شينجياڭ گازەتىنىڭ جالپىلىق اقپارات قۇرالدارى ءتىلشىسى جيا چۇنشيا 4 - ايدىڭ 11 - كۇنى ۇرىمجىدەن حابارلايدى. 4 - ايدىڭ 10 - كۇنى اۆتونوميالى رايوندىق اۋىل - قىستاق امانات - قارىز بىرلەسكەن كووپەراتيۆى مەن اۆتونوميالى رايوندىق مادەنيەت - ساياحات مەڭگەرمەسى فينانس ارقىلى ساياحات كاسىبىنە قولداۋ كورسەتۋ ستراتەگيالىق سەلبەستىك كەلىسىمىنە قول قويدى، الداعى 5 جىلدا 20 ميلليارد يۋانعا تارتا ارناۋلى امانات - قارىز اقشامەن قامداپ، ساياحات ارقىلى شينجياڭدى گۇلدەندىرۋ ستراتەگياسىن اتقارۋعا قولداۋ كورسەتەدى.
ۇعىسۋعا قاراعاندا، شينجياڭ اۋىل - قىستاق امانات - قارىز كووپەراتيۆى ساياحات ارقىلى شينجياڭدى گۇلدەندىرۋ ستراتەگياسىن ارقاۋ ەتىپ، شارۋالار شاتتىعى ساياجايى، اۋىل - قىستاق ەرەكشەلىگىندەگى حالىقتىق تۇسەلحانا، تەبىندەپ كەلە جاتقان كاسىپتەردى دامىتۋ قاتارلىلاردى سۇيەمەلدەۋ - قولداۋ ارقىلى ”ساياحات + فينانس“ ۇلگىسىن بەلسەنە تۇلعالاپ، ساياحات كاسىبىنە امانات - قارىز اقشا ۇستەۋدى جالعاستى كۇشەيتەدى ەكەن. قازىرگە دەيىن، شينجياڭ اۋىل - قىستاق امانات - قارىز كووپەراتيۆىنىڭ ساياحات كاسىبىنە تاراتقان قارىز اقشاسى 3 ميلليارد يۋانعا تاياعان.
الداعى 5 جىلدا، شينجياڭ اۋىل - قىستاق امانات - قارىز كووپەراتيۆى 20 ميلليارد يۋاننان كەم بولمايتىن ارناۋلى امانات - قارىز قارجىسىمەن قامداپ، ءتۇيىندى تۇردە ساياحات كاسىبىنە، ساياحات ناقتى تۇلعالارىنىڭ قارجى قۇراۋىنا، تولەۋ - ەسەپ جابۋىن قامتاماسىز ەتۋىنە، ساياحات ارقىلى كەدەيلەردى سۇيەمەلدەۋگە، زەردەلى ساياحات سياقتىلارعا قولداۋ كورسەتىپ، رايونىمىزدىڭ ساياحات كاسىبىن جان - جاقتى، ءبىر تۇلعالانعان، جوعارى دەڭگەيدەگى فينانس قىزمەت وتەۋىمەن جانە قولداۋمەن قامدايدى.
اۆتونوميالى رايوندىق مادەنيەت - ساياحات مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى گۇلي ابليم مىنالاردى ءبىلدىردى: وسى رەتكى سەلبەستىك كەلىسىمىنە قول قويۋ رايونىمىزدىڭ ساياحات پەن فينانستى ىشكەرىلەي توعىستىرا دامىتۋدا ماڭىزدى قادام باسقانىن ايگىلەدى. قول قويىلعان سوڭ، ەكى جاق امانات - قارىزبەن قولداۋ كورسەتۋ، ساياحات ەرەكشە شاعىن قالاشىعى قۇرىلىسى سياقتى جاقتاردا ناقتى ىستەر سەلبەستىگىن ورىستەتىپ، ءتىپتى دە كەمەلدى، اناعۇرلىم ءونىمدى ءونىم - فينانستى ۇشتاستىرۋ مەحانيزمىن قۇرىپ، شينجياڭنىڭ ساياحات كاسىبىنىڭ جوعارى ساپالى دامۋىن بىرگە جەبەيدى.
