شينجياڭ گازەتىنىڭ 1 – ايدىڭ 17 – كۇنى ۇرىمجىدەن بەرگەن حابارى، انار بۇلت / شينجياڭ گازەتىنىڭ ٴتىلشىسى ياڭ شۋحان، ەرىكتى ٴتىلشى فىڭ جۇنلين حابارلايدى. 2020 – جىلدان بەرى، رايونىمىزداعى پروكۋراتۋرا ورگاندارى ازامات جاسىنا تولماعان زيانكەستىككە ۇشىراۋشىلارعا ”ٴبىر ورىندا“ دالەل – سىپات الۋ، كومەك بەرۋ مەحانيزمى قۇرىلىسىن بەلسەنە ىلگەرىلەتتى، قازىر ”ٴبىر ورىندا“ دەلو ىستەۋ ورنىنان 66ى قۇرىلىپ، ٴارقايسى ايماق، وبلىستا ”ٴبىر ورىندا“ دەلو ىستەۋ ورىندارى جاپپاي قامىتۋدى جۇزەگە اسىرىلدى.
تاياۋدا قۇلجا قالالىق حالىق پروكۋراتۋراسى ازامات جاسىنا تولماعاندارعا قاتىستى قىلمىس كۇماندىسىنىڭ ”مويىنداماسى جوق“ ٴبىر دەلوعا الىنالا ارالاستى. ازامات جاسىنا تولماعاندارعا ”ٴبىر ورىندا“ كومەك بەرۋ ورتالىعىندا ازامات جاسىنا تولماعان زيانكەستىككە ۇشىراۋشى پسيحيكالىق جۇكتەن ارىلىپ، دەلونىڭ ناقتى جاعدايىنا قايىتتى، پروكۋرور ازامات جاسىنا تولماعان زيانكەستىككە ۇشىراۋشىعا باستان – اياق پسيحولوگيالىق جاقتان ٴجون سىلتەپ، وعان زاڭنىڭ مەيىرى مەن قورعاۋىن سەزىندىردى.
ٴبىر ورىندا دەلودان جاۋاپ الۋ، پسيحولوگيالىق ٴجون سىلتەۋ، ٴادىليالىق كومەك بەرۋ، ساقتانۋ تاربيەسى سياقتى قىزمەتتەردى ٴبىر جولدا ورىنداپ، قايتا – قايتا، ۇيلەسىمسىز سۇراۋدىڭ ازامات جاسىنا تولماعان زيانكەستىككە ۇشىراۋشىلار مەن ولاردىڭ وتباسىنداعىلارعا اكەلەتىن زيانىنان ساقتانۋ؛ ولاردىڭ جەكە باسىندىق قۇپيالىعى مەن دەنساۋلىق اقاۋسىزدىعىنىڭ ەڭ زور قورعالۋىنا كەپىلدىك ەتۋ… مۇنىڭ بارلىعى ازامات جاسىنا تولماعان زيانكەستىككە ۇشىراۋشىلار دەلولارىن ”ٴبىر ورىندا“ ىستەۋ ورىندارىن قۇرۋدىڭ پايداسى.
2020 – جىلدىڭ باسىندا اۆتونوميالى رايوندىق حالىق پروكۋراتۋراسىنىڭ 9 – پروكۋراتۋرالىق ٴبولىمى 3 جىلدان بەرگى شينجياڭداعى ٴار دارەجەلى پروكۋراتۋرا ورگاندارى باسقارعان ازامات جاسىنا تولماعانداردىڭ قىلمىس دەلولارىنىڭ نەگىزگى جاعدايىنا، ەرەكشەلىگىنە جانە سەبەبىنە تالداۋ جاساپ، زەرتتەۋ جۇرگىزىپ، ٴار دارەجەلى پروكۋراتۋرا ورگاندارىن ازامات جاسىنا تولماعان زيانكەستىككە ۇشىراۋشىلاردىڭ دەلوسىن ”ٴبىر ورىندا“ ىستەۋ ورنىن قۇرۋدىڭ قاجەتتىلىگىن جەتە تانۋعا جەتەكتەپ، ازامات جاسىنا تولماعان زيانكەستىككە ۇشىراۋشىلارعا جان – جاقتىلى كومەك بەرۋ قىزمەتىن ىلگەرىلەتىپ، دەلو ىستەۋ ساپاسىن، ونىمدىلىگىن جوعارىلاتتى.
اۆتونوميالى رايوندىق حالىق پروكۋراتۋراسى اۆتونوميالى رايوندىق جوعارى دارەجەلى حالىق سوتى مەكەمەسى، اۆتونوميالى رايوندىق قوعام حاۋىپسىزدىگى مەڭگەرمەسى، اۆتونوميالى رايوندىق دەنساۋلىق ساقتاۋ، سالاماتتىق كوميتەتىمەن بىرلەسىپ «”ٴبىر ورىندا“ دەلو ىستەۋ مەحانيزمىن ورناتۋ جونىندەگى جۇمىس باعدارلاماسىنا» قول قويىپ، قىزمەت مەحانيزىمىنىڭ نىسانالىق ماقساتى، قولدانىلۋ وبيەكتىسى، قىزمەت ورنى سياقتى ىستەرگە بەلگىلەمە شىعاردى، زاڭدىق كومەك بەرۋ، پسيحولوگيالىق كومەك بەرۋ، ٴادىليالىق كومەك بەرۋ، قوعامدىق كومەك ٴبىر تۇلعالانعان ازامات جاسىنا تولماعان زيانكەستىككە ۇشىراۋشىلارعا جان – جاقتىلى كومەك بەرۋ مەحانيزمىن ورناتۋ جونىندە ىزدەنىس جاساپ، ازامات جاسىنا تولماعانداردىڭ زاڭدى ۇقىق – مۇددەسىن ەڭ جوعارى شەكتە قورعادى.
”ٴبىر ورىندا“ دەلو ىستەۋ ورىندارىنا سايكەستى دىبىس – كەسكىنگە الۋ، پسيحولوگيالىق ٴجون سىلتەۋ، پسيحولوگيالىق باعالاۋ، دەنساۋلىق تەكسەرۋ سياقتى قاتىستى قۇرىلعىلار ورناتىلعان. پروكۋراتۋرا ورگاندارى قوعام حاۋىپسىزدىگى ورگاندارىنىڭ بارلاۋ ساتىسىنداعى دەلولارىنا الىنالا ارالاسقاندا، دەلوعا قىلمىس تۇراقتاندىرىپ، جازا ولشەۋگە ىقپال جاسايتىن فاكتتەردى زيانكەستىككە ۇشىراۋشىدان ٴبىر جولدا انىق سۇراپ، زيانكەستىككە ۇشىراۋشىدان الۋعا ٴتيىستى زاتتىق دالەلدەردى ٴبىر جولدا الادى؛ دەلونى قولعا الۋعا جولداعاننان، ايىپتاۋعا تاپسىرعاننان كەيىن، پروكۋراتۋرا ورگانى زيانكەستىككە ۇشىراۋشى جانە ونىڭ زاڭدى جوقشىسىنا تەك ۇقىق – بورىشتى عانا ۇقتىرادى، ەندىگارى جاۋاپ المايدى. سونىمەن بىرگە، ٴارقايسى نەگىزگى ساتى پروكۋراتۋرا ورگاندارى قىزمەت تەبىنىن ۇزدىكسىز ارتتىرىپ، اۋدان دارەجەلى ”ٴبىر ورىندا “دەلو ىستەۋ ورنىن قۇرۋ قىزمەتىن جەدەل ىلگەرىلەتتى.
قازىر سانجى حۇيزۋ اۆتونوميالى وبلىسىنداعى 7 اۋدان، قالاداعى حالىق پروكۋراتۋرالارى، تەكەس اۋداندىق حالىق پروكۋراتۋراسى، ٴدوربىلجىن اۋداندىق حالىق پروكۋراتۋراسى قاتارلىلار ”ٴبىر ورىندا “ دەلو ىستەۋ ورنىن قۇردى. پوسكام اۋداندىق حالىق پروكۋراتۋراسى، يىڭسار اۋداندىق حالىق پروكۋراتۋراسى، قاعىلىق اۋداندىق حالىق پروكۋراتۋراسى، ٴپايزاۋات اۋداندىق حالىق پروكۋراتۋراسى قاتارلى 7 ”ٴبىر ورىندا“ دەلو ىستەۋ ورنى ىسكە قوسىلدى.
اۋدارعان: قادىر ماقان
