شينجياڭ گازەتىنىڭ جالپىلىق اقپارات قۇرالدارى ءتىلشىسى يۇي شي
8 - ايدىڭ 30 - كۇنى ساعات 14، بىرنەشە وتباسىنا كوكونىس جەتكىزىپ بولىپ، قارا تەرگە مالشىنعان توحتى تۇردى تۇسكى اسىن جەۋگە دە ۇلگىرمەي، ءبىر قارياعا ءدارى ساتىپ الۋعا تاعى دا ءدارىحاناعا اتتاندى...
”ءبىر ۇلەس مەيىر، ءبىر ۇلەس شۋاق“، ”كوپشىلىككە قىزمەت ەتسەڭ، ءوزىڭ كوڭىلدى بولاسىڭ“... ءبىر ايدان استام ۋاقىتتان بەرى، ءۇرىمجى قالاسى تيانشان رايونى ىنتىماق جولى اۋماعىن باسقارۋ كوميتەتى كونسۋل كوشەسى سولتۇستىك الەۋمەتتىك اۋماعىندا ەرىكتى توحتىنىڭ ۇنەمى ايتاتىن بۇل سوزدەرى تۇرعىنداردىڭ قۇلاعىنا ءسىڭىستى بولىپ كەتتى.
وسى رەتكى ىندەت توحتىنىڭ ايەلىن ەرتىپ ساياحاتتاۋ جوسپارىنا كەسىرىن تيگىزدى. ”اكە، دەنساۋلىعىڭىزدى كۇتىڭىز، سىرتقا استە شىقپاڭىز.“ سىرت جەردە قىزمەت ىستەيتىن ۇلى مەن الەۋمەتتىك اۋماقتا قىزمەت ىستەيتىن قىزى تۇگەلدەي تەلەفون شالىپ توحتى تۇردىعا وسىلاي دەپ تاپسىردى.
”ۇلىم، سەن كوممۋنيستىك پارتيا مۇشەسىسىڭ، اكەڭ دە سولاي، شەشۋشى ساتتە مەن سەندەرگە ونەگە كورسەتۋىم كەرەك!“ ۋيچاتتا توحتى بالاسىنا وسىلاي دەپ لەبىز قالدىردى. الەۋمەتتىك اۋماق ەرىكتى قابىلداۋ ۇندەۋىن شىعارعاننان كەيىن، توحتى تىزگىن ۇشىمەن جەتىپ تىزىمدەلدى.
زاتتىق ماتەريال تاسىمالىن قامتاماسىز ەتۋ، وتباسىلارىن ارالاپ دەنە تەمپەراتۋرالارىن ولشەۋ، ورتانى زارارسىزداندىرۋ، تازالىعىن ساقتاۋ... تاڭەرتەڭنەن كەشكە دەيىن ساقتانۋ - قورعانۋ كيىمىن كيىپ ءجۇردى، اۋىر زارارسىزداندىرۋ جابدىعىن كوتەردى، ءيا بولماسا تۇرعىنداردىڭ ساتىپ العان تۇرمىسقا قاجەتتى بۇيىمدارىن تاسىدى. شاعىن اۋماقتىڭ ىشىنەن سىرتىنا، قابات ۇيلەردىڭ ۇستىنەن استىنا دەيىن زىر جۇگىرىپ، اققان تەردەن توحتىنىڭ كيىم - كەشەگى مەن اياق كيىمى قايتا - قايتا سۋ بولىپ، قايتا - قايتا كەپتى. تۇندە دەنەسىن زورعا كوتەرىپ ۇيىنە قايتسا، ەرتەسى ەلدىڭ الدىمەن قىزمەت ورنىندا پايدا بولدى.
ەرىكتى قىزمەت وتەگەن نەشە ونداعان كۇندە توحتى وزگە ەرىكتىلەرمەن بىرگە شاعىن اۋماقتىڭ ءبىر عيماراتىنداعى 216 وتباسىنا قىزمەت ەتتى، كۇنىنە ورتا ەسەپپەن نەشە ون تەلەفون قابىلداپ، نەشە ءجۇز ۋيچات ينفورماتسياسىن جولدادى؛ ءوزى قىزمەت وتەگەن عيماراتتان تۇرمىستىق قاجەتتى بۇيىمدار ساتىپ الاتىن ورىنعا دەيىنگى 2 كيلومەترلىك جولدى ۆەلوسيپەد ءمىنىپ كۇنىنە ورتا ەسەپپەن ون نەشە رەت باستى.
توحتىنىڭ ۇنەمى بەلىن ۇرعىشتاپ تۇراتىنىن كورگەن كونسۋل كوشەسى سولتۇستىك الەۋمەتتىك اۋماعى پارتيا ياچەيكاسىنىڭ شۋجيى ما لينچىڭ ونى ۇيىنە قايتىپ دەمالۋعا ءناسيحاتتايتىن. ءبىراق توحتى وعان ”مەن 22 جىلدىق پارتيا ستاجىم بار ساقا پارتيا مۇشەسىمىن، مۇنداي كىشى - گىرىم سىرقات مەنى جەڭە الا ما؟“ دەپ جاۋاپ بەرەتىن.
”ەڭ قيىنى 30 سەلتسي گرادۋستان استام ىستىق كۇندەر بولدى، ءبىر كۇندە تۇرعىندارعا 10 نەشە ساعات قىزمەت وتەيمىز، دەنەم ءبورتىپ، قىشىنىپ تا، اۋىرسىنىپ تا ءجۇردىم“، - دەدى توحتى، ول كەزدەرى تۇندە ۇيگە قايتقاننان كەيىن ايەلى دەنەسىنە ءدارى جاعىپ، ونى ەندى ەرىكتى بولماي - اق قوي دەپ ءناسيحاتتايتىن، ”شاعىن اۋماقتاعى ءار ءۇي جاقسى بولسا عانا ءبىز جاقسى بولامىز“، - دەيتىن ول ايەلىنە.
ەرىكتى قىزمەت وتەۋ بارىسىندا، ءار ىسكە قۇنىتتى توحتى قىزمەت وتەۋ ساپاسىنا ەرەكشە دەن قويدى. زات ساتىپ الۋ، جەتكىزۋ، ۇلەستىرۋ بارىسىندا تۇرعىنداردىڭ قاجەتتى بۇيىمدارىندا اعاتتىق جىبەرمەۋ ءۇشىن، توحتى مەن ايەلى ءار كۇنى تۇندە تۇرعىنداردىڭ ۋيچات توبىندا بەرگەن تاپسىرىستارىنىڭ سانىن، ءتۇرىن تاپتەشتەي ساناققا الىپ، تىزىمدىك جاساپ باسىپ شىعارىپ، ءبىر - بىرلەپ سالىستىرىپ تەكسەرەدى. ول تاعى ىرىقتى تۇردە ءار كۇنى يەلەگەن كوكونىس تۇرلەرى مەن باعاسىن ۋيچات توبىندا جاريالاپ تۇردى، وسىلايشا ول ءار كۇنى كەشكە دەيىن قاربالاس بولسادا، شارشاعانىن سەزبەيتىن.
بىرەۋگە گۇل ۇسىنساڭ، حوش ءيىسى قولىڭدا قالار دەگەن ءسوز بار. توحتىنىڭ مەيىرگە تولى قىزمەت وتەۋى بارىسىندا تۇرعىندار ءارقاشان تۇسىنىستىكپەن قاراپ، وعان العىس ايتتى. كوپتەگەن تۇرعىندار زات ساتىپ الۋدى ازايتتى، ول ۇيگە كەلىپ قوقسىق جيناعان كەزدە تۇرعىندار قوقسىق قالتاسىنىڭ اۋزىن مۇقياتتاپ بەكىتەتىن بولدى، ونىڭ ۇستىنە وعان قايتا - قايتا العىس ايتىپ، دەمالىسقا كوڭىل ءبولۋدى ەسكەرتتى.
تۇرعىندار العىس ايتقاندا، توحتى ولارعا: ”ىندەتتەن ساقتانۋ - تىزگىندەۋ ءار ادامنىڭ جاۋاپكەرشىلىگى، ونىڭ ۇستىنە مەن پارتيا مۇشەسىمىن، بۇل مەنىڭ ءتىپتى دە بۇلتارتپاس بورىشىم“، - دەپ جاۋاپ بەرەتىن.
