بيىل قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋىمەن جاپپاي قامتۋ جۇزەگە اسىرىلادى
شينجياڭ گازەتىنىڭ جالپىلىق اقپارات قۇرالدارى ءتىلشىسى لي چۇنشيا 4 - ايدىڭ 19 - كۇنى ۇرىمجىدەن حابارلايدى. ”اي سايىن 3000 يۋان كىرىس تابامىن، مەنىڭ جۇمىس تابۋىما كومەكتەسكەنىڭىزگە العىس ايتامىن“. 4 - ايدىڭ 18 - كۇنى ونسۋ اۋدانى گۇلاۋات اۋىلى بوستان توعىراق قىستاعىنىڭ تۇرعىنى يۇسان زياۋدۇن اپتانىڭ اياعىندا ۇيىنە قايتىپ كەلگەندە، زوھىرام كامىلدى كورگەن جەردەن وعان راقىمەت ايتتى.
زوھىرام − بوستان توعىراق قىستاعى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ پۋنكتىنىڭ كومەكشىسى، باستىسى، قىستاق تۇرعىندارىنا جۇمىستاندىرۋ جانە قوعامدىق قامتاماسىزداندىرۋ ساياساتىن ۇگىتتەۋ، قىستاقتاعى ارتىق ەڭبەككۇشتەردىڭ ناقتى سانىن انىقتاۋ، باسقا كاسىپ سالاسىنا ويىستىرىپ جۇمىستاندىرۋعا كومەكتەسۋ سياقتى جۇمىستارعا جاۋاپتى. ول تىلشىگە بىلتىر قىستاقتىڭ 5000 مۋدان استام جەردى اينالىمعا سالعاندا، 200 نەشە ەڭبەككۇش اسىپ قالعانىن ايتتى. ”ءبىز توڭىرەكتەگى كاسىپورىندارمەن، سونداي - اق ەگىمشىلىك ءىرى وتباسىلارىمەن بەلسەندى تۇردە ۇشتاسىپ، جاقىن ماڭايداعى اتىز - ارىق باپتاۋ، ەگىمشىلىك، باعىمشىلىق سياقتى 140 جۇمىس ورنىمەن حابارلاسىپ، ءبىر ماشينا جابدىقتاۋ كاسىپورنىنان 11 جۇمىس ورنىن تاۋىپ، 2 توقىماشىلىق كاسىپورنىمەن كەلىسىم جاساسىپ، 30 ادامدى زاۆودقا جۇمىسقا كىرگىزدىك“، - دەدى زوھىرام قولمەن قويعانداي.
بۇگىندە بۇكىل شينجياڭنىڭ ءار جەرىندە زوھىرام سياقتى قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ كومەكشىلەرى اۋىل - قىستاقتاعى ارتىق ەڭبەككۇشتەردى باسقا كاسىپ سالالارىنا ويىستىرىپ جۇمىستاندىرۋ، دالمە - ءدال جۇمىستاندىرىپ كەدەيلەردى سۇيەمەلدەۋدى ىلگەرىلەتۋ، نەگىزگى ساتى قوعامدىق قامتاماسىزداندىرۋ قىزمەت وتەۋىن ورىستەتۋ سياقتى جاقتاردا ماڭىزدى رول اتقارىپ وتىر. اۆتونوميالى رايوندىق الەۋمەتتىك جۇمىستاندىرۋعا قىزمەت وتەۋ مەكەمەسى جۇمىستاندىرۋعا قىزمەت وتەۋ جەتەكشىلىك ەتۋ باسقارماسىنىڭ باستىعى لي جىنجياڭ تانىستىرىپ بىلاي دەدى: قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ تۇعىرى قۇرىلىسى رايونىمىزدىڭ الەۋمەتتىك جۇمىستاندىرۋعا قىزمەت وتەۋ جۇيەسىن كەمەلدەندىرۋدىڭ ماڭىزدى مازمۇنىنىڭ ءبىرى، اۆتونوميالى رايوننىڭ ادام كۇشى بايلىعى جانە قوعامدىق قامتاماسىزداندىرۋ ىستەرىنىڭ دامۋ جوباسىنا نەگىزدەلگەندە، 2020 - جىلدىڭ اياعىنا دەيىن، بۇكىل رايونداعى بارلىق اكىمشىلىك قىستاقتا جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ تۇعىرى قۇرىلىپ، قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋىمەن جاپپاي قامتۋ جۇزەگە اسىرىلادى.
ساناققا نەگىزدەلگەندە، 2019 - جىلدىڭ اياعىنا دەيىن، بۇكىل رايوندا قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ پۋنكتتەرىنەن 8668ى قۇرىلىپ، قامتۋ سالىستىرماسى ％95.2كە جەتكەن؛ مۇندا وڭتۇستىك شينجياڭداعى 4 ايماق - وبلىستا قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ پۋنكتىنەن 4942سى قۇرىلىپ، قامتۋ سالىستىرماسى ％91.9كە جەتكەن، اۆتونوميالى رايون، ايماق، وبلىس (قالا)، اۋدان (قالا، رايون)، ءمالى (اۋىل، قالاشىق)، الەۋمەتتىك اۋماق (اكىمشىلىك قىستاق) سىندى الەۋمەتتىك جۇمىستاندىرۋعا قىزمەت وتەۋدىڭ 5 دارەجەلى جۇيەسى نەگىزىنەن قۇرىلعان.
قۇرىلىپ بولعان قىستاق دارەجەلى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ تۇعىرى ادام كۇشى بايلىعى جانە قوعامدىق قامتاماسىزداندىرۋ قىزمەتىنىڭ اۋىل - قىستاققا، شارۋالارعا قىزمەت وتەۋىنىڭ ”ەڭ سوڭعى ءبىر شاقىرىمىن“ تۇتاستىردى. سانجى حۇيزۋ اۆتونوميالى وبلىسىندا وبلىس بويىنشا 473 اكىمشىلىك قىستاقتىڭ بارىندە قىزمەت وتەۋ تۇعىرى قۇرىلىپ، كومەكشى سەپتەلىپ، قىستاقتاردى قامتىعان ينفورماتسيا تورى باسقارۋ قىزمەت وتەۋ جۇيەسى قۇرىلدى؛ ىلە قازاق اۆتونوميالى وبلىسىندا قىستاق دارەجەلى قىزمەت وتەۋ تۇعىرىنىڭ جۇمىسقا ورنالاستىرۋ ارقىلى كەدەيلەردى سۇيەمەلدەۋ كەرۋەن اۆتوموبيلى، بازار كۇنى جۇمىسقا قابىلداۋ سياقتىلاردى ۇيىمداستىرۋدى ۇدايىلاندىرۋ ارقىلى ۇقساماعان ادامدار شوعىرىنا ۇيلەسەتىن جۇمىس ورىندارىن ءار ۇلت بۇقاراسىنا تانىستىردى.
”قازىر قۇرىلعان قىستاق دارەجەلى قىزمەت وتەۋ تۇعىرى ءوز رولىن ناتيجەلى ساۋلەلەندىرىپ وتىر“. لي جىنجياڭ مىنانى ايتتى: قىستاق دارەجەلى قىزمەت وتەۋ تۇعىرىنىڭ قۇرىلۋىنا بايلانىستى، نەگىزگى ساتىداعى بۇقارانىڭ ”ساياساتتى قىستاقتا ۇعىسۋ، جۇمىستى قىستاقتا تابۋ، قوعامدىق قامسىزداندىرۋ اقىسىن قىستاقتا تاپسىرۋ، زەينەتاقىنى قىستاقتا الۋ“ بىرتىندەپ جۇزەگە اسىپ، باقىت سەزىمى، تابىس سەزىمى ۇزدىكسىز كۇشەيدى.
تانىستىرۋعا قاراعاندا، كەلەسى قادامدا رايونىمىز وڭتۇستىك شينجياڭداعى 4 ايماق - وبلىسقا قاراتا، قىزمەتكەر سەپتەۋ، قارجى سايكەستىرۋ سياقتى جاقتاردا ۇزدىكسىز ارنايى جەتەكشىلىك ەتىپ، قىستاق دارەجەلى قىزمەت وتەۋ تۇعىرى قۇرىلىسىنىڭ قامتۋ سالىستىرماسىن ％100كە جەتكىزەدى ەكەن. سونىمەن بىرگە، قىستاقتاعى جۇمىستاندىرۋ جانە قوعامدىق قامتاماسىزداندىرۋ قىزمەت وتەۋ پۋنكتىندەگى كومەكشىلەردى تاربيەلەۋدى اناعۇرلىم كۇشەيتىپ، ولاردىڭ كاسىپتىك ساپاسىن، ساياساتتىق ورەسىن جانە قىزمەت وتەۋ قابىلەتىن ءوسىرىپ، قىستاق دارەجەلى قىزمەت وتەۋ تۇعىرىنىڭ اۋىل - قىستاقتاعى ارتىق ەڭبەككۇشتەردى باسقا كاسىپ سالاسىنا ويىستىرىپ جۇمىستاندىرۋ، قوعامدىق قامتاماسىزداندىرۋ جاعىنان كاسىپتىك قىزمەت وتەۋدى جاقسى ىستەۋ سياقتى جاقتاردا نەگىزدىك رولدى ءتىپتى جاقسى ساۋلەلەندىرۋىنە مۇمكىندىك جاساپ، كەدەيلىكتەن ارىلتۋدان قامال الۋعا جانە ەكونوميكالىق، قوعامدىق دامۋعا دەم بەرەدى ەكەن.
