شينجياڭ گازەتىنىڭ جالپىلىق اقپارات قۇرالدارى تىلشىلەرى لي چۇنشيا، جاۋ چۇنحۋا 8 - ايدىڭ 6 - كۇنى ۇرىمجىدەن حابارلايدى. 8 - ايدىڭ 6 - كۇنى اۆتونوميالى رايوندىق ۇكىمەتتىڭ اقپارات كەڭسەسى اشقان ىندەتتەن ساقتانۋ - تىزگىندەۋ قىزمەتى جونىندەگى اقپار جاريالاۋ ماجىلىسىندە ءۇرىمجى قالالىق حالىق ۇكىمەتىنىڭ ورىنباسار باس حاتشىسى شاڭ يۇيلان بىلاي دەپ تانىستىردى: 8 - ايدىڭ 5 - كۇنى ءۇرىمجى قالاسىندا جاڭادان قوسىلعان دياگنوزى تۇراقتاندىرىلعان ناۋقاستار مەن اۋرۋ بەلگىسى جوق جۇعىمدالۋشىلاردىڭ بارلىعى شوعىرلى مەديتسينالىق باقىلاۋعا الىنعاندارعا نۋكلەين قىشقىلىن ەكشەپ تەكسەرۋ جۇرگىزۋ بارىسىندا بايقالعان، الەۋمەتتىك اۋماقتا تىڭنان تارالۋدى تۋدىرمايدى.
8 - ايدىڭ 5 - كۇنى ساعات 0دەن 24كە دەيىن ءۇرىمجى قالاسىندا جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعانداردان تاعى 27سى، اۋرۋ بەلگىسى جوق جۇعىمدالۋشىلاردان تاعى 12سى قوسىلعاندىعى مالىمدەلدى. 8 - ايدىڭ 5 - كۇنى ساعات 24كە دەيىن، ءۇرىمجى قالاسىندا دياگنوزى تۇراقتاندىرىلعان ناۋقاستاردىڭ سانى 634، اۋرۋ بەلگىسى جوق جۇعىمدالۋشىلاردىڭ سانى 128 بولدى. 7 - ايدىڭ 15 - كۇنى ساعات 0دەن 8 - ايدىڭ 5 - كۇنى ساعات 24كە دەيىن، دياگنوزى تۇراقتاندىرىلعان ناۋقاستاردان جيىنى 59 ادام ساۋىعىپ شيپاحانادان شىقتى، اۋرۋ بەلگىسى جوق جۇعىمدالۋشىلاردان 46 ادام مەديتسينالىق باقىلاۋدان بوساتىلدى.
ءۇرىمجى قالاسىندا جاڭا تيپتى ايدارشا ۆيرۋس وكپە قابىنۋ دياگنوزى تۇراقتاندىرىلعان ناۋقاستاردىڭ سانى 7 - ايدىڭ 31 - كۇنىنەن بەرى تولقىن فورماسىندا ازايۋدا. جۇقپالى اۋرۋدان ساقتانۋ - تىزگىندەۋ بارىسىندا اۋرۋعا شالدىعۋدىڭ جالپىلىق دەڭگەيى تومەندەدى، ءبىراق شاعىن كولەمدە تولقۋ جاعدايى ۇنەمى كورىلۋدە. قازىر بۇكىل قالانىڭ ىندەتتەن ساقتانۋ - تىزگىندەۋ جاعدايى ءالى دە اۋىر، استە بوساڭسۋعا بولمايدى.
