شينجياڭ گازەتىنىڭ جالپىلىق اقپارات قۇرالدارى ءتىلشىسى جيڭ بو 8 - ايدىڭ 6 - كۇنى ۇرىمجىدەن حابارلايدى. 8 - ايدىڭ 8 - كۇنى 12 - رەتكى ”جالپى حالىقتىق دەنە شىنىقتىرۋ كۇنى“، بيىلعى قيمىل تاقىرىبى: ”جالپى حالىقتىق دەنە شىنىقتىرۋدى ىلگەرىلەتىپ، جاپپاي دوڭگەلەك داۋلەتتىلىككە كۇش ۇستەۋ“. رايونىمىزداعى ءار دارەجەلى دەنە تاربيە تاراۋلارى ىندەتتەن ساقتانۋ - تىزگىندەۋ قىزمەتىن ويداعىداي ىستەۋ العى شارتىندا، الۋان فورماداعى جالپى حالىقتىق دەنە شىنىقتىرۋ قيمىلىن ۇيىمداستىرىپ، ورىستەتىپ، ءار ۇلت بۇقاراسىنىڭ ىندەت كەزىندەگى جۇمىستان سىرتقى تۇرمىسىن بايىتىپ، دەنە ساپالارىن كۇشەيتىپ قالماستان، ”سپورت شەڭبەرلەرىن“ دە كەڭەيتىپ، اناعۇرلىم كوپ ادامنىڭ سپورتتى سۇيۋىنە مۇمكىندىك جاسادى.
7 - ايدىڭ 22 - كۇنى اۆتونوميالى رايوندىق دەنە تاربيە مەكەمەسى باس بولىپ ۇيىمداستىرعان 4 - ماۋسىمدىق ”ۇيدە بۇلتتىق تاسىلمەن دەنە شىنىقتىرۋ سپورتتىق باس قوسۋى“ باستالدى. ءتىلشى قيمىلدىڭ ينتەرنەت پاراقشاسىنداعى باس بەتىنەن 8 - ايدىڭ 5 - كۇنىنە دەيىن 1067 ادامنىڭ قاتىناسقاندىعىن، جالپى القاۋ ءبىلدىرۋ سانى 110 مىڭنان اسقاندىعىن، باس بەتتىڭ كورىلۋ مولشەرى 2 ميلليون 250 مىڭ رەتكە جەتكەندىگىن كوردى.
قارتتاردان بالالارعا دەيىن وسىناۋ كوڭىلدى سپورتتىق باس قوسۋعا قاتىناسىپ، ينتەرنەتكە دەنە شىنىقتىرۋ گيمناستيكاسى، تايجي جۇدىرىقشىلىعى، دومالاق تەپكىشتى مانەرلەپ تەبۋ، جىپتەن سەكىرۋ سياقتىلاردى قامتىعان بەينەجازبالاردى جولداپ، سپورتپەن شۇعىلدانۋ بارىسىندا قۋانىشقا بولەنىپ، تۋىستىق سۇيىسپەنشىلىكتەرىن تەرەڭدەتتى.
5 - ايدىڭ 11 - كۇنى ىلە قازاق اۆتونوميالى وبلىسى ”ۇلتتار ىنتىماعىنىڭ بەرەكەلى شاڭىراعى . سپورت لاتارياسى ساۋىتى“ تۇڭعىش كەزەكتى ينتەرنەتتە جالپى حالىقتىق دەنە شىنىقتىرۋ سپورت جينالىسىن باستاعان بولاتىن، 8 - ايدىڭ 5 - كۇنىنە دەيىن، ءار كۇنى تىركەلىپ تۇراتىندار سانى 10 مىڭنان، جارىسقا قاتىناسقاندار سانى 70 مىڭ ادامنان اسىپ، ىلە وبلىسى جالپى حالىقتىق دەنە شىنىقتىرۋ قيمىلىن ورىستەتكەننەن بەرگى بۇقارانىڭ قاتىناسۋ مولشەرىنىڭ ەڭ جوعارى رەكوردىن جاڭالادى.
بۇكىل شينجياڭداعى ءار ايماق - وبلىس، اۋدان - قالالار دا ىركەس - تىركەس ”جالپى حالىقتىق دەنە شىنىقتىرۋ كۇنى“ جەلىلەس قيمىلدارىن ورىستەتىپ، ينتەرنەتتىك جارىستار وتكىزۋ، عىلمي دەنە شىنىقتىرۋعا جەتەكشىلىك اشىق ساباعىن اشۋ، تىكە تاراتۋدا ۇيرەتۋ سياقتىلار ارقىلى حالىق بۇقاراسىنىڭ عىلمي دەنە شىنىقتىرۋ قاجەتىن قاناعاتتاندىردى.
ءتىلشىنىڭ ۇعىسۋىنشا، ”جالپى حالىقتىق دەنە شىنىقتىرۋ كۇنىنىڭ“ ينتەرنەت جەلىسىندەگى قيمىلى العا قويىلعاننان كەيىن، بۇكىل شينجياڭداعى ءار ۇلت بۇقاراسى بەلسەنە ات سالىسقان. ءار دارەجەلى دەنە تاربيە ۇيىمدارى ۋيچات، QQ، الەۋمەتتىك تۇعىر سياقتى تاسىلدەرمەن قيمىلدى بۇقارانىڭ جانىنا جەتكىزىپ، بۇكىل رايوندا جالپى حالىقتىق دەنە شىنىقتىرۋدىڭ قىزۋ ورلەۋىن كوتەرگەن.
ينتەرنەت جەلىسىندەگى جالپى حالىقتىق دەنە شىنىقتىرۋ قيمىلى جەدەل دامىپ، جەلىگە تىركەلگەن ادام سانى شاپشاڭ ءوسىپ، بەلسەندى قولدانۋشىلاردىڭ ۇلەسى ارتىپ، رايونىمىزداعى ءار ۇلت بۇقاراسىنىڭ دەنە شىنىقتىرۋ اياسىنداعى ”دوستار شەڭبەرىن“ ۇزدىكسىز كەڭەيتتى، جۇرت ورتاق سپورتتىق اۋەستىڭ ارقاسىندا باس قوسىپ، پىكىرلەسىپ، ونەر سىناسىپ، قىزۋ دۋمانعا شومىپ، دەنە شىنىقتىرىپ دەنساۋلىقتى كۇشەيتۋمەن بىرگە، قۋانىشقا بولەندى.
”اناعۇرلىم كوپ ادامنىڭ تۇرمىستا ’قيمىلداۋىنا‘ مۇمكىندىك جاساساق، ’جالپى حالىقتىق دەنە شىنىقتىرۋدى ىلگەرىلەتىپ، جاپپاي دوڭگەلەك داۋلەتتىلىككە دەم بەرۋ‘ سىندى سپورتتىڭ قۇنى شىن مانىندە تەرەڭ تامىر تارتادى“، - دەدى اۆتونوميالى رايوندىق دەنە تاربيە مەكەمەسى بۇقارالىق سپورت باسقارماسىنىڭ باستىعى جاي حۇڭفي.
