شينحۋا اگەنتتىگىنىڭ 7 - ايدىڭ 15 - كۇنى ۇرىمجىدەن بەرگەن حابارى (ءتىلشى دۋ گاڭ). شينجياڭنىڭ تۇڭعىش ەرەكشە جوعارى كەرنەۋلى ينجەنەرياسى بولعان قۇمىلدىڭ وڭتۇستىگى - جىڭجوۋ 800 ± كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسى 2014 - جىلى ىسكە قوسىلعاننان بۇگىنگە دەيىن جالپى سىرتقا جەتكىزگەن توك مولشەرى 200 ميلليارد كيلوۆات - ساعاتتان اسىپ، ەكونوميكالىق ونىمدىلىگى مەن ەكولوگيالىق ونىمدىلىگى تەڭ جارىققا شىعىپ، ەلىمىزدىڭ ”باتىستىڭ ەلەكترىن شىعىسقا جەتكىزۋ“ ەنەرگيا ستراتەگياسىنىڭ ماڭىزدى قۇرامداس بولىگىنە اينالدى.
شينجياڭ ەلەكتر قۋاتى ساۋدا ورتالىعى شەكتى سەرىكتەستىگى ساۋدا ءبولىمىنىڭ ارناۋلى جاۋاپتىسى جاڭ جۇن 7 - ايدىڭ 14 - كۇنى بىلاي دەپ تانىستىردى: جىڭجوۋ قالاسىنىڭ 2019 - جىلى پايدالانعان 56 ميلليارد 460 ميلليون كيلوۆات - ساعات توك مولشەرى بويىنشا ەسەپتەگەندە، 200 ميلليارد كيلوۆات -ساعات توكتى جىڭجوۋ قالاسىنداعى 10 ميلليوننان استام ادامنىڭ 3 جارىم جىل پايدالانۋىنا بولادى. بۇل توكتى 64 ميلليون توننا ولشەمدى كومىردىڭ ورنىن باستىرۋعا بولادى دەگەن ءسوز، حۋاجۇڭ ءوڭىرىنىڭ 170 ميلليون توننا كومىرتەگى قوس توتىعى، 544 مىڭ توننا كۇكىرت قوس توتىعى، 473 مىڭ 600 توننا ازوتتى قوسىلىستارىنىڭ شىعارىلۋىن ازايتۋعا كومەكتەسكەنمەن قارايلاس.
بۇل ەلەكتر قۋاتىنىڭ ”كەڭىستىكتەگى جوعارى جىلدامدىقتى جەلىسى“ جەتكىزگەن 200 ميلليارد كيلوۆات - ساعات توك مولشەرىنىڭ ىشىندە جەل ەلەكترى، فوتو ەلەكترى سياقتى جاڭا ەنەرگيالى توك مولشەرى 59 ميلليارد كيلوۆات - ساعاتتان اسىپ، جىڭجوۋ قالاسىنىڭ ءبىر جىلعى توكتەن پايدالانۋ مولشەرىنەن اسىپ تۇسكەن.
مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى بىلاي دەپ تانىستىردى: قۇمىلدىڭ وڭتۇستىگى - جىڭجوۋ 800± كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسى تىكە شينجياڭعا 100 ميلليارد يۋان قارجى قوسۋدى باۋراپ، شينجياڭنىڭ كومىرىن، كومىر ەلەكترىن، جەل ەلەكترىن، فوتوۆولتتىق ەلەكترىن اشۋ جانە جابدىق جاساۋ سياقتى قاتىستى كاسىپ سالالارىنىڭ تەز دامۋىن جەتەكتەدى.
قازىر شينجياڭنىڭ شىعىس بولىگىنە ورنالاسقان قۇمىل قالاسىنا 10 ميلليون كيلوۆات دارەجەلى جەل ەلەكترى بازاسى جانە ميلليون كيلوۆات دارەجەلى فوتوۆولت بازاسى قۇرىلىپ، ءبىرشاما كەمەلدى جاڭا ەنەرگيا جابدىقتارىن جاساۋ كاسىپ تىزبەگى قالىپتاسىپ، ەلەكتر قۋاتى گەنەراتور اگراگاتتار سىيمدىلىعى 21 ميلليون 200 مىڭ كيلوۆات بولعان، مۇنىڭ ىشىندە جاڭا ەنەرگيا ەلەكتر شىعارۋ گەنەراتور اگراگاتى 60 پايىزدان اسقان.
بۇل ەرەكشە جوعارى كەرنەۋلى ينجەنەريادان سىرت، قازىر شينجياڭنىڭ سولتۇستىگىندە تاعى ءبىر 2019 - جىلى ىسكە قوسىلعان جۇندۇڭ - انحۇي ۋاننان 1100± كيلوۆولتتىق ەرەكشە جوعارى كەرنەۋلى تۇراقتى توك ەلەكتر جەتكىزۋ ينجەنەرياسى بار، ەلىمىزدىڭ باتىس بولىك ەنەرگيا بازاسىنان شىعىس، ورتا بولىك ەنەرگيادان پايدالانۋ ورتالىقتارىنا دەيىنگى توك جەتكىزۋ كاريدورى قازىر بارعان سايىن ماڭىزدى رولىن ساۋلەلەندىرۋدە.
