شينجياڭ گازەتىنىڭ جالپىلىق اقپارات قۇرالدارى ءتىلشىسى چىن چياڭۋي 4 - ايدىڭ 6 - كۇنى ۇرىمجىدەن حابارلايدى. مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگىنەن ۇعىسۋعا قاراعاندا، 4 - ايدىڭ 2 - كۇنىنە دەيىن رايونىمىزدىڭ جاڭا ەنەرگيا گەنەراتورلار تىزبەگىنىڭ سيىمدىلىعى 30 ميلليون 20 مىڭ كيلوۆاتقا جەتىپ، شينجياڭنىڭ ەلەكتر تورى جالپى گەنەراتورلار تىزبەگى سيىمدىلىعىنىڭ ％32.6ىن ۇستاپ، بۇكىل ەلدىڭ الدىڭعى لەگىنە وتكەن. رايونىمىزدىڭ جەل ەنەرگياسى، كۇن ەنەرگياسى بايلىعى مول، جاڭا ەنەرگيا گەنەراتورلار تىزبەگىنىڭ كولەمى جىل سايىن ارتۋدا. كەزەكتە رايونىمىزدىڭ جەل ەلەكتر گەنەراتورلارى تىزبەگىنىڭ سيىمدىلىعى 19 ميلليون 750 مىڭ كيلوۆات بولىپ، سانجى حۇيزۋ اۆتونوميالى وبلىسى، التاي ايماعى، قۇمىل قالاسى، ءۇرىمجى قالاسى، تۇرپان قالاسى سياقتى 9 ءىرى جەلدى وڭىرگە ورنالاسقان؛ فوتوۆولت گەنەراتورلار تىزبەگىنىڭ سيىمدىلىعى 10 ميلليون 270 مىڭ كيلوۆات بولىپ، وڭتۇستىك شينجياڭداعى 4 ايماق وبلىس، قۇمىل قالاسى، تۇرپان قالاسى سياقتى جەرلەرگە ورنالاسقان.
تاياۋ جىلداردان بەرى رايونىمىزدىڭ جاسىل، تازا ەنەرگياسىن جەلىگە تۇتاستىرۋدى جانە قابىلداۋدى جەبەۋ ءۇشىن، مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى ەلەكتر تورى جۇلگەسى قۇرىلىسىن جانە ساپالىلاندىرۋ تەبىنىن ۇزدىكسىز كۇشەيتتى. 2019 - جىلى ىسكە قوسىلعان 750 كيلوۆولتتىق ياركەننەن حوتانعا دەيىنگى كەرنەۋ وزگەرتۋ ينجەنەرياسى وڭتۇستىك شينجياڭنىڭ جاڭا ەنەرگيانى قابىلداۋ ماسەلەسىن ءونىمدى شەشتى. جۇندۇڭ - ۋاننان 1100± كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسى رايونىمىزدىڭ جاڭا ەنەرگيانى سىرتقا شىعارۋ قۋاتىن جاپپاي جوعارىلاتىپ، بۇكىل شينجياڭداعى جاڭا ەنەرگيا كاسىپ سالاسىنىڭ دامۋىن جەبەدى.
بيىل ەلەكتر تورى جۇلگەسىن ونان ارى ساپالىلاندىرۋ ءۇشىن، مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى بۇراتالا موڭعۇل اۆتونوميالى وبلىسىنان، التايدان، موريدان 750 كيلوۆولتتىق كەرنەۋ وزگەرتۋ ينجەنەرياسىن سالۋدى جوسپارلادى، بۇل سولتۇستىك شينجياڭ ءوڭىرىنىڭ جاڭا ەنەرگيا قابىلداۋ قۋاتىن ءونىمدى جوعارىلاتادى.
مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگىنىڭ ەلەكتر قۋاتىن ورنالاستىرۋ - مەڭگەرۋ ورتالىعى ۋنيۆەرسال تەحنيكا باسقارماسىنىڭ ورىنباسار باستىعى گو شياۋلۇڭ تانىستىرىپ بىلاي دەدى: ”وتكەل“ سالۋدان تىس، مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى تاعى شينجياڭنىڭ ءىشى مەن سىرتىنداعى ”ەكى بازاردى“ تياناق ەتىپ، عىلمي ورنالاستىرۋدى كۇشەيتىپ، ەلەكتر قۋاتىن بازارلاندىرۋ ارقىلى جاڭا ەنەرگيا قابىلداۋ كەڭىستىگىن ۇزدىكسىز اشتى. 1 - توقساندا جاڭا ەنەرگيا ”شينجياڭنىڭ ەلەكترىن سىرتقا جەتكىزۋ“ مولشەرى 4 ميلليارد 200 ميلليون كيلوۆات - ساعاتقا جەتىپ، ”شينجياڭنىڭ ەلەكترىن سىرتقا جەتكىزۋ“ ەلەكتر مولشەرىنىڭ شامامەن ％20ىن يەلەدى.
بيىل رايونىمىزدا جاڭا ەنەرگيا بويىنشا توك تاراتۋ مولشەرى 60 ميلليارد كيلوۆات - ساعاتقا جەتىپ، 2019 - جىلعىدان مولشەرمەن 6 ميلليارد كيلوۆات - ساعات ارتاتىندىعى مەجەلەندى. وسى بويىنشا مولشەرلەگەندە، تۇتاس جىلدا 24 ميلليون 240 مىڭ توننا تولىمدى كومىردىڭ ورنىن باسىپ، 63 ميلليون 500 مىڭ توننا كومىرتەگى قوس توتىعىن ىعىستىرۋ مولشەرىن ازايتادى.
