شينجياڭ گازەتىنىڭ جالپىلىق اقپارات قۇرالدارى ءتىلشىسى چىن چياڭۋي 7 - ايدىڭ 25 - كۇنى ۇرىمجىدەن حابارلايدى. 7 - ايدىڭ 24 - كۇنى شىعىس جوڭعار - وڭتۇستىك انحۇي 1100± كيلوۆولتتىق ەرەكشە جوعارى كەرنەۋلى تۇراقتى توك جەتكىزۋ ينجەنەرياسىنىڭ توك جەتكىزۋ قۋاتى 6 ميلليون كيلوۆولتتان 8 ميلليون كيلوۆولتقا جوعارىلادى، بۇل وسى ەلەكتر جەلىسىنىڭ توك جەتكىزۋ شاماسىنىڭ بۇدان بۇرىنعى كۇنىنە 120 ميلليون كيلوۆات - ساعاتتان 192 ميلليون كيلوۆات - ساعاتقا ارتقانىن اڭعارتادى. مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى ازىرلەگەن ساندى مالىمەت بويىنشا بۇل ەلەكتر جەلىسى قازىر تۇتاس ەل كولەمىندە ىسكە قوسىلىپ وتىرعان 26 ەرەكشە جوعارى كەرنەۋلى ەلەكتر جەلىسى اراسىنداعى توك جەتكىزۋ قۋاتى ەڭ ۇلكەن ەلەكتر جەلىسىنە اينالعان.
مەملەكەت ەلەكتر تورى شينجياڭ ەلەكتر قۋاتى شەكتى سەرىكتەستىگى ەلەكتر قۋاتىن رەتتەۋ - مەڭگەرۋ ورتالىعىنىڭ ورىنباسار باسقارما باستىعى گو شياۋلۇڭ مىنالاردى ءبىلدىردى: وسى ەلەكتر جەلىسىنىڭ توك جەتكىزۋ قۋاتى جوعارىلاعاننان كەيىن، ءار كۇنى حۋادۇڭ وڭىرىنە 192 ميلليون كيلوۆات - ساعات توك جەتكىزە الاتىندىعىن، بۇل 60 مىڭ توننا ولشەمدى كومىر ورتەگەنگە بارابار ەكەندىگىن، انحۇي ولكەسىندەگى 71 ميلليوننان استام تۇرعىننىڭ 2 كۇنگە تاياۋ ۋاقىت ەلەكتر پايدالانۋ قاجەتىن قاناعاتتاندىرا الاتىندىعىن اڭعارتادى.
وسى ەلەكتر جەلىسى ىسكە قوسىلعاننان بەرى، شينجياڭ توگىن سىرتقا جەتكىزۋدىڭ ماڭىزدى ارناسىنا اينالدى، بيىل العاشقى جارتى جىلدا وسى توك سىرتقا جەتكىزگەن توك مولشەرىنىڭ شاماسى 17 ميلليارد 100 ميلليون كيلوۆات - ساعاتقا جەتىپ، رايونىمىزدىڭ سىرتقا جەتكىزگەن توك مولشەرىنىڭ ％39 ۇستادى. وسى رەت توك جەتكىزۋ قۋاتى جوعارىلاتىلعاننان كەيىن، رايونىمىزدىڭ شينجياڭ توگىن سىرتقا جەتكىزۋ قۋاتى اناعۇرلىم جوعارىلايدى.
1100± كيلوۆولت سانجى اينىمالى ەلەكتر پۋنكتى پارتيا ياچەيكاسىنىڭ شۋجيى يىن حۇڭشيا مىنالاردى ءبىلدىردى: ەڭ سوڭىندا وسى اينىمالى توك پۋنكتىنىڭ توك جەتكىزۋ قۋاتى 12 ميلليون كيلوۆاتقا جەتەدى، سول كەزدە وسى ەلەكتر جەلىسىنىڭ ءار كۇنى سىرتقا جەتكىزەتىن شينجياڭ توگىنىڭ مولشەرى 290 ميلليون كيلوۆات - ساعاتقا جەتەدى.
قازىر، رايونىمىز ”ءىشتى قامدايتىن ءتورت اينالمالى تورى، سىرتقا جەتكىزۋدىڭ ءتورت ارناسى“ سىندى نەگىزگى تور جەلىسىن قالىپتاستىرىپ، سىرتقا جەتكىزۋ قۋاتى 16 ميلليارد 400 ميلليون كيلوۆاتقا جەتىپ، جارتى ءۇش قىساڭ سۋ ەلەكتر ستانسياسىنىڭ توك شىعارۋ قۋاتىنان استى، سىرتقا جەتكىزۋ كولەمى 19 ولكە، اۆتونوميالى رايون، قالانى قامتىدى، بۇل رايونىمىزدىڭ بايلىق باسىمدىعىن ەكونوميكالىق باسىمدىققا اينالدىرۋ قادامىن تەزدەتىپ قانا قالماستان، بۇكىل ەل كولەمىندە ەنەرگيانىڭ سەپتەلۋىن ساپالىلاندىرۋعا، ەنەرگيانى ۇنەمدەپ، جاراقسىز زاتتاردىڭ ىعىستىرىلۋىن ازايتۋعا ءتيىمدى.
