− دۇنيە جۇزىلىك ىندەتكە قول ۇستاسا قارسى اتتانىپ، جۇڭگو جاۋاپكەرشىلىگىن ايگىلەدى ③
حالىق گازەتىنىڭ شولۋشىسى
سالماقتى ناۋقاستاردى قۇتقارۋ - ەمدەۋ ىندەتكە قارسى اتتانۋدىڭ ونىمدىلىگىن ايگىلەپ، ىندەتكە قارسى اتتانۋداعى سەنىمگە سايادى. جۋىقتا ۋحاندا جاڭا تيپتى ايدارشا ۆيرۋس وكپە قابىنۋ ىندەتىنە شالدىققان ءبىر سالماقتى ناۋقاستى شۇعىل قۇتقارۋ كەزىندەگى بەينەەكران ينتەرنەت جەلىسىندە زور ءدۇمپۋ تۋدىردى، ”ونى قالايدا امان الىپ قالايىق!“ ەمدەۋ قىزمەتكەرلەرىنىڭ جۇدىرىق تۇيە ىنتالاندىرعان سوزدەرى جۇڭگولىقتاردىڭ كوزدەرىنەن جاس پارلاتتى. 25 كۇن ECMO قولدانىپ، 50 كۇن تىنىس الدىرۋ اپپاراتىمەن تىنىستاندىرىلدى، 4 ولكەنىڭ ەمدەۋ قىزمەتكەرلەرى 2 ايدان استام ۋاقىت ۇتىلاپ قۇتقارعان - ەمدەگەن وسى ناۋقاستىڭ بەتى بەرى قاراپ، حاۋىپتەن قۇتىلدى. حۋبەي مەن ۋحانداعى سالماقتى ناۋقاستاردىڭ ءومىرىن مۇمكىندىگىنشە قۇتقارۋ ءۇشىن، جۇڭگو مەملەكەت دارەجەلى مامانداردى، جوعارى دەڭگەيلى شيپاحانالاردى بەلگىلەنگەن ءتۇيىن بويىنشا ورنالاستىرىپ، شوعىرلى ەمدەۋ - قۇتقارۋ جۇرگىزىپ، ”ءبىر ادامعا ءبىر شارا“ قولداندى. ۋحاندا دياگنوزى تۇراقتاندىرىلعان 80 جاستان اسقان 2500دەن استام قارت ناۋقاستى قۇتقارۋ - ەمدەۋدىڭ ءساتتى بولۋ مولشەرى ％70كە جاقىندادى، بۇلاردىڭ ىشىندە جاسى ەڭ ۇلكەنى 108 جاستا.
بارلىعىندا ءومىردى قۇتقارۋعا ءمان بەرىلدى. ىندەت تۇتقيىل تۋىلعان شاقتا، باس شۋجي شي جينپيڭ ءاۋ باستان ”قاشاندا حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعىن ءبىرىنشى ورىنعا قويۋدى“ باسا دارىپتەپ، ”ىندەتتەن ساقتانۋ - تىزگىندەۋ قىزمەتىن قازىرگى ەڭ ماڭىزدى قىزمەت رەتىندە مىقتى ۇستاۋدى“ تالاپ ەتتى. قىسقا عانا 2 − 3 اي ۋاقىت ىشىندە، باسىم كوپ ولكەلەر دياگنوزى تۇراقتاندىرىلعان ناۋقاستار مەن جاڭادان ارتقان ناۋقاستاردىڭ ”ەكەۋىن دە نولگە ءتۇسىرۋدى“ جۇزەگە اسىرىپ، 70 مىڭنان استام ناۋقاس ەمدەلىپ جازىلىپ شيپاحانادان شىعىپ، ىندەت جەدەل تارالعان اۋىر جاعدايدى تەز وڭالتىپ، ەمدەپ ساۋىقتىرۋدىڭ ءبىرشاما جوعارى مولشەرى جانە اۋرۋدان ءولۋدىڭ ءبىرشاما تومەن مولشەرى ارقىلى ەلەۋلى جۇقپالى اۋرۋعا قارسى اتتانۋدىڭ ”جۇڭگو كەرەمەتىن“ جاراتتى. بىردە - ءبىر ادامنىڭ ءومىرىن اجالعا بەرمەۋ ءۇشىن جانتالاسىپ، تينامداي ءۇمىت بولسا قۇتقارىپ قالۋعا بارىن سالىپ قۇلشىندى، مىنە بۇل حالىقتى بارىنەن جوعارى قوياتىن، ءومىردى بارىنەن جوعارى قوياتىن ۇستانىمنىڭ جاندى كورىنىسى سانالادى.
بارلىعىندا ءومىردى قۇتقارۋ الدىمەن ەسكەرىلدى. ىندەتتىڭ تارالۋ جولىن جەدەل ءۇزۋ ءۇشىن، پارتيا ورتالىق كوميتەتى ۋحاننان، حۋبەيدان شىعاتىن جولداردى جابۋ تۋرالى باتىل شەشىم جاسادى، قالادا تىرلىك توقتاعان، ەكونوميكا قۇلدىراعان بوداۋ بەرۋگە تۋرا كەلسە دە ەش ءارى - ءسارى بولمادى! ءومىر تايشان تاۋىنان دا قادىرلى، 340تان استام ەمدەۋ اترەتى، 42 مىڭنان استام ەمدەۋ قىزمەتكەرى حۋبەيعا كومەك بەرۋگە شۇعىل اتتانىپ، جۇڭگوداعى ەڭ ۇزدىك 10 اكادەميك ۇجىمى ءبىرىنشى شەپتە ەرلىكپەن شايقاس جۇرگىزدى، بۇكىل ەلدەگى سالماقتى ناۋقاس مەديتسيناسى سالاسىنداعى تىرەكتىلەردىڭ وننان بىرىنە جۋىعى كۇش جالعاپ شەپكە اتتاندى... بۇكىل ەلدىڭ كۇشىن جۇمىلدىرىپ، سايلاۋىت كۇشتەرمەن شايقاسقا اتتانىپ، كۇن - ءتۇن دەمەي دامىلسىز شايقاس جۇرگىزدى. دۇنيەدە سيرەك كەزىگەتىن ساقتانۋ - تىزگىندەۋ سەرپىنىنىڭ جانە قۇتقارۋ - ەمدەۋ تەزدىگىنىڭ ارقاسىندا، جۇڭگو ءومىردى بارىنەن جوعارى قوياتىن ۋادەسىن ورىنداپ، ءومىر تەڭدەسسىز باعالى دەيتىن سۇيىسپەنشىلىكتى ايگىلەدى.
ءومىردى قۇتقارۋدا، جۇڭگو بوداۋ بەرۋمەن ەسەپتەسىپ جاتپادى. 1 - ايدىڭ 22 - كۇنى جۇڭگو ۇكىمەتى جاڭا تيپتى ايدارشا ۆيرۋس وكپە قابىنۋ ىندەتىنە شالدىققان ناۋقاستار مەن كۇدىكتى ناۋقاستاردى ەمدەۋ اقىسىن جەكە ادامداردىڭ وزدەرى تولەۋىنىڭ قاجەتى جوق دەپ جاريالادى. مەملەكەتتىك قازىنا ىندەتتەن ساقتانۋ - تىزگىندەۋگە شۇعىل تۇردە جاردەماقى قارجىسىن ءبولدى، جەر - جەر ىندەتتەن ساقتانۋ - تىزگىندەۋگە ۇسىنىلىمدى ىركەس - تىركەس كوبەيتتى، تىنىس الدىرۋ اپپاراتى، ساقتانۋ - قورعانۋ كيىمدەرى، جەدەل جاردەم كولىكتەرى سياقتى ءتۇرلى مەديتسينالىق زاتتىق ماتەريالدار بۇكىل ەلدەن سەپتەلىپ اكەلىنىپ، استىق - ماي، كوكونىس، جەمىس - جيدەك سياقتى ءتۇرلى تۇرمىستىق قاجەتتى بۇيىمدار شار تاراپتان توپتالدى. يلاندىرۋ قۋاتى بارىنەن كۇشتى مىنا ەكى توپ ساندى مالىمەتكە قارايىق، ءبىرى، ۋحان قالاسىندا جاڭا تيپتى ايدارشا ۆيرۋس وكپە قابىنۋ ىندەتىنە شالدىققان ناۋقاستاردىڭ جالپى ەمدەلىپ ساۋىعۋ مولشەرى ％94كە جەتكەن. ەندى ءبىرى، مەملەكەتتىك ەمدەۋ قامسىزداندىرۋى مەكەمەسىنىڭ جاريالاۋى بويىنشا، دياگنوزى تۇراقتاندىرىلىپ شيپاحاناعا جاتقان ناۋقاستاردىڭ ءاربىرىنىڭ ورتاشا ەمدەلۋ اقىسى 21 مىڭ 500 يۋانعا جەتىپ، سالماقتى ناۋقاستاردىڭ ءاربىرىنىڭ ورتاشا ەمدەلۋ اقىسى 150 مىڭ يۋاننان اسقان، بۇل اقىلاردىڭ ءبىر ءبولىمى ەمدەۋ قامسىزداندىرۋىنىڭ ەسەبىنەن كوتەرىلىپ، قالعانىنا مەملەكەتتىك قازىنا كومەك قاراجات بەرگەن. بۇنىڭ ىشىندە، 70 جاستاعى ءبىر ناۋقاس ەمدەلگەن 3 ايدا 2 مارتە ECMO ىستەتىپ، ەمدەلۋ اقىسى ءبىر ميلليون 400 مىڭ يۋانعا تاياعان. انگليالىق وقىمىستى، لوندون ەكونوميكا جانە ساۋدا ساياساتى مەكەمەسىنىڭ بۇرىنعى باستىعى روسس: ”جۇڭگو اۋەل باستان - اق ادامداردىڭ تۇرمىسىنا شىنايى ىقپال جاسايتىن ادامدىق ۇقىقتىڭ نە ەكەندىگىن تەرەڭ ءتۇسىندى، جان العىش تارالمالى ىندەت الدىندا، ەڭ ماڭىزدى ادامدىق ۇقىق قاتىپ - سەمگەن، تاياز ماندەگى’ادامدىق ۇقىق‘ ۇعىمى ەمەس، قايتا جان ساقتاپ، ءتىرى ءجۇرۋ“ دەپ جاقسى ايتتى.
ءومىردى قۇتقارۋدا، جۇڭگو كومەك قولىن سوزدى. ىندەت دۇنيە جۇزىنە تاراعاندا، جۇڭگو ادامگەرشىلىك رۋح ۇستانىپ، كومەككە ءزارۋ بولىپ وتىرعان الەمنىڭ كوپتەگەن ەلدەرى مەن وڭىرلەرىنە كومەك قولىن سوزدى. قازىرگە دەيىن جۇڭگو ۇكىمەتى 150دەن استام مەملەكەت پەن حالىقارالىق ۇيىمعا شۇعىل قاجەتتى مەديتسينالىق زاتتىق ماتەريالدار كومەگىن ۇسىندى نەمەسە ۇسىنۋ ۇستىندە، جيىنى 15 توپ ەمدەۋ اترەتىن اتتاندىرىپ 16 مەملەكەتكە كومەك بەردى، دۇنيە جۇزىلىك دەنساۋلىق ساقتاۋ ۇيىمىنا 50 ميلليون دوللار جىلۋ اتادى، وركەندەپ كەلە جاتقان ەلدەردىڭ ىندەتتەن ساقتانۋ - تىزگىندەۋ جانە دەنساۋلىق ساقتاۋ جۇيەسى قۇرىلىسىنا قولداۋ كورسەتتى... توپ - توپ باعالى زاتتىق ماتەريالدار، بەينە ەكرانمەن سويلەسۋلەر، شەتەلگە كومەككە بارعان مەديتسينالىق ماماندار گرۋپپالارى قولىنان كەلگەنشە ىستەپ، قاتەردە قالعانداردى سۇيەمەلدەپ، قيىنشىلىقتا قالعاندارعا كومەك بەرىپ، تاعدىرلاس بولاتىن، ۇلى سۇيىسپەنشىلىكتە شەك بولمايتىن ادامگەرشىلىكتىڭ نۇر - شۇعىلاسىن شاشتىردى.
ەلەۋلى داعدارىس الدىندا، ءومىر تۋرالى پوزيتسيا ءبىر مەملەكەتتىڭ ءمورالدىق بىلىكتىلىگى مەن قۇن بەتالىسىن سىننان وتكىزەدى. جاڭا جۇڭگو قۇرىلعان 70 نەشە جىلدان بەرى، سۇراپىل تاسقىن بولسىن، ايانىشتى جەر سىلكىنىسى بولسىن، الدە لاڭ سالعان ىندەت بولسىن، جۇڭگو كوممۋنيستىك پارتياسى مەن جۇڭگو ۇكىمەتى قاشاندا حالىقتىڭ ءومىرىنىڭ حاۋىپسىزدىگى مەن دەنساۋلىعىن ءبىرىنشى ورىنعا قويىپ كەلەدى. بۇل بيلىك باسىنداعى پارتيانىڭ اسقاق ساياسي سانالىلىعىنان باستاۋ العان، بۇل ۇرپاقتان - ۇرپاققا جالعاسقان كوممۋنيستەردىڭ العا قويعان مۇراتىنان تايمايتىن بورىش ارقالاۋى، ءارقاشان اينىمايتىن بيلىك جۇرگىزۋ ۇستانىمى سانالادى.
4 - ايدىڭ 4 - كۇنى چيڭميڭ كۇنى جۇڭگو بۇكىل مەملەكەت بويىنشا ازا ءبىلدىرۋ قيمىلىن وتكىزدى. ءبىر مەملەكەتتىڭ جۇڭگوداعى ەلشىلىگى ميكرو بلوك پاراقشاسىنا بىلاي دەپ جازدى: ”جۇڭگو جاڭا تيپتى ايدارشا ۆيرۋس وكپە قابىنۋ ىندەتىنەن قازا بولعاندارعا مەملەكەت اتىنان ازا ءبىلدىردى، ءبىز بۇدان جۇڭگونىڭ جەكە تۇلعالاردىڭ ار - نامىسىنا جانە ومىرگە دەگەن قۇرمەتى مەن ىززەتىن كوردىك، ءبىر ميلليارد 400 ميلليون جۇڭگولىقتىڭ كوللەكتيۆ سۇيىسپەنشىلىگىنىڭ استارىنداعى ىنتىماق پەن كۇشتى سەزىندىك“. ءاربىر ادام بالاسىنا شىنايى قامقورلىق جاساعان، ءاربىر ادامنىڭ ومىرىنە شىن جۇرەكتەن قۇرمەت ەتكەن، ءاربىر ناۋقاستى بار كۇشىن سالىپ قۇتقارعان جۇڭگونىڭ ىندەتكە قارسى اتتانعاندا ساۋلە شاشقان ادامدىقتىڭ نۇر - شۇعىلاسى ۆيرۋس جايلاعان قازىرگى تاڭدا ىنتىماقتاسۋ تىلەگىن وياتىپ، مەيىرىمدىلىكتىڭ كۇشىن بەرۋدە.
(شينحۋا اگەنتتىگىنىڭ 5 - ايدىڭ 9 - كۇنى بەيجيڭنەن بەرگەن حابارى)
