شينجياڭ گازەتىنىڭ جالپىلىق اقپارات قۇرالدارى ءتىلشىسى چاۋ جين 8 - ايدىڭ 2 - كۇنى ۇرىمجىدەن حابارلايدى. ۇيدە جاتىپ ىندەتكە قارسى تۇرعاندا، قوبالجۋ، مازاسىزدانۋ، ۇيقىسىزدىق سياقتى كەرەناۋ كوڭىل كۇي پايدا بولعاندا قايتۋ كەرەك؟ پسيحولوگيالىق مەديتسينا مامانى ۇيدە جاتقان جۇرتشىلىققا پسيحيكالىق قورعانۋدى جاقسى ىستەۋدىڭ وتە ماڭىزدى ەكەنىن، ”التى قادام“ بويىنشا كوڭىل كۇيدى رەتتەۋگە بولاتىندىعىن ەسكەرتتى.
شينجياڭ رۋحاني دەنساۋلىق ساقتاۋ ورتالىعى (ءۇرىمجى قالالىق 4 - حالىق شيپاحاناسى) پسيحيكالىق ولشەۋ - باعالاۋ ءبولىمىنىڭ مەڭگەرۋشىسى، اعا شيپاگەر شيا يەليڭ بىلاي دەدى: ”قاۋىمنىڭ ىندەت تۋرالى تانىمى مەن تۇسىنىگى جىل باسىنداعىدان ارتتى، ۇرەيلەنۋ پسيحيكاسى ازايعان بولۋى مۇمكىن، ءبىراق ءار ءتۇرلى كوڭىل كۇي، پسيحيكا، ارەكەت اسەرلەرى جارىققا شىعادى، قوزدىرۋدان پايدا بولاتىن بۇل اسەرلەردى ءوزىن - ءوزى رەتتەۋ ارقىلى پسيحيكالىق اقاۋسىزدىقتى ساقتاۋعا بولادى“.
شيا يەليڭ مىنانى ۇسىنىس ەتتى: ءبىرىنشى قادامدا، ۇيدە وتىرعان جۇرتشىلىق وسى مەزگىلدەن پايدالانىپ تۇرمىس نىساناسى مەن بەتالىسىن قايتا رەتتەۋىنە بولادى. جوسپار جاساۋعا بولادى، مىسالى، بالاعا سەرىك بولىپ نەشە كىتاپ وقۋ، قارتتارعا نەشە رەت دەنەسىن ۋقالاپ بەرۋ، ت. ب. وسى شاعىن نىسانالاردى بىرتىندەپ ورىنداپ، سول ارقىلى تۇرمىستا ءوزىن مەڭگەرۋدى جۇزەگە اسىرىپ، پسيحيكالىق كۇيدىڭ تەپە - تەڭدىگىن ساقتاۋىنا بولادى.
”ەكىنشى قادامدا، ءوزىن تۇرمىس ءتارتىبىن ساقتاپ، ۇيلەسىمدى ارەكەت جاساۋعا، دەنەنىڭ قارسىلىق قۋاتىن ارتتىرۋعا قۋزاۋ كەرەك“. شيا يەليڭ بىلاي دەدى: قىزمەتى ۋاقىتشا توقتاعان جاس ادامدار وتە تەز ينتەرنەتكە ۇزاق ۋاقىت قۇنىعىپ، جۇمىس، دەمالىس ۋاقىتىن شاتاستىرىپ الادى، ۋاقىت وتە كەلە تورىعۋ، قوبالجۋ، مازاسىزدانۋ سياقتى كوڭىل كۇي پايدا بولادى، سونداي - اق ازىقتانۋدىڭ، ۇيقىنىڭ قالپىسىز بولۋىمەن دەنەسىنىڭ اۋرۋعا قارسىلىق قۋاتى تومەندەيدى.
ءۇشىنشى قادامدا، قازىرگى جاعدايدى قابىلداپ، ۇيدە جاتۋدىڭ ماڭىزدىلىعىن جانە مۇنداي شارالاردى قولدانباۋدىڭ زيانىن ءتۇسىنىپ، سول ارقىلى ادەتتەگىدەي قابىلداۋ كەرەك. جايشىلىقتا ىستەۋگە ۋاقىت تاپپايتىن ءوزى اۋەس بولعان ىستەردى ىستەۋ، ايتالىق، سۋرەت سالۋ، مۋزيكا تىڭداۋ، ت. ب ارقىلى نازاردى باسقاعا اۋدارۋ كەرەك؛ ءتورتىنشى قادامدا، باسقا تۇرعىدان ويلاۋ ارقىلى بەلسەندىلىكپەن ەنەرگيا ۇستەۋ، وسى كەزدەگى ۋاقىتتان پايدالانىپ وتباسىنداعىلارمەن بىرگە وتىرىپ اڭگىمەلەسۋ، ءوزارا قولداۋ، پسيحيكالىق قىسىمعا توتەپ بەرۋ قابىلەتىن ارتتىرۋ كەرەك.
ەگەر مازاسىزدانۋ اسقىنىپ ۇيقىسىزدىققا، اشۋىن باسا الماۋعا جەتكەندە، بەسىنشى قادامدا الدىمەن وزىنە ىشتەي اڭعارتۋ، وزىمەن سويلەسۋ جانە ءوزىن شابىتتاندىرۋ ارقىلى قوبالجۋدى جەڭىلدەتۋ كەرەك، تۋىستارمەن، دوستارمەن اڭگىمەلەسۋ ارقىلى دا كوڭىل كۇيدى باسۋعا بولادى. ءوزىن رەتتەۋ ءساتسىز بولعاندا، پسيحيكالىق قىسىم شەكتەن تىس جوعارى بولعاندا، التىنشى ساتىعا ءوتىپ، دەر كەزىندە كاسىبي تۇلعالاردان كومەك سۇراۋعا بولادى.
”بىزدە مول تاجىريبەلى كاسىبي شيپاگەرلەر ۇجىمى بار، 9 پسيحيكالىق اقىل - كەڭەس تىكە جەلىسى اشىلعان، قالا تۇرعىندارىنىڭ رۋحاني ساۋلىققا قاتىستى ماسەلەلەردى شەشۋىنە كومەكتەسەمىز“. شيا يەليڭ بىلاي دەدى: ۆيرۋس − اۋرۋ، ناشار كوڭىل كۇي دە اۋرۋ، ادامنىڭ كوڭىلى شاتتانعاندا پسيحيكالىق اۋرۋلاردان ”قورعانۋ داۋالىن“ تۇرعىزادى. كوپشىلىكتىڭ ەرەكشە مەزگىلگە بەلسەنە قاراۋىن، اقاۋسىز كوڭىل كۇيدە بولۋىن ءۇمىت ەتەمىن.
