”بۇلتتا“ ءوندىرۋ مەن ساتۋدى ۇشتاستىردى
شينجياڭداعى كەدەي وڭىرلەردىڭ اۋىل شارۋاشىلىق ونىمدەرى كەلىسىم سوماسى 775 ميلليون يۋانعا جەتتى
شينجياڭ گازەتىنىڭ جالپىلىق اقپارات قۇرالدارى ءتىلشىسى حان چين - يان 8 - ايدىڭ 3 - كۇنى قاشقاردان حابارلايدى. ”ءبىر كۇندە ءبىزدىڭ ينتەرنەت جەلىسىندە ساتقان جاڭعاعىمىزدىڭ جالپى سوماسى 337 ميلليون 500 مىڭ يۋان بولدى“، - دەدى 8 - ايدىڭ 2 - كۇنى قاعىلىق اۋدانىنىڭ ورىنباسار اكىمى مامەترەيىم تۇرسۇن قۋانىشپەن.
وڭتۇستىك شينجياڭداعى اۋىر كەدەي وڭىرلەردىڭ ەرەكشەلىككە يە ساپالى اۋىل شارۋاشىلىق ونىمدەرىنىڭ قىستاقتان شىعىپ قالاعا كىرۋىنە كومەكتەسىپ، ۇزاق ۋاقىتتىق، ورنىقتى ءوندىرۋ مەن ساتۋ قاتىناسىن ورناتۋ ءۇشىن، 7 - ايدىڭ 30 - كۇنى اۋىل شارۋاشىلىعى، اۋىل - قىستاق مينيسترلىگىنىڭ بازار جانە ينفورماتسيالاندىرۋ مەكەمەسى، اۆتونوميالى رايوندىق اۋىل شارۋاشىلىق، اۋىل - قىستاق مەڭگەرمەسى ينتەرنەت جەلىسىندە ۇشتاسۋ ۇلگىسىندە 2020 - جىلعى شينجياڭداعى كەدەي وڭىرلەردىڭ اۋىل شارۋاشىلىق ونىمدەرىن ءوندىرۋ - ساتۋدى ۇشتاستىرۋ قيمىلىن (قاشقار) وتكىزىپ، شينجياڭداعى 20 كەدەي اۋداننان 100 نەشە قامداۋشى ساۋداگەردى ۇسىنىس ەتىپ، 160 نەشە ساپالى اۋىل شارۋاشىلىق ونىمىمەن بەيجيڭ يوۋگوليان اقىل - كەڭەس بەرۋ قىزمەت وتەۋ شەكتى سەرىكتەستىگى، شينجياڭ بەييۋانچۇن توبى سەرىكتەستىگى، گانسۋ جيۋچۋان چۇنگۋاڭ توبى قاتارلى بۇكىل ەلدىڭ جەر - جەرىندەگى 60 ساتىپ الۋشى ساۋداگەرمەن ينتەرنەت جەلىسىندە ءوندىرۋ - ساتۋدى ۇشتاستىردى، سول كۇنگى كەلىسىم سوماسى 775 ميلليون يۋانعا جەتتى.
وسى رەتكى قيمىلدا ينتەرنەت جەلىسىندە ۇشتاسۋ، ينتەرنەت جەلىسىندە تانىستىرۋ، ينتەرنەت جەلىسىندە كورۋ، ينتەرنەت جەلىسىندە قاتىناسۋ سياقتى تاسىلدەر قولدانىلدى، مۇنداعى ماقسات − شينجياڭداعى كەدەي وڭىرلەردىڭ اۋىل شارۋاشىلىق ونىمدەرى مەن بازاردىڭ دالمە - ءدال ۇشتاسۋىن ىلگەرىلەتىپ، كەدەي وڭىرلەردىڭ ساپالى، ەرەكشەلىككە يە اۋىل شارۋاشىلىق ونىمدەرىنىڭ ينتەرنەت جەلىسىندە ساتىلۋىنا دەم بەرىپ، ءوندىرۋ مەن ساتۋدى ۇشتاستىرۋدىڭ باياندى مەحانيزمىن ورناتۋ. ايگىلى ماركانى ساتۋ، تانىستىرۋ كەزىندە قاعىلىقتىڭ جاڭعاعى، يىڭساردىڭ ورىگى، اقسۋدىڭ الماسى، حوتاننىڭ شىلانى، كەريانىڭ روزاسى جانە كورلانىڭ المۇرتى سياقتى ساپالى اۋىل شارۋاشىلىق ونىمدەرى تانىستىرىلدى. ينتەرنەت جەلىسىندە ءوندىرۋ مەن ساتۋدى ۇشتاستىرۋ قيمىلى ءوڭىر اتتاپ، ءوندىرۋ مەن ساتۋدىڭ ارالىعىن جاقىنداتىپ، شينجياڭداعى كەدەي وڭىرلەر مەن جەر - جەردەگى قامداۋشى ساۋداگەرلەردىڭ ساۋدا اۋىس - كۇيىسى قيمىلىن جەبەدى، بۇل ءبىر رەتكى ساتۋ ارقىلى ءوندىرۋدى جەتەكتەۋ، ساتۋ ارقىلى ءوندىرۋدى جەبەۋدەگى ءتيىمدى ىزدەنىس بولدى.
ۇعىسۋىمىزشا، اۋىل شارۋاشىلىق، اۋىل - قىستاق مينيسترلىگى سوڭعى جارتى جىلدا تاعى دا 2 رەت كەدەي وڭىرلەردىڭ اۋىل شارۋاشىلىق ونىمدەرىن ءوندىرۋ مەن ساتۋدى ۇشتاستىرۋ قيمىلىن ورىستەتەدى ەكەن.
