شينحۋا اگەنتتىگىنىڭ 12 - ايدىڭ 4 - كۇنى شىجياجۋاڭنان بەرگەن حابارى (ءتىلشى يان چيلەي). حىبەي ولكەسى شيڭتاڭ اۋدانى شاڭنانجۋاڭ قۇرباندار قابىرستانىندا ءبىر ەرەكشە ەسكەرتكىش بوي سوزىپ تۇر، بۇل ەسكەرتكىش ”قوعام حاۋىپىسزدىگى جۇيەسىندەگى 1 - دارەجەلى مەملەكەتتىك قاھارمان ۇلگى“ جاڭ حۇڭفيگە ارناپ تۇرعىزىلعان. ونى ەسكە الۋ ءۇشىن جەرگىلىكتى ورىن تاعى حۇڭفي جولىن، جيڭمين كوپىرىن سالدى.
جاڭ حۇڭفي 1969 - جىلى تۋعان، حىبەي ولكەسى شيڭتاڭ اۋدانىنان. 1986 - جىلى جۇڭگو حالىق قارۋلى ساقشى بولىمىنە قاتىناسقان، 1990 - جىلى 4 - ايدا جۇڭگو كوممۋنيستىك پارتياسىنا مۇشە بولعان، 1990 - جىلى قوسىننان بوساعان، 1991 - جىلى قوعام حاۋىپسىزدىگى قىزمەتىنە قاتىناسىپ، حىبەي ولكەسى شىجياجۋاڭ قالالىق قوعام حاۋىپسىزدىگى مەكەمەسى سايلاۋىت ساقشى بولىمشە تارماق اترەتى 1 - ۇلكەن اترەتى 3 - ورتا اترەتىنىڭ حالىق ساقشىسى، 2 - دارەجەلى اتقارۋشى ساقشى بولعان.
1996 - جىلى 9 - ايدىڭ 4 - كۇنى جاڭ حۇڭفي حالىق ساقشىلارىن باستاپ سول جەردىڭ وزىندە ۇرلىق ىستەپ جاتقان قىلمىستىلارعا سوققى بەرۋ مىندەتىن اتقارىپ جاتقان كەزدە، پىشاق ۇستاعان بۇزاقىلارعا جولىعادى، الايدا ول تيتتەي دە قايمىقپاي، ولارمەن سايىسىپ باقىتقا قارسى ەرلىكپەن قۇربان بولادى، سول جىلى ول نەبارى 27 جاستا بولاتىن. 1996 - جىلى 9 - ايدىڭ 11 - كۇنى جاڭ حۇڭفيگە ”قوعام حاۋىپسىزدىگى جۇيەسىندەگى مەملەكەتتىك 1 - دارەجەلى قاھارمان ۇلگى“ اتاعى تولىقتاپ بەرىلدى.
1996 - جىلى 9 - ايدىڭ 4 - كۇنى جاڭ حۇڭفي جاۋىنگەر سەرىكتەرىمەن بىرگە كوشەدەگى قىلمىستىلارعا سوققى بەرۋگە اتتانادى، شارلاۋ كەزىندە، بىرنەشە كۇماندى ادامنىڭ ۇرلىق ىستەپ جاتقاندىعىن بايقايدى، جاڭ حۇڭفي جاۋىنگەر سەرىكتەرىمەن بىرگە ولارعا جالما - جان جەتىپ بارعاندا، قىلمىس كۇماندىلارى ولاردى كورە سالىپ، جان - جاققا قاشا جونەلەدى، حالىق ساقشىلارى دا بىرنەشە گرۋپپاعا ءبولىنىپ، ءتۇرلى باعىتتا ىزدەرىنە تۇسەدى.
جاڭ حۇڭفي ءبىر كۇماندىنىڭ سوڭىنان وكشەلەي قۋىپ، كۇماندىنى ۇستاۋعا شاق قالعان كەزدە، كۇماندى توسىننان ارتىنا بۇرىلىپ، جاڭ حۇڭفيگە قاراي ۇمتىلىپ، ونىڭ كەۋدەسىنە پىشاق سالىپ جىبەرەدى، قىزىل قان اتقالاقتايدى، جاڭ حۇڭفي قاتتى اۋىرعانىنا شىداپ، بۇزاقىنىڭ سوڭىنان قالماي قۋالايدى، 10 نەشە مەترگە دەيىن قۋىپ بارعاندا قان كوپ كەتكەندىكتەن جىعىلىپ تۇسەدى.
جاڭ حۇڭفيدىڭ پىشاق ۇستاعان بۇزاقىمەن ەرلىكپەن كۇرەسىپ، پىشاقتالىپ قالعان حابارى قالا تۇرعىندارى اراسىنا تەز تارايدى، جاڭ حۇڭفيگە قۇتقارۋ - ەمدەۋ جۇرگىزگەن شيپاحانادا قان بەرۋگە كەلگەن نەشە 100 قالا تۇرعىنى ۇزىن شىرەتكە تۇرادى. وكىنىشتىسى، جاڭ حۇڭفي 27 جاسىندا ماڭگىلىك كوز جۇمادى.
جاڭ حۇڭفي 1991 - جىلى قوعام حاۋىپسىزدىگى قىزمەتىنە قاتىناسقاننان بەرى، ءوز قىزمەتىن قىزۋ ءسۇيىپ، كاسىپتى قاجىرلىلىقپەن دەن قويا زەرتتەپ، وزىنە قاتاڭ تالاپ قويىپ، بارلاۋ، دەلو اشۋ بارىسىندا قۇربان بولۋدان قورىقپاي، الدا اتويلاپ جۇرەدى، بىرنەشە جىلدا جالپى 37 دەلو اشىپ، زاڭعا قايشىلىق جاساعان 124 قىلمىستىنى تۇتقىنداپ، قاتەردە قالعان 12 بۇقارانى قۇتقارىپ، زاڭعا قايشى قىلمىستىق ارەكەتتەرگە سوققى بەرۋگە، قوعام اماندىعىن قورعاۋعا كورنەكتى ۇلەس قوسادى. ىلگەرىندى - كەيىندى 2 رەت 3 - دارەجەلى ەڭبەك كورسەتتى، ءبىر رەت سيلاندى.
”ساقشى بولعاندار جاۋاپكەرشىلىك ارقالاۋ كەرەك، شەشۋشى ساتتەردە جاڭ حۇڭفي سياقتى اتويلاپ الدا ءجۇرۋ كەرەك!“. سول جىلى جاڭ حۇڭفيمەن بىرگە ارەكەتتەنگەن، قازىر قىلمىستىق ىستەر ساقشىسى بولعان حاۋ يۇيگۋاڭ: ”قانداي قىزمەت ورنى بولسىن، ءبىز قاي - قاشان دا ونى ۇلگى ەتۋىمىز كەرەك“، - دەدى.
