ليۋ جىنجيدىڭ سۋرەتى. شينحۋا اگەنتتىگى تاراتقان
شينحۋا اگەنتتىگىنىڭ 12 - ايدىڭ 8 - كۇنى بەيجيڭنەن بەرگەن حابارى (ءتىلشى لۋ چاڭ). 2018 - جىلى 4 - ايدىڭ 4 - كۇنى بەيجيڭ قالالىق قاتىناس باسقارۋ مەكەمەسى چيڭميڭدە قۇربانداردى ەسكە الۋ قيمىلىن ۇيىمداستىردى، چاۋياڭ رايونى ادەبيەت - كوركەمونەرشىلەر بىرلەستىگىندەگى كوركەمونەرشىلەر قاتىناس ساقشىسى ليۋ جىنجيدىڭ تۇلعاسىن سومداپ جاساعان مىس ءمۇسىندى كوزى تىرىسىندە تۇرعان بەيجيڭ قالالىق قاتىناس باسقارۋ مەكەمەسى چاۋياڭ تارماق اترەتى جوعارى قارقىندى تاس جول ۇلكەن اترەتىنە تارتۋ ەتىپ، كوزى تىرىسىندەگى شايقاس قوسىنىنا قايتا ورالتتى... ءبىر جىلدان ارتىق ۋاقىتتان بەرى، وسى مىس ءمۇسىن ۇلكەن اترەت كەڭسەسىنىڭ 3 - قاباتىنداعى جيىن زالىنا جايعاسقاننان بەرى، چيڭميڭ كەزىندە، قۇربانداردى ەسكە الۋ كۇنىندە، ۇلكەن اترەت ۇنەمى گۇلشارباق قويۋ سالتىن وتكىزىپ، قۇرباندى ماداقتاپ، رۋحىن جالعاستىرادى.
ليۋ جىنجي، 1964 - جىلى 11 - ايدا دۇنيەگە كەلگەن، بەيجيڭ قالاسى داشيڭ رايونىنان، 1989 - جىلى 12 - ايدا قوعام حاۋپسىزدىگى قىزمەتىنە قاتىناسقان، كەزىندە بەيجيڭ قالالىق قوعام حاۋپسىزدىگى قاتىناس باسقارۋ مەكەمەسى ءتارتىپ باسقارماسى بەيجيڭ - تيانجين - تاڭشان جوعارى قارقىندى تاس جول ورتا اترەتىنىڭ حالىق ساقشىسى، ورىنباسار بولىمشە اترەت باستىعى مىندەتىن اتقارعان، 1997 - جىلى 3 - ايدا ۇكىمەت قىزمەتىندە ءجۇرىپ قۇربان بولعان. 1997 - جىلى 9 - ايدىڭ 1 - كۇنى قوعام حاۋىپسىزدىگى مينيسترلىگى ليۋ جىنجي جولداسقا مەملەكەتتىك قوعام حاۋىپسىزدىگى جۇيەسىندەگى 2 - دارەجەلى قاھارمان ۇلگى اتاعىن تولىقتاپ بەردى، سول جىلى بەيجيڭ قالالىق حالىق ۇكىمەتى ليۋ جينجي جولداستى توڭكەرىستىك قۇربان دەپ بەكىتتى.
ۋاقىتتى 1997 - جىلى 3 - ايدىڭ 17 - كۇنى كەشكە شەگەرەيىك، ليۋ جىنجي قىزمەتتەن تۇسكەن سوڭ، ۇيگە قايتار جولىندا تۋىلعان كۇن بالكۇلشەسىن الىپ ۇلىنىڭ 9 جاسقا كەلگەن تۋعان كۇنىن وتكىزۋگە دايىندالىپ جاتقان. الايدا، ول كەڭسەنىڭ ەسىگىنەن ەندى شىعا بەرگەن ساتتە، اترەتتىڭ تەلەفونى شىرىلداي جونەلەدى: ”ازدان كەيىن ايرىقشا قىزمەت وتەۋشىلەر قاراستى جەردەن وتەدى“. ادامنىڭ كەمشىل ەكەنىن ويلاپ، ليۋ جىنجي ەشنارسە ايتپاستان، بەلسەندى تۇردە تاس جولعا شىعىپ مىندەت وتەۋدى ءوتىنىش ەتەدى.
سول كۇنى كەشكى ساعات 8دەن 20 مينۋت وتكەندە، قىزمەت وتەۋشىلەر اۆتوكولىك اترەتى جوعارى قارقىندى تاس جولدان ءتىزىلىپ وتەدى. ليۋ جىنجي قىراعى كوزىمەن بەيجيڭ - تيانجين - تاڭشان جوعارى قارقىندى تاس جولىنىڭ ءنول كيلومەتر جەرىندە شارلاۋ جۇرگىزەدى − كەنەت، ءبىر قىزىل ءتۇستى شيالي كولىگى بەلگىلەمەگە قايشى تۇردە قارسى ءجۇرىپ، وڭتايلى جولمەن جوعارى قارقىندى تاس جولعا باسا - كوكتەپ كىرىپ، اۆتوكولىك اترەتىنە ىلەسپەكشى بولادى. قىزمەت وتەۋدىڭ مۇلدەم حاۋىپسىزدىگىنە كەپىلدىك ەتۋ ءۇشىن، ليۋ جىنجي اتىلىپ العا شىعىپ، جان قيارلىقپەن رولدان شاپ بەرىپ ۇستاي الادى ءارى اقىرا بۇيرىق بەرەدى: توقتات! توقتات! الايدا، سول ساتتە قۇتىرىنعان بۇزاقى ماي قاقپاعىن ءۇستى - ۇستىنە باسادى، شالي كولىگى وڭ - سولعا تەڭسەلىپ ۇزدىكسىز العا قاراي جۇرەدى.
ليۋ جىنجي استە قولىن بوساتپايدى. 50 مەتر، 100 مەتر، 200 مەتر... ونى اۆتوكولىك سۇيرەتىپ كەتە بەرەدى. قۇتىرىنعان بۇزاقى اۆتوكولىگىن ايداپ ليۋ جىنجيدى 302 مەتر جەرگە سۇيرەتىپ بارىپ، جوعارى قارقىندى تاس جولدىڭ ورتاسىنداعى وڭاشا بولات تاقتايشاعا اپارىپ سوعادى.
”ليۋ جىنجي قۇلاپ ءتۇستى، قانعا بويالىپ قۇلاپ ءتۇستى، جوعارى قارقىندى تاس جولدىڭ كىرە بەرىسىندە قۇلاپ ءتۇستى، جۇمىس ىستەگەن ورنىندا قۇلاپ ءتۇستى! قارتايىپ قالعان اكە - شەشەسىنە قوش ايتۋعا ۇلگىرمەي قالدى، كۇندىز - ءتۇنى بىرگە بولعان جاۋىنگەر سەرىكتەرىنە ’قوش‘ دەپ ايتۋعا ۇلگىرمەي قالدى، اۋەلى، باۋىر ەتى بالاسىنا دا ’تۋعان كۇنىڭ قۇتتى بولسىن‘دەپ ايتا المادى...“، - دەدى ليۋ جىنجيدىڭ ءبىر قىزمەتتەسى ونى ساعىنىشپەن ەسكە العاندا، ”سول كوكتەمگى ىزعاردىڭ تۇنىندە، جوعارى قارقىندى تاس جول اترەتىندەگى 55 جاۋىنگەر سەرىگى باس كيىمدەرىن الىپ ءۇنسىز تۇردە جانارلارىنان ىستىق جاستارىن پارلاتىپ ءجۇرىپ، سول جەردە جۇلىم - جۇلىم بولىپ جىرتىلىپ قالعان ساقشى كيىمىن تەرىپ، وڭاشا بولات تاقتايشاعا جابىسىپ قالعان ليۋ جىنجي قۇرباننىڭ قانى مەن شاشتارىن قىرىپ الدى...“.
ونىڭ قىزمەتتەسى بىلاي دەدى: ”قوعام حاۋىپسىزدىگى قىزمەتىنە قاتىناسقاننان بەرى، ليۋ جىنجي قاتىناس باسقارۋ ىستەرىن قىزۋ ءسۇيىپ، كاسىپتىك بىلىمدەردى بەرىلە زەرتتەپ، زاڭدى قاتاڭ اتقارىپ، مادەنيەتتى قىزمەت وتەپ، ۇكىمەت ىسىندە پاك بولدى، كەزىندە تالاي رەت ماراپاتتالدى، ءومىر مەن ءولىم تايتالاسقان ەڭ سوڭعى ساتتە، ول قىزىل قانىمەن جانە ومىرىمەن حالىق ساقشىسىنىڭ ار - نامىسىن قورعاپ، قىزمەت وتەۋ اۆتوكولىگى اترەتىنىڭ مۇلدەم حاۋىپسىزدىگىنە شىنايى كەپىلدىك ەتتى“.
