىل وتسە دە سول كەزدەگى كورىنىس ءالى دە كوز الدىنان كەتەر ەمەس، ول جاۋىنگەر سەرىكتەرىمەن بىرگە جىل سايىن ياڭ شۋچيندى ەسكە الىپ، لاۋ ياڭنىڭ رۋحى ارقىلى ءوزىن جىگەرلەندىرىپ وتىرادى.
بۇگىندەرى ياڭ جيە اكەسىنىڭ مىندەتىن ارقالاپ، اكەسىنىڭ ورىنداي الماي قالعان ىستەرىن جالعاستىرۋدا.
