”كەدەيلىكتەن ارىلىپ بايۋ استە الدىمەن بايىعانداردىڭ بايلىعىن جىلۋعا بەرۋدەي قاراپايىم شارۋا ەمەس. ءبىز بايلىق جاراتاتىن كاسىپورىن قۇرىپ، كىرىسىن ارتتىرىپ بايۋدى كوكسەگەن ادامداردى قاتارىمىزعا قوسىپ، بايلىققا ۇزاق ۋاقىت قول جەتكىزە الاتىن قابىلەت جاراتۋىمىز كەرەك“. 6 - ايدىڭ 9 - كۇنى شينجياڭ ۋاڭيۋان بيولوگيالىق عىلىم - تەحنيكا توبىنىڭ القا باستىعى چىن گاڭلياڭ ءوزىنىڭ بۇرىننان بەرى اتقارىپ كەلە جاتقان كەدەيلەردى سۇيەمەلدەۋ ۇستانىمىن وسىلاي باياندادى.
2007 - جىلى چىن گاڭلياڭ بار جيعان - تەرگەنىن الىپ، جياڭنانداعى سۋلى وڭىردەن باتىس سولتۇستىكتەگى ءشول دالاعا كەزىندە مالشىلارعا بەرگەن ءبىر اۋىز ۋادەسىن ورىنداۋ ءۇشىن كەلەدى: ”شەكارا وڭىردەگى مالشىلاردى تۇيە باعىپ بايۋعا باستايمىن“.
ماتەريال كورۋ، سول جەردىڭ وزىندە ىشكەرىلەي تەكسەرۋ جۇرگىزۋ، وتباسىلاردى ارالاپ جاعداي ۇعىسۋ، مامانداردان كەڭەس الۋ ارقىلى مال شارۋاشىلىعى ماماندىعىن بىتىرگەن چىن گاڭلياڭ تۇيە شارۋاشىلىعىن وركەندەتۋ ارقىلى ۇزىن كاسىپ سالاسى تىزبەگىن قالىپتاستىرۋعا بولادى دەپ قارايدى. 2007 - جىلى ول بۋرىلتوعاي اۋدانىندا 20 ميلليون يۋان قارجى قوسىپ شينجياڭ ۋاڭيۋان تۇيە ءسۇتى كاسىپكەرلىك شەكتى سەرىكتەستىگىن قۇرادى.
10 نەشە جىلدان بەرى، چىن گاڭلياڭ ”باستاماشى كاسىپورىن + ارناۋلى سەلبەستىك كووپەراتيۆى + باعىمشىلىق بازاسى + باقتاشى وتباسى“ سىندى كەمەلدى تۇيە ءسۇتىن ءوندىرۋ، مانەرلەۋ تىزبەگىن قالىپتاستىرادى. ۋاڭيۋان توبىنىڭ قارجى قوسپايتىن، تيجارات حاۋىپ - قاتەرى جوق، قولما - قول جۇمىستاناتىن كاسىپ سالالانعان كەدەيلەردى دالمە - ءدال سۇيەمەلدەۋ ۇلگىسى التاي، تارباعاتاي، سانجى، ءۇرىمجى، قۇمىل سياقتى 5 ايماق، وبلىستاعى (قالا) 5600دەن استام وتباسىنداعى تۇيە باعاتىن 10 مىڭنان استام مالشىنى كەدەيلىكتەن ارىلىپ بايۋعا باستادى، سونداي - اق ىلگەرىندى - كەيىندى 600 مالشى وتباسىن 100 ميلليون يۋاننان ارتىق ءوسىمسىز قارىز اقشامەن قامدادى.
2019 - جىلى 6 - ايدا چىن گاڭلياڭ جەمەنەي اۋدانىنا كەلىپ، جەرگىلىكتى ۇكىمەتپەن سەلبەسىپ، قارجى قوسىپ جەمەنەي اۋدانى ۋانتويۋان باقشاسىن بىرگە قۇرىپ، وسى فەرماعا تىڭ وراي اكەلدى.
كەزەكتە، ۋانتويۋان باقشاسىنىڭ جۇمىس باستاپ قۇرىلىس جۇرگىزۋىنە ىلەسە، چىن گاڭلياڭ قاعىر جايلىمدا وسۋگە ءتىپتى دە ۇيلەسەتىن تۇيە الىپ كەلدى، تۇيە باعاتىن جەتەكشى تەحنيك الىپ كەلدى، تۇيە ءسۇتىن ءوز قالپىندا ساقتايتىن جابدىق الىپ كەلدى، ونان دا ماڭىزدىسى، داۋىرلەر بويى وسى ارادا جاساپ كەلە جاتقان مالشىلارعا سالاۋاتتاعى وزگەرىستى الىپ كەلدى.
”بۇرىن وتباسىمىز مال باعۋعا سۇيەنىپ كۇن كورەتىن، ايلىق كىرىسىمىز 2000 نەشە يۋان بولاتىن. قازىر اكەم جەمەنەي اۋدانى ۋانتويۋان باقشاسىنىڭ تۇيە باقتاشىسى، ايىنا 6000 يۋاننان ارتىق ەڭبەكاقى الادى، ۋانتويۋان باقشاسى اكەمنىڭ قوعامدىق قامتاماسىزداندىرۋ قاراجاتىن دا تاپسىرادى“، - دەدى 6 - ايدىڭ 1 - كۇنى لاستى قالاشىعى لاستى قىستاعىنىڭ تۇرعىنى باقبول نۇريات.
”بۇل نىسان قايناردى مال - مۇلىككە، قارجىنى جارناعا، ەگىنشى - مالشىلاردى جۇمىسشىعا اينالدىرىپ، تۇتاس اۋدانداعى 3265 وتباسىنداعى 8990 ارحيۆ تۇرعىزىلىپ، كارتچكالاندىرىلعان كەدەي حالىقتى ورنىقتى كىرىس كىرگىزۋگە باستادى“، - دەدى ۋانتويۋان باقشاسى شەكتى سەرىكتەستىگىنىڭ ورىنباسار باس ديرەكتورى ما يىڭجۇن.
ۋانتويۋان باقشاسى قۇرىلعاننان بەرى، جەمەنەي اۋدانىنداعى 1026 ەگىنشى - مالشى وتباسى جايلىمدى جالعا بەرۋ، تۇيە باعۋ، پايدا ءبولۋ سياقتى تاسىلدەرمەن كىرىستەرىن ارتتىرىپ، جان باسىندىق ورتاشا ارتقان كىرىسى 5624 يۋانعا جەتتى.
بيىل 5 - ايدا ۋاڭيۋان توبى بۋرىلتوعاي اۋدانىمەن سەلبەسىپ شامامان 2 ميلليارد يۋانعا جۋىق قارجى قوسىپ بىرگە قۇرعان ”ساياحات، كۇتىمدەلۋ، مادەنيەت، سەيىلدەۋ - كوڭىل اشۋ، تيجاراتتىق تۇتىنۋ، قارجى قوسىپ شارۋاشىلىق قۇرۋ“ سىندى التى ءبىر تۇلعالانعان تۇيە شاعىن قالاشىعى نىسانى قۇرىلىس باستادى.
”2010 - جىلدان باستاپ مەن ۋاڭيۋان توبىندا تۇيە باقتىم، العاشىندا 8 تۇيەم عانا بار بولاتىن. القا باستىعى چىن گاڭلياڭنىڭ كومەگىندە قازىر مەندە 200 تۇيە بار بولدى، تەك تۇيە باعۋدان جىلىنا 650 مىڭ يۋان كىرىس كىرگىزەمىن، استىمدا اۆتوكولىگىم، باسىمدا ءۇيىم بار. بيىل تۇيە باعۋعا كومەكتەسۋگە بىرنەشە ادام جالداماقشىمىن، ءوزىم تۇيە شاعىن قالاشىعىنان ءۇي ساتىپ الىپ ساياحاتپەن شۇعىلدانامىن. ءبىز ۋاڭيۋانعا ىلەسىپ تۇيە باعىپ قانا قالماستان، تاعى ۋاڭيۋانعا ىلەسىپ بىرگە ساياحات اشامىز“، - دەدى 6 - ايدىڭ 8 - كۇنى بۋرىلتوعاي اۋدانى جەتى ارال قالاشىعى قارابيە قىستاعىنىڭ مالشىسى ارعىن ارىپ كوڭىلدى تۇردە تىلشىگە ءوزىنىڭ ساۋدا جولىن اڭگىمەلەپ.
تۇيە شاعىن قالاشىعىنىڭ قۇرىلىس باستاۋى ۋاڭيۋان توبىنىڭ مادەنيەت - ساياحات - كۇتىمدەلۋ بازارىنا رەسمي كىرە باستاعانىن ايگىلەيدى، نىسان مەجەمەن 3000نان ارتىق مالشى پەرزەنتتەرىنىڭ قالاعا بارىپ جۇمىستانۋ ماسەلەسىن شەشىپ، تىكەلەي 1000نان ارتىق وتباسىنىڭ كەدەيلىكتەن ورنىقتى ارىلۋىن جۇزەگە اسىرۋعا باستايدى. بۇل نىسان تاعى التاي ايماعىنىڭ مال شارۋاشىلىعىن ارتتىرۋ تاسىلىنە وزگەرىس جاساپ، مال شارۋاشىلىعى قۇرىلىمى دارەجەسىنىڭ جوعارىلاۋىن جەبەپ، مال شارۋاشىلىعى مەن كۇتىمدەلۋ، ساياحات، مادەنيەت كاسىپ سالاسىنىڭ توعىسپالى دامۋىن ىلگەرىلەتەدى.
