− ءپايزاۋات اۋدانىنىڭ جەر سىلكىنىسىنە قارسى اتتانىپ، اپاتتان قۇتقارۋىنان كورگەن - بىلگەندەرىمىز
شينجياڭ گازەتىنىڭ جالپىلىق اقپارات قۇرالدارى ءتىلشىسى ليۋ شياڭ
1 - ايدىڭ 20 - كۇنى ساعات 17گە دەيىن ءپايزاۋات اۋدانىندا 6.4 بال جەر سىلكىنىسى تۋىلعانىنا 20 ساعاتقا جۋىق ۋاقىت بولدى. جەر سىلكىنىسىنە قارسى اتتانىپ، اپاتتان قۇتقارۋ قىزمەتىنىڭ قاربالاس، ءتارتىپتى جۇرگىزىلۋىمەن، جارالانعاندار شىن ىقىلاستى قۇتقارۋعا، ەمدەۋگە الىنىپ، اپاتقا ۇشىراعان بۇقارا ۇيلەسىمدى ورنالاستىرىلىپ، جەر سىلكىنىسىنىڭ ۋايىمىنان بىرتە - بىرتە ارىلىپ، حاۋىپتى جەرلەردەگى بۇقارا تۇگەلدەي ورنالاستىرۋ تۇيىندەرىنە كوشىرىلىپ، تۇرمىستارى ويداعىداي قامتاماسىزداندىرىلدى.
”ءبىز ’قۇتقارۋشى جۇلدىزىمىز‘دىڭ تەز ارادا جەتىپ كەلەتىندىگىنە سەندىك“
ءپايزاۋات اۋدانىنىڭ شەكەركول قالاشىعى وسى رەتكى جەر سىلكىنىسىنىڭ سىلكىنىس سەنترى. ءتىلشى بۇل ارادا قالاشىقتاعى كەيبىر ءوزى سالىپ العان دۇكەندەردىڭ قۇلاپ قالعاندىعىن، ءىشىنارا جولداردىڭ جول بەتى بۇلىنگەندىگىن، كوپتەگەن ۇيلەردىڭ قابىرعاسىنىڭ جارىلعاندىعىنىڭ انىق كورىنىپ تۇرعاندىعىن بايقادى.
”كەشكى ساعات 9دان اسقاندا، وتباسىمىزداعىلار كەشكى تاماعىمىزدى ءىشىپ جاتقان بولاتىنبىز، كەنەت كوز الدىمىزداعى نارسەلەردىڭ بارلىعى بۇلعالاقتاي باستادى، جەر سىلكىندى!“ شەكەركول قالاشىعىنىڭ تۇرعىنى زۇلحۇمار الىم تىلشىگە سول كۇنى كەشتە تۋىلعان جاعدايدى بايانداپ بىلاي دەدى: ”ءبىز سول ساتتە نەداۋىر ساسقالاقتاپ قالدىق، ءبىراق اكەم سابىرلى قالپىنان جازبادى، ول ءبىزدى ەرتىپ ءۇيدىڭ بۇرىشىنا اپارىپ پانالاتتى، سىلكىنىس باسەڭدەي قالعاننان كەيىن، ءبىر ءۇيلى جان دەرەۋ ۇيدەن شىعىپ كەتتىك“.
بىردەمدە سىرتقا قىرۋار تۇرعىندار جينالعان ەكەن، بارلىق ادامنىڭ جانارىنان ازدى - كوپتى ۇرەي بايقالادى. ”مۇنداي ىسكە ۇشىراعاندا، ەسىڭ شىعىپ كەتەدى ەكەن، دەگەنمەن، ءبىز’ قۇتقارۋشى جۇلدىزىمىز‘دىڭ تەز ارادا جەتىپ كەلەتىندىگىنە سەندىك“، - مۇنى ايتقان كەزدە، زۇلحۇماردىڭ كوزىنەن سەنىم وتى ۇشقىندادى.
سول كۇنى تۇندە كىرپىك ايقاستىرماعان ادام كوپ بولدى
1 - ايدىڭ 20 - كۇنى تۇستە ءپايزاۋات اۋدانى شەكەركول قالاشىعىنداعى كۇرە جولدىڭ بويىندا نەشە ونداعان ءورت ءسوندىرۋ، ورتتەن ساقتانۋ كوماندير - جاۋىنگەرلەرى جول جاعاسىنداعى تاستارعا وتىرا قالىپ، اسىعىس - ۇسىگىس تۇسكى تاماقتارىن جەۋدە ەدى.
بۇقارانى شوعىرلى تۇردە كوشىرىپ ورنالاستىرىپ بولعاننان كەيىن عانا، ولاردىڭ تاماق ىشۋگە مۇرساسى ءتيدى. 1 - ايدىڭ 19 - كۇنى ساعات 21دەن 27 مينۋت وتكەندە جەر سىلكىنىسى تۋىلعاننان كەيىن، وسى ءورت ءسوندىرۋ، ورتتەن ساقتانۋ كوماندير - جاۋىنگەرلەرى ءبىر تاۋلىك بويى كوز ىلمەي، باستان - اياق جەر سىلكىنىسىنە قارسى اتتانىپ، اپاتتان قۇتقارۋدىڭ ءبىرىنشى شەبىندە شايقاس جۇرگىزدى.
”ءبىز سول مەزەتتە - اق دايىندىق جوبا جاساپ، 28 اۆتوكولىك، 116 ادامدى جيىپ، سىلكىنىس سەنترىنە جونەلتتىك. جەر سىلكىنىسىنە قارسى اتتانىپ، اپاتتان قۇتقارۋعا قولباسشىلىق ەتۋ شتابىنىڭ تالابى بويىنشا، ۇيلەرگە ءبىر - بىرلەپ تەكسەرۋ جۇرگىزۋ، ورتتەن ساقتانۋ، شارلاۋ - تەكسەرۋ جانە ناق مايداندى سۋمەن قامداۋدى قامتاماسىزداندىرۋ قىزمەتىن جۇرگىزدىك“. قاشقار ايماقتىق ءورت ءسوندىرۋ، ورتتەن ساقتانۋ، قۇتقارۋ، كومەكتەسۋ تارماق اترەتىنىڭ سانموۋجاڭى جاڭ لەي بىلاي دەدى: ”كوپشىلىكتىڭ ءتۇنى بويى كۇرەس جۇرگىزۋىنىڭ ارقاسىندا، جيىنى 250دەن استام ءۇي ءبىر - بىرلەپ تەكسەرىلدى، سونداي - اق جەرگىلىكتى ۇكىمەتتىڭ بۇقارانى ويداعىداي ورنالاستىرۋىنا كومەكتەستىك“.
وسى كۇنى تۇندە كىرپىك ايقاستىرماعان ادام كوپ بولدى. جەر سىلكىنىسى تۋىلعان سول ساتتەن باستاپ، اۆتونوميالى رايوندىق شۇعىل جاعدايعا توتەپ بەرۋ، جەر سىلكىنىسى، ءورت ءسوندىرۋ، ورتتەن ساقتانۋ، قاتىناس تاراۋلارى دەرەۋ ارەكەتتەنىپ، قىزمەت اترەتتەرىن سىلكىنىس تۋىلعان وڭىرگە جىبەردى، قاشقار ايماعى، ءپايزاۋات اۋدانى جيىنى 12 تارماق قۇتقارۋ - كومەكتەسۋ كۇشىن، 198 اۆتوكولىك، 1136 ادامدى جينادى، اۋدان، اۋىل، قىستاق كادرلارىنان 7000 ادامدى، 500دەن استام اۆتوكولىكتى جەر سىلكىنىس اپاتى تۋىلعان وڭىرگە كومەككە جىبەردى.
ءتىلشى سول مايداننان مىنالاردى كوردى: كەزەكتە جەر سىلكىنىسى تۋىلعان وڭىردە سۋمەن قامداۋ، ەلەكترمەن قامداۋ، حابارلاسۋى جۇيەگە ءتۇسىپ، بۇلىنگەن ۇيلەر، تاس جولدار قاۋىرت جاسالۋ باسقىشىنا ءوتىپ، بارلىق ءىس ءتارتىپتى ءجۇرىلىپ جاتىر ەكەن.
”ءبىزدىڭ بۇل اراداعى تۇرمىسىمىز وتە جاقسى“
جەر سىلكىنىسى تۋىلعاننان كەيىن، ءپايزاۋات اۋدانى دەرەۋ ءپايزاۋات اۋداندىق 2 - باستاۋىش مەكتەپتەن، گۇللۇك اۋىلى سەنترلى باستاۋىش مەكتەبىنەن، عولتوعىراق قالاشىعى 3 - باستاۋىش مەكتەبىنەن بۇقارانى ورنالاستىراتىن 3 ءتۇيىن قۇردى.
جەر سىلكىنىسى تۋىلعاننان ورنالاستىرۋ تۇيىنىنە كوشىپ بارعانعا دەيىن زۇلحۇماردىڭ وتباسىنداعىلار 2 ساعاتقا جەتپەيتىن ۋاقىت جۇمسادى. ”ۇكىمەتتىڭ ۇيىمداستىرۋىمەن، ءبىز تەز ارادا عولتوعىراق قالاشىقتىق 3 - باستاۋىش مەكتەپتەگى ورنالاستىرۋ تۇيىنىنە كوشىپ باردىق، بارا قالعان كەزدە، ءاربىر بولمەنىڭ ورىن - كورپەلەرى سالۋلى، ازىق - تۇلىك، جىلى سۋ دايىن تۇرعاندىعىن كورىپ، كوڭىلىمىز جايلاندى، جەر سىلكىنىسىنەن بولعان قورقىنىش - ۇرەي عايىپ بولدى“. زۇلحۇمار تەبىرەنە: ”قازىر ۇيىمىزگە قايتا الماعانىمىزبەن، ءبىزدىڭ بۇل اراداعى تۇرمىسىمىز وتە جاقسى، پارتيا مەن ۇكىمەت شىنايى قامقورلىق جاساپ وتىر“، - دەدى.
”ورنالاستىرۋ تۇيىنىندە اۋىز سۋ، ازىق - تۇلىك، كورپە - جاستىق سياقتى تۇرمىسقا قاجەتتى نارسەلەرمەن قامتاماسىزداندىرۋ جەتكىلىكتى، ءبىز بارلىق بۇقارانىڭ ىستىق سۋ ىشۋىنە، تاماق جەي الۋىنا، جاۋراپ قالماۋىنا بار كۇشىمىزبەن كەپىلدىك ەتەمىز“، - دەدى سول مايداندا قۇتقارۋ - كومەكتەسۋ زاتتارىن ءبولىپ تاراتۋعا جاۋاپتى بولعان ءپايزاۋات اۋداندىق حالىق ىستەرى مەكەمەسىنىڭ قىزمەتكەرى.
گۇللۇك اۋىلدىق سەنترلى باستاۋىش مەكتەبىندەگى ورنالاستىرۋ تۇيىنىندە ۋاقىتشا قۇرىلعان اۋرۋدان ساقتانۋ، مەڭگەرۋ ورتالىعىندا مەديتسينا قىزمەتكەرلەرى 70جاستاعى مامەت تۇردى كاريانىڭ دەنساۋلىعىن تەكسەرىپ جاتىر. ”ءسىزدىڭ قان قىسىمىڭىز قالىپتى، قانداعى قانت قۇرامىڭىزدا دا ماسەلە جوق، سالاماتتىعىڭىزدا پالەندەي اقاۋ جوق، جاقسىراق دەمالساڭىز بولعانى، قالپىڭىزعا كەلەسىز“. ”ماقۇل، ماقۇل، شىنىندا، قاتتى جاپا شەكتىڭىزدەر!“، - دەدى كاريا اسەرلەنە.
انادايدا، بالالار قىسقى كۇننىڭ شۋاعىندا اسىر سالىپ ويناۋدا، ەرەسەكتەر قۇتقارۋشى، كومەكتەسۋشى قىزمەتكەرلەرگە كومەكتەسىپ زات تاسىسىپ، قارتتارعا قارايلاسۋدا، جۇمىس ءتارتىپتى جۇرگىزىلىپ، ءۇمىت ۇشقىنى لاۋلاي ءتۇستى.
